Tü waaʼinrajatkat süpüla waküjain nümüin Jehová tü suluʼukat waaʼin

1, 2. (1) ¿Kasa tü nnojotkat waküjain atuma nümüin Jehová tü suluʼukat waaʼin? (2) ¿Kasa wayaawataka atuma jülüjain naaʼin Jehová süpüshuaʼa tü waküjakat nümüin?

EESHIIJAʼA woʼuraajüle nümüin Jehová sooʼopünaa waaʼin otta eesüjaʼa wanaawale wanüiki waneepia wachuntapa nümüin. Eeshiijaʼa nnojorüle kamaʼain waya sünain oʼuraajaa sutuma kupaain maʼin waya. Eesüjaʼa nnojorüle waküjain nümüin Jehová jamüin waaʼin sutuma jülüjain waaʼin nnojoluin anain wakuwaʼipa noʼuluʼu.

² Nnojotsü nuchuntuin wamüin Jehová anain maʼin wanüiki woʼuraajapa nümüin shia nüchekaka woʼuraajüin nümüin süka süpüshuaʼa waaʼin sümaa kojutuin nia watuma maʼaka süshajünüin suluʼu tü Bibliakat. Naapajüin Jehová nanüiki na wayuu anamiakana (Sal. 10:17). Jülüjasü naaʼin süpüshuaʼa tü waküjakat nümüin, jama kapülain naaʼin tü wakuwaʼipakat (Sal. 129:1-3).

3. ¿Kasa wekirajaainjatka anain sünain ekirajaayakat tüü?

³ Sünain ekirajaayaka tüü, wekirajaajeerü anain pütchika tüü: ¿Jamüshii nnojoliinjanaka mmoluin waya seema aküjaa nümüin Jehová jamüin waaʼin?, ¿kasa waaʼinrajatka süpüla woʼuraajüin nümüin Jehová süka süpüshuaʼa waaʼin?, ¿kasa watüjaka sünainjee nanüiki waneinnua wayuu oʼuraajakana nümüin Jehová ashajünaka achiki suluʼu tü Bibliakat? otta ¿kasa waaʼinrajatka isale wachiki waküjain nümüin Jehová jamüin waaʼin sutuma shapaain maʼin waaʼin?

NNOJO MMOLUIN WAYA SEEMA WAKÜJAIN NÜMÜIN JEHOVÁ JAMÜIN WAAʼIN

4. ¿Kasa waaʼinrajatka süpüla waküjain nümüin Jehová süpüshuaʼa tü suluʼukat waaʼin? (Salmo 119:145).

⁴ Jülüjale waaʼin niʼreein waya Jehová suluʼu anain wakuwaʼipa jee waʼaleewain nia mapüleejeerü wamüin waküjain nümüin jamüin waaʼin. Jülüjataa waaʼin tü alatakat nümüin chi ashajakai Salmo 119. Wainma tü müliaa niʼrakat. Jamüshijaʼa nia aküjünüsü perulaa nüchiki (Sal. 119:23, 69, 78). Jee mojuwaisü naaʼinña sutuma tü kasa mojusü naaʼinrakat (Sal. 119:5). Mayaainjeʼe müin nukuwaʼipa nnojoishi mmoluin nia seema nüküjain nümüin Jehová süpüshuaʼa tü suluʼukat naaʼin (paashajeʼera Salmo 119:145).

5. ¿Jamüshii woʼuraajüinjanaka nümüin Jehová mayaainjeʼe jülüjain waaʼin nnojoluin anain tü wakuwaʼipakat? Püküja wanee sukuwaʼipa.

⁵ Nücheküin Jehová woʼuraajüin nümüin jaʼitakajeʼe kaainjalain waya (Is. 55:6, 7). Anakalaka woʼuraajüle waneepia nümüin Jehová mayaainjeʼe jülüjain waaʼin nnojoluin anain maʼin wakuwaʼipa noʼuluʼu. Jülüjataa waaʼin tüü: Jamüshiijaʼa maaʼawale waya isashiipaʼa jee nüntataale joo wanee wayuu wanainmüin, ¿japüijeenache waya sünain achuntaa kaalinwaa nümüin? ¡Nnojottaa!, ¿aashin müin? Müsia neʼe wakuwaʼipa, nnojoliinjana japüliin waya sünain oʼuraajaa nümüin Jehová mayaainjeʼe kaainjalain waya jee seemiajaale tü wanoulakat (Sal. 119:25, 176).

¿KASA WAAʼINRAJATKA SÜPÜLA WOʼURAAJÜIN SÜKA SÜPÜSHUAʼA WAAʼIN?

6, 7. ¿Kasa waaʼinrajatka süpüla woʼuraajüin nümüin Jehová süka süpüshuaʼa waaʼin? Püküja wanee sukuwaʼipa (paashajeʼera tü nootakat).

⁶ Aleeweena maʼin waya nümaa Jehová waküjale nümüin tü suluʼukat waaʼin jee tü jülüjakat waaʼin. Anashii wekirajaale süchiki tü waaʼinrajatkat süpüla woʼuraajüin nümüin Jehová süka süpüshuaʼa waaʼin.

⁷ Anasü jülüjale waaʼin anain maʼin nukuwaʼipa Jehová.a Waaʼinrüle tia kamalainjeerü wamüin yootoo nümaa Jehová (Sal. 145:8, 9, 18). Jülüjataa waaʼin sukuwaʼipa wanee wawala, Kristine sünülia. Müliapuʼusü shia nutuma chi süshikai. Sutuma müin nukuwaʼipa sümüin, nnojotpuʼusü sunoujain sünain alin shia nüpüla Jehová. Müsüjeseʼe nnojoluin süküjain nümüin Jehová tü suluʼukat saaʼin otta müsia jülüjapuʼusü saaʼin maalin shia nüpüla Jehová sutuma nnojoluin anain maʼin sukuwaʼipa. Anuu sünüiki Kristine: «Anasü taaʼin süka tatüjaaitpain saaʼu miyoʼuin taalin nüpüla Jehová. Tatüjaa aaʼulu eejeechin nia waneepia tamaa jee nükaalinjeerü taya. Ayateerü alin taya nüpüla Jehová jaʼitakajeʼe nnojoluin lotuin maʼin takuwaʼipa. Sutuma tatüjaain saaʼu alin taya nüpüla Jehová taküjain nümüin tü talatakalü atuma taaʼin jee tü mojukalü atuma taaʼin».

8, 9. ¿Jamüsü anakaʼa jülüjale waaʼin palajana tü waküjainjatkat nümüin Jehová? Püküja wanee sukuwaʼipa.

⁸ Anasü jülüjale waaʼin palajana tü waküjainjatkat nümüin Jehová. Wasakira waaʼin sünain tüü süpülapünaa woʼuraajüin: «¿Kasa eejiraaka amaa taya müinmaʼa yaa? ¿Nnojoyüitche motuin taaʼin naainjala wanee wayuu tamüin? ¿Choʼujaasüche nükaalinjain taya Jehová sünain tü alatakat tamüin jekenainka?» (2 Rey. 19:15-19). Anasü washatüle nukuwaʼipa Jesús woʼuraajapa nümüin Jehová. Wachunta nümüin süpüla kojutuin nia sümüin wayuu, süpüla nuluwataainjachin jee saainjünüin tü keeʼireekat naaʼin (Mat. 6:9, 10).

⁹ Jülüjataa waaʼin tü alatakat sümüin wanee wawala, Aliska sünülia. Nnojotsü sütüjaain aaʼu tü sünüikinjatkat nümüin Jehová sutuma shapaain maʼin saaʼin sütüjaapa saaʼu outasiroʼu tü ayuulii nünainka chi suʼwayuusekai. Anuu sünüiki: «Sutuma süpüleeruain aaʼinruʼu maʼin taya tü shapawaakalü aaʼin nnojotpuʼusü tatüjaain aaʼu tü tanüikinjatkat nümüin Jehová. Shiasaʼa maaʼulu yaa takumajüin tanüiki palajana süpülapünaa toʼuraajüin. Sutuma taaʼinrüin tia jimatüsü taaʼin jee nnojotsü shiain neʼe tachuntuin nümüin Jehová tapüleerua jee nüpüleerua chi taʼwayuusekai, tachuntuinña napüleerua na waneinnua».

10. ¿Jamüsü anakaʼa nnojorüle washapajaain aaʼin sünain oʼuraajaa? (Piirakaa sümüin tü ayaakuaakat).

¹⁰ Nnojo washapajaain aaʼin woʼuraajapa. Aleeweena waya nümaa Jehová woʼuraajüle nümüin jaʼitainna kamaain jee nnojorüle kamaain waya sünain oʼuraajaa. Anapejeʼe maʼin kamaʼale waya sünain oʼuraajaa, süka jamüin, waküjeerü nümüin Jehová tü suluʼukat waaʼin.b Anuu nünüiki Elijah chi suʼwayuusekai Aliska: «Oʼuraajawaishi taya nümüin Jehová kojuyatua, müshi yaakai nia tamaa wanaa sümaa kamaʼain taya sünain oʼuraajaa nümüin. Tatüjaa aaʼulu nnojoleechin nukulajaain aaʼin tamaa sutuma kamaʼain taya sünain oʼuraajaa nümüin». Wane kasa eeka süpüla waaʼinrüin süpüla kamaʼain waya sünain oʼuraajaa shia wachajaale eere yüütüülin jee jimatuulin tü mmapaʼakat otta eesüjaʼa süpüla emetuluin wanüiki. Anasü wooʼulaküle tia kojuyatua süpüla kiʼrain waya sünain aaʼinraa tia.

SÜNÜIKI WAYUU OʼURAAJAKA NÜMÜIN JEHOVÁ ASHAJÜNAKA ACHIKI SULUʼU TÜ BIBLIAKAT

11. ¿Jamüsü anakaʼa jülüjale waaʼin nanüiki waneinnua wayuu oʼuraajakana nümüin Jehová ashajünaka achiki suluʼu tü Bibliakat? (Paashajeʼera tü pütchikat «¿Müsüche pukuwaʼipa?»).

¹¹ Atüjeena waya sünainjee nanüiki waneinnua wayuu oʼuraajakana nümüin Jehová jee eeʼirajakana jayeechi nümüin ashajünaka achiki suluʼu tü Bibliakat. Eesü süpüla püshatüin sukuwaʼipa nanüiki puʼuraajapa nümüin Jehová. Atüjeechi pia süpüleerua sukuwaʼipa pünüiki süpüla puʼwaajüin Jehová puʼuraajapa nümüin jee eesüjaʼa müin paaʼin maʼaka naaʼin jee wanaawain tü puchuntakat sümaa tü nachuntakat nümüin Jehová.

12. ¿Kasa eeka süpüla wasakirüin anain waaʼin waashajeʼerapa suluʼu tü Bibliakat nünüiki wanee wayuu oʼuraajakai nümüin Jehová?

¹² Paashajeʼerapa suluʼu tü Bibliakat nünüiki wanee wayuu oʼuraajakai nümüin Jehová, anasü püsakirüle paaʼin sünain tüü: «¿Jara kanüikika shia? ¿Kasa alataka nümüin wanaa sümaa tia? ¿Müsüche takuwaʼipa maʼaka tü alatakat nümüin? ¿Kasa tatüjaka sünainjee sukuwaʼipa nünüiki?». Acheküsü pikirajaainjachin süpüla pütüjaain saaʼu tia, anapejeʼe maʼin paaʼinrüle tia. Anashii wekirajaale süchiki nakuwaʼipa waneinnua wayuu oʼuraajakana nümüin Jehová.

13. ¿Kasa watüjaka sünainjee tü suchuntakat Ana nümüin Jehová? (1 Samuel 1:10, 11; piirakaa sümüin tü ayaakuaa sünainkat süta tü rewiisütakat).

¹³ (Paashajeʼera 1 Samuel 1:10, 11). Mojusü maʼin saaʼin Ana wanaa sümaa suchuntuin tia nümüin Jehová süka machooin shia jee aʼürülaanüsü shia sutuma Peniná tü suwalaʼatakat nutuma chi suʼwayuusekai (1 Sam. 1:4-7). Eesü tü kasa watüjakat sünainjee tü suchuntakat Ana kakaliale waya eejiraain sümaa wanee kasa alatakat wamüin. Jamüsüjaʼa shia nnojotsü ashapajaain saaʼin sünain oʼuraajaa nümüin Jehová jee anasü saaʼin mapa nutuma (1 Sam. 1:12, 18). Anasü waküjale nümüin Jehová tü alatakat wamüin jee waküjaa nümüin tü shapaakalü atuma waaʼin maʼaka saaʼinrüin shia Ana (Sal. 55:22).

14. (1) Püküja wanee kasa watüjaka sünainjee sukuwaʼipa Ana. (2) ¿Jamüsü watüjeenakaʼa süpüleerua sukuwaʼipa wanüiki woʼuraajapa nümüin Jehová waashajeʼerüle tü Bibliakat? (Paashajeʼera tü nootakat).

¹⁴ Maʼaka jeʼra nuuyase Samuel, chi süchonkai Ana eʼikajaanüshi nia nutuma nümaʼanamüin Elí chi laülaashikai napüleerua na sacerdotekana (1 Sam. 1:24-28). Süchikijee tia oʼuraajüsü Ana nümüin Jehová sümaa talatüin saaʼin süka shiyaawatüin saaʼu naaʼinmajüin Jehová na wayuu oonookana sümaa nünüiki (1 Sam. 2:1, 8, 9).c Mayaainjeʼe nnojoluin sunoutaain tü kasa alatakat sümüin Ana shia jülüjaka saaʼin tü kasa anasü naapakat Jehová sümüin. Anuu tü watüjakat sünainjee sukuwaʼipa Ana: Wachechereerü waaʼin soʼunnaa müliaa jülüjale waaʼin tü naaʼinrakat Jehová süpüla nükaalinjain waya.

15. ¿Kasa watüjaka sünainjee tü nuchuntakat Jeremías nümüin Jehová? (Jeremías 12:1)

¹⁵ (Paashajeʼera Jeremías 12:1). Yüülasü naaʼin Jeremías chi nünüikimaajachikai Maleiwa sutuma niʼrüin anain nakuwaʼipa na mojulaashiikana jee sutuma meeʼerapalain nia natuma na israelitakana (Jer. 20:7, 8). Eesüjaʼa müle waaʼin maʼaka naaʼin Jeremías sutuma meeʼerapalain waya atumawaa jee sutuma weʼrüin anain nakuwaʼipa na mojulaashiikana. Mojushiisü nümüin Jeremías tü kasa niʼrakat jee nüküjain nümüin Jehová jamüin naaʼin, nnojotpejeʼe nüsirüin tia Jehová naashin. Sutuma niʼrüin Jeremías sukuwaʼipa nutuma Jehová süsalajatpa saainjala wayuu nutuma niyaawata aaʼu lotuin maʼin nukuwaʼipa Jehová sünain süpüshuaʼa tü kasa naaʼinrakat (Jer. 32:19). Müsia wakuwaʼipa, eeshii süpüla waküjain nümüin Jehová tü alatakat wamüin, Watüjaa aaʼulu nunouteʼerüinjatüin Jehová tia soʼu tü kaʼi anakalü oʼu shia.

16. ¿Kasa watüjaka sünainjee tü nuchuntakat chi levitakai nümüin Jehová? (Salmo 42:1-4; piirakaa sümüin tü ayaakuaakat).

¹⁶ (Paashajeʼera Salmo 42:1-4). Jayeechika tüü nünüiki shia wanee levita amaanaka suluʼumüin wanee mma naata. Mojusü naaʼin sutuma nnojoluin süpüla nuʼwaajüin Jehová namaa na nuwalayuukana sünain anoujaa. Eesüjaʼa müle waaʼin maʼaka naaʼin chia levitakai sutuma nnojoluin süpüla wojuʼitüin wepialuʼujee sutuma ayuulin waya jee shiale sutumajee püreesain waya saaʼujee wanoujain. Sülatüle wamüin tia, eejeerü kaʼi aneetkalü oʼu waaʼin jee mojeetkalü oʼu waaʼin. Anapejeʼe maʼin waküjale nümüin Jehová jamüin waaʼin. Müle shia watuma nnojoleerü waaʼinmaain maʼin tü müliaa weʼrakat jee jülüjeerü waaʼin tü eekat süpüla waaʼinrüin. Jamüshijaʼa chia levitakai jülüjasü naaʼin eejeerü tü kaʼi nuʼwaajeechikalü oʼu Jehová nüchikuaʼa namaa na nuwalayuukana (Sal. 42:5). Otta jülüjasü naaʼin naaʼinmajünüin nutuma Jehová (Sal. 42:8). Waküjale nümüin Jehová süpüshuaʼa tü suluʼukat waaʼin aʼwanajaajeerü tü jülüjakat waaʼin, nnojoleena waaʼinmaain maʼin tü müliaa weʼrakat jee wachechereerü waaʼin soʼunnaa müliaa.

17. (1) ¿Kasa watüjaka sünainjee tü nuchuntakat Jonás nümüin Jehová? (Jonás 2:1, 2). (2) ¿Jamüsü anakaʼa sotule waaʼin tü sümakat tü karaloʼutakat Salmos weʼrapa müliaa? (Paashajeʼera tü nootakat).

¹⁷ (Paashajeʼera Jonás 2:1, 2). Nuchuntuin tia Jonás nümüin Jehová süleʼeruʼujee wanee jime. Mayaainjeʼe moonooin nia sümaa nünüiki Jehová nütüjaa aaʼulu nükaalinjüneechin nutuma. Niʼraajüinkajasaʼa maʼin Jonás tü pütchi ashajünakat suluʼu Salmos.d Müsüjeseʼe nuchuntuin shia wanaa sümaa nuʼuraajüin nümüin Jehová. Sutuma sotuin naaʼin waneepia tia pütchikat nunoujain maʼin sünain nükaalinjüneechin nutuma Jehová. Meerü wakuwaʼipa maʼaka naaʼin Jonás wanaajüle suluʼu wekii pütchi suluʼujeejatkat tü Bibliakat. Eesüjaʼa süpüla sotuin waaʼin shia woʼuraajapa nümüin Jehová jee amülialaajeerü waaʼin sutuma.

WOʼURAAJA WANEEPIA NÜMÜIN JEHOVÁ

18, 19. ¿Jamüsü anakaʼa sotule waaʼin tü sümakat Roma 8:26, 27 isale wachiki tü wachuntuinjatkat nümüin Jehová? Püküja wanee sukuwaʼipa.

¹⁸ (Paashajeʼera Roma 8:26, 27). Eejeerü kaʼi kapüleejeetkalü oʼu wamüin watüjaain saaʼu tü wachuntuinjatkalü ooʼopünaa nümüin Maleiwa, nükaalinjeenapejeʼe waya Jehová sükajee tü nüpülainkat. ¿Jamüsü sukuwaʼipa tia? Jamüshijaʼa Jehová nüshajirüin suluʼu tü Bibliakat nanüiki waneinnua wayuu oʼuraajakana nümüin. Isale wachiki tü wachuntuinjatkat nümüin Jehová nükaalinjeena waya sükajee tü nüpülainkat süpüla sotuin waaʼin tü nachuntakat naya wayuukana jee meerü wachuntakai shia nümüin jee nusouteerü wamüin.

¹⁹ Jülüjasü saaʼin tia wanee wawala Elena sünülia, chejeʼewat shia Rusia. Püreesasü tü wawala sutuma suʼuraajüin jee saashajeʼerüin tü Bibliakat. Mojusü saaʼin sutuma tia jee nnojotsü sütüjaain aaʼu tü suchuntüinjatkat nümüin Jehová. Anuu sünüiki: «Tatüjaa aaʼulu naapajeerüin Jehová tanüiki mayaainjeʼe tachuntuin tü nachuntakat na wayuu oʼuraajakana nümüin ashajünaka achiki suluʼu tü Bibliakat, jama nütüjaain aaʼu Jehová isain tachiki tü tachuntuinjatkat nümüin sutuma shapaain maʼin taaʼin. Sutuma tia amülialaasü taaʼin soʼunnaa müliain maʼin taaʼin».

20. ¿Jamüsü anakaʼa wakumajüle palajana tü wanüikinjatkat süpülapünaa woʼuraajüin?

²⁰ Eesüjaʼa wattale waaʼin woʼuraajapa nümüin Jehová shapaale maʼin waaʼin. Sülatüle wamüin tia anashii waapajüle tü karaloʼutakat Salmos jee eeshii süpüla washajüin jamüin waaʼin maʼaka naaʼinrüin shia David. Waaʼinra tia süpülapünaa woʼuraajüin (Sal. 18:34, 142 otta tü pütchi ashajünakat iipünaa sünain). Eepejeʼe süpüla naatain sukuwaʼipa watuma waneʼewai wakua wakumajapa wanüiki süpülapünaa woʼuraajüin (Sal. 141:2). ¿Jamüsü sukuwaʼipa putuma?

21. ¿Jamüsü anakaʼa woʼuraajüle nümüin Jehová süka süpüshuaʼa waaʼin?

²¹ Aashin anain waaʼin süka watüjaain saaʼu niyaawatüin saaʼu Jehová jamüin waaʼin süpülapünaa waküjain shia nümüin (Sal. 139:4). Kamalainshaatasü nümüin Jehová waküjale nümüin jamüin waaʼin jee weʼitaale waaʼin nünain. Anakalaka maʼin woʼuraajüle waneepia nümüin chi Washikai Jehová. Washata sukuwaʼipa tü pütchi nachuntakat na wayuu oʼuraajakana nümüin Jehová ashajünaka achiki suluʼu tü Bibliakat. Woʼuraaja nümüin Jehová süka süpüshuaʼa waaʼin, waküja nümüin tü talatakat atuma waaʼin jee tü mojukat atuma waaʼin. Aishii maʼin waya nüpüla Jehová otta eemaateechi nia süpüla nükaalinjain waya.