Motojoyoo waaʼin woʼuraajüin napüleerua na waneinnua

1. ¿Jamüsü watüjaakaʼa saaʼu naapajeein wanüiki Jehová woʼuraajapa?

ALANAʼALEESIA sünain anain eein süpüla woʼuraajüin nümüin Jehová. Jülüjataa waaʼin tüü. Naapüin Jehová aʼyatawaa namüin na aapieekana otta naapüin laülawaa nümüin Jesús saaʼu wainma kasa (Sal. 91:11; Mat. 28:18). Nnojotpejeʼe jaralin aapünüin amüin shikii nutuma Jehová süpüla naapajüin sünüiki wayuu suʼuraajapa. Nia neʼe niakai nümüiwaʼa «chi Aapajakai sünüiki wayuu suʼuraajapa» (Sal. 65:2). Otta kamalainsü nümüin yootuin waya nümaa.

2. ¿Kasa washatüinjatka sünainjee nukuwaʼipa Pablo?

² Anashii woʼuraajüle nümüin Jehová süchiki tü kasa shapaakalü atuma waaʼin, achuntuinjanapejeʼe waya napüleerua na waneinnua. Shia naaʼinraka tia Pablo. Watüjaa aaʼu tia sünainjee tü nüshajakat namüin na anoujashii chajanakana Éfeso. Müshi nia namüin: «Ayatüshia taya oʼuraajüin jüpüleerua» (Éfes. 1:16). Eeshi nuchuntule Pablo nünülia chi wayuu nuʼuraajakai apüleerua. Watüjaa aaʼulu tia sünainjee tü nüshajakat nümüin Timoteo wanaa sümaa nümüin: «Taapüin analuʼutkat nümüin Maleiwa [...]. Sotowaishi pia taaʼin waneepia toʼuraajawaipa nümüin Maleiwa saʼwai jee soʼukai» (2 Tim. 1:3). Nnojotsü nuʼuraajüin neʼe Pablo saaʼu tü kasa shapaakalü atuma naaʼin. Oʼuraajüshiaʼaya nia napüleerua na waneinnua (2 Cor. 11:23; 12:7, 8).

3. ¿Kasa motowaika atuma waaʼin woʼuraajüin napüleerua na waneinnua?

³ Eesüjaʼa motowaire waaʼin woʼuraajüin napüleerua na waneinnua. Jülüjataa waaʼin tü sümakat wanee wawala Sabrina sünülia.a Müsü sünüiki: «Sutuma wainmain tü kasa alatawaikat wamüin eesüjaʼa jülüjale neʼe maʼin waaʼin tü choʼujaakat wamüin wachuntapa nümüin Jehová». Sülatüle wamüin tia, jalouijeerü maʼin wamüin ekirajaayaka tüü. Wekirajaajeerü anain jamüin choʼujaaka woʼuraajüin napüleerua na waneinnua otta tü sukuwaʼipainjatkat watuma.

¿JAMÜSHII WOʼURAAJÜINJANAKAʼA NAPÜLEERUA NA WANEINNUA?

4, 5. ¿Jamaluʼulu tü pütchikat kaawainsü wanüiki wachuntapa nümüin Maleiwa? (Santiago 5:16).

⁴ Kaawainsü maʼin wanüiki wachuntapa nümüin Maleiwa napüleerua na waneinnua (paashajeʼera Santiago 5:16). ¿Eesüche süpüla sunoutaain sukuwaʼipa tü alatakat namüin na waneinnua woʼuraajüle napüleerua? Jamüsaʼa shia. «Achuntapejeʼe maʼin taya püpüleerua süpüla nnojoluinjatüin sümalajaain tü punoulakat», müshi Jesús nümüin Pedro sutuma nütüjaatüjülin aaʼu nüküjainjatüin Pedro sümüin wayuu nnojoluin niʼraajüin Jesús (Luc. 22:32). Wanaa sümaa nüpüreesajinnüin Pablo chaa Roma nüshajüin pütchikat tüü nümüin Filemón: «Kasataalejeseʼe tajütünüin achiki süpüla chamaatüin taya jümaʼanamüin, süka jamüin, juʼuraajawalin tapüleerua». Nüshajüin tia Pablo sutuma nütüjaain saaʼu kaawain nünüiki wanee wayuu nuʼuraajapa (Filem. 22). Maʼaka jeʼra kaʼi süchikijee tia taashisü Pablo atumawaa jee nüküjain pütchi nüchikuaʼa namaa na nuwalayuukana.

⁵ ¿Naainjainche Jehová süpüshuaʼa tü wachekakat süka wachuntuin neʼe shia nümüin? Nnojottaa. Jülüjapejeʼe naaʼin tü shapaakalü atuma waaʼin otta eesia naainjale tü wachuntakat anale shia nümüin. Anasüjeseʼe woʼuraajüle maʼin nümüin Jehová süka süpüshuaʼa waaʼin süchiki tü kasa shapaakalü atuma waaʼin, jama watüjaain saaʼu nükaalinjeenain waya jee aneerü sukuwaʼipa nutuma (Sal. 37:5; anasü paashajeʼerüle 2 Corinto 1:11).

6. ¿Kasa waaʼinreejeetka amüin woʼuraajüle napüleerua na waneinnua? (1 Pedro 3:8).

⁶ Wayuujeena amüliajülii waya woʼuraajüle napüleerua na waneinnua (paashajeʼera 1 Pedro 3:8). Amüliajüliire waya jülüjeerü waaʼin namüliala na waneinnua otta suchunteerü waaʼin wakaalinjain naya (Mar. 1:40, 41). Anuu tü nümakat wanee laülaashi, Michael nünülia: «Toʼuraajapa napüleerua na waneinnua tayaawata aaʼu tü eejiraakat amaa naya, aishiijeseʼe maʼin naya tapüla suluʼujee tia jee kapülasü maʼin taaʼin nakuwaʼipa». Anuu tü nümakat Richard, laülaashi niaʼaya: «Keeʼireejeerü maʼin waaʼin wakaalinjain wanee wayuu woʼuraajüle nüpüleerua jee wakaalinjüle nia asouteechi Jehová wakajee wayakana tü wachuntakat nümüin».

7. ¿Jamüsü nnojoleenakaʼa kapülain neʼe waaʼin wakuwaʼipa wamüiwaʼa woʼuraajüle napüleerua na waneinnua? (Filipos 2:3, 4; piirakaa sümüin tü ayaakuaakat).

⁷ Nnojoleerü kapülain neʼe waaʼin wakuwaʼipa wamüiwaʼa woʼuraajüle napüleerua na waneinnua (paashajeʼera Filipos 2:3, 4). Eʼrüshii waya wapüshuaʼa wamüliala sutuma niain Satanás chi aluwataakai naaʼu na wayuu manoujainsaliikana (1 Juan 5:19; Apoc. 12:12). Woʼuraajawaire napüleerua na waneinnua soteerü waaʼin wanaawain tü wamülialakat «sümaa namüliala na wawalayuukana sainküin tü mmakat» (1 Ped. 5:9). Anuu tü sümakat wanee wawala pürekutsoot, Katherine sünülia: «Sutuma toʼuraajawalin napüleerua na waneinnua sotusü taaʼin nnojoluin tayain neʼe eʼraka müliaa. Sutuma tia, nnojotsü kapülain neʼe taaʼin takuwaʼipa tamüiwaʼa».

¿JARALII NA NA WOʼURAAJÜINJANAKANA APÜLEERUA?

8. ¿Jaralii na woʼuraajüinjanakana apüleerua?

⁸ Anashii woʼuraajüle napüleerua na wawalayuu ayuuikana jee napüleerua na jimaʼaliikana otta na majayünnüükana apüleeruaanakana aaʼin natuma na koleejiajiraakana namaa jee anashii woʼuraajüle napüleerua na wawalayuu laülaayuuinnakana. Eeshii wawalayuu apüleeruaanakana aaʼin sutuma napüshi jee natuma na süʼlaülashiikana mma saaʼujee nanoujain (Mat. 10:18, 36; Aluw. 12:5). Eetaashii joo na wawalayuu apütakana nepia sutuma nnojoliin anain sukuwaʼipa tü mmakat eere kepiain naya. Otta eeshii na müliakana sutuma sülatalaʼa sümüin wanee kasa noumainpaʼa. Anashii woʼuraajüle napüleerua na wawalayuukana mayaainjeʼe nnojoluin weʼraajüin naya. Waaʼinrüle tia oonoojeena waya sümaa tü nümakat Jesús süchiki aijiraainjanain waya (Juan 13:34).

9. (1) ¿Jamüsü anakaʼa woʼuraajüle napüleerua na wawalayuu aʼyataashiikana maʼin wapüleerua? (2) ¿Jamüsü anakaʼa woʼuraajüle napüleerua naʼwayuuse naya wawalayuukana?

⁹ Anashii woʼuraajüle napüleerua na wawalayuu oʼunirakana sukuwaʼipa waʼyataain maʼaka naaʼin na Laülaashii Jülüjakana Aaʼin na Aküjaliikana pütchi otta na neʼipajanakana, na laülaashii jülüjakana aaʼin tü aʼyatawaakat suluʼu Weteet, na wawalayuu jülüjakana aaʼin tü aʼyatawaakat suluʼu wanee departamento chaa Weteet, na wawalayuu alapalaakana waaʼu, na laülaashiikana wapüleerua suluʼu tü outkajaaleekat otta na neʼipajanakana. Aʼyataashii maʼin wapüleerua wawalayuukana naainnua mayaainjeʼe wainmain tü kasa shapaakalü atuma naaʼin (2 Cor. 12:15). Jülüjataa waaʼin tü nümakat Mark, wanee wawala alapalaaikai naaʼu na wawalayuukana, anuu nünüiki: «Tasukajüin maʼin tü teikat nümaa chi tashikai, jama nnojoluin teʼrüin maʼin naya waneepia sutuma wattain taya noulia. Ayuuishii maʼin naya otta laülaayuuinnapain naya. Aaʼinmajünüshiiajeʼe naya sutuma tawala nümaa chi suʼwayuusekai. Mojupejeʼe taaʼin süka nnojoluin chain taya namaa». Eesü nnojorüle watüjaain saaʼu süpüshuaʼa tü alatakat namüin na wawalayuu aʼyataashiikana maʼin wapüleerua müsüjeseʼe anain woʼuraajüle maʼin nümüin Jehová napüleerua (1 Tes. 5:12, 13). Woʼuraaja napüleerua naʼwayuuse naya wawalayuukana, jama namaain naya waneepia otta nakaalinjain maʼin naya süpüla naʼyataain maʼin wapüleerua.

10, 11. ¿Naapüinche Jehová wanüiki woʼuraajüle napüleerua napüshuaʼa na wawalayuukana?

¹⁰ Eeshii woʼuraajüle napüleerua kojuyashii wawalayuu sümaa nnojoluin wachuntuin nanülia maʼaka naaʼin napüleerua na püreesashiikana jee napüleerua na anaajaakana apüshi. Anuu nünüiki wanee wawala, Donald nünülia: «Watta naalii wawalayuu eʼrakana müliaa. Müsüjeseʼe eeshii woʼuraajüle napüleerua napüshuaʼa na wawalayuu choʼujaakana amüin kaalinwaa».

¹¹ ¿Naapüinche Jehová wanüiki wachuntule napüleerua napüshuaʼa na choʼujaakana amüin kaalinwaa? Jamüsaʼa shia. Sutuma nnojoluin watüjaain saaʼu tü alatawaikat namüin na wawalayuukana waneʼewai nakua, anasü wachuntule napüleerua napüshuaʼa nümüin Jehová (Juan 17:20; Éf. 6:18). Oʼuraajüshii waya napüleerua sutuma alin wapüla napüshuaʼa na wawalayuukana (1 Ped. 2:17).

TÜ SUKUWAʼIPAINJATKAT WATUMA WOʼURAAJAPA NÜPÜLEERUA WANEE WAWALA

12. ¿Jamüsü anakaʼa jülüjale waaʼin nakuwaʼipa na wawalayuukana?

¹² Jülüjaa waaʼin nukuwaʼipa. Anasü woʼuraajüle napüleerua napüshuaʼa na wawalayuukana, anapejeʼe maʼin wachuntule nünülia wanee wawala woʼuraajapa. Wasakira waaʼin sünain tüü: ¿Eeshiche wanee wawala outkajaakai wamaa ayuuikai maʼin? ¿Eeshiche wanee jimaʼai mojukai aaʼin sutuma süpüleeruaanüin naaʼin natuma na koleejiajiraakana nümaa? ¿Eesüche wanee wawala epijaka süchon sümüiwaʼa? (Éfes. 6:4). Jülüjale waaʼin nakuwaʼipa na wawalayuukana amülialaajeerü waaʼin naalin jee achunteena waya napüleerua nümüin Jehová (Roma 12:15).b

13. ¿Kasa waaʼinrajatka süpüla woʼuraajüin napüleerua na wawalayuu nnojoliikana weʼraajüin?

¹³ Wachunta nünülia. Eesü süpüla wachuntuin nanülia na wawalayuukana woʼuraajapa mayaainjeʼe nnojoluin weʼraajüin naya, maʼaka naaʼin na wawalayuu ashajünaka anülia suluʼu jw.org c na chakana Crimea, Eritrea, Rusia otta Singapur. Anuu nünüiki wanee wawala alapalaaikai naaʼu na wawalayuukana Brian nünülia: «Süpüla sotuin taaʼin na wawalayuu püreesakana jee tachuntuin nanülia toʼuraajapa, tashajüin nanülia sünain wanee karaloʼuta jee tachuntuin shia kojuyatua».

14, 15. ¿Kasa waaʼinrajatka süpüla wachuntuin wanaapünaa sümaa tü choʼujaakat nümüin wanee wawala?

¹⁴ Wachunta nüpüleerua wanaapünaa sümaa tü choʼujaakat maʼin nümüin. Jülüjataa waaʼin tü nümakat Michael, chi wachuntakai anülia suluʼu pütchi 6: «Taashajeʼerapa suluʼu jw.org tü nachikimaajatkat na wawalayuu püreesakana müshi chakai aaʼin taya püreesain wanaa namaa. Sutuma tatüjaain saaʼu shapaain naaʼin saaʼu naʼwayuuse tachuntuin nümüin Jehová süpüla nükaalinjain naya sümaa naʼwayuuse» (Heb. 13:3).

¹⁵ Atüjeena waya süpüleerua tü wachuntuinjatkat nümüin Jehová napüleerua na wawalayuu püreesakana jülüjale waaʼin tü nakuwaʼipakat. Jamüshiijaʼa waya eeshii süpüla wachuntuin nümüin Jehová süpüla kamaneeinjanain na waariakana namüin na wawalayuukana jee süpüla nooʼulaain naʼwaajüin Maleiwa (1 Tim. 2:1, 2). Wane kasa eeka süpüla wachuntuin nümüin Jehová shia waneepiainjanain na wawalayuu outkajaapuʼukana nümaa chi wawala püreesakai maʼaka waneepiain chia wawalakai nümaa Jehová. Otta wane kasa eeka süpüla wachuntuin shia sunoujain wayuu nünain Jehová sünainjee anain nukuwaʼipa chi wawala püreesakai (1 Ped. 2:12). Maʼaka wekirajaainnapain anain jülüjainjatüin waaʼin nakuwaʼipa na wawalayuukana süpülapünaa woʼuraajüin napüleerua, wachuntuinjatü nanülia jee wachuntuinjatü wanaapünaa sümaa tü choʼujaakat maʼin namüin. Eesü süpüla jülüjain waaʼin tia wachuntapa napüleerua napüshuaʼa na wawalayuukana. Anasü waaʼinrüle tia, jama alin maʼin naya wapüla (1 Tes. 3:12).

TÜ JÜLÜJAINJATKAT WAAʼIN WOʼURAAJAPA

16. ¿Kasa jülüjainjatka waaʼin woʼuraajapa? (Mateo 6:8).

¹⁶ Kaawainsü wanüiki woʼuraajapa nümüin Jehová, jama eein süpüla anain nukuwaʼipa wanee wayuu sünainjee. Atüjainjanapejeʼe waya süpüleerua sukuwaʼipa wanüiki woʼuraajapa, kojutuinjachi Jehová watuma jee jülüjainjatüin waaʼin nütüjaain saaʼu süpüshuaʼa tü alatakat namüin na wawalayuukana jee nütüjaa aaʼulu tü choʼujaakat namüin. Müsüjeseʼe nnojoluinjatüin waküjain nümüin Jehová tü naaʼinrajatkat nüpüleerua wanee wawala (paashajeʼera Mateo 6:8). Wekirajaainnapa anain jamüin woʼuraajüinjanaka napüleerua na waneinnua. Eepejeʼe wanee kasa waaʼinrajatka aaʼujee tia, shia sutuma kapülain waaʼin nakuwaʼipa na waneinnua. Oʼuraajüshii waya napüleerua na wawalayuukana saaʼujee alin naya wapüla, mayaa washatüin nukuwaʼipa Jehová, jama alin maʼin waya nüpüla.

17, 18. Püküja wanee sukuwaʼipa wayaawataka atuma talateein naaʼin Jehová wamaa woʼuraajüle napüleerua na waneinnua.

¹⁷ Mayaainjeʼe weʼrüin nnojoluin sunoutaain wanee kasa alataka nümüin wanee wawala wachuntakai apüleerua nümüin Jehová, kojutusü tia nümüin Jehová süka waaʼinrüin shia saaʼujee alin wapüla chi wawalakai. Jülüjataa waaʼin nukuwaʼipa wanee wayuu piamakai nüchonnii. «Ayuuishi maʼin chi tawalakai, pükaalinja maa nia», müshi wane nüchon nümüin pejeewa. Nütüjaa aaʼu chi nüshikai aneechin nüchikuaʼa chi wane nüchonkai, jama naaʼinmajüin nia. Talatapejeʼe naaʼin sutuma tü nuchuntakat chi wane nüchonkai nümüin, jama nütüjain saaʼu naaʼinrüin tia sutuma alin nüpüla chi nuwalakai.

¹⁸ Müinjatü wakuwaʼipa maʼaka naaʼin chia jintüikai. Kapülainjatü waaʼin nakuwaʼipa na waneinnua jee oʼuraajüinjana waya napüleerua. Waaʼinrüle tia nnojoleerü kapülain neʼe waaʼin wakuwaʼipa wamüiwaʼa. Kojuteerü nümüin Jehová tia jee talateechi nia wamaa (2 Tes. 1:3; Heb. 6:10). Soto waaʼin eein süpüla sunoutaain tü kasa alatakat nümüin wanee wayuu woʼuraajüle nüpüleerua nümüin Jehová. Anasüjeseʼe maʼin woʼuraajüle napüleerua na wawalayuukana.