¿Jamüsü nakuwaʼipa na Aküjaliikana pütchi nüchiki Jehová namaa na ojuʼitinnakana naʼakajee?
Wayakana aküjaliikana pütchi kamaneeshii waya, kojutushi otta aishi wapüla na wayuukana, eereje wanee aküjain pütchi nnojoikai outkajaain sümaa nnojoluin nüküjain pütchi jee nuuʼulaale suulia anouja, wakumajüin sukuwaʼipa süpüla waashajaain nümaa a otta waküjain nümüin alin nia wapüla jee waaʼinmaasü nuʼwaajüinjachi Maleiwa nüchikuaʼa (Lucas 15:4-7).
Macheʼere wanee wawala süchirua kaainjarale jee nujuʼitinnüle naʼakajee na wawalayuukana (1 Corinto 5:13) Sutumajee alin wapüla na wawalayuukana wakaalinjain nia süpüla niyaawajaain suulia naainjala süpüla nnojoluin nujuʼitinnüin. Müleka nujuʼitinnüle naʼakajee na wawalayuukana ayatüshi alin nia wapüla jee kojutushi nia wamüin, maʼaka süküjain tü Bibliakat (Marcos 12:31; 1 Pedro 2:17).
¿Kasa ojuʼitinnaka aaʼujee wanee wawala naʼakajee na wawalayuukana?
Süküjain tü Bibliakat kaainjarale wanee wawala jee nnojorüle nunoutuin nukuwaʼipa ojuʼitinnüinjachi nia naʼakajee na wawalayuukana b (1 Corinto 5:11-13) ¿Kasa mojusü eeka süpüla naaʼinrüin wanee wawala süpüla nujuʼitinnüin naʼakajee na wawalayuukana? Süküjain tü Bibliakat süpüshi tü kasa mojusükat kaainjalaka anainjee wanee wawala maʼaka naaʼin na aʼluwajiraakana akuwaʼipa, outaa saaʼin wayuu, müliale nüpüshi nutuma otta nuʼluwajüle (1 Corinto 6:9, 10; Galacia 5:19-21; 1 Timoteo 1:9, 10).
Nakumajüin sukuwaʼipa na laülaashiikana c süpüla nnojoluin nujuʼitinnüin wanee wawala kaainjalakai süpüla niyaawajaain suulia naainjala jee nunoutuin nukuwaʼipa (Roma 2:4). Kamaneeshii naya nümüin sümaa kemeʼeriain nanüiki (Galacia 6:1). Naaʼinrüin tia süpüla niyaawajaa suulia naainjala chi kaainjalashikai. (2 Timoteo 2:24-26). Mayaainjeʼe nakaaliinjünüin natuma na laülaashiikana ayatüle macheʼein nia sümaa naainjala ojuʼitinnüshi naʼakajee na wawalayuukana. Aküjüneerü tia suluʼu tü outkajaaleekat nutuma wanee laülaashi, nujuʼitinnüin naʼakajee na wawalayuukana chi wawala macheʼekai süchiirua kaainjalaa, nnojoluichipain nia aküjalin pütchi nüchiki Jehová.
Kamaneeshi na laülaashiikana nümüin chi ayaawajaakai suulia naainjala otta natanalüin naaʼin.
¿Kasa anasü eeka sünainjee nujuʼitinnüin naʼakajee na anoujashiikana chi kaainjalashikai? kojutusü atumawaa tü nuluwataaka anain Maleiwa jee nnojotsü ashatünüin nukuwaʼipa chi wawala kaainjalashikai (1 Corinto 5:6; 15:33; 1 Pedro 1:16). Eesüjaʼa süpüla nukumajüin sukuwaʼipa chi kaainjalashikai niyaawajaain suulia naainjala.(Hebreokana 12:11).
¿Kasa naaʼinrakat na aküjaliikana pütchi nujuʼitinnüle wanee anoujashi naʼakajee?
Süküjain tü Bibliakat nnojoluinjanain waya aleewain nümaa chi ojuʼitinnakai waʼakajee otta nnojoluinjatüin weküin nümaa (1 Corinto 5:11). Mayaainjeʼe nnojoluin aleewain waya nümaa kojutushi nia wamüin jee nnojoishi moʼuyaain waya nuulia. Eepejeʼe süpüla ayatüin nia sünain tü outkajawaakat, nüsakünüin natuma na wawalayuukana d otta nuchuntuin kaaliiwaa namüin na laülaashiikana.
Eeshi süpüla noutkajaain na ojuʼitinnakana jee wasaküin naya anale shia wamüin.
¿Jama nujuʼitinnüle wanee wawala ayatapejeʼe anoujain tü nuʼwayuusekat otta na nüchonniikana? Mayaainjeʼe nnojoluin nuwaajüin Jehová namaa, ayatüshi nia sünainpünaain tü kasa aaʼinnakat nipialuʼu, kojutushi nia namüin otta aijiraashi naya jama shia nuʼwayuusein otta nüchonnii.
Chi ojuʼitinnakai naʼakajee na wawalayuukana eesü süpüla nuchuntuin nülapalaanüin natuma na laülaashika. Nemeejeerü naaʼin sükajee tü sümakat tü Bibliakat, nakaalinjeechi nia süpüla nürütkaain nüchikuaʼa nünainmüin Jehová otta niyaawajaain suulia naainjala (Zacarías 1:3). Niyaawajaale suulia naainjala jee noonoole sümaa tü pütchi nuluwataaka anain Maleiwa suluʼu tü Bibliakat, aleʼejeechi nia nüchikuaʼa.naʼakamüin na wawalayuukana. Amülianneerü naaʼin natuma na wawalayuukana, kamaneeinjana naya nümüin otta moteerü naaʼin naainjala, maʼaka naaʼinrüin shia na anoujashiikana chajanakana Corinto wamaa sümaa niyaawajaain suulia naainjala wanee anoujashi (2 Corinto 2:6-8).
¿Jamüsü naaʼin na wawalayuu ojuʼitinnakana palaa naʼakajee na anoujashiikana?
Anuu nanüiki waneinnua Aküjalii pütchi ojuʼitinnakana palaa naʼakajee na wawalayuukana. Arütkaakana nachikuaʼa nünainmüin Maleiwa.
«Wanaa sümaa taleʼejüin naʼakamüin na wawalayuukana nasakirüinjatia taya taaʼinrüin na laülaashiikana süchiki süpüshuaʼa tü kasa taaʼinraka wanaa sümaa tojuʼitinnüin. Nnojotpejeʼe müin shia naküjain tamüin jülüjainjatüin taaʼin tü kasa taaʼinrajatkat süpüla anainjatüin tanoula, müsüjeseʼe taleʼejüin tachikuaʼa, anakalaka taaʼin sutuma tü nanüikikat» (Maria, Estados Unidos).
«Keeʼireesü naaʼin na wawalayuukana taleʼejüin tachikuaʼa tayaawatüin saaʼu alin taya napüla, motuin naaʼin Jehová jee müshi na wawalayuukana tü kasa mojusü taaʼinrakat. Namülialüin taaʼin na laülaashiikana, nakaalinjain taya süpüla taʼleewajaain tachikuaʼa nümaa Jehová, naküjain tamüin kojutuin sümaa alin taya nüpüla Jehová» (Malcom, Sierra Leona).
«Nücheküin Jehová wuleinjatüin nakuwaʼipa napüshuaʼa na ayatakana nümüin. Mayaainjeʼe müin kapüleekai saaʼin tamüin palaa tayaawatüin saaʼu naaʼinrüin shia Jehová süka alin waya nüpüla. Taapüin analuʼut nümüin chi Maleiwa iipünajachikai süka aipüralin nia otta motuin naaʼin saainjala wayuu» (Sandi, Estados Unidos).
a Pütchikat tüü, namüinjatü shia na tooloyuukana otta na jieyuukana.
b «Ojuʼitinnüshi naʼakajee na wawalayuukana», müshi waya nüchiki wanee wawala eekai nujuʼitinnüin. Pansaasü tia sümaa tü sümakat tü Bibliakat.
c Na kanüliakana laülaashiikana nakajee na aküjaliikana pütchi wawalayuu tooloyuu naya laülaa aaʼinchi sünain anouja, nekirajüin tü pütchi sümakat tü Bibliakat. Naaʼinmajüin na anoujashiikana otta nakatsüinrüin nanoula. Nnojoishi naya awalaajünüin saaʼu tü naaʼinrakat (1 Pedro 5:1-3).
d Eeshi eekai nooʼulaain suulia anoujaa jee nachajaain sukuwaʼipa süpüla wanaawainjatüin naaʼin na waneinnua nümaa süpüla naaʼinrüinjatüin kasa mojusü jee nümalajeʼereein nanoula. Sülatüle tia woonoo amaa tü sümakat tü Bibliakat «nnojo jüsaküin nia» (2 Juan 9-11).