Wekiraja «na wayuu achekakana süchiki katüinjatüin noʼu waneepia»

1. ¿Nacheküinche napüshuaʼa na wayuukana tü pütchi waküjakat namüin? (Aluwataaushikana 13:47, 48; 16:14, 15).

SOʼU NAKALIA na aluwataaushikana wainma wayuu anoujayaa makana naapapa nüchiki Maleiwa (paashajeʼera Aluwataaushikana 13:47, 48; 16:14, 15). Müsia sukuwaʼipa maaʼulu yaa, wainma wayuu anoujayaa makana süküjünapa pütchi namüin. Eeshii wayuu nnojotka jamajüin namüin tü pütchi waküjakat namüin, nachekapejeʼe mapa nekirajünüin nüchiki Maleiwa. ¿Kasa waaʼinrajatka waküjale pütchi nümüin wanee wayuu atüjaweekai saaʼu süchiki tü sümakat tü Bibliakat?

2. ¿Kasa wanaawaka aluʼu wakuwaʼipa nümaa wanee wayuu kaʼttiashikai?

² Tü waaʼinrakat sünain aküjaa pütchi müsü aka saaʼin tü naaʼinrakat wanee wayuu aaʼinmajakai wanee aʼttiee. Jamüshijaʼa kaʼttiale wanee wayuu eeshijaʼa nüpünajüle sooʼomüin. Sümaʼainruʼu tia eeshijaʼa niʼrüle jakütüin süchon pünajüt, nüsüʼütamaataka shia nnojotsü nuuʼulaain shia mayaa. Müsia neʼe wakuwaʼipa waküjapa pütchi. Jamüshijaʼa waküjale pütchi nümüin wanee wayuu ekirajaweekai sünain tü Bibliakat wakumajamaatüin sukuwaʼipa süpüla wekirajüin nia. Ayatüinjanapejeʼe waya aküjain pütchi sümüin wayuu süpüla natüjaain saaʼu anain maʼin nekirajüle sünain tü Bibliakat (Juan 4:35, 36). Wayaawatüle saaʼu nnojoluin wanaawain sukuwaʼipa wayuu, watüjaajeerü aaʼu tü waaʼinrajatkat süpüla wakaalinjain naya. Anashii wekirajaale sünain tü waaʼinrajatkat waküjale pütchi nümüin wanee wayuu atüjaweekai sooʼomüin süchiki tü sümakat tü Bibliakat otta tü waaʼinrajatkat süpüla kooʼomüinjatüin nunoula.

WAAʼINRAJATKA NÜTÜJAWEERE SAAʼU WANEE WAYUU SÜCHIKI TÜ SÜMAKAT TÜ BIBLIAKAT

3. ¿Kasa waaʼinrajatka nütüjaweere saaʼu wanee wayuu süchiki tü sümakat tü Bibliakat? (1 Corinto 9:26).

³ Waküjale pütchi nümüin wanee wayuu atüjaweekai saaʼu süchiki tü sümakat tü Bibliakat, wakaalinjamaata nia süpüla suluʼuinjachin nia tü wopu kaluʼukat kataa oʼuu. Waküjamaata nümüin eein süpüla wekirajaain nia sünain tü Bibliakat otta wounejaa nia sünain tü outkajawaakat (paashajeʼera 1 Corinto 9:26).

4. Püküja wanee sukuwaʼipa wayaawataka atuma eein süpüla nikirajaweein wanee wayuu sünain tü Bibliakat waküjapa pütchi nümüin.

⁴ Püküja nümüin eein süpüla pikirajüin nia sünain tü Bibliakat. Eeshii wayuu ekirajaweekana sünain tü Bibliakat waküjapa pütchi namüin. Jülüjataa waaʼin sukuwaʼipa wanee wayuu chejeʼewatkat Canadá. Arütkaasü shia sünainmüin wanee wawala aküjaka pütchi sükajee tü kareetachonkot, saapaaka tü poyeetokot Anainjatka atuma pukuwaʼipa waneepia. Süküjaka tü wawalakat sümüin wekirajüin wayuu sükajee tia poyeetokot. Süküjaka tü wayuukot sümüin shikirajaweein sünain tü Bibliakat otta saapüin sunuumerose süserulaatse sümüin tü wawalakat. Shiasaʼa yaaulerü süchikijee tia «¿Joujeenaka wekirajaaka?», müsü tü wayuukot sümüin tü wawalakat suluʼupünaa mensaaje. «¿Jamüsüjaʼa saaʼin pümüin wekirajaale saawanoʼu?», sümaka tü wawalakat sümüin. «¿Jama wekirajaale wattaʼa?», sümaka tü wayuukot sümüin. Nekirajaaka piennoʼu sünain tü Bibliakat otta oʼunusü shia domingoʼu sünain tü outkajawaakat. Soʼujeʼereeya tia kooʼomüin kooʼomüin müsü sunoula tia wayuukot.

5. ¿Kasa waaʼinrajatka nnojorüle shikirajaweein wayuu wamaa sünain tü Bibliakat? (Piirakaa sümüin tü ayaakuaakat).

⁵ Nnojotpejeʼe müin sukuwaʼipa wayuu süpüshuaʼa maʼaka saaʼin tü wayuu waashajaaitpakalü achiki. Eeshii na aapajakana wanüiki, nnojotpejeʼe naya ekirajaweein sünain tü Bibliakat. Müsüjeseʼe anain kamaneere waya sümüin wayuu jee yootule waya namaa süchiki tü kasa kamalainkat namüin süpüla sütanalüin naaʼin tü pütchikat jee nekirajaweein sünain tü Bibliakat. Nnojoire nekirajaweein sünain tü Bibliakat nnojoluinjatü akulajaain waaʼin namaa. Anashii wekirajaale sünain tü namakat waneinnua wawalayuu tütükana maʼin sünain ekirajawaa wayuu. Watüjaajeerü aaʼu tü waaʼinrajatkat süpüla sücheküin wayuu nekirajaain sünain tü Bibliakat.

6. ¿Kasa waaʼinrajatka süpüla shikirajaweein wayuu wamaa sünain tü Bibliakat?

⁶ Naashin naya wawalayuukana, eeshii wayuu nnojotka anain amüin müle wanüiki namüin: «Tekirajeechi pia sünain Bibliakat», süka eein süpüla nnojoluin nekirajaweein wamaa. Aluʼusaʼa wamüle: «Eeshii süpüla yootuin waya sooʼomüin süchiki tü sümakat tü Bibliakat». Otta müsia eesüjaʼa kamalainre sümüin wayuu waleʼejüin wachikuaʼa nanainmüin müle wanüiki namüin: «Jamüsüjaʼa suluʼu tü Bibliakat ashajünüsü süpüshuaʼa tü watüjaweekalü aaʼu». Eesia süpüla wamüinña: «Nnojotsü shiain neʼe ashajünüin suluʼu tü Bibliakat nüchiki Maleiwa, ashajünüsiaʼaya pütchi anainjatkalü atuma wakuwaʼipa». Otta eesü süpüla wamüinña: «Motsomüinjeerü wamaʼa sünain yooto». «Anteechi taya semaanawai», nnojotsü anain wamüle sümüin wayuu suulia müin wapüleeruakai saaʼin.

7. ¿Kasa nayaawataka atuma waneinnua wayuu sümaiwa paala tü shiimainkat nüchiki Maleiwa? (1 Corinto 14:23-25).

⁷ Puunejaa nia sünain tü outkajawaakat. Nükalioʼu Pablo eejana wayuu ayaawatakana saaʼu tü shiimainkat nüchiki Maleiwa noutkajaapa namaa na anoujashiikana (paashajeʼera 1 Corinto 14:23-25). Müsia neʼe sukuwaʼipa maaʼulu yaa, kooʼomüinjeerü maʼin nanoula na wekirajüinkana noutkajaale wamaa. Nnojotsü choʼujaain waʼatapajüin wekirajüin naya sünain tü ekirajaayakat 10 suluʼuka tü karaloʼutakat Anainjatka atuma pukuwaʼipa waneepia süpüla wounejaain naya sünain tü outkajawaakat. Anashii wounejaamaatüle naya. Eeshii süpüla wounejaain wayuu sünain tü outkajawaakat waküjapa pütchi namüin. Eeshii süpüla waküjain namüin sünülia tü pütchi süpülajatkat wayuu süpüshuaʼa jee shiale waküjain namüin tü wekirajaainjatkalü anain sünain Aapiria Wayuu.

8. ¿Kasa waküjainjatka sümüin wayuu wounejaapa naya sünain tü outkajawaakat? (Isaías 54:13).

⁸ Wounejaapa wayuu sünain tü outkajawaakat anasü waküjale namüin naatain tü aainjünakat eere woutkajaain suulia tü aainjünakat suluʼu waneirua iküleesia. Jamüsüjaʼa wanee wayuu soʼu tü palajatkat sukua sünain tü outkajawaakat ponoshaatasü saaʼin sukuwaʼipa tü Ekirajawaakat sünain Aapiria Wayuu, süsakiraka tü wawala ekirajakat shia: «¿Niʼraajüin chi ekirajakai napüshuaʼa nayakana jutkatüin maka nuchuntuin nanülia waneʼewai nakua?». «Weʼraajiraain wanülia namaa na wawalayuukana sutuma müin pawalaawakai waaʼin namaa», müsü tü wawalakat sümüin. «Nnojotsü müin nakuwaʼipa na wayuu suluʼukana tü iküleesia kaluʼukat taya», müsü tü wayuukot sümüin tü wawalakat. Maʼaka sukuwaʼipa tia wayuukot, eeshii wayuu nnojoliikana atüjaain saaʼu kasain aainjünüin sünain tü outkajawaakat, müsüjeseʼe choʼujaain maʼin waküjain namüin süchiki tia (paashajeʼera Isaías 54:13). Outkajaashii waya süpüla waʼwaajüin Jehová, watüjain süchiki nukuwaʼipa jee süpüla watütüleʼerajiraain waaʼin (Heb. 2:12; 10:24, 25). Anasü maʼin sukuwaʼipa tü outkajawaakat otta ekirajünüshii waya sünain jee nnojotsü washatüin sukuwaʼipa tü aainjünawaikat suluʼu waneirua iküleesia (1 Cor. 14:40). Anasü maʼin sukuwaʼipa sukumajia tü piichi outkajaaleekat warattuuisü maʼin suluʼu, jama wekirajünüin chayaa. Nnojoishii waya yootuin süchiki política sünain tü outkajawaakat, jama nnojoluin sünainpünaain waya tia makat jee nnojoishii waya peʼipaain sümaa waʼwoolojooin waashajaapa süchiki wanee kasa. Süpüla sütüjaain saaʼu wayuu kasain aainjünüin suluʼu tü Piichi Outkajaaleekat anasü weeʼiyatüle namüin tü videokot ¿Kasache aainjünaka suluʼu tü Piichi Outkajaaleekat?

9, 10. ¿Kasa niyaawatüinjatka saaʼu wanee wayuu wounejaale nia sünain tia outkajawaakat? (Piirakaa sümüin tü ayaakuaakat).

⁹ Eeshii wayuu nnojoliika oʼuneein sünain tü outkajawaakat süka napüleeruaaneerüin aaʼin saaʼin namüin shiiʼiree nanoujain wanaa wamaa. Wounejaapa wayuu sünain tü outkajawaakat anasü nayaawatüle saaʼu eein süpüla suʼunuin wayuu maʼleekalia sünain jee eeshii süpüla noʼunuin sünain aapajaa neʼe tü pütchikat. Nnojotsü apüleeruaaneerüin naaʼin shiiʼiree nuuʼulaainjachin suulia tü iküleesia kaluʼukat nia. Sünain tü outkajawaakat nnojoishii katatawalin na tepichikana noulia na wayuu miyoʼuyuukana, yalashii naya joyotuin namaa na wayuu kachooinkana naya, mayaa natüjaa aaʼulu kasain ekirajünüin anain nachonnii (Deut. 31:12). Nnojotsü achuntunuin nneerü sünain tü outkajawaakat. Waaʼinrüin tü nümakat Jesús wanaa sümaa nümüin: «Nnojoishii achekajüinjanain jia saaʼu tia maʼaka nnojoluin süchekajünüin jümüin paala» (Mat. 10:8). Anasü waküjale sümüin wayuu nnojoluin choʼujaain anainjatüin maʼin nasheʼin süpüla noutkajaainjanain wamaa. Nnojotsü jülüjain naaʼin Maleiwa tia, shia jülüjakat naaʼin tü suluʼukat saaʼin wayuu (1 Sam. 16:7).

¹⁰ Nuʼunule wanee wayuu sünain tü outkajawaakat anainjatüin naaʼin sünain. Anale naaʼin wanee wayuu sünain tü outkajawaakat eeshi süpüla nüleʼejüin nüchikuaʼa. Anasüjeseʼe maʼin weʼraajiraale nia na laülaashiikana jee na wawalayuukana. Nnojorüle Biblia nümaʼana anashi waikalaale nümaa süpüla weeʼiyatüin nümüin tü wetsiikulokot jee waküja nümüin jamüin sukuwaʼipa tü ekirajawaakat.

WAAʼINRAJATKA WEKIRAJAPA WANEE WAYUU SÜNAIN TÜ BIBLIAKAT

11. ¿Kasa waaʼinrajatka süpüla wekeraajüin wanüiki namüin na wekirajüinkana?

¹¹ Wekirajüle wanee wayuu sünain tü Bibliakat anasü wekeraajüle wanüiki nümüin. Anashi wekirajüle nia soʼu tü oora nüküjakalü oʼu wamüin, waaʼinrajatü tia mayaainjeʼe nnojoluin müin sukuwaʼipa wayuu eere kepiain waya. Anashii nnojorüle kamaʼain waya sünain ekirajaa wanee wayuu soʼu tü palajatkat wakua nümaʼanamüin, waaʼinrüinjatü tia mayaainjeʼe nütüjaweein saaʼu sooʼomüin süchiki wanee kasa. Naashin waneinnua wawalayuu atüjakana maʼin ekirajaa wayuu nnojotsü anain kamaʼale maʼin waya sünain ekirajaa na wekirajüinkana. Nüsakirüle waya süchiki wanee kasa «wekirajaajeerü anain tia wanee wakueena», eeshiijaʼa süpüla wamüin nümüin. Mayaa nikirajaweerü maʼin sünain tü Bibliakat. Anasü waapajüle maʼin nünüiki suulia yootuin maʼin waya (Prov. 10:19).

12. ¿Kasapülajatü wekirajaka wayuu sünain tü Bibliakat?

¹² Ekirajaashii waya wayuu sünain tü Bibliakat süpüla neʼraajüinjachin Jehová otta Jesús jee süpüla alinjanain naya napüla. Süpüla wountuin tia, nnojoishii wekirajüinjanain naya sükajee tü wekiiruʼujeejatkat neʼe, wekirajüinjana naya sükajee tü sümakat Bibliakat (Aluw. 10:25, 26). Jamüshijaʼa chi aluwataaushikai Pablo nüshajüin maʼin nüchiki Jesucristo, jama niain Jesús chi nüjünalakai Jehová süpüla weʼraajüinjatüin nukuwaʼipa jee alinjachin nia wapüla (1 Cor. 2:1, 2). Nüshajüinña Pablo choʼujaain maʼin wekirajüin na jekenakana sünain anoujaa süchiki anainjatüin maʼin nakuwaʼipa maʼaka anain maʼin tü oorokot, tü pülaatakat jee tü ipa eekalü anain maʼin sünoʼu (1 Cor. 3:11-15). Tü nüküjeekat Pablo shia kanoulainjachin wanee wayuu, kekiinjachin nia, niyaawatüinjatü saaʼu anale jee mojule wanee kasa jee mmoluinjachin nia seema aaʼinraa kasa mojuka noʼuluʼu Jehová (Sal. 19:9, 10; Prov. 3:13-15; 1 Ped. 1:7). Wakaalinja na wekirajüinkana süpüla kanoulainjanain naya jee aleewain maʼin naya nümaa Jehová, maʼaka naaʼinrüin shia Pablo (2 Cor. 1:24).

13. ¿Kasa waaʼinrajatka suulia washapajaain aaʼin jee wayaawatüin saaʼu nukuwaʼipa chi wekirajüinkai? (2 Corinto 10:4, 5; piirakaa sümüin tü ayaakuaakat).

¹³ Washata sukuwaʼipa nikirajia Jesús. Nnojo washapajaain aaʼin jee wayaawata aaʼu sukuwaʼipa wayuu wekirajapa naya. Nnojo wasakirüin chi wekirajüinkai süchiki wanee kasa japüijeechika atuma nia. Nnojorüle niyaawatüin saaʼu wanee kasa wekirajaakalü anain nümaa, wekirajaa sünain waneirua pütchi jee yooto waya mapa süchiki tü kasa kapüleekat nümüin. Nnojo wapüleeruain naaʼin chi wekirajüinkai süpüla naapaain sümaa tü pütchi wekirajakalü anain nia, nnojo washapajaain aaʼin jee waʼatapaja sütanalüin naaʼin tü pütchikat (Juan 16:12; Col. 2:6, 7). Tü alawaa ekirajünakat nüchiki Maleiwa müsü aka saaʼin wanee kasa eekai ichein maʼin saashin tü Bibliakat jee wojuttirajatüin shia (paashajeʼera 2 Corinto 10:4, 5). Süpüla nuuʼulaainjachin wanee wayuu suulia tü nunoujapuʼukalü anain choʼujaasü wakaalinjain nia süpüla nütüjaain saaʼu naaʼinmajüneechin nutuma Jehová nunoujale nünain (Sal. 91:9).

WAAʼINRAJATKA NUUTKAJAALE WAMAA WANEE WAYUU

14. ¿Jamüinjatü wakuwaʼipa namaa na wayuu outkajaakana wamaa?

¹⁴ Nücheküin Jehová kamaneein waya namüin na wayuu outkajaakana wamaa jee wanaawainjatü nakuwaʼipa wamüin jaʼitairü naatain noumain, washirüle naya jee maʼletsere naya (Sant. 2:1-4, 9). Anashii wekirajaale süchiki tü waaʼinrajatkat nuutkajaale wanee wayuu wamaa.

15, 16. ¿Kasa waaʼinrajatka süpüla anain saaʼin wayuu sünain tü outkajawaakat?

¹⁵ Eeshii wayuu outkajaakana wamaa süka natüjaweein saaʼu jamüin sukuwaʼipa tü outkajawaakat otta eeshii na oʼunakana sutuma nounejaanüin nutuma wanee wawala nnojoikai outkajaain wamaa. Nüntüle wanee wayuu sünain tü outkajawaakat wasaka nia, kamanee waya nümüin jee nnojo wasakiijüin maʼin nia süchiki wanee kasa. Anashi waikalaale nümaa, waapüle nümüin wanee Biblia jee shiale wanee karaloʼuta wekirajaakalü aka jee shiale waʼanapirüin nia tü wamüinkat. Jülüjataa waaʼin nukuwaʼipa wanee wayuu oʼunakai sünain tü outkajawaakat, japüishaatashi nia sutuma nnojoluin anain maʼin nüsheʼin naashin. Niasaʼa chi wawala asakakai nia nüküjain nümüin nnojoleerü jamüin pütchi nümüin natuma na wawalayuukana jee nnojoluin choʼujaain anainjatüin maʼin nüsheʼin süpüla yalainjachin nia sünain tü outkajawaakat. Sütanalüin naaʼin chi wayuukai tü nümakat chi wawalakai nümüin jee woutiisaka nia mapa. Mayaainjeʼe kamaneeinjanain maʼin waya namüin na wayuu antakana sünain tü outkajawaakat eejüinjatüin waaʼin suulia wasakiijüin maʼin naya süchiki tü nakuwaʼipakat (1 Ped. 4:15).

¹⁶ ¿Kasa amaa jülüjainjatka waaʼin nüntule wanee wayuu sünain tü outkajawaakat? Kojutuinjatü wayuu watuma yootopa waya süchiki tü sunoujakalü anain jee waküjapa wanee pütchi shiʼipajee tü asakinnakalü anain sünain tü outkajawaakat. Nnojo waküjain süchiki wanee kasa mojuteenaka amüin na wayuu antakana sünain tü outkajawaakat, nnojoleenaka naleʼejeein atuma nachikuaʼa (Tito 2:8; 3:2). Jamüshiijaʼa waya nnojoluinjatü mojutuin watuma tü nanoujakalü anain na waneinnua (2 Cor. 6:3). Eejüinjatü naaʼin sünain tia na wawalayuu ekirajakana sünain tü pütchi süpülajatkat wayuu süpüshuaʼa, jamüshiijaʼa naya anasü naküjale jamaluʼuluin wanee pütchi nnojotka nayaawatüin saaʼu na wayuu antakana sünain tü outkajawaakat.

17. ¿Kasa waaʼinrajatka waküjale pütchi nümüin wanee wayuu atüjaweekai saaʼu sooʼomüin süchiki tü sümakat tü Bibliakat?

¹⁷ Choʼujaasü maʼin waküjain pütchi süpüla wantüin nanain «na wayuu achekakana süchiki katüinjatüin noʼu waneepia» (Aluw. 13:48). Waküjale pütchi nümüin wanee wayuu atüjaweekai saaʼu süchiki tü sümakat tü Bibliakat wekirajamaata nia sünain jee wounejaa nia sünain tü outkajawaakat. Waaʼinrüle tia, wakaalinjeechi nia süpüla suluʼuinjachin nia «tü wopu kaluʼukat kataa oʼuu» (Mat. 7:14).