Ayataʼaya talatüin waaʼin laülaale waya

1, 2. ¿Jamüsü nakuwaʼipa nümüin Jehová na wawalayuu laülaayuuinnakana? (Salmo 92:12-14; piirakaa sümüin tü ayaakuaa sünainkat süta tü rewiisütakat).

EESHII wayuu anakana amüin laülaamaatüin naya, eetaashii joo na achajaakana sukuwaʼipa suulia jaʼyain naaʼu laülaain naya. Jamüsüjaʼa neʼrapa shiyulain wanee kasuula sünain nekii nasujamaatüin shia ayatüinjatpejeʼe ojuʼitüin shia namüin, jama laülaain wanee wayuu shiʼipaʼaya.

² ¿Jamüsü nakuwaʼipa nümüin Jehová na wawalayuu laülaainnakana? (Prov. 16:31). Müshii naya nümüin maʼaka saaʼin wunuʼulia eekai miyoʼu maʼin sümaa kasiin maʼin (paashajeʼera Salmo 92: 12-14). Jamüsüjaʼa kakaliairüle wanee wunuʼulia wüittüsü waneepia sümaa kasiin maʼin, maʼaka saaʼin tü wunuʼulia flor de cerezo japonés makalü anülia, eesü süsaʼwatüle miit juya. Maʼaka saaʼin tia wunuʼulia, kojutushii nümüin Jehová na wawalayuu laülaayuuinnakana saaʼujee tü nakuwaʼipakat jee sutuma kakaliainnain naya aʼyataain nümüin sümaa waneepiain naya nümaa.

3. ¿Jaralii na wayuu aneekünakana nutuma Jehová süpüla naaʼinrüin aʼyatawaa kaawainka maʼin eerejeʼe wayuuin miyoʼuin naya?

³ Kojutushiʼiya waya nümüin Jehová jaʼitainna laülaain waya.a Jamüshijaʼa nia nüneeküin wayuu miyoʼu süpüla naaʼinrüin aʼyatawaa kaawainkat maʼin. Jülüjataa waaʼin sukuwaʼipa Sara, aneekünüsü shia nutuma Jehová süpüla kachoinjatüin shia eerejeʼe wayuuin miyoʼuin shia, jee nünainjee chi süchonkai watteena naalii na suuʼuliwoʼukana, nayainjanaka joo natuushinuu chi Mesíaskai (Gén. 17:15-19). Akaataajaʼa neʼe nukuwaʼipa Moisés, mayaainjeʼe laülaain nia aneekünüshi nutuma Jehová süpüla niyuʼluin na israelitakana Egiptojee (Éx. 7:6, 7). Müsia nukuwaʼipa Juan chi aluwataaushikai, aneekünüshi nia nutuma Jehová laülaapa nia süpüla nüshajüin jaʼraisü karaloʼuta suluʼukat tü Bibliakat.

4. ¿Saashin Proverbios 15:15, kasa nounteetka atuma na wawalayuu laülaayuuinnakana eejiraain naya sümaa tü alatakat namüin? (Piirakaa sümüin tü ayaakuaakat).

⁴ Saashin wanee wawala yalayalainjatü waaʼin laülaapa waya süka jamüin, wainmain kasa oʼttaaka nümüin wanee wayuu laülaapa nia, nükaalinjeena waya Jehová süpüla ayatüin talatüin waaʼin mayaainjeʼe laülaain wayab (paashajeʼera Proverbios 15:15). Sünain ekirajaayakat tüü wekirajaajeerü anain süchiki tü eekat süpüla mojuin atuma waaʼin laülaale waya, tü waaʼinrajatkat süpüla ayatüin talatüin waaʼin jee tü naaʼinrajatkat na wawalayuukana süpüla nakaalinjain na wawalayuu laülaayuuinnakana.

TÜ EEKAT SÜPÜLA MOJUIN ATUMA WAAʼIN

5. ¿Kasa tü eekat süpüla mojuin atuma waaʼin laülaale waya?

⁵ Laülaale waya eesüjaʼa mojule waaʼin sutuma ayuulin waya, matchin waya jee shiale sutuma isain wachiki waaʼinrüin tü waaʼinrapuʼuka jimaʼaliiwaʼaya waya (Ecl.7:10). Jülüjataa waaʼin tü sümakat wanee wawala Ruby sünülia: «Sutuma aijaain maʼin tatapaʼa kapüleesü maʼin tamüin taʼatüin tanain tasheʼin, jamüsüjaʼa süpüla taʼatüin tanain tü tamediasekat aishaatasü maʼin tasaʼa tayalerapa shia. Sutuma tanain tü ayuuliikat artrosis nnojotsü süpüla taaʼinrüin wanee kasa süka tajapü süka alin maʼin shia tamüin». Anuu nünüiki wanee wawala Harold nünülia, aʼyataapuʼushi nia suluʼu Betel: «Eeshi jashichire maʼin taya sutuma isain tachiki taaʼinrüin tü taaʼinrapuʼukat paala. Kanchouleepuʼushi taya jee kamalainpuʼusü tamüin ashaitaa béisbol ‹Pülatira tü woolakat nümüin Harold, atüjashi maʼin nia ashaitaa› Mapuʼushii na ashaitakana tamaa. Eekajasaʼa maaʼulu isaleeitpa tachiki tayalerüin tajapü süpüla tojutirüin wanee woola».

6. (1) ¿Kasa amaa eeka süpüla mojuin atuma waaʼin? (2) ¿Kasa jülüjainjatka naaʼin wanee wawala laülaaichikai süpüla niyaawatüin saaʼu nuuʼulaainjachire suulia oʼuniraa kemion? (Paashajeʼera tü pütchikat «¿Ooʼulaainjaiche taya suulia oʼuniraa kemion?»).

⁶ Wane kasa mojuka atuma waaʼin laülaale waya shia nnojoluin süpüla waaʼinrüin wanee kasa wamüiwaʼa. Eesüjaʼa choʼujaale wamüin waneepiain wanee wayuu wamaa süpüla nükaalinjain waya sünain aaʼinraa waneirua kasa, jee eeshiijaʼa kepiale waya nümaa wanee wachoin süpüla naaʼinmajüin waya. Eesüjaʼa isale wachiki woʼunireein kemion jee woʼunule wamüiwaʼa jalapünaa yaa sutuma ayuulin maʼin waya jee moʼupaʼain waya, mojusü waaʼin sutuma tia. Wanee kasa amülialeetka waaʼin shia kojutuin waya nümüin Jehová jee namüin na wawalayuukana mayaainjeʼe nnojoluin süpüla waaʼinrüin wanee kasa wamüiwaʼa. Niyaawata aaʼu Jehová jamüin waaʼin, niʼraajüin maʼin wakuwaʼipa otta nütüjaa aaʼulu alin nia wapüla jee alin wapüla na wawalayuukana (1 Sam. 16:7).

7. ¿Kasa aneetka atuma waaʼin jülüjale waaʼin nnojoleenain weʼrüin Armagedón?

⁷ Wane kasa eeka süpüla mojuin atuma waaʼin shia jülüjale waaʼin eein süpüla outuin waya süpülapünaa süntüin Armagedón. Aneetpejeʼe waaʼin jülüjale waaʼin nnojotyüluin najaʼttirüin Jehová tü kasa mojusü eekat maaʼulu shiiʼiree shiyaawajaainjatüin wayuu suulia saainjala (Is. 30:18). Otta süpüla shiʼraajüin tü nukuwaʼipakat jee shiʼyataain nümüin (2 Ped. 3:9). Mojule waaʼin sutuma jülüjain waaʼin nnojoleerüin weʼrüin nükalia Jehová, anasü sotule waaʼin aneerüin sukuwaʼipa watta saalii wayuu sünainjee nnojoluin süshapajaain naaʼin Jehová.

8. ¿Kasa eeka süpüla nüküjain wanee wayuu sutuma laülaaichin otta ayuulin nia?

⁸ Nnojorüle anain waaʼin eesüjaʼa airuʼurule wanüiki otta waaʼinrüle kasa mojeetkalü atuma waaʼin mapa. Eesüjaʼa süpüla sülatüin wamüin tia jaʼitaina jimaʼaliin waya, majayünnüüle waya jee laülaayuuinnale waya (Ecl. 7:7; Sant. 3:2). Jamüshijaʼa Job nnojotsü niyaawatüin saaʼu nünüiki niʼrapa müliaa eerejeʼe kanoulain maʼin nia (Job 6:1-3). Eesüjaʼa müle wakuwaʼipa maʼaka naaʼin Job wanainre wanee ayuulii. Laülaaichire jee ayuuire wanee wayuu nnojotsü anain jashichikuʼu nümüle jee mojule nünüiki namüin na waneinnua, müle wakuwaʼipa mayaa, «nnojotsü meein tanüiki pümüin» anashii mamaatüle waya nümüin chi wayuu mojukai amüin wanüiki (Mat. 5:23, 24).

WAAʼINRAJATKA SÜPÜLA AYATÜIN TALATÜIN WAAʼIN

9. ¿Jamüsü anakaʼa wooʼulaale nakaalinjain waya na waneinnua? (Piirakaa sümüin tü ayaakuaakat).

⁹ Wooʼulaa nakaalinjain waya na waneinnua (Gal. 6:2). Eeshii nnojoliire kiʼrain waya sünain, anuu tü sümakat wanee wawala Gretl sünülia: «Kapüleʼewaisü tamüin tooʼulaain nakaalinjain taya na waneinnua, suulia müin tekeʼejakai naaʼin. Tayaawatapejeʼe saaʼu mapa nnojoluinjatüin yaletüin taaʼin otta choʼujaain takaalinjünüin». Talateerü naaʼin na waneinnua wooʼulaale nakaalinjain waya (Aluw. 20:35). Jee talateerü waaʼinña weʼrapa alin waya napüla jee jülüjain waya naaʼin.

10. ¿Jamüsü anakaʼa waapawaire analuʼut saaʼu tü naaʼinrakat na waneinnua wapüleerua? (Piirakaa sümüin tü ayaakuaakat).

¹⁰ Atüjainjana waya aapaa analuʼut (Col. 3:15; 1 Tes. 5:18). Anasü waaʼin wakaalinjünüle, eepejeʼe süpüla nnojoluin waapüin analuʼut namüin na waneinnua saaʼujee tü naaʼinrakat. Wakulemeraale namüin otta waapüle analuʼut namüin, aneerü naaʼin neʼrapa kojutuin wamüin tü naaʼinrakat wapüleerua. Anuu tü sümakat wanee wawala Lea sünülia, saaʼinmajawalin na wawalayuu laülaayuuchein kepiakana suluʼu Betel: «Süshajawalin karaloʼuta tamüin wanee wawala laülaaitka süpüla saapüin analuʼut tamüin, antüsü suluʼumüin taaʼin tü süshajakat tamüin jee talatashaatasü maʼin taaʼin sutuma teʼrüin kojutuin maʼin sümüin takaalinjain shia».

11. ¿Kasa amaa waaʼinrajatka napüleerua na waneinnua? (Piirakaa sümüin tü ayaakuaakat).

¹¹ Wakaalinja na waneinnua. Shiale waaʼinmaain maʼin namaain waya na waneinnua otta waaʼinrüin kasa anasü napüleerua nnojoleerü jülüjain maʼin waaʼin tü alatakat wamüin. Jamüshiijaʼa na wayuu laülaayuuinnakana müshii aka saaʼin wanee libro jalouika maʼin wamüin, jama wainma tü kasa watüjakat nanainjee, nnojoleetpejeʼe jaloulin wamüin wanee libro wanaajüle neʼe shia. Akaʼaya joo wayakana, choʼujaasü yootuin waya namaa na waneinnua süpüla natüjainjanain wanainjee, anashii wasakirüle naya otta waapaja nanüiki naküjapa wamüin süchiki wanee kasa. Waküja namüin jamüin anaka noonoole waneepia nümüin Jehová otta waküja namüin talateerü maʼin naaʼin naaʼinrüle tia. Talateerü waaʼinña weʼrapa wamülialüin naaʼin otta wakatchinrüin naaʼin (Sal. 71:18).

12. ¿Kasa naaʼinrajatka Jehová napüleerua na wawalayuu laülaayuuinnakana saashin Isaías 46:4? (Piirakaa sümüin tü ayaakuaakat).

¹² Wachunta nümüin Jehová nükatsüinrüin waaʼin. Eeshiijaʼa mapüsawaire waya otta mojuwaire waaʼin, eekajasaʼa Jehová «matüjainsai mapüsaa» (Is. 40:28). Miyoʼu tü nüpülainkat Maleiwa otta naapüin shia namüin na wawalayuu laülaayuuinnakana süpüla katsüinjatüin naaʼin (Is. 40:29-31). Nüküjainjeseʼe Jehová namüin: «ayateena takaalinjain jia» (paashajeʼera Isaías 46:4). Jee nikeraajüin waneepia tü nümakat (Jos. 23:14; Is. 55:10, 11). Talateerü maʼin waaʼin weʼrapa alin waya nüpüla Jehová otta nükaalinjain waya.

13. ¿Kasa soteetka waaʼin saashin 2 Corinto 4:16-18? (Piirakaa sümüin tü ayaakuaakat).

¹³ Soteesü waaʼin nnojoleenain laülaain waya jee nnojoleerü wanain waʼleche. Wachechereerü waaʼin jülüjale waaʼin nnojoleerüin müliakuʼu müin waaʼin. Ashajünüsü suluʼu tü Bibliakat nnojoleerüin laülaain jee ayuulin wayuu mapeena (Job 33:25; Is. 33:24). Talatashaatasü maʼin waaʼin sutuma watüjaain saaʼu aneerüin wakuwaʼipa mapeena jee aneerüin waaʼin (paashajeʼera 2 Corinto 4:16-18). ¿Kasa amaa naaʼinrajatkat wapüleerua na waneinnua?

¿KASA WAAʼINRAJATKA SÜPÜLA WAKAALINJAIN NA LAÜLAAYUUINNAKANA?

14. ¿Jamüsü choʼujaakaʼa wayamaajawalüin na wawalayuu laülaayuuinnakana otta wawaraijaʼawalüin naaʼu?

¹⁴ Anashi wawaraijaʼawaire naaʼu otta wayamaajawaire naya (Heb. 13:16). Eesü mojuwaire naaʼin na wayuu laülaayuuinnakana sutuma namüiwaʼain naya. Anuu tü nümakat wanee wawala Camille nünülia : «Akulajaashatasü taaʼin sutuma isain tachiki tojuʼitüin piichipaʼajee. Mojuwaisü taaʼin, shapaakuʼu müsü taaʼin, müsü jalapaʼakai taaʼin, müshii aka taya naaʼin wanee mürüt süttakai atumawaa». Wanaʼlawaire amüin na laülaayuuinnakana neʼreerü alin naya wapüla jama jülüjain naya waaʼin. ¿Aashin motowalin waaʼin waaʼinrüin tia sutuma kupaain maʼin waya? Anashi wawaraijaʼawaire naaʼu na laülaayuuinnakana jama choʼujaain maʼin waaʼinrüin tia (Filip. 1:10). Anasü washajüle nanülia naya wawalayuukana otta joujainjana wayamaajüin naya suulia motojuin shia waaʼin, «nnaweerüjaʼa sukuwaʼipa» nnojoishii müinjanain waya. Anasü wakumajüle sukuwaʼipa süpüla wawaraijaain naaʼu jee anasü waaʼinramaatüle shia.

15. ¿Kasa amaa eeka süpüla waaʼinrüin namaa na wawalayuu laülaayuuinnakana?

¹⁵ «¿Kasache anaka süpüla yootuin achiki taya namaa? ¿Kasache anaka süpüla taaʼinrüin namaa?», eesüjaʼa maa müle paaʼin jimaʼaire pia jee majayürüle pia. Nnojotsü anain shapaale maʼin paaʼin saaʼu, anasü paʼaleewajaale namaa (Prov. 17:17). Anashii yootule waya namaa süpülapünaa suʼttuin tü outkajawaakat jee shiale sujutaapa. Eeshijaʼa süpüla püsakirüin naya jaralin tü pütchi kamalainkat namüin suluʼujee tü Bibliakat, jee puchunta namüin nakuentajüin pümüin tü naaʼinrapuʼukat tepichijaiwaʼaya naya. Puuneja naya süpüla nanajüin pümaa tü ojuʼitawaika suluʼu Broadcasting. Pükaalinja naya sünain tü isakat nachiki, eesüjaʼa süpüla punoutuin sukuwaʼipa wanee kasa suluʼu naserulaatse jee shiale püdescargaajüin namüin tü jeketükat karaloʼuta nekirajaayainjatü. Anuu tü anakat süpüla paaʼinrüin saashin wanee wawala, Carol sünülia: «Puuneja naya süpüla paaʼinrüin namaa wanee kasa kamalainkat pümüin. Mayaainjeʼe laülaain taya, kamalainsü tamüin taainjain kasa talatakat atuma taaʼin maʼaka saaʼin ojuʼitaa sünain ayaʼlajaa wanee kasa jee shiale sünain tekaain namaa na taʼaleewainyuukana jee toʼunuin jalapünaa yaa süpüla tananajüin tü kasa anasüchenkat nukumajakat Jehová». Anuu tü sümakat wanee wawala Maira sünülia: «90 suuyase wanee taʼaleewain otta 33 touyase, nnojotpejeʼe jülüjain taaʼin laülaain shia toulia, talatüsü taaʼin sümaa, ananajüshii waya peliikula otta akaalinjiraashii waya».

16. ¿Jamüsü anakaʼa noʼuyaajanale waya na wawalayuu laülaayuuinnakana sünain eʼrajeʼeraa?

¹⁶ Anashi puʼunule namaa neʼrajeʼerapa. Nnojotsü shiain neʼe weʼikajaain naya, anashii makatüle waya namaa neʼrajeʼennaleepa nutuma chi tottootkai (Is. 1:17). Anasü washajüle sünain wanee karaloʼuta tü naaʼinrajatkat naashin chi tottootkai. Anuu tü sümakat wanee wawala Ruth sünülia: «Toʼunapa tamüiwaʼa nümaʼanamüin chi tottootkai, nnojotsü kapülain taya naaʼin, nnojotsü joo nunoujain tü tamakat nümüin, ‹Nnojotsü anain tü suluʼukat pikii maachon› eeshijaʼa nümüle neʼe tamüin. Eekajasaʼa koʼuyaajanale taya kamaneeshi tamüin. Talatashaatasü maʼin taya namaa na wawalayuu oʼunakana tamaa nümaʼanamüin chi tottootkai».

17. ¿Kasa waaʼinrajatka süpüla wamaain na wawalayuu laülaayuuinnakana sünain aküjaa pütchi?

¹⁷ Waküja pütchi namaa. Eesüjaʼa isale nachiki na wawalayuu laülaayuuinnakana naküjain pütchi sainküin miichi, anashii wounejaale naya süpüla naküjain pütchi wamaa süka tü kareetachonkat. Eesü süpüla walüʼüjain wanee siiya süpüla naikalaain waʼatoʼu. Otta eeshii süpüla wasakirüin naya anale saaʼin namüin wekirajüle wanee wayuu nepialuʼu. Eesüjaʼa mapüleere namüin na wawalayuu laülaayuuinnakana naküjain pütchi nojuʼitüle na wawalayuukana nepialuʼujee. Eesüjaʼa süpüla müin sukuwaʼipa natuma na laülaashiikana wapüleerua. Talateerü naaʼin Jehová wamaa niʼrapa kamaneein waya namüin na wawalayuu laülaayuuinnakana otta kojutuin naya wamüin (Prov. 3:27; Roma 12:10).

18. ¿Kasa watüjaajeetka aaʼu sünain tü wanee ekirajaayakat?

¹⁸ Wayaawatüitpa aaʼu kojutuinjanain wamüin na wawalayuu laülaayuuinnakana otta alinjanain naya wapüla maʼaka naaʼinrüin shia Jehová. Müliasü saaʼin wayuu laülaapa naya, ayateenapejeʼe talatüin naaʼin sutuma nükaalinjain naya Jehová (Sal. 37:25). Katchinsü waaʼin süka watüjaain saaʼu aneerüin maʼin wakuwaʼipa mapeena. ¿Jama wayale aaʼinmajüin wanee wapüshi laülaaichi, wanee wachoin jee shiale wanee waʼaleewain eekai ayuulin?, ¿Kasa waaʼinrajatka süpüla ayatüin talatüin waaʼin? Watüjaajeerü aaʼu tia sünain tü wane ekirajaayakat.