Naaʼinrajatka na laülaashiikana süpüla nakaalinjain na ojuʼitinnakana

1, 2. (1) ¿Jamüsü nünüiki Jehová nüchiki wanee wawala macheʼekai süchiirua kaainjalaa? (2) ¿Kasa nüchekaka Jehová nüpüleerua wanee wawala kaainjalakai?

NNOJOTSÜ anain nümüin Maleiwa naaʼinrüle wanee wayuu tü kasa mojusükat (Sal. 5:4-6). Nücheküin wapüleerua Jehová woonooinjanain sümaa tü nümakat wamüin suluʼu tü Bibliakat. Nütüjaapejeʼe saaʼu eejeerüin tü kasa mojukat watuma süka waleʼeruʼuin tü kaainjalaakat (Sal. 130:3, 4). Nnojoishi talatüin Jehová namaa na mojulaashiikana. Naashin naya wayuukana moteerü naaʼin Maleiwa naainjala saaʼujee kamaneein nia sümüin wayuu, müshiijeseʼe maapülin naya sünain aaʼinraa kasa mojusü (Jud. 4). Süküjain tü Bibliakat najaʼttirajanain Maleiwa na mojulaashiikana soʼu tü kanüliakat Armagedón (2 Ped. 3:7; Apoc. 16:16).

² Nnojotsü nücheküin Jehová outajachin wanee wayuu saaʼujee naainjala. Wekirajaa anainrü tia sünain tü wane ekirajaayakat. Shia nüchekaka Jehová «shiyaawajaainjatüin wayuu süpüshuaʼa suulia saainjala» (2 Ped. 3:9). Nnojoishii aashichijaain na laülaashiikana nümüin wanee wawala kaainjalakai maʼaka nnojolin naashichijaain Jehová. Nakaalinjain nia süpüla niyaawajaain suulia naainjala jee aleewain nia nüchikuaʼa nümaa. Eepejeʼe wawala eekai nnojolin niyaawajaain suulia naainjala (Is. 6:9). Mayaainjeʼe nükaalinjünüin kojuyatua natuma na laülaashiikana, ayatüshia nia macheʼein süchiirua kaainjalaa. ¿Kasakaʼa naaʼinrüinjatüin na laülaashiikana müle nukuwaʼipa wanee wawala?

«JUJUʼITIRA JAʼAKAJEE CHI WAYUU KAAINJALASHIKAI»

3. (1) ¿Kasa aaʼinnajatka saashin tü Bibliakat nüka chi anoujashi nnojoikai ayaawajaweein suulia naainjala? (2) ¿Jamüshi niakaʼa kasirüin chi wawala kaainjalashikai nujuʼitinnüin naʼakajee na wawalayuukana?

³ Nnojoire niyaawajaain chi wawala kaainjalashikai suulia naainjala, naaʼinrajatü na laülaashiikana tü sümakat 1 Corinto 5:13, nojuʼitirüinjachi nia naʼakajee na wawalayuukana.a Nia kasitka chi wawala kaainjalashikai nujuʼitinnüin naʼakajee na wawalayuukana. ¿Jamüshi niaka kasirüin tia? Shia süka nnojoluin niyaawajaweein suulia naainjala mayaainjeʼe kojuyatuain nükaalinjünüin natuma na laülaashiikana (2 Rey. 17:12-15). Müsü nükotchojokoi saaʼin tü kasa nüpünajakat (Gal. 6:7). Jayasü naaʼu nnojoluin noonooin sümaa tü nümakat Jehová nümüin (Deut. 30:19, 20).

4. ¿Jamüsü süküjünajatkaʼa namüin na wawalayuukana suluʼu tü outkajaaleekat nujuʼitinnüle wanee wawala macheʼekai süchiirua kaainjalaa?

⁴ Nujuʼitinnüle naʼakajee na wawalayuukana chi wawala macheʼekai süchiirua kaainjalaa, aküjünüsü namüin na wawalayuukana suluʼu tü outkajaaleekat nnojoluichipain nüküjalin pütchi nüchiki Jehová.b Nnojotsü aküjünüin tia süpüla naapülijünüin chi ojuʼitinnüshikai. Aküjünüsü tia süpüla naaʼinrüinjatüin na wawalayuukana tü sümakat tü Bibliakat: nnojoliinjanain namaain nia otta nnojoliinjanain nekaain nümaa (1 Cor. 5:9-11). Aküjünüsü tia süpüla nnojoluinjatüin sülatüin tü nümakat Jehová, tü makat mayaa: «Kaainjarale wanee wayuu müsü aka saaʼin tü soolojiakat pan, oolojoʼoleesia süpüshuaʼa tü ariinakat sutuma» (1 Cor. 5:6). Nnojoire nujuʼitinnüin wanee anoujashi macheʼekai süchiirua kaainjalaa, eesü süpüla jülüjain naaʼin na wane wawalayuukana nnojoluin choʼujaain maʼin noonooinjanain sümaa tü nümakat Jehová (Prov. 13:20; 1 Cor. 15:33).

5. ¿Kasa jülüjainjatka waaʼin nüchiki wanee wawala ojuʼitinnakai naʼakajee na wawalayuukana otta jamüsü jülüjainjatkaʼa waaʼin tia?

⁵ ¿Kasa jülüjainjatka waaʼin nüchiki wanee wawala ojuʼitinnakai naʼakajee na wawalayuukana? Mayaainjeʼe nnojoluin nümaʼawalin waya jülüjainjatü waaʼin nnojoluin mepireein tü nukuwaʼipakat. Müsü nukuwaʼipa maʼaka saaʼin nukuwaʼipa wanee anneerü eekai machikin. Jamüshijaʼa machikire wanee anneerü, eeshi süpüla nüleʼejüin nüchikuaʼa saʼakamüin nüpüshi. Jülüjeesü waaʼin naapüin paala naaʼin nümüin Jehová chia wawalakai, nnojotpejeʼe naaʼinrüin maaʼulu tü nüchekakat Jehová. Eesüjaʼa sumojujaʼaleejeerüle nukuwaʼipa sünainjee müin nia (Ezeq. 18:31). Eeyüipejeʼe süpüla nüleʼejüin nüchikuaʼa nünainmüin Jehová, amülialaajeerü naaʼin Jehová naalii naaʼinrüle tia. ¿Kasa naaʼinrajatka na laülaashiikana süpüla nüleʼejüin nüchikuaʼa chia wawalakai?

NAAʼINRAKA NA LAÜLAASHIIKANA SÜPÜLA NAKAALINJAIN NA OJUʼITINNAKANA

6. ¿Kasa naaʼinreetka na laülaashiikana süpüla ayatüin nakaalinjain chi wayuu ojuʼitinnüshikai?

⁶ Nujuʼitinnüle wanee wawala naʼakajee na wawalayuukana, ¿nnojolitchipache nakaalinjain nia na laülaashiikana? Ayatüshia nakaalinjain nia. Wanaa sümaa naküjain na laülaashiikana nümüin chi wawalakai nujuʼitinnajachin, naküjain nümüin tü naaʼinrajatkat süpüla nüleʼejüin nüchikuaʼa nünainmüin Jehová. Eesüjaʼa naküjeerüle nümüin noutkajaajeenain nümaa sülatapa maʼaka jeʼra kashi süpüla nasakirüin nia nüleʼejeere nüchikuaʼa. Anale nümüin chi kaainjalashikai nuutkajaain nüchikuaʼa namaa na laülaashiikana, yooteena naya nümaa süpüla natanalüin naaʼin shiiʼiree niyaawajaain suulia naainjala jee nüleʼejüin nüchikuaʼa nünainmüin Jehová. Ayatüleʼeya nnojoluin niyaawajaain suulia naainjala, nakumajeerü sukuwaʼipa na laülaashiikana süpüla noutkajaain nümaa sülatapa maʼaka jeʼra kashi.

7. ¿Kasa naaʼinraka na laülaashiikana süpüla sümülialaain naaʼin naalin chi wayuu ojuʼitinnüshikai maʼaka sümülialaain naaʼin Jehová naalin? (Jeremías 3:12).

⁷ Amülialaasü naaʼin na laülaashiikana naalin chi wayuu ojuʼitinnüshikai maʼaka sümülialaain naaʼin Jehová naalin. Soʼu kaainjalain na israelitakana nnojoishi yalain neʼe Jehová aʼatapajüin nantüin nünainmüin. Süpülapünaa nayaawajaain suulia naainjala nüchajaain Jehová sukuwaʼipa süpüla nürütkaain nanainmüin. Nikirajüin naya süpüla nayaawatüin saaʼu nümüliajülin maʼin wayuu Jehová. Wekirajaa anainrü tia sünain ekirajaaya 32. Nikirajüin naya sükajee nukuwaʼipa Oseas. Mayaainjeʼe kawalaʼatain nia sutuma nuʼwayuuse jee ayatayülüin kaainjalain shia soʼu tia, nuchuntuin Jehová nümüin Oseas nüleʼejirüin shia süchikuaʼa (Os. 3:1; Mal. 3:7). Tü keeʼireekat naaʼin na laülaashiikana nüpüleerua wanee wayuu ojuʼitinnakai shiaʼaya neʼe tü keeʼireekat naaʼin Jehová: niyaawajaain suulia naainjala jee nüleʼejüin nüchikuaʼa naʼakamüin na wawalayuukana (paashajeʼera Jeremías 3:12).

8. ¿Jamüsü watüjaakaʼa saaʼu nümüliajülin maʼin Jehová sünainjee tü nüküjakat Jesús nüchiki wanee wayuu nümaa nüchon? (Lucas 15:7).

⁸ Soto waaʼin tü wekirajaakalü anain sünain ekirajaaya 32 nüchiki wanee wayuu nümaa nüchon nüküjakana achiki Jesús. Niʼraiwaʼaya chi nüchonkai wattaʼajee amülialaasü naaʼin naalin. «Nuwataakalaka nüpanapa sümaa nukoʼojooin nünain jee nutuʼlaka nuwalapaʼa» (Luc. 15:20). Jülüja waaʼin tü naaʼinrakat chia wayuukai. Nnojotsü naʼatapajüin neʼe nüntüin chi nüchonkai nünainmüin süpüla nüküjain nümüin motuinjatüin naaʼin naainjala. Niʼraiwaʼaya nia wattaʼajee awataashi nia nünainmüin maʼaka naaʼinrüin shia wanee wayuu aikai apüla nüchon. Müinjatia neʼe nakuwaʼipa na laülaashiikana soʼu nakaalinjain chi wayuu ojuʼitinnüshikai. Tü nachekakat nüpüleerua shia nüleʼejüin nüchikuaʼa nünainmüin Jehová (Luc. 15:22-24, 32). Nüleʼejüle nüchikuaʼa, talateechi maʼin Jehová, Jesús, na aapieekana otta napüshuaʼa na wawalayuukana (paashajeʼera Lucas 15:7).

9. ¿Kasa nüchekaka Jehová nüpüleerua chi wayuu ojuʼitinnüshikai?

⁹ Wekirajaaitpa anain nujuʼitirüin Jehová naʼakajee na wawalayuukana chi wawala nnojoikai ayaawajaweein suulia naainjala. Nnojoipejeʼe nia niyüülajaleein, nücheküin nüpüleerua nüleʼejüinjachin nüchikuaʼa. Anuu nünüiki Jehová suluʼu Oseas 14:4 nachiki na ayaawajaakana suulia naainjala: «Moteerü taaʼin nnojoliin naya waneepiain tamaa. Aijeena naya tapüla [...], nnojoleechi taya jashichin namüin». Jülüjeesü maʼin naaʼin na laülaashiikana eere wanee kasa nayaawataka anainjee nuuʼulaale suulia naainjala chi kaainjalashikai. Nukumajeein sukuwaʼipa chi ojuʼitinnüshikai nüleʼejamaatüin nüchikuaʼa nünainmüin Jehová.

10, 11. ¿Kasa naaʼinrajatka na laülaashiikana napüleerua na kakaliainnakana ojuʼitinnüin naʼakajee na wawalayuukana?

¹⁰ Sülatüirüle wainma juya süchikijee nujuʼitinnüin wanee wawala naʼakajee na wawalayuukana, ¿kasa naaʼinrüinjatka na laülaashiikana süpüla nakaalinjain nia? Eesüjaʼa nnojoluitpale naaʼinrüin chia wayuukai tü kasa mojusü nujuʼitinnakalü anainjee otta motuitpale naaʼin shia. Nakumajeerü na laülaashiikana sukuwaʼipa süpüla nalapalaain naaʼu. Oʼuraajeena naya nüpüleerua chi wayuukai nalapalaapa naaʼu otta naküjeerü nümüin eein süpüla nüleʼejüin nüchikuaʼa nünainmüin Jehová. Eesüjaʼa matchinre maʼin nunoula wanee wayuu kakaliaichire nia ojuʼitinnüin. Nüleʼejeere nüchikuaʼa nakumajeerü na laülaashiikana sukuwaʼipa süpüla nikirajünüin nüchikuaʼa sünain tü Bibliakat. Ekirajüneechi nia süpülapünaa nüleʼejüin nüchikuaʼa. Nayapejeʼe na laülaashiikana aneeküinjanakana chi wawala ekirajüinjachikai nia.

¹¹ Nashatüinjatü na laülaashiikana nukuwaʼipa Jehová, aipürai nia wayuu jee amülialaasü naaʼin naalin chi kaainjalashikai. Makalaka nachajaainjanain na laülaashiikana na kakaliainnakana ojuʼitinnüin naʼakajee na wawalayuukana, naküjeerü namüin eein süpüla naleʼejüin nachikuaʼa. Niyaawajaale wanee wayuu suulia naainjala, niiʼiratüitpale tü jülüjakat naaʼin jee nukuwaʼipa, aleʼejinnamaatüinjachi nia nüchikuaʼa naʼakamüin na wawalayuukana (2 Cor. 2:6-8).

12. (1) ¿Kasa jülüjainjatka naaʼin na laülaashiikana süpülapünaa naleʼejirüin wanee wayuu naʼakamüin na wawalayuukana? (2) ¿Jamüsü nnojotkaʼa jülüjainjatüin waaʼin nnojoleechin nümülialaain Jehová naalin chi wayuu mojukai maʼin aainjala? (Paashajeʼera tü nootakat).

¹² Süpülapünaa naleʼejirüin na laülaashiikana wanee wayuu naʼakamüin na wawalayuukana, jülüjainjatü naaʼin kasain nujuʼitinnüin anainjee jee shiimainre niyaawajaain suulia naainjala. Jülüjainjatü naaʼin nujuʼitinnüle sünainjee nütaüjaain tepichi, nikirajüin alawaa nüchiki Maleiwa jee nukumajüin sukuwaʼipa süpüla najaʼlajeʼerüin tü kasaalüükat (Mal. 2:14; 2 Tim. 3:6). Naaʼinmajüinjana na laülaashiikana na wawalayuukana. Nüleʼejinnüle nüchikuaʼa wanee wayuu naʼakamüin na wawalayuukana, nnojotsü mojushiinjatüin tia wamüin. Nücheküin Jehová nüleʼejüin nüchikuaʼa wanee wayuu shiimainrejeʼe niyaawajaain suulia naainjala. Nnojotpejeʼe jülüjainjatüin naaʼin nnojoleechin nümülialaain aaʼin Jehová naalin chi wayuu mojukai maʼin aainjala (1 Ped. 2:10).c

NAAʼINRAJATKA NA WAWALAYUUKANA

13. ¿Kasa waaʼinrajatka süküjünüle wamüin nüchiaanüitchipain wanee wawala natuma na laülaashiikana otta kasa tü nnojoluinjatkat waaʼinrüin nujuʼitinnüle wanee anoujashi naʼakajee na wawalayuukana?

¹³ Süküjünüle wamüin nüchiaanüitchipain wanee wawala natuma na laülaashiikana, ayateena waya nümaʼawalin süka watüjaain saaʼu niyaawajaaitchipain suulia naainjala (1 Tim. 5:20). Nümaajeena waya süka choʼujaajeerüin nümüin watütüleʼerüin naaʼin. Waaʼinreerü tia süka ayatayülin nia wawalain (Heb. 10:24, 25). Nnojotpejeʼe müinjatüin wakuwaʼipa nümüin wanee wayuu ojuʼitinnakai naʼakajee na wawalayuukana. Süküjain wamüin tü Bibliakat nnojoliinjanain nümaain waya jee nnojoliinjanain wekaain nümaa (1 Cor. 5:11).

14. ¿Kasa waaʼinrajatka nüntüle sünain tü outkajawaakat wanee wayuu ojuʼitinnakai naʼakajee na wawalayuukana? (Piirakaa sümüin tü ayaakuaakat).

¹⁴ ¿Shiache süküjaka wamüin 1 Corinto 5:11 nnojolinjachin wounejaain sünain tü outkajawaakat wanee wayuu ojuʼitinnakai naʼakajee na wawalayuukana jee nnojoluinjachin wasaküin nia sünain tü outkajawaakat? Nnojo, tü süküjeekat wamüin shia nnojoliinjanain nümaain waya. Süka watüjaaitpain saaʼu tü sümakat tü Bibliakat süchiki tia, waneeküinjatü süka waaʼin wamüiwaʼa wounejaainjachire sünain tü outkajawaakat chi wayuu ojuʼitinnüshikai wapüshire nia jee aleewapuʼule waya nümaa. ¿Kasa waaʼinrajatka nüntüle sünain tü outkajawaakat? Nnojoipuʼushi wasaküin nia, aluʼujasaʼa maaʼulu waneeküinjatü süka waaʼin wamüiwaʼa wasaküinjachire nia, waküjain nümüin talatüin waya nümaa süka nüntüin sünain tü outkajawaakat. Eejeena wawalayuu eekana anashiin namüin nasaküin nia, nnojoliipejeʼe waya kamaʼainjanain nümaa sünain yootoo jee nümaʼawalin waya sünain aaʼinraa waneirua kasa.

15. ¿Jaralii na wayuu kaainjaralii saashajaakana achiki 2 Juan 9-11? (Paashajeʼera tü pütchi kanüliakat «¿Nayache na wayuu naashajaakana achiki Juan na naashajaakana achiki Pablo?»).

¹⁵ Eejeena eekai nasakirüin sünain tüü: «¿Nnojotsüjasaʼa müin tü Bibliakat wamüin wanaaweerüin waaʼin nümaa wanee wayuu aaʼinrakai kasa mojusü wasaküle nia?» (paashajeʼera 2 Juan 9-11). Na aashajaanakana achiki süpülapünaa tia wetsiikulokalüirua naya na ekirajakana alawaa nüchiki Maleiwa otta na wayuu ekirajakana sünain tü kasa mojusükat (Apoc. 2:20). Eere wanee wayuu aaʼinrakai tia, nnojoleena alapalaanüin aaʼu natuma na laülaashiikana. Sümaʼainruʼu neeʼiratüin nakuwaʼipa, nnojoliinjana wasaküin naya jee wounejaain sünain tü outkajawaakat.

WAMÜLIALAA NAALIN NA KAAINJALAKANA MAʼAKA SÜMÜLIALAAIN NAAʼIN JEHOVÁ NAALIN

16, 17. (1) ¿Kasa nüchekaka Jehová napüleerua na kaainjalakana? (Ezequiel 18:32). (2) ¿Kasa naʼyataajiraaka apüla na laülaashiikana nümaa Jehová?

¹⁶ ¿Kasa watüjaka sünainjee tü jaʼraisükat ekirajaaya? Shia nnojoluin nücheküin Jehová outajachin wanee wayuu saaʼujee naainjala (paashajeʼera Ezequiel 18:32). Tü nüchekakat Jehová shia anajiraainjachin chi kaainjalashikai nümaa nüchikuaʼa (2 Cor. 5:20). Wainma na anoujashii namaiwajana kaainjalakana. Nüküjapejeʼe Jehová namüin kojuyatua nayaawajaainjanain suulia naainjala jee naleʼejüinjanain nachikuaʼa nünainmüin. Aʼyataajiraashii na laülaashiikana nümaa Jehová süpüla nakaalinjain na kaainjalakana. Naküjawalin namüin eein süpüla nayaawajaain suulia naainjala jee naleʼejüin nachikuaʼa nünainmüin Jehová (Roma 2:4; 1 Cor. 3:9).

¹⁷ Miyoʼu maʼin talataa chaa iipünaa niyaawajaale wanee wayuu suulia naainjala. Talatüsü maʼin naaʼin Jehová chi Washikai nüleʼejüle nüchikuaʼa wanee wawala naʼakamüin na wawalayuukana. Süka watüjaain saaʼu nümüliajülin maʼin wayuu Jehová jee anamiain maʼin nia, kooʼomüinsü tü naalinkat wapüla (Luc. 1:78).