Washata nukuwaʼipa Jesús, waküja pütchi süka süpüshuaʼa waaʼin

1. ¿Kasa naataka aluʼu wakuwaʼipa noulia na anoujayaashiikana nünain Maleiwa?

NAATASÜ wakuwaʼipa noulia na anoujayaashiikana nünain Maleiwa süka waküjeein maʼin pütchi sümüin wayuu (Tito 2:14). Eejeetpejeʼe kaʼi nnojoleetka oʼu suchuntaain waaʼin waküjain pütchi. Eesü süpüla müin waaʼin maʼaka naaʼin wanee laülaashi makai anüiki: «Eesü kaʼi nnojotka oʼu taaʼin sünain aküjaa pütchi».

2. ¿Jamüsü eekaʼa kaʼi nnojotka oʼu waaʼin sünain aküjaa pütchi?

² Eesüjaʼa kamalainre wamüin waneirua aʼyatawaa nümüin Jehová suulialeʼeya aküjaa pütchi. Jamüsüjaʼa wanaa sümaa wakumajüin piichi outkajaalee, watütüleʼerapa naaʼin na wawalayuukana jee wakaalinjapa na alatakana amüin wanee kasa, talatüsü waaʼin jee anasü waaʼin. Waʼyataajiraapa namaa na wawalayuukana paaʼinwashii jee aijiraashii waya weʼrüin kojutuin namüin tü kasa waaʼinrakat. Eepejeʼe nnojorüle anain waaʼin sünain aküjaa pütchi kakaliainnale waya aküjain pütchi suluʼu wanee mma sümaa nnojoluin saapajüin maʼin wayuu wanüiki jee sutuma eein wayuu jashichikana wamüin. Watüjaa aaʼulu süpüleeruaaneerüin maʼin waaʼin sülüʼütpa nükalia Maleiwa (Mat. 10:22). ¿Kasa waaʼinrajatka süpüla ayatüin waküjain pütchi süka süpüshuaʼa waaʼin?

3. ¿Kasa watüjaka nüchiki Jesús sünainjee tü sümakat Lucas 13:6-9?

³ Anasü washatüle nukuwaʼipa Jesús süpüla waküjain pütchi süka süpüshuaʼa waaʼin. Wanaa sümaa yaajachin Jesús mmapaʼa nnojotsü amalajaain naaʼin, ayatüshi nia aküjain pütchi süka süpüshuaʼa naaʼin (paashajeʼera Lucas 13:6-9). Nuʼwanaajireʼerüin nukuwaʼipa Jesús nümaa wanee wayuu aaʼinmajakai soʼu apünüin juya wanee higuera, shiiʼiree kachooin shia, machonpejeʼe neʼe shia. Müsia nukuwaʼipa Jesús, apünüin juya nüküjain pütchi namüin na judíokana, palitchonpejeʼe na anoujakana nünain. Maʼaka nüchajaain maʼin sukuwaʼipa chia wayuukai süpüla kachoinjatüin tü higuerakat, müsia nukuwaʼipa Jesús, nüchajaain maʼin sukuwaʼipa süpüla nüküjain pütchi sümüin wayuu jee nanoujainjanain.

4. Püküja tü pienchisü kasa wekirajaainjatkalü anain sünainjee nukuwaʼipa Jesús

⁴ Sünain ekirajaayakat tüü, wekirajaajeerü anain nüküjain maʼin pütchi Jesús süka süpüshuaʼa naaʼin soʼunnaa tü aipiruakat kashi süpülapünaa outuin nia (Luc. 10:1). Otta wekirajaajeerü anain pienchisü kasa anaka süpüla washatüin sünainjee nukuwaʼipa Jesús: (1) Naaʼinmaasü maʼin tü niʼyataainkat nümüin Jehová, (2) jülüjasü naaʼin tü pütchi ekeraajüinjatkat suluʼujee tü Bibliakat, (3) nunoujain sünain nükaalinjüneechin nutuma Jehová otta (4) jülüjasü naaʼin eejeenain na wayuu aapajeekana nünüiki.

NAAʼINMAASÜ MAʼIN TÜ NIʼYATAAINKAT NÜMÜIN JEHOVÁ

5. ¿Kasa naaʼinraka Jesús sutuma naaʼinmaain maʼin niʼyataain nümüin Jehová?

⁵ Nüküjain maʼin Jesús «tü pütchi anakat maʼin süchiki niainjachin aluwataain Maleiwa», jama shiain ajütüüshin apüla tia nia (Luc. 4:43). Mayaainjeʼe nütüjaain aaʼu nuʼutunuinjachin aaʼin naaʼinmaasü maʼin aküjaa pütchi jee «ekirajüshi nia wayuu sainküin pueulo eekai miyoʼuin jee eekai joʼuuchoin» (Luc. 13:22). Nikirajüin na nikirajüinkana süpüla natüjainjanain aküjaa pütchi (Luc. 10:1).

6. ¿Kasapülajatü sukumajünüin piichi outkajaalee otta kasapülajatü tü aʼyatawaa aainjünakat suluʼu Weteet? (Piirakaa sümüin tü ayaakuaakat).

⁶ Nücheküin Jehová otta Jesús waaʼinmaain tü aküjaakat pütchi maʼaka naaʼinrüin shia Jesús (Mat. 24:14; 28:19, 20). Sünainpünaasü tü aküjaakat pütchi süpüshuaʼa tü waʼyataainkat nümüin Maleiwa. Jamüshiijaʼa waya wakumajüin piichi outkajaalee süpüla noutkajaain wamaa na wayuu waküjakana amüin pütchi. Otta süpüshuaʼa tü aainjünakat suluʼu Weteet shia süpüla wekeraajüin tü aküjaakat pütchi jee wakaalinjain na wawalayuu müliakana sutuma wawai jee sukutkujaain mma süpüla eeinjatüin namaʼana tü kasa choʼujaakat namüin jee ayatüin naya sünain aküjaa pütchi. Anasü jülüjale waaʼin waneepia shiain kojutuleeka nümüin Jehová waküjain pütchi. Jülüjale waaʼin tia waküjeerü pütchi süka süpüshuaʼa waaʼin sümüin wayuu. Anuu nünüiki wanee wawala laülaashi, János nünülia, chejeʼewai nia Hungría: «Mayaainjeʼe wainmain tü aʼyatawaa eekat süpüla waʼyataain nümüin Maleiwa shia waaʼinmaainjatkat maʼin tü aküjaakat pütchi».

7. ¿Jamüsü ayatüinjanakaʼa waküjain pütchi naashin Jehová? (1 Timoteo 2:3, 4).

⁷ Wane kasa waaʼinrajatka süpüla waküjain pütchi süka süpüshuaʼa waaʼin shia alin wapüla wayuu maʼaka alin naya nüpüla Jehová. Nücheküin chi Maleiwakai saapajüin wayuu maʼleekalia jee shiyaawatüinjatüin saaʼu tü pütchi shiimainkat (paashajeʼera 1 Timoteo 2:3, 4). Nikirajüin waya Jehová süpüla tütüinjanain waya sünain aküjaa pütchi, jama eein süpüla suʼttaain wayuu sutuma. Jamüsüjaʼa suluʼu tü poyeetokot Ai wapüla wayuu: wekiraja wayuu ashajünüsü süchiki tü wanüikinjatkat sünain aküjaa pütchi süpüla wekirajüin wayuu jee woutiisainjanain naya. Nnojorüle nanoujain na wayuu waküjakana amüin pütchi maaʼulu yaa eeshiijaʼa nanoujale mapa soʼunnaa tü kaʼi shiʼrüinjatkalü oʼu maʼin müliaa wayuu. Eesüjaʼa sotule naaʼin tü pütchi waküjakat namüin jee nacheküin naʼyataain nümüin Jehová. Müsüjeseʼe ayatüinjanain waya aküjain pütchi sümüin wayuu.

JÜLÜJASÜ NAAʼIN TÜ PÜTCHI EKERAAJÜINJATKAT SULUʼUJEE TÜ BIBLIAKAT

8. ¿Kasa naaʼinraka Jesús sutuma niyaawatüin saaʼu tü pütchi ekeraajüinjatkat suluʼujee tü Bibliakat?

⁸ Nütüjaa aaʼu Jesús jamüinjatü sukuwaʼipa süpüla shikeraajüin tü pütchi aküjünatüjütkalia suluʼu tü Bibliakat. Müsüjeseʼe niyaawatüin saaʼu nüküjainjachin pütchi soʼu apünüin shikii juya shiatapünaamüin (Dan. 9:26, 27). Nütüjaa aaʼu Jesús nuʼutunuinjachin aaʼin jee joujainjatüin sülatüin tia nümüin. Niyaawata aaʼu tia sutuma tü pütchi aküjünatüjütkalia nüchiki paala (Luc. 18:31-34). Sutuma niyaawatüin saaʼu Jesús tü pütchi ekeraajüinjatkat suluʼujee tü Bibliakat najayatüin tü kaʼikat süpüla nüküjain pütchi jee nikeraajüin tü aʼyatawaa naapakat Maleiwa nümüin.

9. ¿Jamüsü waküjeekaʼa maʼin pütchi watüjaapa saaʼu tü pütchi ashajünatüjütkalia achiki suluʼu tü Bibliakat?

⁹ Waküjeerü pütchi süka süpüshuaʼa waaʼin jülüjale waaʼin tü pütchi ekeraajakat suluʼujee tü Bibliakat jee tü ekeraajüinjatkat mapeena. Watüjaa aaʼulu sülüʼülüin sükalia süpüla sajaʼttajatüin tü kasa alatakat sainküin mma. Weʼrüin shikeraajüin tü sümakat tü Bibliakat süchiki nakuwaʼipa na wayuukana jee tü alatüinjatkat sainküin mma. Wayaawata aaʼu sutuma tü sümakat tü Bibliakat jamüin peʼipaaka «chi aluwataai uuchijeʼewaikai» (Estados Unidos sümaa Reino Unido) «nümaa chi aluwataai palaajeʼewaikai» (Rusia namaa na nümaajanakana) (Dan. 11:40). Wayaawata aaʼu kasain kayaawasein nuuʼui niyaakua chi wayuu ashajünakai achiki suluʼu Daniel 2:43-45. Wayaawata aaʼu shiain kayaawasein Estados Unidos sümaa Reino Unido. Sutuma wayaawatüin saaʼu tü pütchi aküjünatüjütkalia suluʼu tü Bibliakat watüjaa aaʼulu sülüʼülüin sükalia süpüla najaʼttirüin Maleiwa napüshuaʼa na aluwataaliikana saaʼu mma. Süka sülüʼülüin maʼin tia kaʼikat waküjainjatü maʼin pütchi süka süpüshuaʼa waaʼin.

10. Püküja waneirua pütchi aküjünatüjütkalia achiki suluʼu tü Bibliakat atütüleʼeraka naaʼin waneinnua wawalayuu süpüla ayatüin naküjain pütchi.

¹⁰ Sutuma watüjain saaʼu tü naaʼinrüinjatkat Maleiwa mapeena waküjeein shia sümüin wayuu. Anuu sünüiki wanee wawala, Carrie sünülia, kepiasü shia República Dominicana: «Wanaa sümaa teʼrüin müliain maʼin wayuu tayaawata aaʼu choʼujaain natüjaainjatüin saaʼu tü eeinjatkat nutuma Maleiwa mapeena». Sutuma watüjaain saaʼu tü pütchi süküjakat tü Bibliakat süchiki tü alatüinjatkat maaʼulu jee mapeena wayaawata aaʼu nükaalinjeenain waya Jehová süpüla wekeraajüin tü aküjaakat pütchi. Jülüjataa waaʼin sünüiki wanee wawala chejeʼewat Hungría, Leila sünülia. Müsü shia: «Tü tatüjakat sünainjee Isaías 11:6-9, shia eein süpüla niiʼiratüin nukuwaʼipa wanee wayuu nutuma Jehová jaʼitaichi mojulaain maʼin nia. Müsüjeseʼe taküjeein maʼin pütchi sümüin wayuu maʼleekalia». Anuu nünüiki wanee wawala chejeʼewaikai Zambia, Christopher nünülia: «Ashajünüsü suluʼu Marcos 13:10 süküjünüinjatüin tü pütchi anakat maʼin sainküinpünaa tü mmakat. Anasü taaʼin süka taʼyanaajiraain namaa na wawalayuukana sünain aküjaa pütchi süpüla shikeraajüin tia aküjünatüjütkalia achiki paala». ¿Jeʼtsü tü pütchi aküjünatüjütkalia achiki paala suluʼu tü Bibliakat atütüleʼeraka paaʼin süpüla ayatüinjachin pia aküjain pütchi?

NUNOUJAIN SÜNAIN NÜKAALINJÜNEECHIN NUTUMA JEHOVÁ

11. ¿Jamüsü choʼujaakaʼa nunoujainjachin Jesús sünain nükaalinjüneechin nutuma Jehová süpüla ayatüinjachin nia sünain aküjaa pütchi? (Lucas 12:49, 53).

¹¹ Nütüjaa aaʼu Jesús nükaalinjüneechin nutuma Jehová süpüla ayatüin nia aküjain pütchi süka süpüshuaʼa naaʼin. Mayaainjeʼe kojutuin wayuu nutuma Jesús nüküjapa pütchi nütüjaa aaʼulu eejeenain na wayuu ayoutakana shia jee aʼürüleenakana nia (paashajeʼera Lucas 12:49, 53). Sutuma mojushiin namüin nekiipüʼü na judíokana tü pütchi nüküjakat Jesús kojuyatua noʼutireein aaʼin nia (Juan 8:59; 10:31, 39). Nnojoipejeʼe ooʼulaain Jesús suulia aküjaa pütchi süka nütüjaain saaʼu eein Jehová nümaa. Anuu nünüiki: «[Nnojoishi] tamüiwaʼain taya, eeshi chi Tashikai tamaa, chi Kajünalakai taya» (Juan 8:16). Anuu nünüiki mapa: «Nnojoishi nüpütüichin taya tamüiwaʼa süka taaʼinrüin waneepia tü kasa anashiikat nümüin» (Juan 8:29).

12. ¿Kasa nüküjaka Jesús namüin na nikirajüinkana süpüla ayatüin naküjain pütchi mayaainjeʼe müliain naya atumawaa?

¹² Sutuma nütüjaain saaʼu Jesús mülieenain atumawaa na nikirajüinkana kojuyatua nüküjain namüin nakaalinjüneenain nutuma Jehová (Mat. 10:18-20; Luc. 12:11, 12). Otta nüküjain namüin eejüinjatüin naaʼin (Mat. 10:16; Luc. 10:3). Otta nnojoluinjatüin napüleeruaain saaʼin wayuu nnojorüle saapajeein nanüiki (Luc. 10:10, 11). Nüküjain Jesús namüin noʼunajaainjanain suluʼumüin wanee mma müliale naya atumawaa (Mat. 10:23). Mayaainjeʼe nütüjaain aaʼu Jesús nükaalinjüneechin nutuma Jehová jee nüküjeein maʼin pütchi eejüsü naaʼin suulia sülatüin kasa mojusü nümüin (Juan 11:53, 54).

13. ¿Jamüsü watüjaakaʼa saaʼu nükaalinjeenain waya Jehová?

¹³ Apüleeruaanüsiaʼaya waaʼin maaʼulu yaa. Müsüjeseʼe choʼujaain nükaalinjain waya Jehová süpüla ayatüinjanain waküjain pütchi süka süpüshuaʼa waaʼin (Apoc. 12:17). Watüjaa aaʼu nükaalinjeenain waya Jehová süka nuchuntuin shia Jesús nümüin. Naaʼinrüin Jehová tia, naaʼinmajüin na aluwataaushikana. Ashajünüsü süchiki tia suluʼu Juan kapiitulo 17. Suluʼu tü karaloʼutakat Aluwataaushikana ashajünüsü süchiki tü naaʼinrakat Jehová süpüla nükaalinjain na nikirajüinkana Jesús süpüla ayatüin naküjain pütchi mayaainjeʼe süpüleeruaanüin naaʼin. Nuchuntuinña Jesús nümüin Jehová süpüla naaʼinmajüin napüshuaʼa na wayuu aapaakana sümaa tü pütchi naküjakat na aluwataaushikana nümüin. Ayatüsia naaʼinrüin Jehová tü nuchuntakat Jesús nümüin. Nükaalinjain waya süpüla ayatüin waküjain pütchi süka süpüshuaʼa waaʼin (Juan 17:11, 15, 20).

14. ¿Jamüsü watüjaakaʼa saaʼu ayateenain waküjain pütchi süka süpüshuaʼa waaʼin? (Piirakaa sümüin tü ayaakuaakat).

¹⁴ Sülüʼülapa nükalia Maleiwa kapüleejeerü wamüin aküjaa pütchi, watüjaapejeʼe saaʼu nükaalinjeenain waya Jehová (Luc. 21:12-15). Maʼaka naaʼinrüin Jesús jee na nikirajüinkana, nnojoishii waya peʼipaain namaa na wayuukana jee nnojotsü wapüleeruain naaʼin shiiʼiree naapajüin tü pütchi waküjakat namüin. Suluʼu waneirua mma apülajünüsü noulia na wawalayuukana naküjain pütchi ayatapejeʼe naya aküjain pütchi süka nükaalinjain naya Jehová. Maʼaka naapüin Jehová tü nüpülainkat namüin na anoujashii namaiwajanakana naapeeriaʼaya shia wamüin süpüla wekeraajüin tü aküjaakat pütchi (2 Tim. 4:17). Weʼitaale waaʼin nünain Jehová ayateena waya aküjain pütchi süka süpüshuaʼa waaʼin.

JÜLÜJASÜ NAAʼIN EEJEENAIN NA WAYUU AAPAJEEKANA NÜNÜIKI

15. ¿Jamüsü watüjaakaʼa saaʼu jülüjain naaʼin Jesús eejeenain na wayuu aapajeenakana tü pütchi nümakat namüin?

¹⁵ Nütüjaa aaʼu Jesús eejeenain na wayuu aapajeekana nünüiki. Müshijeseʼe ayatüin nia sünain aküjaa pütchi süka süpüshuaʼa naaʼin. Wanee juya süchikijee nuʼttuin Jesús sünain aküjaa pütchi nüküjain wainmain na wayuu aapajeekana tü pütchikat. Müsüjeseʼe nuʼwanaajireʼerüin nakuwaʼipa sümaa wanee aʼttiee kettaaitpaka süpüla atpajünaa (Juan 4:35). Maʼaka wanee juya süchikijee tia, müshi Jesús namüin na nikirajüinkana: «Watta saalii tü pünajüt eekai keraairüin» (Mat. 9:37, 38). Anuu nünüiki Jesús mapa: «Watta saalii tü pünajüt [...]. Shiaka anain juchuntule nümüin chi Kaʼttiashikai tü pünajütkat süpüla nuluwataainjanain wayuu aʼyataainjanakana sünain» (Luc. 10:2). Jülüjasü naaʼin Jesús waneepia eejeenain na wayuu aapaajeenakana sümaa tü pütchi nümakat namüin. Talatüsü maʼin naaʼin niʼrapa nunoujain wanee wayuu (Luc. 10:21).

16. ¿Jeʼtsü tü piamasü sukuwaʼipa nüküjakat Jesús süpüla nayaawatüin saaʼu na nikirajüinkana choʼujaain naküjainjanain maʼin pütchi? (Lucas 13:18-21) (Piirakaa sümüin tü ayaakuaakat).

¹⁶ Nütütüleʼerüin naaʼin Jesús na nikirajüinkana süpüla ayatüin naküjain pütchi süka eejeenain na wayuu aapajeenakana tü pütchikat. Anuu piamasü sukuwaʼipa niʼitaaka Jesús süpüla nayaawatüin saaʼu tia na nikirajüinkana (paashajeʼera Lucas 13:18-21). Nüküjain Jesús müin tü aküjaakat pütchi maʼaka saaʼin wanee süʼü «mostaza». Mayaainjeʼe joʼuuchon shia miyoʼuin maʼin tü suuliakat süpünajünapa. Tü nüküjeekat Jesús sükajee tia shia wainmeenain na wayuu aapajeenakana tü pütchi anakat maʼin. Shiyaawasesü nutuma Jesús tü soolojiakat pan sümaa tü aküjaakat pütchi. Tü nüküjeekat sükajee tia shia süküjüneerüin pütchi sainküinpünaa tü mmakat süchiki nuluwataainjachin Maleiwa jee neeʼirateerü nakuwaʼipa na wayuukana shiʼipaʼaya. Nüküjain tia Jesús namüin na nikirajüinkana süpüla nayaawatüin saaʼu nakaalinjeenain wainmain wayuu ayatüle naya sünain aküjaa pütchi.

17. ¿Jamüsü ayatüinjanakaʼa waküjain pütchi süka süpüshuaʼa waaʼin?

¹⁷ Atütülaasü maʼin waaʼin jülüjapa waaʼin tü kasa anasü eekat sünainjee süküjünüin pütchi sainküin mmakat. Watta naalii na wayuu outkajaakana wamaa juyawai sünain tü Outkajawaakat eere Sotuin Waaʼin Outuin Jesús jee watta naalii na wayuu ekirajakana wamaa sünain tü Bibliakat jee wainma na wayuu aküjaliikana pütchi wamaa jee woutiisakana. Nnojotsü watüjaain saaʼu jeʼreenain na wayuu aapajeenakana tü pütchi waküjakat namüin. Watüjaapejeʼe saaʼu watteena maʼin naalii na wayuu oʼttaajeenakana nutuma Jehová soʼunnaa tü kaʼi shiʼrüinjatkalü oʼu maʼin müliain wayuu (Apoc. 7:9, 14). Nütüjaa aaʼulu Jehová eeyülüinña na wayuu aapajeenakana tü pütchi anakat maʼin. Müsüjeseʼe waküjainjatüin pütchi süka süpüshuaʼa waaʼin.

18. ¿Jamüsü waküjeekaʼa pütchi sümaa yalayalain waaʼin?

¹⁸ Eʼraajünüshii na anoujashiikana nünain Jesús sutuma naküjain pütchi süka süpüshuaʼa naaʼin. Sutuma naküjain maʼin pütchi na nikirajüinkana Jesús sümaa yalayalain naaʼin nayaawata aaʼu na wayuukana nümaatalapuʼuin naya Jesús (Aluw. 4:13). Müsia maaʼulu yaa, waküjeein maʼin pütchi sümaa yalayalain waaʼin süpüla nayaawatüin saaʼu na wayuukana washatüin nukuwaʼipa Jesús.