NATÜJAWEEKA AAʼU JIMAʼALII OTTA MAJAYÜNNÜÜ
¿Kasa anasü teʼreetka taashajeʼerüle tü Bibliakat? Shiʼipa 1: Püchajaa süchiki korolo kojutusü suluʼu tü Bibliakat
«Tooʼulaküirü taashajeʼerüin tü Bibliakat, akatsaʼa müin nnojoleetkai tajaʼttirüin taashajeʼerüin shia süka wainmain maʼin süpana» (Briana, 15 suuyase).
¿Alatüirü tia pümüin? Müle shia, pümüinjatü pütchikat tüü:
¿Jamüsü choʼujaaka saashajeʼennüin tü Bibliakat?
¿Kakulajia saaʼin pümüin aashajeʼeraa tü Bibliakat? Eesüjaʼa müle shia, süka wainmashaatain süpana tü Bibliakat, joʼuuchoin süleetürain otta nnojoluin ayaakua sünain. Akatsaʼa anaʼleein maʼin tü sümakat tü Bibliakat suulia tü ojuʼitakat suluʼu telewisoot jee video.
Jülüjataa paaʼin tüü: puusütüle sünain wanee jurasükeerü wotoko korolo kojutusü, keeʼireejeerü maʼin paaʼin piirulüin shia ¿aashi müin?
Tü Bibliakat müsü aka saaʼin tia jurasükeerü wotoko korolo kojutusü. Puunteerü anain tü akaalinjeechikat pia suluʼu:
Aneerü sukuwaʼipa tü püneeküinjatkat.
Aleeweechi pia namaa na kachooinkana pia.
Aneerü naneekia paʼaleewainyuu putuma.
Nnojoleerü shapaain paaʼin.
Mayaainjeʼe kakaliairüin maʼin tü Bibliakat, ¿jamüsü ayatayütka shia jaloulin wamüin maaʼulu yaa? Shia süka nümaʼanajeejatüin shia Maleiwa (2 Timoteo 3:16, TNM). Anasü maʼin tü sümakat tü Bibliakat süka nümaʼanajeejatüin shia chi Maleiwa pülashikai maʼin.
Tü Bibliakat müsü aka saaʼin wanee jurasükeerü wotoko korolo kojutusü.
Sukuwaʼipainjatü saashajeʼeria tü Bibliakat
Wanee sukuwaʼipa saashajeʼeriainjatka tü Bibliakat shia woʼttuin suʼttianainjee sajaʼttiamüinreʼeya. Tüü süpülajatü sükaaliijain waya süpüla watüjaain maʼin saaʼu tü saashajaakat achiki tü Bibliakat. Anuu piamasü sukuwaʼipa süpüla wountuin tia.
Süpüla piyaawatüin saaʼu tü sümakat tü Bibliakat, paashajeʼera shia sünainjee Génesis sünainmüinreʼeya Alateetkat Mapeena.
Eesü süpüla paashajeʼerüin süchiki wanee kasa suluʼu tü Bibliakat sünainjee tü kaʼi sülatakalü oʼu wanee kasa jee sünainjee tü eekai alatüin palajana.
Tü eekat süpüla paaʼinrüin: Sünain Apéndice A7, suluʼuka La Biblia. Traducción del Nuevo Mundo, piʼreerü suluʼu yaawain maʼin tü kaʼi alatakat nümüin Jesuu wanaa sümaa yaajachin nia mmapaʼa.
Tü piamakat kasa eeka süpüla paaʼinrüin shia paashajeʼerüin süchiki wanee kasa aküjünaka suluʼu makalü aka saaʼin tü alatakat pümüin. Maʼaka saaʼin:
¿Keeʼireesü paaʼin paʼaleewain wanee wayuu eekai süpüla piʼitaain anain paaʼin? Müle shia, paashajeʼera nüchiki David otta Jonatán (1 Samuel, kapiitulo 18 sünainmüin 20). Süchikijee, piʼrajaa tüü süpüla paaʼinrüin tü paashajeʼerakalü achiki: «Tü waaʼinrajatkat süpüla wousütüin nünain wane anakai süpüla waʼaleewain».
¿Püchechereein paaʼin suuʼulakünapa paaʼin? Paashajeʼera nüchikuaʼa José süpüla püchecherüin paaʼin suuʼulakünapa paaʼin (Génesis, kapiitulo 39). Süchikijee piʼrajaa tüü: «Eejiraa pia sümaa tü ooʼulakünakalü aka paaʼin» otta «Süküjünüle alawaa nüchiki». Sükaalinjeechi pia sünain tü paaʼinrajatkat.
¿Pütüjawee aaʼulu jameerüin paaʼin puʼuraajüle? Paashajeʼera süchiki tü alatakat nümüin Nehemías (Nehemías, kapiitulo 2). Süchikijee piʼrajaa tüü: «Naapüin nünüiki Jeʼwaa nuʼuraajapa». Atüjeechi pia kasa anasü sünainjee.
Tü eekat süpüla paaʼinrüin: Paashajeʼereerü tü Bibliakat, püchajaa eere anashin aashajeʼeraa eere nnojoluin shikeʼejünüin paaʼin.
Tü apünüinkat kasa eeka süpüla paaʼinrüin shia paashajeʼerüin süchiki wanee kasa kamalainka pümüin jee shiale wanee salmo otta püsakireʼera paaʼin süchiki tü jalouijeetkat pümüin sünainjee. Süchikijee paashajeʼerüin shia, püsakireʼera paaʼin sünain pütchi makalü aka saaʼin tüü:
¿Jamüsüche niʼitaaka Jeʼwaa pütchikat tüü suluʼu tü Bibliakat?
¿Kasa shikirajaka anain taya nüchiki Jeʼwaa jee jamüin naaʼinraka wanee kasa?
¿Jamüsü süpüla anain takuwaʼipa sutuma tü taashajeʼerüitpakat?
Tü eekat süpüla paaʼinrüin: Eesü süpüla piʼitaain püpüleerua püshajüin wanee kaʼi süpüla puʼttuin sünain aashajeʼeraa tü Bibliakat sükajee «Sukuwaʼipa saashajeʼeria tü Bibliakat». Puusüteerü anain shia suluʼu Internet.