¿Choʼujaasüche wekerotüinjanain sünain anouja?

Tü sümakat tü Bibliakat

Aa. Keeʼireesü naaʼin Maleiwa noutkajaainjanain na wayuukana süpüla naʼwaajüin nia. Müsü tü Bibliakat: «Anakajaʼa müleka aijiraale waya otta wakaalinjiraale. Jee anakajaʼa nnojoliire wooʼulaain suulia jutkatirawaa» (Hebreokana 10:24, 25, TNM).

Nüküjatüjülia Jesús paaʼinwainjanain na oushikajaakana süchiirua nukuwaʼipa wanaa sümaa nümüin: «Müleka shiimüinre sünain aijiraain jia jüpüla, ayaawatüneena jia sütüma wayuu süpüshua sünain tekirajanain jia» (Juan 13:35). Wanee kasa naaʼinrajatka na oushikajaakana süchiirua nukuwaʼipa Jesús süpüla aijiraain naya, shia noutkajaain namaa na wane anoujashiikana. Süpüla nountuin tia choʼujaasü noutkajaʼawaliin suluʼu wanee outkajaalee weinshi süpüla naʼwaajüin Maleiwa (1 Corinto 16:19). Pawalaawajiraainjana nayakana sainküin mmakat süpüshuaʼa (1 Pedro 2:17).

Anuu sooʼomüin wanee kasa waaʼinrajatkat

Saashin tü Bibliakat, outkajaainjana na wayuukana süpüla naʼwaajüin Maleiwa, nnojotpejeʼe süküjain tü Bibliakat aneerüin nukuwaʼipa wanee wayuu noʼuluʼu Maleiwa nuʼunule suluʼu wanee iküleesia. Choʼujaasü anainjatüin nukuwaʼipa sutuma tü nikirajaakalü anain. Anuu tü sümakat tü Bibliakat: «Tü sukuwaʼipa aʼwaajaa wulesükat otta nnojotka yarüttüin noʼuluʼu chi Washikai Maleiwa shia tüü: Aaʼinmajaa na tepichi mooʼutshiikana otta na jieyuu outakana aʼwayuuse otta nnojoluin waaʼinrüin tü naaʼinrakat na manoujainsaliikana» (Santiago 1:27, TNM).