Wainma maʼin tü kasa tatüjakat nünainjee chi Atüjakai maʼin Ekirajaa

ATÜJASHI MAʼIN TAYA NANAINJEE NA KACHONKANA TAYA

Soʼu tü juyakat 1957 akolojooshii na kachonkana taya Italiajee chamüin Canadá suluʼu tü pueulo kanüliakat Kindersley chaa Saskatchewan. Nekirajaka sünain tü Bibliakat palit kaʼi süchikijee tia, kojutusü maʼin namüin tü natüjakalü. Sotusü taaʼin jintüliiwaʼaya taya aküjashi maʼin taya pütchi waneepia namaa na tapüshikana, mataashi pürekutsootkai aaʼusiliaat taya sümaa mekiisalüin touyase.

Maʼletsesalii na kachonkana taya, nachajaapejeʼe maʼin sukuwaʼipa süpüla naʼyataainjanain nümüin Jehová. Jamüsüjaʼa soʼu 1963 eejatü wanee outkajawaa miyoʼu eere nantüin na wawalayuu naatakana oumain chaa Pasadena (California, Estados Unidos). Süka noʼuneein maʼin sünain, noiküin tü kasa eejatkat namaʼana süpüla eeinjatüin nasapia. Soʼu 1972 akolojooshii waya suluʼumüin wanee pueulo Trail sünülia, eetaasü maʼaka 1.000 kilómetro sünainjee Columbia Británica (Canadá), süpüla waküjainjanain pütchi namüin na aashajaakana italiano. Aʼyataapuʼushi chi tashikai sünain epitajaa jee nnojotsü naapaain aʼyatawaa walaaka maʼin süka naaʼinmaain maʼin niʼyataain nümüin Maleiwa.

Anasü maʼin nakuwaʼipa na kachooinkana taya tapüleerua jee napüleerua tawalayuu, ichesü tanoula natuma. Nekirajüin taya naapeerüin Jehová tamüin tü kasa choʼujaakat taaʼinmaale taʼyataain nümüin (Mat. 6:33).

OʼTTUSHI TAYA SÜNAIN AʼYATAWAA WANEEPIA NÜMÜIN MALEIWA

Soʼu 1980 kasaatshi taya sümaa Debbie, saaʼinmaasü maʼin shiʼyataain nümüin Jehová, pürekutsootka shia apünüin kashi süchikijee kasaalüin waya. Waneemüin juya wakolojooka suluʼumüin wanee mma süpüla wakaalinjain sünain aküjaa pütchi, pürekutsootkalaka taya.

Eemiajaasü wanoula mapa jee akolojooweesü waaʼin. Waashajaaka palajana nümaa chi wawala alapalaaikai waaʼu, lotusü nünüiki wamüin: «Shiaʼala neʼe jülüjaka jaaʼin tü kasa mojusü alataka jümüin jamüsüjaʼa jaaʼinmaale maʼin tü kasa anasü jiʼrakat katchinjeerü jaaʼin». Antüsü suluʼumüin waaʼin tü nümakat (Sal. 141:5). Woonoomaataka sümaa nünüiki chi wawalakai jee weʼrüin nakooʼomüinreein na wawalayuukana naʼyataain nümüin Jehová jaʼitakajeʼe na tepichikana otta waneinnua wawalayuu manoujainkana aʼwayuuse. Tü watüjakat sünainjee tia shia waaʼinmaainjatü maʼin tü kasa anasükat otta weʼitaainjatü waaʼin sünain nükaalinjeenain waya Jehová soʼu tü kaʼi anakalü oʼu shia nümüin (Miq. 7:7). Akatsüinraasü wanoula süchikuaʼa jee anoutaasü shiʼipaʼaya tü kasa alatakat wamüin.

Woʼunaka mapa sünain tü ekirajawaa napülajatkat na Pürekutsootkana, noʼutku na wawalayuu ekirajaakana waya aʼyataashii naya paala nümüin Jehová suluʼu wanee mma naata. Neeʼiyataka wamüin waneirua ayaakua jee naküjaka wamüin tü kasa kapüleesü otta tü kasa anasü neʼrakat sünainjee naʼyataain nümüin Maleiwa. Keeʼireejaaka waaʼin misioneeroinjanain waya, shiaka waʼyataain achiirua tia soʼujee tia.

Süpüla yapain waya süpüla misioneeroin waya akolojooshii waya soʼu 1984 chamüin Quebec, 4.000 kilómetro shia sünainjee Columbia Británica. Francés nanüikipala na wayuu chejeʼewaliikana makalaka wekirajaain sünain jee wekiʼralaain sünain nakuwaʼipa. Wanee kasa kapüleʼewaika wamüin shia manneetsewalin waya. Nuuʼulaaka waya wanee wayuu washirü süpüla wakotchojüin papa süpütaala nuʼttia. Shia wekawaika tia soʼukai. Sutuma sütüjain aʼlakajawaa Debbie wainma sukuwaʼipa süʼlakajaaya tü papakat. Mayaainjeʼe sülatawalin wamüin kasa kapüleesü talatüsü maʼin waaʼin jee wayaawatüin saaʼu naaʼinmajüin waya Jehová (Sal. 64:10).

Soʼu wanee kaʼi ounejünüshii waya süpüla chainjanain waya suluʼu tü Weteet chakat Canadá. Ashajüshii paala waya süpüla woʼunuinjanain sünain tü Ekirajaaleekat Galaad. Müsüjeseʼe wainmajüin waaʼin waapajapa tü eenajünakalü apüla waya. Weʼraajaka chayaa chi wawalakai Kenneth Little napüshi nia na shikiipüʼükana tü aʼyatawaakat suluʼu Weteet, wasakitka nia: «¿Jameetka sukuwaʼipa tü washajakat süpüla woʼunuinjanain suluʼu tü ekirajaaleekat Galaad?». Nusoutakalaka wamüin: «Nnaweerüjaʼa sukuwaʼipa soʼuweena wanee kaʼi».

Antamaatapejeʼe sükalia, jamüsüjaʼa waneemüin semaana eenajaanüshii waya Galaad. Waneeküinjatpejeʼe tü kasa waaʼinrajatkat. Nümaka chi wawalakai Little wamüin: «Jaʼitairü jeʼtsüin tü jüneeküinjatkalü eejeerü kaʼi meenaka oʼu jia ‹anayülüje waneeküle tü wane›. Wanaawapejeʼe sujutu nümüin Jehová, jaʼitairü jeʼtsüin tü jüneekakalü aneerü jukuwaʼipa nutuma ». Müsüjeseʼe woʼunaka sünain tü Ekirajaaleekat Galaad. Naneeküinjatpa na wawalayuukana wanee kasa süpüla naʼyataainjanain nümüin Jehová taküjain namüin tü nümakat paala chi wawalakai Little tamüin.

MISIONEEROIWAʼAYA WAYA

Talatüshii maʼin waya sutuma wounejaanüin sünain tü Ekirajaaleekat Galaad sünain tü ekirajawaakat 83. Aainjünüsü tia aaʼuriiroʼu soʼu 1987 chaa Brooklyn (Nueva York). 24 waya wapüshuaʼa. Na ekirajakana waya nia chi wawalakai Ulysses Glass otta chi wawalakai Jack Redford. Jaʼrai kashi tia ekirajawaakat, müsü mamaʼajaakai saaʼin wamüin. Agraduaajüshii waya settienpüroʼu 6 soʼu 1987. Aluwataanüshii waya suluʼumüin tü mmakat Haití otta aluwataanüshii wanaa wamaa John sümaa Marie Goode.

Soʼujee tü juyakat 1962 nnojotsü aluwataanüin misioneero suluʼumüin tü mmakat Haití süchikijee nojutunüin na chajanakana paala natuma na süʼlaülashiikana mma. Waya na palajanakana misioneero aluwataanaka chamüin süchikijeʼereʼeya tia. Apünüin semaana süchikijee wantüin, akolojooshii waya suluʼumüin wanee mma uuchoʼusü maʼin eere noutkajaain 35 wawalayuu. Tepichijaʼa maʼin waya soʼu tia jee wainma tü kasa nnojotkat watüjaain aaʼu. Waya neʼe na kepiakana suluʼu tü miichi napülajatkat na misioneerokana. Müliashii maʼin sutuma jamü na wayuu kepiakana suluʼu tü mmakat Haití jee wainmain na nnojoliikana atüjain karaloʼuta. Soʼu chajanain waya kepiain weʼrüin naprotestajüin maʼin na wayuukana namüin na süʼlaülashiikana mma sümaa jashichin maʼin naya jee alaülaajaweeshii na wayuukana saaʼu tü mmakat jee eejatia maʼin wawai chapünaa.

Atüjashii maʼin waya nanainjee na wawalayuukana sutuma nachecherüin naaʼin sümaa talatüin naaʼin. Watta naalii wawalayuu eʼrakana müliaa, aipejeʼe napüla Jehová jee naaʼinmaasü maʼin tü aküjaakat pütchi. Eejatü wanee wawala jaʼapüirü matüjainka aashajeʼeraa karaloʼuta, sütüjapejeʼe apüleerua 150 wetsiikulo suluʼujeejatka tü Bibliakat. Sutuma weʼrüin maʼin namüliala na wayuukana waküjeein namüin süchiki tü naaʼinrajatkat Maleiwa nuluwataapeena. Noʼutku na wayuu wekirajakana sünain tü Bibliakat pürekutsootshii rekulaat naya, eeshii na pürekutsootkana pesiaat jee eeshii laülaashii suluʼu tü outkajaaleekat. Talatüshii maʼin waya sutuma tia.

Wanaa sümaa chajachin taya Haití teʼraajüin Trevor, wanee misioneero mormón. Yootushi taya kojuyatua nümaa süchiki tü Bibliakat. Kojuya juya süchikijee tia, aluwataashi nia tamüin wanee carta. «Woutiisainjachin taya sünain tü outkajawaakat miyoʼu. Aleʼejeeshi taya tachikuaʼa Haití süpüla pürekutsoolüin pesiaat taya suluʼu tü mma eejachire paala misioneeroin taya namaa na mormónkana» müshi nia tamüin. Shiaʼaya naaʼinraka tia, kojuya juya nia sünain aʼyatawaa nümüin Jehová sümaa tü nuʼwayuusekat chayaa.

CHAJANA WAYA EUROPA JEE SÜCHIKIJEE ÁFRICA

Aluwataanüshii waya suluʼumüin wanee mma chakat chaa Europa eere taashin süchikuaʼa nakuwaʼipa na wawalayuukana. Antüshii waya suluʼumüin tü mmakat Liubliana (Eslovenia) soʼu juyakat 1992, peje sünain tü mmakat eejanain miyoʼuin paala na kachonkana taya süpülapünaa nakolojooin Italiamüin. Soʼutpünaa tia kaʼikat oʼttusü wanee atkawaa suluʼu tü mma kanüliapuʼukat Yugoslavia. Na Jülüjapuʼukana Aaʼin sukuwaʼipa naʼyataain na wawalayuu chakana Yugoslavia naya na jülüjapuʼukana aaʼin na wawalayuu suluʼukana tü Weteet chakat Viena (Austria), tü Weteet chakat Zagrep (Croacia) otta tü chakat Belgrado (Serbia). Sükajee katatawalin tü mmakat Yugoslavia eeinjatü wanee Weteet suluʼu waneʼewai sukua tia mmakat.

Acheküsüjeseʼe watüjain süpüleerua nanüiki na wayuu chejeʼewaliikana jee wekiʼralaainjatüin sünain nakuwaʼipa. Namaka na eslovenokana wamüin: «Jezik je težek». Tia maluʼulu «kapüleesü tü wanüikipalakat». Shiimain tü namakat, kapüleeshaatasü maʼin wamüin. Atütülaasü maʼin waaʼin süka weʼrüin noonooin maʼin nümüin Jehová na wawalayuukana jee suʼwanajaainjatüle sukuwaʼipa tü naʼyataainkat nümüin Jehová naaʼinramaatüin shia. Neʼrüin wainma kasa anasü sutuma. Wayaawata aaʼulu alin waya nüpüla Jehová sükajee nunouteerüin sukuwaʼipa wanee kasa soʼu tü kaʼi nüchekakalü oʼu shia. Tü naaʼinrakat Jehová wapüleerua suluʼu waneirua mma eejanale paala waya sükaalinjain waya süpüla wachecherüin waaʼin soʼunnaa tü kasa alatakat wamüin chaa Eslovenia jee wainma maʼin kasa watüjaka nanainjee na wawalayuu chejeʼewaliikana.

Aʼwanajaaitpa joo sukuwaʼipa tü waʼyataainjatkat nümüin Jehová. Soʼu juyaka 2000 aluwataanüshii waya chamüin Costa de Marfil, tü chakat África Occidental. Nowienpüroʼu soʼu 2002 oʼttusü wanee atkawaa chayaa. Aluwataanüshiijeseʼe waya Sierra Leonamüin. Eejatü wanee atkawaa chayaa soʼunnaa 11 juya, ajaʼttapejeʼe shia süpülapünaa wantüin chamüin. Mojusü maʼin waaʼin süka wojuʼitamaatüinjanain chejee Costa de Marfil. Katchinpejeʼe maʼin waaʼin sükajee sotuin waaʼin tü kasa watüjakat sünainjee nakuwaʼipa na wawalayuukana.

Jülüjasü maʼin waaʼin anain namüin na wayuukana waküjain pütchi namüin jee müsia aishaatain waya napüla na wawalayuu achecherakana maʼin aaʼin mayaainjeʼe jouluin atkawaa eere naya. Mayaainjeʼe nnojoluin wainmain kasa namaʼana atüjashii naya asülajaa. Süsülajüin wanee wawala wanee kuluulu sümüin Debbie, nnojotsiaajeʼe paala saapaweein shia. Shiasaʼa sümaka tü wawalakat sümüin: «Soʼunnaa tü atkawaa eejatkalü yaa nakaalinjain maʼin waya na wawalayuu suluʼujeejanakana waneirua mma, wayainjana joo akaalinjaka jia». Shiasaʼa soʼujeʼereeya tia washateein nakuwaʼipa naya wawalayuukana.

Shiasaʼa mapa, aleʼejüshii wachikuaʼa Costa de Marfilmüin. Sükajee mojujiraain na wayuukana sutuma nakuwaʼipa na políticokana joutsü maʼin mojulawaa chayaa. Sutumajee tia, asaajünüshii waya sükajee helicóptero nowienpüroʼu soʼu 2004. Naküjain wamüin shiain neʼe walüʼüjainjatüin poloo kilo wachise. Atunkapünaashii waya eere natunkule na surulaat franciajeʼewaliikana. Woʼunaka wattaʼamüin suluʼu katünasü suluʼumüin tü mmakat Suiza, antüshii waya Weteet eeiwa aikat. Naya yalajanaka aʼatapajüin waya na wawalayuu shikiipüʼükana tü aʼyatawaakat suluʼu Weteet jee na wawalayuu ekirajaakana sünain tü ekirajawaa sünain tü Biblia napülajatkat na tooloyuu maʼwayuusekana. Napanapüin waya sümaa nakoʼojooin waya jee nanaajüin wapüla eküülü sümaa kojuyasü chocolate chejeʼewat suluʼujee tü mmakat Suiza. Talatüsü maʼin waaʼin süka weʼrüin tü waalinkat napüla.

Aluwataanüshii joo waya suluʼumüin tü mmakat Ghana, motsoʼopünaa wamaʼa chapünaa. Aleʼejüshii joo waya wachikuaʼa suluʼumüin Costa de Marfil shiimalaapa saaʼin tü mmapaʼakat chayaa. Weʼrüin nakaalinjain maʼin waya na wawalayuukana soʼunnaa wojuʼitinnüin kojuyatua suluʼujee tü mma waluwataanakat aluʼu paala. Jülüjasü taaʼin sümaa Debbie ayatüinjanain aijiraain waya namaa na wawalayuukana jama shiain eʼnnajünüin aʼakajee na anoujashiikana nünain Jehová. Müsüjeseʼe nnojoluinjatüin motuin waaʼin tü kasa naaʼinrakat wapüleerua na wawalayuukana. Atüjashii waya sünainjee tü kasa alatakat wamüin jee katchinsü wanoula sünainjee.

ALUWATAANÜSHII WAYA SULUʼUMÜIN WANE MMA

Soʼu tü juyakat 2006 aluwataanüsü wamüin wanee carta eejeere sukumajünüin sukuwaʼipa waʼyataain, aküjünüsü wamüin aluwataanüin waya Asia occidental (Oriente Medio). Anasü maʼin süka waluwataanüin suluʼumüin wanee mma naata, atüjainjana joo waya wanee anüikii jeketü jee weʼraajüinjatüin nakuwaʼipa na wayuu chejeʼewaliikana. Nnojotpejeʼe watüjaain saaʼu tü kasa eejiraainjanakat amaa waya chayaa. Ponusü maʼin waaʼin sukuwaʼipa wayuu chayaa, wainma kasachiki sutumajee tü naainjakat na políticokana jee sutuma tü kasa sunoujakalü anain wayuu chayaa. Mayaainjeʼe naatawalin nanüikipala na wawalayuu chejeʼewaliikana chayaa paaʼinwashii maʼin naya sükajee noonooin sümaa tü aluwataanakalü anain naya natuma na wawalayuu oʼunirakana wakuwaʼipa. Yalayalakanache maʼin na wawalayuukana sükajee nachecherüin naaʼin mayaainjeʼe süpüleeruaanüin naaʼin natuma napüshi, natuma na koleejiajiraakana amaa, natuma na wayuu naʼyataajiraakana amaa jee na kepiakana naʼütpünaa.

Chajana waya sünain wanee outkajawaa miyoʼu anaka maʼin soʼu juyakat 2012, aainjünüsü shia chayaa Tel Aviv (Israel). Anashaatasü maʼin tia outkajawaakat süka wainma na wawalayuu outkajaakana soʼu tia. Kakaliairü nnojoluin aainjünüin wanee outkajawaa maʼaka saaʼin tia soʼujeʼereeya Pentecostés soʼu juyakat 33 noutkajaain na aʼyataashiikana nümüin Jehová chayaa.

Soʼunnaa tia juyakalüirua aluwataanüshii waya sünain alapalawaa suluʼumüin wanee mma eere süpülajünüin tü aʼyatawaakat nümüin Jehová. Alüʼüjüshii waya waneirua karaloʼutairua, ojuʼitüshii waya sünain aküjaa pütchi jee oʼunushii waya sünain waneirua outkajawaa miyoʼu eere palirüin na wayuu oʼunakana sünain. Eejana wainma surulaat kaʼapülajüshii eepünaale waya. Anapejeʼe waaʼin sükajee naaʼinmajüin waya na wawalayuu chajanakana chayaa, nakaalinjain waya sünain tü waaʼinrajatkat suulia jamajüin waya.

ALEʼEJÜSHII WACHIKUAʼA ÁFRICAMÜIN

Naata maʼin tü aʼyatawaa aapünakat wamüin soʼu juyakat 2013, ounejaanüshii waya sünain aʼyatawaa suluʼu tü Weteet chakat Kinsasa (República Democrática del Congo). Anashaatasü maʼin tü mmapaʼakat chayaa, wüittuuishaanasü maʼin. Müliapejeʼe saaʼin wayuu sutuma jamü jee sutumajee wainmain atkawaa chayaa. «Chapuʼushii waya África, aneena waya chayaa», maa müsü waaʼin. Wainmapejeʼe tü kasa watüjainjatkalü apüleerua maʼaka saaʼin watüjaainjanain saaʼu jalapünaainjanain waya, jama nnojoluin eein wopu eepünaainjanale walatüin. Shiapejeʼe jülüjain waaʼin tü kasa anasü naaʼinrakat na wawalayuukana maʼaka nachecherüin naaʼin jee talatüin maʼin naaʼin mayaainjeʼe manneetsein naya. Kamalainsü maʼin namüin na wawalayuu chejeʼewaliikana naküjain pütchi. Ayatüshiʼiya naya oʼunuin sünain tü outkajawaakalüirua jee sünain tü outkajawaakalüirua miyoʼu mayaainjeʼe kapüleein maʼin shia namüin. Jaʼyashaatasü maʼin wamüin niain Jehová akooʼomüinraka atuma na wawalayuukana jee nükaalinjain naya. Wainma kasa watüjaka nanainjee na wawalayuu chejeʼewaliikana Congo-Kinsasa. Aleewashiijeseʼe maʼin waya namaa, müshii saaʼin wapüshi wamüin.

Soʼu juyakat 2017 aluwataanüshii waya süpüla waʼyataain suluʼu tü Weteet chakat Sudáfrica. Miyoʼu maʼin suulia tü Weteet waʼyataapuʼukalü aluʼu paala. Aapünüsü aʼyatawaa wamüin nnojotpuʼukat waʼyataain anain. Sünainjee tü watüjakat paala yapaka waya jee wekeraajaka tü aʼyatawaa aapünakat wamüin. Aishii maʼin wapüla na wawalayuu watüjakana anainjee, jama waneepiain naya sünain aʼyatawaa nümüin Jehová. Ponusü maʼin taaʼin paaʼinwain maʼin na wawalayuu aʼyataakana suluʼu Weteet mayaainjeʼe naatawalin neʼiruku jee noumain. Nountuin müin nakuwaʼipa sükajee noonooin sümaa tü nümakat Jehová namüin jee naaʼinrüin tü nüchekakat napüleerua.

Anasü maʼin tü aʼyatawaa eʼitaanakat wapüleerua, jama wainmain tü kasa watüjakat sünainjee. Atüjainnapa waya süpüleerua sukuwaʼipapala wayuu jee sünüikipala. Mayaainjeʼe kapüleein tü alatakat wamüin weʼrüin waalin nüpüla Jehová jee napüla na wawalayuukana (Sal. 144:2). Wainma tü kasa watüjakat sutuma waʼyataain waneepia nümüin Jehová müshiijeseʼe aleewaleeinnapain waya nümaa.

Atüjashi maʼin taya sünainjee nakuwaʼipa na kachonkana taya jee sükajee sükaalinjain maʼin taya tü taʼwayuusekat jee atüjashi maʼin taya sünainjee nakuwaʼipa na wawalayuu teʼraajakana sainküinpünaa tü mmakat. Kojutusü maʼin tamüin tia jee atüjeeshii maʼin waya sooʼomüin sünainjee nukuwaʼipa Jehová, chi Ekirajakai waya.