¿Jamüshii nnojoliika sünainpünaain na aküjaliikana pütchi nüchiki Jehová saludo a la bandera otta eeʼirajaa himno nacional?

Wayakana aküjaliikana pütchi nüchiki Jehová kojutushii wamüin na sülaülashiikana mma, kojutusü wamüin tü wanteerakat jee tü himno nacional münakat. Nnojotsü wapüleeruain saaʼin wayuu süpüla nnojoluin naaʼinrüin saludo a la bandera, juramento otta neeʼirajüin himno nacional wanaa wamaa.

¿Jamakaʼa nnojoliika sünainpünaain waya tia? Jülüjasü waaʼin nnojoluin pansaain tü sümakat tü Bibliakat sümaa tü kasa aainjünakat sümüin tü wanteerakat otta tü kasa eeʼirajünakalü aaʼujee himno nacional. Maʼaka kojutuin wamüin tü aainjünakat süka tü wanteerakat jee shiiʼirajünüin himno nacional, keeʼireesiaʼaya waaʼin kojutuin natuma na waneinnua tü wanoujakalü anain.

Anuu tü waashajaainjatkalü achiki sünain pütchikat tüü:

• ¿Kasa süküjaka tü Bibliakat süchiki tia?

• ¿Kasa waaʼinraka napüleeruale waaʼin na sülaülashiikana mma süpüla sünainpünaain waya tia?

• ¿Wachajaainche sukuwaʼipa wayakana aküjaliikana pütchi nüchiki Jehová süpüla sunoutaain sukuwaʼipa política jee sukuwaʼipa wayuu?

¿Kasa süküjaka tü Bibliakat süchiki tia?

Anuu piamasü pütchi suluʼujee tü Bibliakat wayaawataka atuma jamüin nnojoliika sünainpünaain waya tia:

• Nia waʼwaajüinjachikai Maleiwa nümüiwaʼa. Anuu sünüiki tü Bibliakat: «Nia puʼwaajüinjachika Jehová nümüiwaʼa, nia Pümaleiwaseka otta nia piʼyataainjachika amüin» (Lucas 4:8). Tü juramento aainjünakat sümüin tü wanteerakat jee sümüin himno nacional, eesü pütchi nüpansaajaka wanee wayuu süpüla kojutuinjatüin nümüin tü nuumainkat, jaʼitairü kasain naaʼinrajatüin süpüla nikeraajüin tia pütchikat. Müsüjeseʼe nnojoluin anain wamüin wayakana aküjaliikana pütchi nüchiki Jehová sünainpünaain waya tia.

  Wayakana aküjaliikana pütchi nüchiki Jehová nnojoishii waya sünainpünaain saludo a la bandera süka müin waʼwaajakai saaʼin waaʼinrüle tia. Mojusü tia saashin tü Bibliakat (1 Corinto 10:14). Naashin waneinnua wayuu ashajakana süchiki tü kasa alatüitkat «tü wanteerakat süpülajatü neʼe suʼwaajünüin». Wanee wayuu aküjakai tia, nia Carlton Hayes. Müsü nünüiki: «Tü wanteerakat shia tü aʼwaajünakat maʼin suluʼu wanee mma».a Daniel Mannix, nia wanee wayuu ashajakai karaloʼuta. Anuu nünüiki nachiki na anoujashii namaiwajanakana: «Nayoutuin na anoujashiikana naaʼinrüin waneirua kasa süpüla naʼwaajüin chi aluwataaikai saaʼu Roma. Tü naaʼinrakat naya anoujashiikana müsü aka saaʼin niyoutule wanee wayuu maaʼulu sünainpünaain saludo a la bandera».b

  Mayaainjeʼe nnojoluin sünainpünaain waya saludo a la bandera jee shiale wanee shiyaawase mma, nnojotsü wachatajüin, nnojotsü waʼajüin jee nnojotsü waaʼinrüin wanee kasa mojuteetka atuma shia.

• Wanaawasü sukuwaʼipa wayuu noʼuluʼu Maleiwa (Aluwataaushikana [Hechos] 10:34, 35). Anuu sünüiki tü Bibliakat: «Nünainjee waneeshia wayuu, nukumajüin Maleiwa napüshuaʼa na wayuukana süpüla kepiainjanain naya sainküinpünaa tü mmakat» (Aluwataaushikana 17:26). Müshiijeseʼe wayakana aküjaliikana pütchi nüchiki Jehová nnojoluin koʼuin wakuwaʼipa sümüin wayuu, kojutusü wamüin wayuu maʼleekalia, jaʼitashii jalejeʼewaliin naya jee jalain kepiain naya (1 Pedro 2:17).

¿Kasa waaʼinraka napüleeruale waaʼin na sülaülashiikana mma süpüla sünainpünaain waya tia?

Wayakana aküjaliikana pütchi nüchiki Jehová, oonooshii waya namaa na sülaülakana mma. Watüjaa aaʼu nuuʼulaain Maleiwa naluwataain na sülaülashiikana mma süpüla anain sukuwaʼipa tü kasakalüirua yaa saaʼu tü mmakat (Roma 13:1-7). Otta watüjaa aaʼu süküjain tü Bibliakat noonooinjanain na anoujashiikana namaa na sülaülashiikana mma (Lucas 20:25).

¿Kasa waaʼinrajatka naluwataale waya na sülaülashiikana mma sünain aaʼinraa wanee kasa mojuka saashin tü Bibliakat? Eesüjaʼa waluwataale wanee karaloʼuta namüin na sülaülashiikana mma eere wachuntuin namüin nanoutuin tü pütchi naikaleʼerakat.c Nnojorüle nanoutuin tia pütchikat, ayatüshii kojutuin naya wamüin, niapejeʼe Maleiwa «woonoʼoleeinjachika amaa anüiki suulialeʼeya sünüiki wayuu» (Aluwataaushikana 5:29).

¿Wachajaainche sukuwaʼipa wayakana aküjaliikana pütchi nüchiki Jehová süpüla sunoutaain sukuwaʼipa política jee sukuwaʼipa wayuu?

Nnojo. Wayakana aküjaliikana pütchi nüchiki Jehová, nnojoishii sünainpünaain waya política jee nnojoishii sünainpünaain waya sukuwaʼipa wayuu, nnojoishii waya aaʼinrüin juramento de lealtad, saludo a la bandera jee nnojoishii waya eeʼirajüin himno nacional. Waaʼinrüin tia süpüla woonooinjanain sümaa tü sümakat tü Bibliakat, nnojotsü shiain saaʼujee weʼrüliijeein wayumüin namüin na sülaülashiikana mma.