Paaʼinrajatka süpüla anain pukuwaʼipa püchikuaʼa nümaa Jeʼwaa

WAINMA wayuu aleʼejakana nachikuaʼa suluʼumüin nupueulose Jeʼwaa juyawai. Talatakajasaʼa maʼin naaʼin na aapiee chakana iipünaa sutuma tia (Luc. 15:7, 10). Pialeje wanee wayuu aleʼejakai nüchikuaʼa nünainmüin Jeʼwaa, soto paaʼin talatüin naaʼin Jesuu, na aapieekana otta müshia Jeʼwaa sutuma tü paaʼinrakat. Sümaʼinruʼu anain pukuwaʼipa püchikuaʼa nümaa Jeʼwaa, eesüjaʼa eere waneirua kasa kapüleejeetka pümüin. ¿Jarat tü kasa kapüleejeetkat pümüin? ¿Kasa paaʼinrajatka süpüla pülatüin süchikumüin tia?

WANEIRUA KASA KAPÜLEEKA PÜMÜIN

Wainma wawalayuu aleʼejakana nachikuaʼa suluʼumüin nupueulose Jeʼwaa mojuwaikana aaʼin. Müle pukuwaʼipa mayaa, eesüjaʼa piyaawatüle saaʼu jamüin naaʼin chi aluwataaikai David. Anuu nünüiki motopa naaʼin Jeʼwaa naainjala: «Müshi jalapaʼakai taaʼin [...] sutuma wainmain tü kasa mojukat tatuma» (Sal. 40:12; 65:3). Eeshijaʼa japüire jee mojule naaʼin soʼu kojuya juya wanee wayuu aleʼejakai nüchikuaʼa nünainmüin Jeʼwaa. Anuu sünüiki Isabelle,a wanee wawala ojuʼitinnaka naʼakajee na wawalayuukana jee aleʼejaka süchikuaʼa soʼu 20 juya mapa: «Jülüjapuʼusü taaʼin nnojoluin eein süpüla motuin naaʼin Jeʼwaa taainjala». Mojuwaire paaʼin eesüjaʼa sümalajaale süchikuaʼa punoula nünain Jeʼwaa (Prov. 24:10). Jalia majayaai pukuwaʼipa.

Eeshii na shapaakana aaʼin sutuma wainmain tü kasa naaʼinrajatkat süpüla anain nakuwaʼipa nachikuaʼa nümaa Jeʼwaa. Anuu nünüiki Antoine, wanee wawala aleʼejakai nüchikuaʼa nünainmüin Jeʼwaa: «Motusü taaʼin tü tekirajaapuʼukat anain otta tü taaʼinrapuʼukat süpülapünaa tooʼulaain suulia Taküjalin pütchi». Eeshii na nnojoliikana naaʼinmaain maʼin tü sünainpünaakat nanoula sutuma shapaain naaʼin.

Jülüjataa waaʼin tüü: sumojujaale nipia wanee wayuu sutuma wanee wawai, eesüjaʼa shapaale maʼin naaʼin sutuma wainmainjatüin kasa naaʼinraka süpüla nukumajüin shia süchikuaʼa. Tia müsü aka saaʼin tü pukuwaʼipakat nümaa Jeʼwaa, tü amojujaakat sutuma tü kasa mojusü paaʼinrapuʼukat. Eesüjaʼa jülüjale paaʼin wainmain tü kasa paaʼinrajatkat süpüla anainjatüin shia süchikuaʼa. Soto paaʼin nnojolin pia pümüiwaʼain.

Anuu nünüiki Jeʼwaa wamüin: «Jalainna waloʼireʼerai tü alatakat wamüin» (Is. 1:18). Püchajaaitpa sukuwaʼipa süpüla anain pukuwaʼipa püchikuaʼa nümaa Jeʼwaa jee aishi pia nüpüla sünainjee tia. Nnojo motuin paaʼin, sutuma tü paaʼinrakat atüjaaneerü aaʼu alaain Satanaa (Prov. 27:11).

Sutuma tü paaʼinrakat, arütkaashi pia nünainmüin Jeʼwaa otta müshia niakai, arütkaajeechi pünainmüinya (Sant. 4:8). Anasia müin neʼrüin na wawalayuukana tü paaʼinrakat süpüla naʼakain pia nachikuaʼa. Ayatüinjatpejeʼe pukumajüin sukuwaʼipa süpüla pükooʼomüinrüin tü naalinkat Jeʼwaa püpüla. Nia chi Püshikaiya jee Paʼaleewain nia. ¿Kasa paaʼinrajatka süpüla puuntuin tia?

PIʼYATAA SÜCHIIRUA TÜ EEKAT SÜPÜLA PUUNTUIN

Anasü piʼyataale süchiirua tü kasa eekat süpüla puuntuin. Eesü sotule paaʼin tü kasa mapüleesat pikirajaapuʼukat suluʼujee tü Bibliakat, maʼaka saaʼin süchiki nukuwaʼipa Jeʼwaa jee süchiki paʼaraiisüinjatüin tü Mmakat. Kiʼrainjachipejeʼe pia sünain aaʼinraa waneirua kasa katchinjeetka atuma punoula maʼaka saaʼin püküjain pütchi, puʼunuin sünain tü outkajawaakat jee namaain pia na wawalayuukana. Wekirajaa sünain waneirua kasa eeka süpüla piʼyataain achiirua.

Paashajaa waneepia nümaa Jeʼwaa. Niyaawata aaʼu eein süpüla isain püchiki tü pünüikinjatkat nümüin saaʼujee mojuin paaʼin sutuma tü paaʼinrapuʼukat (Roma 8:26, 27). Ayatüinjachipejeʼe pia oʼuraajüin nümüin jee püküja nümüin aleeweein pia nümaa (Roma 12:12). Anuu nünüiki Andrej: «Japüipuʼushi maʼin taya jee mojupuʼusü maʼin taaʼin, shiasaʼa toʼuraajapa, anasü taaʼin sutuma». Nnojorüle pütüjaain saaʼu tü pünüikinjatkat puʼuraajapa, anasü jülüjale paaʼin tü nuchuntapuʼukat chi aluwataaikai David niyaawajaapa suulia naainjala, ashajünüsü tia suluʼu Salmo 51 otta 65.

Pikirajaa sünain tü Bibliakat soʼukaiwai. Paaʼinrüle tia, katchinjeerü punoula otta aijeechi maʼin Jeʼwaa püpüla (Sal. 19:7-11). Anuu nünüiki Felipe: «Sutuma nnojolin tekirajaʼawalin sünain tü Bibliakat sümaa nnojoluin taashajeʼerawalin shia, amalajaasü tanoula jee kaainjalashi taya. Sutuma nnojoluin keeʼireein taaʼin meein takuwaʼipa tachikuaʼa, shia taaʼinmaaka maʼin tekirajaain sünain tü Bibliakat». Akaʼaya piakai, anasü paaʼinrüle tia. Nnojorüle pütüjaain saaʼu jaralüin tü pütchi anakat süpüla pikirajaain anain, puchunta kaalinwaa nümüin wanee paʼaleewain laülaakai aaʼin sünain anoujaa.

Paʼaleewajaa püchikuaʼa namaa na wawalayuukana. Noʼutku na aleʼejakana nachikuaʼa naʼakamüin na wawalayuukana, shapaasü naaʼin saaʼujee nnojoluin anain nakuwaʼipa noʼuluʼu na waneinnua naashin. Anuu sünüiki Larissa: «Japüipuʼusü maʼin taya, müsü kaainjalakai taya namüin napüshuaʼa na wawalayuukana, kakaliasü jülüjakuʼu müin taaʼin tia». Nakaalinjeein pia na laülaashiikana otta na wawalayuu laülaakana aaʼin sünain anoujaa süpüla anain pukuwaʼipa püchikuaʼa nümaa Jeʼwaa (paashajeʼera tü pütchikat «Tü naaʼinrüinjatkat na laülaashiikana»). Talatüshii naya süka naʼakain pia nachikuaʼa otta keeʼireesü naaʼin talatüin paaʼin (Prov. 17:17).

¿Kasa paaʼinrajatka süpüla aleewain maʼin pia namaa na wawalayuukana? Oʼunuinjachi pia waneepia sünain tü outkajawaakat jee aküjainjachi pia pütchi namaa. ¿Kasa piʼreetka sünainjee tia? Anuu nünüiki Félix: «Tayaawata aaʼu alin taya napüla na wawalayuukana, müsü naʼatapajakai taaʼin süpüla taleʼejüin tachikuaʼa naʼakamüin. Nakaalinjain taya napüshuaʼa süpüla anain taaʼin namaa jee süpüla tayaawatüin saaʼu motuin naaʼin Jeʼwaa taainjala otta eein süpüla taʼyataain nümüin» (paashajeʼera tü pütchikat «Tü paaʼinrüinjatkat»).

NNOJO PÜMALAJAAIN AAʼIN

Sümaʼinruʼu punouteʼerüin pukuwaʼipa nümaa Jeʼwaa, ayateerü müin nüjüteetkai saaʼin Satanaa pünainmüin wanee wawai süpüla nümalajeʼerüin paaʼin (Luc. 4:13). Süpüla nnojoluin nümalajeʼerüin paaʼin Satanaa, peje pia nünain Jeʼwaa.

Anuu nünüiki Jeʼwaa namüin na makana aka saaʼin naʼanneetse nümüin: «Mekeereechi taya süchiirua tü eekai machikin, touyanteerü süchikuaʼa tü eekai sükatalaain, eere wanee eekai seewaain tejittaajeerü sülioʼu» (Ezeq. 34:16). Wainma na nükaalinjakana Jeʼwaa süpüla nanouteʼerüin nakuwaʼipa nümaa. Akaʼaya piakai, nükaalinjeechi pia Jeʼwaa süpüla aleewain maʼin pia püchikuaʼa nümaa.

Tü naaʼinrüinjatkat na laülaashiikana

Wainma kasa eeka süpüla nakaalinjain anain na laülaashiikana na aleʼejakana nachikuaʼa nünainmüin Jeʼwaa. Wekirajaa sünain waneirua kasa naaʼinrajatka.

Natütüleʼerüinjatü naaʼin. Nütüjaa aaʼu Pablo eein süpüla nuuʼulaain suulia anoujaa wanee wawala ayaawajaakai suulia naainjala sutuma mojuin naaʼin (2 Cor. 2:7). Eeshijaʼa japüiwaire chia anoujashikai jee mojuwaire naaʼin. Anuu nünüiki Pablo namüin na corintojeʼewaliikana: «Anakaja motüle jaaʼin naainjala nuulia sümaa kamaneeinjanain jia nümüin». Aküjüneesü namüin na aleʼejakana nachikuaʼa nünainmüin Jeʼwaa alin maʼin naya nüpüla Jeʼwaa otta napüla na wawalayuukana. Saainjünüle tia, eesüjaʼa süpüla nnojoluin sümalajaain naaʼin.

Achuntajana naya naaʼu. «Shiimüin sünain naapeerüin chi Maleiwakai nanüiki na wayuu anajiraakana nümaa» (Sant. 5:16). Anuu sünüiki Larissa: «Taküjain namüin na laülaashiikana kasain wainmajüin anainjee taaʼin jee kasain mmoluin anainjee taya. Nnojoishii jashichin naya tamüin jee nakaalinjeein taya süpüla anajiraain taya tachikuaʼa nümaa Jeʼwaa». Anuu nünüiki wanee wawala kanüliakai Theo: «Sutuma nachuntuin taaʼu na laülaashiikana, tayaawata aaʼu alin maʼin taya nüpüla Jeʼwaa jee niʼrüin tü kasa anakat sünain takuwaʼipa maaʼulu».

Aleewainjana naya namaa. Anasü maʼin kaʼaleewainre na aleʼejakana nachikuaʼa nünainmüin Jeʼwaa. Anuu nünüiki wanee laülaashi, Justin nünülia: «Wachajaainjatü maʼin sukuwaʼipa süpüla wounejaain naya sünain aküjaa pütchi wamaa jee wawaraijaa naaʼu. Anashii aleewale maʼin waya namaa». Anuu nünüikiya wane laülaashi, Henry nünülia: «Neʼrüle na wawalayuukana aleewain na laülaashiikana nümaa wanee wayuu aleʼejakai nüchikuaʼa nünainmüin Jeʼwaa, aleeweejeerü naaʼin namaʼaya».

Nakaalinjainjana naya sünain ekirajawaa. Eeshii süpüla nakaalinjain na wawalayuu laülaakana aaʼin sünain anoujaa wanee wayuu aleʼejakai nüchikuaʼa nünainmüin Jeʼwaa süpüla nikiʼralaain nüchikuaʼa sünain ekirajawaa sünain tü Bibliakat. Anuu nünüiki wanee laülaashi, Darko nünülia: «Taküjain namüin tü pütchi anakat maʼin tamüin tekirajaaka anain suluʼujee tü Bibliakat süpüla neʼrüinjatüin jaʼyain taaʼu kamalain shia tamüin». Anuu nünüikiya wane laülaashi, Clayton nünülia: «‹Anasü pikirajaale süchiki nukuwaʼipa chi makai anülia suluʼu tü Bibliakat, achecheraajeerü paaʼin sutuma›, tamawaishii naya».

Nalapalaainjana aaʼu. Natüjaaitpa aaʼu na aleʼejakana nachikuaʼa nünainmüin Jeʼwaa tü naaʼinrakat na laülaashiikana nachiaapa wanee kaainjalashi. Shiakalaka neʼrüinjatüin maʼin jooluʼu tü nakuwaʼipakat sünain atütüleʼeraa naaʼin (Jer. 23:4). Jiakana laülaashiikana, jaapaja nanüiki, jütütüleʼera naaʼin otta jülüja naya jaaʼin waneepia. Anuu nünüiki wanee laülaashi, Marcus nünülia, süchiki tü naaʼinrakat nülapalaapa naaʼu wanee Aküjaikai pütchi nüchikuaʼa: «Waashajeʼerüin wanee pütchi suluʼujee tü Bibliakat jee waküja wamüsia tü saashajaakalü achiki. Waküjain pütchi analuʼut nümüin jee waküjain kojutuin maʼin wamüin tü kasa naaʼinrakat süpüla nüleʼejüin nüchikuaʼa. Kettaapa walapalaain naaʼu, wakatalüin wanee kaʼi süpüla waleʼejüin wachikuaʼa nümaʼanamüin».

a Aʼwanajaanüsü waneirua anüliee