«Anakajaʼa neenajirüle na laülaashiikana»

1. ¿Kasa naaʼinraka Jehová saaʼujee alin maʼin waya nüpüla?

MÜSHI Jehová maʼaka naaʼin wanee arüleejüi, naaʼinmajüin waya jee aishii waya nüpüla. Naapüin nikii chi Nüchonkai süpüla outuinjachin nia waaʼu jee niʼitaain na laülaashiikana süpüla naaʼinmajüin waya (Aluw. 20:28). Nücheküin Maleiwa alin napüla na laülaashiikana na anoujashiikana. Oonooshii na laülaashiikana sümaa tü nuluwataakat anain Jesús chi nekiipüʼükai na anoujashiikana. Müsüjeseʼe natütüleʼerüin naaʼin jee naaʼinmajüin naya suulia matchin nanoula (Is. 32:1, 2).

2. ¿Jaralii na nükaalinjakana maʼin Jehová? (Ezequiel 34:15, 16).

² Nükaalinjain Jehová napüshuaʼa na aʼyataashiikana nümüin, nayapejeʼe nükaalinjaka maʼin na eʼrakana müliaa. Niʼitaainjeseʼe na laülaashiikana süpüla nakatsüinrüin nanoula (paashajeʼera Ezequiel 34:15, 16). Anasü woʼuraajüle nümüin Maleiwa matsüinre tü wanoulakat otta wachuntuinjatü kaalinwaa namüin na jülüjakana aaʼin wanoula otta na ekirajakana waya (Éf. 4:11, 12).

3. ¿Jamüsü jalouijeetkaʼa wamüin ekirajaayaka tüü?

³ Sünain ekirajaayakat tüü wekirajaajeerü anain süchiki tü naaʼinrakat Jehová süpüla nükaalinjain waya nakajee na laülaashiikana matchinre tü wanoulakat. Wekirajaajeerü anain pütchikat tüü: «¿Jaralii na achuntuinjanakana kaalinwaa namüin na laülaashiikana? ¿Jamüsü choʼujaakaʼa nachuntuin kaalinwaa namüin? ¿Kasa nakaalinjaka aka naya?». Jalouijeeriaʼaya ekirajaayaka tüü wamüin wapüshuaʼa jaʼitairü katchin tü wanoulakat, jama kojuteerüin maʼin wamüin tü naaʼinrakat Jehová süpüla nükaalinjain waya nakajee na laülaashiikana otta wayaawateerü aaʼu tü waaʼinrajatkat matchinre tü wanoulakat.

¿JARALII NA ACHUNTUINJANAKANA KAALINWAA NAMÜIN NA LAÜLAASHIIKANA?

4. ¿Kasa wayaawataka atuma shiain naashajaa achiki Santiago 5:14-16, 19, 20 nüchiki wanee wayuu matchinkai anoula? (Piirakaa sümüin tü ayaakuaakat).

⁴ Nüküjain chi aluwataaushikai Santiago tü naaʼinrakat Jehová süpüla nükaalinjain waya nakajee na laülaashiikana. Anuu nünüiki: «¿Eeshichejeʼe wanee wayuu eekai ayuulin jaʼaka? Anakajaʼa neenajirüle na laülaashiikana napüleerua na anoujashiikana» (paashajeʼera Santiago 5:14-16, 19, 20). Wanaa sümaa nüküjain Santiago nüchiki «wanee wayuu eekai ayuulin» shia naashajaaka achiki wanee wayuu matchinkai anoula. Müsüjeseʼe nuchuntuinjatüin kaalinwaa namüin na laülaashiikana. Naashin Santiago wanee wayuu eekai kaainjalain müshi aka naaʼin «wanee wayuu eekai ayuulin». Aawalaajeechi nia motoleepa naaʼin Jehová naainjala. Ayuuire wanee wayuu eʼrajeʼerüinjachi nia jee nüküjainjatü nümüin chi tottootkai jamüin naaʼin jee naaʼinrüinjatü tü nümakat chi tottootkai nümüin süpüla naawalaainjachin. Müsia nukuwaʼipa wanee anoujashi matchinre tü nunoulakat, yootuinjachi nia namaa na laülaashiikana jee nüküjainjatü namüin tü alatakat nümüin jee oonooinjachi nia sümaa tü namakat nümüin sükajee tü Bibliakat.

5. ¿Kasa wasakireʼerüinjatka anain waaʼin süpüla wayaawatüin saaʼu matchinre wanoula?

⁵ Ashajünüsü suluʼu Santiago kapiitulo 5 anain wachuntule kaalinwaa namüin na laülaashiikana matchinre tü wanoulakat. Anasü wachuntule kaalinwaa namüin süpülapünaa sumojujaain wakuwaʼipa nümaa Jehová. Eejüinjatüin waaʼin saashin tü Bibliakat suulia wemeejiraain jee jülüjain waaʼin anain wakuwaʼipa nümaa Jehová sümaa nnojoluin müin shia (Sant. 1:22). Tia shia tü alatakat namüin waneinnua anoujashii namaiwajana chejeʼewaliikana Sardis. Anayaasü nakuwaʼipa naaʼinruʼu nümaa Jehová, nnojotpejeʼe müin shia naashin Jesús (Apoc. 3:1, 2). Wanee kasa waaʼinrajatka süpüla watüjaain saaʼu anale sukuwaʼipa wanoula shia jülüjale waaʼin talatüle waaʼin sünain tü waʼyataainkat nümüin Jehová maʼakaapuʼu shia paala (Apoc. 2:4, 5). Anasü wasakireʼerüle waaʼin sünain tüü: «¿Kamalainsüche tamüin taashajeʼerüin tü Bibliakat jee tasakireʼerüin taaʼin sünain maʼakaapuʼu shia tatuma? ¿Outkajaashiche taya waneepia sümaa yapain tatuma tü ekirajaanajatkalü anain? ¿Taaʼinmaasüche maʼin tü aküjaakat pütchi maʼakaapuʼu shia tatuma paala? ¿Shiataapa neʼe taaʼinmaain wainmeein kasa tamaʼana jee jülüjain taaʼin wainma kasa suulia?». Wasakireʼerüle waaʼin sünain tia wayaawateerü aaʼu eere wanee kasa wanouteʼerajatka suulia sümalajaain wanoula. Anasü wachuntule kaalinwaa namüin na laülaashiikana kapüleere wamüin wanouteʼerüin wakuwaʼipa jee waaʼinrüle wanee kasa mojuka noʼuluʼu Jehová.

6. ¿Kasa naaʼinrajatka wanee wawala kaainjarale nia?

⁶ Kaainjarale wanee wawala jee nütüjaale saaʼu eein süpüla nujuʼitinnüin naʼakajee na anoujashiikana acheküsü nüküjainjatüin shia namüin na laülaashiikana (1 Cor. 5:11-13). Choʼujaasü nükaalinjünüin süpüla nunouteʼerüin nukuwaʼipa nümaa Jehová. Moteerü naaʼin Jehová naainjala wanee wayuu niyaawajaale suulia naainjala (Aluw. 26:20). Süpüla nuuntuinjatüin tia nüküjainjatü süchiki tü kasa mojusü naaʼinrakat namüin na laülaashiikana.

7. ¿Jaralii na choʼujaakana amüin nakaalinjünüin natuma na laülaashiikana?

⁷ Nnojoishii neʼe nakaalinjain na laülaashiikana na wawalayuu kaainjalakana. Müshiʼiya na wawalayuu matchinkana anoula akaalinjünüshii natuma (Aluw. 20:35). Jülüjataa paaʼin suchuntaʼawalin paaʼin kasa mojusü jee iseerüin püchiki püchecherüin paaʼin saaʼin pümüin. Eesüjaʼa kapüleere pümüin püchecherüin paaʼin suulia tü suchuntakat paaʼin sükajee pükaijapuʼuin paala yüi, pünajapuʼuin shiyaakua wayuu masheʼinsat jee pümaʼüjiraapuʼule pukuwaʼipa süpülapünaa punoujain nünain Jehová. Anasü puchuntule kaalinwaa namüin na laülaashiikana, naapajeerü pünüiki jee nakaalinjeechi pia. Naküjeerü pümüin tü paaʼinrajatkat süpüla punouteʼerüin pukuwaʼipa otta naküjeerü pümüin talateerüin naaʼin Jehová pümaa ayatüle püchecherüin paaʼin suulia tü kasa mojusü suchuntaakat paaʼin (Ecl. 4:12). Ayatüle mojuin paaʼin sutumajee tü kasa mojusü suchuntaakat paaʼin natütüleʼereerü paaʼin na laülaashiikana jee naküjeerü pümüin mojuin paaʼin sükajee aneein pukuwaʼipa nümaa Jehová jee talateein nia putuma (1 Cor. 10:12).

8. ¿Choʼujaasüche waküjainjatüin namüin na laülaashiikana süpüshuaʼa tü kasa nnojotkat anain watuma?

⁸ Nnojotsü choʼujaain waküjainjatüin süpüshuaʼa tü kasa mojuwaikat watuma namüin na laülaashiikana. Jamüsüjeʼe airuʼurule pünüiki nümüin wanee wawala sümaa jashichin maʼin pia, anasü waaʼinrüle tü nümakat Jesús süpüla anajiraainjanain waya namaa na wawalayuukana (Mat. 5:23, 24). Eesü süpüla pikirajaain sünain tü karaloʼuta eekat wamaʼana süchiki tü waaʼinrajatkat süpüla anamiainjanain waya, nnojoliinjana kashapajaaralin waya jee wachecherüinjatüin waaʼin. Ayatülejeʼe müin pukuwaʼipa süchikijee paaʼinrüin tia anasü puchuntule kaalinwaa namüin na laülaashiikana. Suluʼu tü karaloʼuta nüshajakat Pablo namüin na chejeʼewaliikana Filipo nuchuntuin nümüin wanee anoujashi nükaalinjaiwa Evodia otta Síntique süpüla anajiraainjanain naya. Müshijaʼa wanee laülaashi, nükaalinjeechi pia (Filip. 4:2, 3).

¿JAMÜSÜ WACHUNTAJATKAʼA KAALINWAA NAMÜIN NA LAÜLAASHIIKANA?

9. ¿Jamüsü waküjainjatkaʼa namüin na laülaashiikana tü kasa mojusü waaʼinrakat mayaainjeʼe eein süpüla japülin waya sünainjee? (Proverbios 28:13).

⁹ Wachunta kaalinwaa namüin na laülaashiikana isale wachiki wachecherüin waaʼin suulia tü kasa mojusü suchuntaakat waaʼin (Sal. 94:18). Kaainjarale waya waküja shia namüin na laülaashiikana otta wayaawaja suulia süpüla motuinjatüin shia naaʼin Jehová (paashajeʼera Proverbios 28:13). Choʼujaasüjeseʼe kanoulain waya jee yalayalain waaʼin süpüla waküjain shia namüin na laülaashiikana, jama japülin waaʼin sutuma tü kasa mojusü waaʼinrakat. Niʼitaain Jehová na laülaashiikana süpüla natütüleʼerüin waaʼin jee nakatchinrüin wanoula. Jüüjüüshii waya nümüin Jehová jee kanoulashii waya nünain wachuntule kaalinwaa namüin na laülaashiikana.

10. ¿Jameerü wakuwaʼipa wounjulajüle süchiki tü waainjalakat?

¹⁰ Ekirajaainnapa waya sünain aneerüin wakuwaʼipa wachuntule kaalinwaa namüin na laülaashiikana. Shiasaʼa wounjulaale süchiki tü waainjalakat mojeerü wakuwaʼipa. Jamüshijaʼa chi aluwataashikai David nuunjulaain süchiki tü naainjalakat ayuuika nia sümaa mojuin maʼin naaʼin süka nnojoluin anain nukuwaʼipa nümaa Jehová (Sal. 32:3-5). Jamüshijaʼa wanee wayuu eekai ayuulin mayeinshi nia shiʼipaʼaya nnojoire niʼrajeʼerüin. Müshijaʼa wanee wayuu eekai nuunjulüin süchiki naainjala mojusü nukuwaʼipa shiʼipaʼaya. Sutuma tia nüküjain Jehová wamüin wachuntajanain kaalinwaa namüin na laülaashiikana jama niʼreein anain wakuwaʼipa nümaa (Is. 1:5, 6, 18).

11. Nuunjulajüle süchiki naainjala wanee wawala, ¿jameerü nakuwaʼipa na wawalayuukana?

¹¹ Wounjulajüle süchiki waainjala mojeerü nakuwaʼipa na wawalayuukana wanainjee. Eesüjaʼa süpüla nnojoluin naapüin Jehová tü nüpülainkat namüin na wawalayuukana sutumajee tia otta nnojoleena paaʼinwain naya (Éf. 4:30). Watüjaale saaʼu kaainjalain wanee wawala waküja nümüin nuchuntuin kaalinwaa namüin na laülaashiikana.a Wounjulaale süchiki naainjala meena kaainjalakai aaʼin waya wanaa nümaa (Lev. 5:1). Aire wapüla Jehová waküjeerü nüchiki chi wawala kaainjalakai namüin na laülaashiikana. Müle shia watuma aneerü nanoula na wawalayuukana otta eeshi süpüla anajiraain nüchikuaʼa chi wawalakai nümaa Jehová.

¿KASA NAKAALINJAKA AKA WAYA NA LAÜLAASHIIKANA?

12. ¿Kasa naaʼinraka na laülaashiikana süpüla nakaalinjain na matchinkana anoula?

¹² Süküjain tü Bibliakat nakaalinjünüinjanain na matchinkana anoula natuma na laülaashiikana (1 Tes. 5:14). Kaainjarale pia eeshijaʼa nasakirüle pia na laülaashiikana süpüla natüjaain saaʼu jamüin paaʼin otta tü jülüjakat paaʼin (Prov. 20:5). Mapüleejeerü namüin na laülaashiikana nakaalinjain pia püküjale namüin süpüshuaʼa tü suluʼukat paaʼin mayaainjeʼe kapüleein shia pümüin sutuma japülin pia. Nnojo shapaain paaʼin airuʼurule pünüiki namüin (Job 6:3). Jülüjeerü maʼin naaʼin na laülaashiikana pünüiki süpüla nayaawatüin saaʼu pukuwaʼipa jee süpüla natüjaain saaʼu tü naainjainjatkat süpüla nakaalinjain pia (Prov. 18:13). Natüjaa aaʼu na laülaashiikana nnojoluin sunoutamaatüin sukuwaʼipa wanee kasa jee eesüjaʼa choʼujaale yootule naya kojuyatua süchiki.

13. ¿Kasa amaa naaʼinrüinjatka na laülaashiikana süpüla nakaalinjain waya? (Piirakaa sümüin tü ayaakuaakat).

¹³ Nnojoleerü mojuin paaʼin natuma na laülaashiikana sutuma tü paaʼinrakat, achunteena naya nümüin Jehová püpüleerua. Aneetkalaka paaʼin, «jama naapüin Maleiwa» nanüiki otta meerü nashulereetkai saaʼin seita pünain saaʼu nünülia Jehová (Sant. 5:14-16). Tia «seitakat» shia tü Nünüikikat Maleiwa, namülialeerü paaʼin na laülaashiikana sükajee tü Bibliakat jee nakaalinjeechi pia süpüla anainjatüin süchikuaʼa pukuwaʼipa nümaa Jehová (Is. 57:18). Katchinjeetkalaka punoula süpüla paaʼinrüin tü nüchekakat Jehová, meerü paapakai saaʼin nünüiki Jehová sünain nümüin pümüin: «Shiaʼaya wopukot tüü, puʼuna suluʼupünaa» (Is. 30:21).

14. Saashin Galacia 6:1, ¿kasa naaʼinraka na laülaashiikana süpüla nakaalinjain wanee wayuu eekai nükatalaweein suulia nukuwaʼipa sünain anoujaa? (Piirakaa sümüin tü ayaakuaakat).

¹⁴ (Paashajeʼera Galacia 6:1). «Wanee wayuu eekai nükatalaweein suulia tü nukuwaʼipakat sünain anoujaa» nnojotsü pansaain nukuwaʼipa sümaa tü nuluwataakalü anain Maleiwa. Eesüjaʼa shiale sutuma mojuin wanee kasa nüneekaka jee kaainjalain nia. Achiajaaneechipejeʼe nia natuma na laülaashiikana sümaa kamaneein naya nümüin sükajee alin nia napüla. Tü pütchikat «anashi nüchiaanüle» ashajünaka suluʼu tia wetsiikulokot «anoutaa wanee kasa» maluʼulu suluʼu griego, maʼaka saaʼin sujuttaʼale nütünakii wanee wayuu aʼatünüsü süchikuaʼa. Jamüshijaʼa wanee tottoot nütüjale maʼin aʼata süchikuaʼa nütünakii wanee wayuu naaʼinrüin tia sümaa nnojoluin müliajüin nutuma chi wayuukai. Akaʼaya na laülaashiikana nachiaapa wanee wawala, kamaneeshii naya nümüin otta nnojotsü airuʼuluin nanüiki nümüin. Saashin tü Bibliakat jülüjeesü naaʼin na laülaashiikana nakuwaʼipa waneʼewai nakua, jama naleʼeruʼuin süchiki kaainjalaa. Müsüjeseʼe nnojoluinjatüin yaletüin naaʼin na laülaashiikana nachiaapa wanee wawala, amülialaainjatü naaʼin naalii jee nnojoluinjatü nayoujain nukuwaʼipa (1 Ped. 3:8).

15. ¿Jaralii na anakana süpüla yootuin amaa waya sülatüle wamüin wanee kasa?

¹⁵ Eeshii süpüla waküjain namüin na laülaashiikana süchiki wanee kasa, jama watüjaain saaʼu nnojoleenain naküjakuʼu namüin yalapünaa süchiki tia. Ekirajünüshii naya süpüla nachiaain waya sükajee tü sümakat tü Bibliakat suulialeʼeya tü nekiiruʼukat neʼe otta ekirajünüshii naya süpüla nakaalinjain waya soʼunnaa weʼrüin müliaa (Prov. 11:13; Gal. 6:2). Naatayaa müsü nakuwaʼipa na laülaashiikana otta eeshii na kakaliainnakana sünain anoujaa. Eepejeʼe süpüla yootuin waya namaa napüshuaʼa. Nnojoleena waya yootuin namaa waneʼewai nakua na laülaashiikana shiiʼiree naküjain wamüin tü kamalainkat neʼe wamüin. Nnojotsü meein wakuwaʼipa maʼaka naaʼin na wayuu ayoutajaakana «sümaa tü pütchi anasü ekirajünakalü anain» (2 Tim. 4:3). Yootule waya nümaa wanee laülaashi süchiki wanee kasa alataka wamüin, nüsakireena waya palajana müleka yootuinnaapale waya nümaa wanee laülaashi süchiki tia jee kasain nüküjain wamüin. Süka nütüjaain saaʼu eein tü kasa isakat nüchiki eeshi süpüla nüsakirüin wanee laülaashi wanaa nümaa süpüla nakaalinjain waya (Prov. 13:10).

TÜ WAAʼINRAJATKAT WANEʼEWAI WAKUA

16. ¿Kasa waaʼinrajatka waneʼewai wakua?

¹⁶ Naaʼinmajüin waya na laülaashiikana otta nachiaain waya, nnojotpejeʼe naküjain wamüin tü waaʼinrajatkat. Wayainjana aneekaka waneʼewai wakua tü anakat süpüla waaʼinrüin. Sütüjaaneetka aaʼu sükajee tü wamakat jee sükajee tü waaʼinrakat aire Jehová wapüla jee woonoweein nümaa. Nükaalinjeena waya Jehová süpüla waneeküin kasa anasü jee süpüla waneepiainjanain waya nümaa (Roma 14:12). Müshiijeseʼe nekirajüin waya na laülaashiikana sükajee tü Bibliakat süpüla wayaawatüin saaʼu tü jülüjakat naaʼin Jehová süchiki wanee kasa otta nooʼulaain waneeküin süka waaʼin wamüiwaʼa tü anakat süpüla waaʼinrüin. Wayaawateetka saaʼu «anale jee mojule wanee kasa» (Heb. 5:14).

17. ¿Kasa waaʼinrajatka matchinre tü wanoulakat?

¹⁷ Anataʼaleesüjaʼa maʼin wakuwaʼipa süka naʼanneetsein waya Jehová müshijeseʼe nuluwataain Jesús, chi arüleejüi anamiakai maʼin süpüla nuʼtteʼerüin waya jee süpüla katüinjatüin woʼu waneepia (Juan 10:11). Nikeraajüin Jehová nünüiki nakajee na laülaashiikana wanaa sümaa nümüin: «Arüleejüneena jia natuma sümaa natüjain maʼin otta kekiin maʼin naya» (Jer. 3:15). Matchinre wanoula anashii weenajirüle na laülaashiikana süpüla nakaalinjain waya. Wachunta maʼin waneepia kaalinwaa namüin na laülaashiikana, jama nüsülajalain naya Jehová wamüin.