¿Jaleerü puusütüin anain tü anainjatkalü atuma pukuwaʼipa watta kaʼi?

Wainma wayuu achajaakana anainjatüin nakuwaʼipa watta kaʼi sükajee nooʼulakirüin outsü, koleejiain naya, kanneetsein otta kamaneein naya. Waaʼinrüle tia müsü aka saaʼin woʼunule suluʼumüin wanee mma nnojotka weʼraajüin sümaa wamaʼanain wanee mapa nnojotka pansaain. ¿Eesüche wanee kasa akaalinjeenaka waya süpüla anainjatüin wakuwaʼipa watta kaʼi?

TÜ ANAKAT SÜPÜLA OʼUNIRÜIN WAKUWAʼIPA

Waneekajatpa wanee kasa achunteeshii waya kaalinwaa nümüin chi eekai kekiin maʼin woulia. Anasüjeseʼe wooʼulaale nuʼunirüin wakuwaʼipa chi kekiikai maʼin süpüla anainjatüin wakuwaʼipa watta kaʼi. Tü pütchi nüküjakat wamüin suluʼusü shia tü Bibliakat. Eetaairü maʼaka 3.500 juya alatüitpaka süchikijee süshajünüin.

¿Jamüsü weʼitaainjatka waaʼin sünain tü Bibliakat? Shia süka kekiin maʼin chi kashajiralakai shia, nia «chi Laülaa Eetüjüikaʼaya nümaiwa», eetüjüiya nia ooʼulaka eejeechi nia süpüla kaʼikat süpüshuaʼa (Daniel 7:9; Salmo 90:2). Nia «chi Kakumalakai tü sirumatuʼukat, chi Maleiwa shiimainshikai, chi Kakumalakai tü mmakat» (Isaías 45:18). Nüküjain Jeʼwaain nünülia (Salmo 83:18).

Süka niain kashajiralain tü Bibliakat chi Kakumalakai wayuu, nnojotsü nüküjain eein wanee eʼiruku alanaʼaleeka suulia tü waneirua. Anasü sukuwaʼipa wayuu eekai saaʼinrüin tü sümakat tü Bibliakat jaʼitainna jalejeʼewaliin naya. Nnojotsü eein wanee karaloʼuta eekai süshajünüin suluʼu wainma anüikii maʼaka saaʼin tü Bibliakat jee eesü shia suluʼu mmakat süpüshuaʼa.a Müsüjeseʼe eein süpüla shiyaawatüin saaʼu wayuu tü sümakat tü Bibliakat otta suʼunirüin nakuwaʼipa. Anuu sünüiki tü Bibliakat:

«Shiimain nnojolüin koʼuin nükuaippa Maleiwakai sümüin wayuu. Wayuu eekai eein suluʼu mmakat süpüshua, kojutkat atüma Maleiwakai otta aaʼinrakat tü anasükat, nnojoleerü nüjütaain amaa shia» (ALUWATAAUSHIKANA [HECHOS] 10:34, 35).

Müshi Jeʼwaa maʼaka naaʼin wanee wayuu aika apüla nüchonnii süka nuʼunirüin wakuwaʼipa sükajee tü Bibliakat (2 Timoteo 3:16). Eesü süpüla piʼitaain paaʼin sünain tü Nünüikikat Maleiwa. Nia Maleiwa kakumalaka waya otta chi atüjaakai saaʼu tü anainjatkalü atuma wakuwaʼipa.

SHIIMAIN TÜ SÜMAKAT

Eesü süpüla weʼitaain waaʼin sünain tü Bibliakat süka shiain aneerüin atuma wakuwaʼipa. Eetaairü maʼaka 2.000 juya alatüitpaka süchikijee süküjünüin suluʼu tü alatüinjatkat otta tü sukuwaʼipainjatkat wayuu maaʼulu.

TÜ ALATÜINJATKAT

«Atkaajiraajeerü wayuu sainküin mmakat süpüshua. Mülieerü maʼi saaʼin wayuu sütüma jamü je sütüma ayuulii sainküin mma. Je akutkujaweerü tü mmakat sainküin mma» (LUCAS 21:10, 11).

NAKUWAʼIPA NA WAYUUKANA

«Anakaja piyaawatüle saaʼu jamüinjatüin tü kaʼikat mapeena sülüʼütpa sükalia sajaʼttüinjatüin tü kasakat süpüshua. Shiimüin sünain müliainjatüin maʼi wayuu süpüshua soʼu kaʼikat tia. Eejeerü wainma wayuu eekai kapülain naaʼin nakuaippa neʼe namüiwa, eekai kachiiruain naaʼin tü washirüükat, eekai naʼwaataain suluʼu nakuaippa, eekai neʼrüin wayumüin sümüin wayuu, eekai moonooloin sümaa nanüiki nashi je nei, eekai matüjain aapaa analuʼut, je eekai mojutüin Maleiwa natüma. Eejeerü wainma wayuu eekai maalin wayuu napüla, eekai mamülialain amüin wayuu, eekai mojuin nanüiki sujuuna wayuu, eekai maaʼin naaʼin sümaa jashiee, je eekai nayouktüin tü anasükat. Eejeerü wainma wayuu eekai naaʼinreein kasa mojusü, eekai nayouktüin aluwataanaa, eekai yaletayaain nakuaippa suʼupala wayuu, je eekai shaitteein waneepia saaʼu maalin Maleiwa napüla» (2 TIMOTEO 3:1-4).

¿Kasa jülüjaka paaʼin piʼrapa shikeraajüin tü süküjatüjütkalia tü Bibliakat? Eesüjaʼa süpüla müin pünüiki maʼaka naaʼin Leung, kepiakai chaa Hong Kong, anuu nünüiki: «Kakaliairü ashajünüin süchiki tü alatajatkat suluʼu tü Bibliakat, nnojotsü sünüikin shia wayuu, nümaʼanajeejatü shia Maleiwa chi kekiikai maʼin woulia».

Wainma pütchi sümaka tü Bibliakat ekeraajaka.b Wayaawatüinjeseʼe saaʼu nünüikin Maleiwa tü Bibliakat. Anuu nünüiki Jeʼwaa: «Taya neʼe Maleiwakai tayakai, nnojoishi eein wanee eekai müin aka taaʼin. Taya aküjatüjüikai jamüinjatüin sukuwaʼipa sajaʼttia wanee kasa» (Isaías 46:9, 10). Müsüjeseʼe eein süpüla weʼitaain waaʼin sünain tü sümakat tü Bibliakat süchiki tü alatüinjatkat mapeena.

SÜKAALINJEENA WAYA MAAʼULU OTTA MAPEENA

Paaʼinrüle tü sümakat tü Bibliakat aneerü pukuwaʼipa. Jülüjataa paaʼin waneirua pütchi.

NNEERÜ OTTA AʼYATAWAA

«Shia anaka neemeraale wanee wayuu süka nnojoleerüin kasain niʼrüin sünainjee niʼyataain maʼin, meechi nuwataakai aaʼin süchiirua joutai» (ECLESIASTÉS 4:6).

WAKUWAʼIPAINJATKA SÜMAA WAPÜSHI

«Jia tooloyuukana waneʼewaʼire jukua, anakaja müleka aire jüpüla juʼwayuuse maa aka alin jia jüpülajiraa. Akaʼaya jiakana jieyuukana, anakaja müleka kojutule jütüma juʼwayuuse» (ÉFESO 5:33).

WAKUWAʼIPAINJATKA NAMAA NA WANEINNUA

«Puuʼulaa suulia jashiee. Nnojo paashichijaain suulia paaʼinrüin kasa mojusü» (SALMO 37:8).

Paaʼinrüle tü sümakat tü Bibliakat aneerü pukuwaʼipa maaʼulu, wainmeerü kasa anasü piʼraka mapeena. Süküjain tü Bibliakat tü kasa anasü eejeetkat nutuma Maleiwa mapeena.

EEJEERÜ ANAJIRAWAA OTTA JIMATAA AAʼIN

«Shiimain talateenain naya süka aneerüin nakuwaʼipa» (SALMO 37:11).

KEPIEERÜ WAYUU OTTA JOULEERÜ EKÜÜLÜ

«Shiimain nakumajeenain piichi süpüla kepiainjanain naya suluʼu; shiimain napünajeenain süpüla neküinjatüin süchon naʼttia» (ISAÍAS 65:21).

MÜIRIA NNOJOLUIN AYUULII JEE OUTAA

«Müiria nnojolüin ouktaa, mojuu aaʼin, aʼyalajaa, je saalii ayuulii» (ALATEETKAT MAPEENA [Apocalipsis] 21:4).

¿Kasa paaʼinrajatka süpüla piʼrüin tia kasa anasü eejeetkat mapeena? Paashajeʼera shia suluʼu tü wane pütchikat.

a Pütüjeere sooʼomüin süchiki jamakuwaʼipalüin süpüla süshajünüin tü Bibliakat suluʼu wainma anüikii, pünaʼla suluʼu www.jw.org eere sümüin SHIKIRAJAKA ANAIN TÜ BIBLIAKAT > TÜ BIBLIAKAT OTTA TÜ KASA ALATÜIRÜKAT.

b Pütüjeere sooʼomüin, paashajeʼera tü karaloʼutakat La Biblia ¿la Palabra de Dios, o palabra del hombre?, kapiitulo 9 (alijunaikiruʼusü). Nakumajala na aküjaliikana pütchi nüchiki Jeʼwaa. Pünaʼla alijunaikiruʼu suluʼu www.jw.org eere sümüin BIBLIOTECA > OTRAS PUBLICACIONES.