¿Oʼuneeshi pia sünain tü Ekirajawaa napülajatkat na Aküjaliikana Pütchi?

Müleka 23 puuyase jee 65 shia otta piʼyataale waneepia nümüin Jeʼwaa, nnojoire ayuulin pia jee pukolojoweere eere choʼujaain aküjalii pütchi, eesüjaʼa süpüla pipirajüin tü karaloʼuta süpülajatkat tia ekirajawaakat. Soʼu suʼttüin tia, watta naalii na kasaatshiikana, na wawalayuu jieyuukana otta na tooloyuu maʼwayuusekana, epirajaka wanee karaloʼuta süpüla noʼunuin sünain tia ekirajawaakat. Nayapejeʼe choʼujaʼaleein na tooloyuu maʼwayuusekana süpüla noʼunuin sünain tia. Puchunta nümüin Jeʼwaa süpüla piʼyataainjachin sooʼomüin nümüin otta süpüla püshatüin nukuwaʼipa chi Nüchonkai (Sl 40:8; Mt 20:28; Heb 10:7). Süchikijee tia, jülüja paaʼin nnojoluinjatüin wainmain tü piʼyataainkat jee shiale waneirua kasa paaʼinrapuʼukat. Choʼujaasü paainjain tia süpüla puʼunuin sünain tia ekirajawaakat.

¿Kasa anasü neʼraka na oʼunakana sünain ekirajawaakat tia? Eeshii na aluwataanakana eere saashajaanüin wanee anüikii naatajatü, eeshii na aluwataanakana sünain aküjaa pütchi eere wainmain wayuu. Eeshi eekai nuluwataanüin süpüla niʼyataain niʼipajee chi wawala alapalaaikai jee nuluwataanüle süpüla nülapalaainjachin naaʼu na wawalayuukana jee misioneerole nia. Sümaʼinruʼu püsakireʼerüin paaʼin kasain paaʼinrajatüin süpüla piʼyataain sooʼomüin nümüin Jeʼwaa, meesü pünüiki maʼaka naaʼin Isaías: «¡Anii taya! Taya puluwataa» (Is 6:8).

SÜCHIKIJEE JÜNAJÜIN TÜ VIDEOKOT NA MISIONEERO AKÜJAKANA PÜTCHI: AʼYATAASHII NAYA SÜNAIN EKIRAJAA WAYUU, JUSOUTA SHIʼIPAJEE TÜÜ:

• 

  ¿Jamüsü sukuwaʼipa naneekia na misioneerokana?

• 

  ¿Kasa naainjaka na misioneerokana anaka aaʼujee naʼyataain?

• 

  ¿Kasa anasü neʼraka sünainjee müin nakuwaʼipa?