TÜ PAAʼINRAJATKAT SUULIA ÜTTÜIN PAAʼIN

1 | NNOJO KOʼUIN PUKUWAʼIPA SÜMÜIN WAYUU

Tü sümakat tü Bibliakat:

«Shiimain nnojolüin koʼuin nükuaippa Maleiwakai sümüin wayuu. Wayuu eekai eein suluʼu mmakat süpüshua, kojutkat atüma Maleiwakai otta aaʼinrakat tü anasükat, nnojoleerü nüjütaain amaa shia» (ALUWATAAUSHIKANA [Hechos] 10:34, 35).

¿Jamaluʼulu tia?

Nnojoishi kachekalaʼatain wayuu Jehováa sutuma naatain noumain, neʼiruku jee natapaʼa. Jülüjasü naaʼin tü suluʼukat waaʼin otta tü keeʼireekat waaʼin, tü kojutukat maʼin sünain wakuwaʼipa. Anuu sünüiki tü Bibliakat: «Shia neʼe kamalainka nümüin wanee wayuu tü kasa niʼrakat. Akaisaʼa Jehová, shia kamalainka nümüin tü suluʼukat naaʼin» (1 Samuel 16:7).

Puuʼulaka paaʼinrüin tüü:

Mayaainjeʼe nnojoluin weʼrüin tü suluʼukat saaʼin wayuu, eesü süpüla washatüin nukuwaʼipa Jehová sünain nnojoluin koʼuin wakuwaʼipa sümüin wayuu. Nnojo piyoujireʼerüin nukuwaʼipa wanee wayuu sünainjee tü kasa mojusü naaʼinrakat na waneinnua. Piyaawatüle saaʼu nnojoluin anain nüshoʼu pümüin wanee wayuu sutuma naatain tü mma eejeʼewaire nia jee shiale sutuma naatain niʼiruku, puchunta nümüin Maleiwa süpüla nnojoluin müin pukuwaʼipa jee süpüla püsünneʼerüin shia suluʼujee paaʼin (Salmo 139:23, 24). Nükaalinjeechi pia süpüla puuntuin tia (1 Pedro 3:12).

a Jehová nünülia Maleiwa (Salmo 83:18).

«Nnojoipuʼushi aleewain taya namaa na wayuu wulekana ata. Nümaashii taya maaʼulu na wawalayuu aijiraakana maʼin suluʼujeejanaka mmakat süpüshuaʼa» (TITUS).

Tü nukuwaʼipapuʼukat: TITUS

Ooʼulaashi nia suulia üttüin naaʼin

Jashichishaatashi Titus sutuma süikaleʼennüin wanee pütchi suluʼu tü mma eere kepiain nia süpüla nnojoluin kottiraain na mütsiiakana ata namaa na wulekana ata. Nümaashii nia waneinnua wayuu mojukana amüin tia pütchikat. Anuu nünüiki: «Ekerotopuʼushii waya eere süpülajünüin noulia na mütsiiakana ata shiiʼiree neʼe watkaain». Niyaawata aaʼu Titus mojulaain maʼin nia sutuma üttüin maʼin naaʼin waneepia. Anuu sooʼomüin nünüiki: «Tatkaapa, taya asheʼetakai palajana jaʼitashi tooloin jee jierüle shia».

Eeʼiratüsü nukuwaʼipa Titus shiʼipaʼaya sutuma nikirajaain sünain tü Bibliakat namaa na aküjaliikana pütchi nüchiki Jehová. Eeʼiratüsü tü jülüjakat naaʼin sutuma naashajeʼerüin tü Bibliakat. Sütanalüin naaʼin nütüjaapa saaʼu müiriain «nnojolüin ouktaa, mojuu aaʼin, aʼyalajaa, je saalii ayuulii» (Alateetkat Mapeena 21:3, 4).

Isapuʼusü nüchiki nüsünneʼerüin suluʼujee naaʼin tü üttaakalü aaʼin. Anuu nünüiki: «Isapuʼusü maʼin tachiki teeʼiratüin tü jülüjakat taaʼin otta tü taaʼinrakat». Jülüjapejeʼe naaʼin tü nütüjakat nüchiki Maleiwa sünain nnojoluin koʼuin nukuwaʼipa sümüin wayuu (Aluwataaushikana 10:34, 35).

¿Jamakaʼa mapa nukuwaʼipa Titus? Anuu nünüiki: «Teʼrapa aijiraain maʼin na aküjaliikana pütchi nüchiki Jehová, mayaainjeʼe naatain neʼiruku jee natapaʼa, tayaawata aaʼu nayain na anoujashii shiimainshiikana. Nnojoliiwaʼaya woutiisain taya, nuunejaain taya sünain ekaa nipialuʼumüin wanee aküjai pütchi wulekai ata. Müshi talapüjaakai aaʼin, nnojoipuʼushi aleewain taya namaa na wayuu wulekana ata. Nümaashii taya maaʼulu na wawalayuu aijiraakana maʼin suluʼujeejanaka mmakat süpüshuaʼa».