Kasa eekai anain suulia kasa eekai mojuin: Pansaasü tü sümakat tü Bibliakat

Nnojoleerü anain wakuwaʼipa waneepia woʼunule süchiirua tü anakat neʼe saaʼin wamüin jee shiale tü anakat namüin na waneinnua. Süküjain tü Bibliakat nnojoluin anain waaʼinrüle tia otta müsia süküjain kasain anain jee kasain mojuin. Waaʼinrüle tü sümakat aneerü wakuwaʼipa.

NIA ANAKA MALEIWA SÜPÜLA OʼUNIRÜIN WAKUWAʼIPA

Süküjain tü Bibliakat choʼujaain wamüin Jehováa süpüla nuʼunirüin wakuwaʼipa otta nnojoishii nukumajüin waya süpüla woʼunuinjanain süchiirua tü anakat neʼe saaʼin wamüin (Jeremías 10:23). Nüshajirüinjeseʼe suluʼu tü Bibliakat kasain anain jee kasain mojuin. Aishii nüpüla na wayuukana otta nnojoishii niʼreein müliain naya sünainjee tü naneekakat (Deuteronomio 5:29; 1 Juan 4:8). Nia neʼe Jehová anakai süpüla aküjain wamüin kasain anain jee kasain mojuin, jama niain chi Kakumalakai waya jee niain chi Kekiikai maʼin (Salmo 100:3; 104:24). Nnojotpejeʼe nüpüleeruain saaʼin wayuu süpüla saaʼinrüin tü nuluwataakalü anain.

Naapüin Jehová nümüin Adán otta sümüin Eva tü kasa choʼujaakat süpüla talatüinjanain naya (Génesis 1:28, 29; 2:8, 15). Nuchuntuin namüin waneirua kasa nnojotka kapüleein süpüla naaʼinrüin, nnojotsü nüpüleeruaain naaʼin süpüla naaʼinrüin tia (Génesis 2:9, 16, 17). Niyoutapejeʼe achiki Adán sümaa Eva naaʼinrüin tü nuluwataakalü anain Maleiwa, shia noʼunaka achiirua tü anakat neʼe saaʼin namüin (Génesis 3:6). ¿Kasa eeka sünainjee tia? ¿Talatüsüche saaʼin wayuu sutuma suʼunuin süchiirua tü anakat neʼe saaʼin sümüin? Nnojo. Sünainjee tü alatakat sümaiwa jee tü alatakat maaʼulu atüjaana aaʼulu shiʼrüin sümüliala wayuu jee nnojoluin talatüin saaʼin sünainjee nnojoluin saaʼinrüin tü nuluwataakalü anain Maleiwa (Eclesiastés 8:9).

Sükajee tü Bibliakat wayaawata aaʼulu tü waaʼinrajatkat süpüla anain tü kasa waneekakat jaʼitainna jalejeʼewaliin waya otta jaʼitairü naatain wakuwaʼipa (2 Timoteo 3:16, 17; paashajeʼera tü pütchikat «Wanee karaloʼuta jalouika sümüin wayuu maʼleekalia»). Waashajaa süchiki jamüin jalouika wamüin tü sümakat tü Bibliakat.

Pütüjeere sooʼomüin jamüin «nünüiki Maleiwa» sümünaka amüin tü Bibliakat, pünaja suluʼujee jw.org tü videokot ¿Jara kashajiralaka tü Bibliakat? (1 Tesalónica 2:13).

WANEE KARALOʼUTA JALOUIKA SÜMÜIN WAYUU MAʼLEEKALIA

Süka kekiin maʼin chi Maleiwakai jee aipüralin nia eesü tü Bibliakat nutuma süpüla sümaʼanainjatüin wayuu süpüshuaʼa. Anuu waneirua kasa aainjünaka süpüla eeinjatüin tü Bibliakat:

Alatüsü suulia 3.500 tü anüikii ashajünakalü aluʼu tü Bibliakat jee süpüshire neʼe. Nnojotsü eein wanee karaloʼuta ashajünaka suluʼu wainma anüikii maʼaka saaʼin tü Bibliakat.
Alatüsü suulia 5.000 miyoone tü Biblia eʼinpürimiijünakat, nnojotsü eein wanee karaloʼuta eʼinpürimiijünaka maʼin maʼaka saaʼin tü Bibliakat.

Nnojotsü süküjain tü Bibliakat kojutuleʼeinña waneinnua wayuu suulia wane, müsüjeseʼe süpülajatüin wayuu süpüshuaʼa tü Bibliakat.

Paashajeʼera tü Bibliakat suluʼu internet (eesü shia suluʼu 250 anüikii) püchajaa suluʼu tü paajinakat jw.org.

EESHII EEKAI NAMÜIN NNOJOLUIN JALOULIN TÜ SÜMAKAT TÜ BIBLIAKAT

Anuu tü namakat waneinnua wayuu süchiki jamüin nnojotka jaloulin tü Bibliakat:

Eeshii eekai namüin: «Nnojotsü wanaawain tü pütchi ashajünakat suluʼu tü karaloʼuta eekat suluʼu tü Bibliakat».

Pansaasü tü sümakat: Waashajeʼerüle tü Bibliakat eesüjaʼa nnojorüle pansaain wamüin wanee pütchi ashajünaka suluʼu. Shiasaʼa wekirajaapa sünain kasoʼulajatüin ashajünüin wanee karaloʼuta eeka suluʼu jee kasain saashajaain achiki, wayaawateerü aaʼu pansaain tü sümakat.

Pütüjeere sooʼomüin süchiki tia, paashajeʼera suluʼu jw.org tü pütchikat «¿Se contradice la Biblia?» (alijunaikiruʼusü).

Eeshii eekai namüin: «Piama akuwaʼipachii na wayuu ekirajakana sünain tü Bibliakat, müsüjeseʼe nnojoluin jaloulin tü Bibliakat sümüin wayuu».

Pansaasü tü sümakat: Nnojotsü anain jülüjale waaʼin mojuin tü sümakat tü Bibliakat sünainjee nnojoluin saaʼinrüin wayuu tü sümakat. Süküjatüjülia tü Bibliakat nnojoleerüin saaʼinrüin wayuu maaʼulu tü sümakat, jaʼitashii shikiipüʼüle naya wanee iküleesia. Süküjatüjülia tü Bibliakat nnojoleerüin anain sünüiki wayuu süchiki tü pütchi suluʼukat (2 Pedro 2:1, 2).

Pütüjeere sooʼomüin süchiki tia, paashajeʼera suluʼu jw.org tü pütchikat «La religión, ¿un gran negocio?» (alijunaikiruʼusü).

Eeshii eekai namüin: «Na wayuu ekirajaakana sünain tü Bibliakat mojutusalii namüin na wayuu nnojoliikana wanaawain akuwaʼipa namaa».

Pansaasü tü sümakat: Süküjain tü Bibliakat kojutuinjatüin wamüin wayuu. Mojusü saashin tü Bibliakat...

... sülanaʼaleere wakuwaʼipa noulia na waneinnua (Filipos 2:13).
... mojutule watuma na wayuu nnojoliikana wanaawain akuwaʼipa wamaa jee na naatakana anoula (1 Pedro 2:17).
... wapüleeruale naaʼin na waneinnua shiiʼiree wanaawain naaʼin wamaa (Mateo 10:14).

Süküjain tü Bibliakat kamaneein Maleiwa sümüin wayuu otta naaʼinrüin kasa anasü süpüleerua, nücheka achikit müinjatüin wakuwaʼipa maʼaka naaʼin niakai (Roma 9:14).

Pütüjeere sooʼomüin süchiki tia, paashajeʼera suluʼu jw.org tü pütchikat «¿Süküjainche tü Bibliakat tü waaʼinrajatkat süpüla wayaawatüin saaʼu nakuwaʼipa na waneinnua?».

SÜKÜJAIN TÜ BIBLIAKAT TÜ NÜCHEKAKAT MALEIWA WAPÜLEERUA

Ashajünüsü suluʼu tü Bibliakat süchiki tü nukuwaʼipakat Jehová namaa na wayuukana. Sükajee tü Bibliakat wayaawata aaʼu kasain anain nümüin Maleiwa, kasain mojuin, kasain aneerüin atuma wakuwaʼipa otta kasain mojeerüin atuma wakuwaʼipa (Salmo 19:7, 11). Tü pütchi suluʼukat tü Bibliakat jalouisü sümüin wayuu maaʼulu maʼaka jaloulin shia sümüin wayuu sümaiwa. Jülüjale waaʼin tü sümakat aneerü tü kasa waneekakat.

Anuu wanee pütchi jalouika wamüin suluʼuka tü Bibliakat: «Kekiijeechi maʼin wanee wayuu naʼaleewajaale nümaa chi wayuu kekiikai maʼin. Mojeerü nukuwaʼipa wanee wayuu naʼaleewajaale nümaa chi wayuu eekai mojulaain» (Proverbios 13:20). Jalouisü wamüin tia pütchikat maaʼulu maʼaka jaloulin shia sümüin wayuu sümaiwa. Wainma pütchi anasü jalouika wamüin suluʼuka tü Bibliakat (paashajeʼera tü pütchikat «Ayatayülia jaloulin sümüin wayuu tü pütchi suluʼukat tü Bibliakat»).

«¿Jamüsü süpüla tayaawatüin saaʼu aneerüin sukuwaʼipa wayuu sutuma saaʼinrüin tü sümakat tü Bibliakat?», eeshiijaʼa wamüle. Waashajaajeerü süchiki tia sünain tü wane pütchikat.

a Jehová nünülia Maleiwa (Salmo 83:18).

AYATAYÜLIA JALOULIN SÜMÜIN WAYUU TÜ PÜTCHI SULUʼUKAT TÜ BIBLIAKAT

Eetaairü maʼaka 2.000 juya alatüitpakat süchikijee kettaain süshajünüin tü Bibliakat. Ayatayütpejeʼe jaloulin shia sümüin wayuu maaʼulu. Ayatayülia kachiiruain naaʼin na wayuukana anainjatüin nakuwaʼipa jee talatüinjanain naya (Eclesiastés 1:9). Jalouipejeʼe wamüin tü sümakat tü Bibliakat süpüla wountuin tia.

Süpüla lotuin wakuwaʼipa

«Shia wachekaka achiki lotuinjatüin sukuwaʼipa süpüshuaʼa tü kasa waainjakat» (Hebreokana 13:18).
«Chi wayuu eekai aʼluwajüin, anashi nuuʼulaale suulia aʼluwajaa. Anashi niʼyataale maʼin sümaa anainjatüin sukuwaʼipa tü niʼyataainkat nutuma» (Éfeso 4:28).

Süpüla anain wakuwaʼipa namaa na waneinnua

«Ayataʼaya jaainjain tü aneetkalü atuma nakuwaʼipa na waneinnua. Nnojotsü shiainjatüin neʼe jaainjain tü aneetkalü atuma jukuwaʼipa» (1 Corinto 10:24).
«Ayataʼaya jülatirüin sooʼopünaa jaaʼin naainjala na waneinnua jee motomaata jaaʼin tü kasa mojusü aainjünakat jümüin» (Colosas 3:13).

Süpüla anain tü kasa waneekakat

«Chi wayuu nnojoikai kasain nütüjaain aaʼu, nunoujain süpüshuaʼa tü münakat nümüin. Akaisaʼa chi wayuu eekai kekiin maʼin, jülüjasü naaʼin tü naaʼinrajatkat» (Proverbios 14:15).
«Chi wayuu kekiikai maʼin oʼunushi suulia tü kasa mojusükat, akaisaʼa chi malakai aaʼin, oʼunushi sünainmüin jee sülataka kasa mojusü nümüin» (Proverbios 22:3).