Wekirajaapa sünain tü Wiwüliakat wamüiwaʼa, anaʼleeinjatü watuma

¿JAMÜSÜ CHOʼUJAAKA? Wekirajaale sünain tü Wiwüliakat wamüiwaʼa, sükaalinjeena waya süpüla wayaawatüin saaʼu jamüin maʼin sukuwaʼipa tü shiimainkat (Éf 3:18, TNM). Otta müsia sükaalinjeena waya süpüla lotuin wakuwaʼipa jee nnojoluin waaʼinrüin tü naaʼinrakat na manoujainsaliikana. Otta achecheraajeena waya sünain «tü nünüikikat chi Maleiwakai katakat atüma oʼuu» (Flp 2:15, 16). Wekirajaapa wamüiwaʼa sünain tü Wiwüliakat eesü süpüla waneeküin tü pütchi choʼujaakat wamüin. ¿Jamüinjatü sukuwaʼipa watuma süpüla wajayatüin tü kaʼi waashajeʼeraka oʼu tü Wiwüliakat jee wekirajaain sünain?

ANUU SUKUWAʼIPAINJATKA

• Pejeetta wanee wetsiikulo anaka pümüin otta püshaja pütchi suluʼu tü Wiwülia pikirajaakalü aka, jaʼitairü suluʼuin serulaat jee tableta.

• Paashajeʼerapa, püsakiijiraa pümüiwaʼa sünain tüü: «jarai nia», «kasa alataka», «jala yaa», «joujatü shia», «jamüsü sukuwaʼipa» otta «jamüsü maka tia».

• Püchajaa tü pikirajaweekalü anain jee shiale wanee wetsiikulo suluʼu tü paajina nukumajakat chi achepchieekai.

• Püsakira paaʼin sünain tü paashajeʼerakat süpüla piyaawatüin saaʼu tü paaʼinrüinjatkat jee tü pütchi akaalinjeechikai pia.

• Piʼitaa suluʼu pukuwaʼipa tü sümakat tü pütchi pikirajaakalü anain (Lu 6:47, 48).

SÜCHIKIJEE JÜNAJÜIN TÜ VIDEOKOT ACHECHERAAJEENA WAYA SÜNAIN SÜNÜIKI TÜ WIWÜLIAKAT WEKIRAJAALE WAMÜIWAʼA SÜNAIN, JUSOUTA SHIʼIPAJEE TÜÜ:

• ¿Jamüsü nanüiki waneinnua wawalayuu süchiki nekirajaain namüiwaʼa sünain tü Wiwüliakat?

• ¿Jamüshii woʼuraajüinjanaka süpülapünaa wekirajaain?

• ¿Kasa akaalinjeenaka waya süpüla wayaawatüin saaʼu tü sümakat wanee wetsiikulo?

• ¿Kasa eeka süpüla weʼitaain sünain tü Wiwülia wekirajaakalü aka?

• ¿Jamüsü choʼujaaka maʼin wasakirüin waaʼin soʼunnaa wekirajaain sünain tü Wiwüliakat?

• ¿Kasa waaʼinrajatka süka tü wekirajaakalü anain?