¿Yapashiche taya süpüla aküjaa pütchi?
1. ¿Jamüsü nnojoluinjatka jülüjüin waaʼin iseerüin wachiki aküjaa pütchi?
1 Püsakirüirüle sünain tia, ¡nnojo mojuin paaʼin! Nnojotsüleʼe shiain yapain atuma waya tü eʼiküleekat jee tü watüjaakat aaʼu süpüla aʼyatawaa nümüin Maleiwa. Soto paaʼin neʼraajünüin noʼutku na nikirajüinkana Kürisüto sünain wayuuin ‹mekirajaainsalii sünain karaloukta otta wayuwaʼatain naya›, akatsaʼa anasü maʼin süküjia natuma tü pütchi anasükat. ¿Jamüsü nountaka shia? Shia süka nashatüin nukuwaʼipa Jesuu (Aluw. 4:13; 1 Ped. 2:21).
2. Püküja soʼutku sukuwaʼipa nikirajia Jesuu.
2 Nikirajia Jesuu. Mapüleesat sümaa nayaawatamaatüin na wayuukana tü nikirajakat anain Jesuu. Naapajeein maʼin na wayuukana tü nünüikikat sutuma tü pütchi nuʼttakat aka, tü shiyaawasekat otta tü asakiraa naainjakat (Mat. 6:26). Otta müsia, jülüjüshii naaʼin na wayuukana (Mat. 14:14). Nnojoishi mmoluin nia sünain aashajawaa otta nütüjaa aaʼu tü nümakat süka nütüjaain saaʼu nükaaliinjünüin nutuma Jeowa, chi aluwataakai nia sünain aʼyatawaakat tia (Luc. 4:18).
3. ¿Kasa nükaaliinjaka aka waya Jeowa süpüla wountüin tü waʼyataainkat?
3 Nükaaliinjüin waya Jeowa. Yapashii waya nutuma Jeowa süka tü Wiwüliakat otta naka na nuʼunirakana süka tü nütchinkat süpüla anain watuma süküjia tü pütchi anasükat (Isa. 54:13). Nüshajirüin Jeowa sukuwaʼipa nikirajia Jesuu süpüla wekirajaain sünain otta washatüin shia. Naapüin wamüin chi naaʼinkai otta nikirajüin waya sünain tü outkajawaakat (Juan 14:26). Nükaaliinjüin waya nakajee na wawalayuu atüjakana aküjaa pütchi süpüla wanoukteʼerüin sukuwaʼipa wekirajia.
4. ¿Jamüshii yapaka waya süpüla aküjaa tü pütchi anasükat namüin na waneeinnua?
4 Süka «yapain maʼin waya nutuma Maleiwa», nnojoluinjatü jülüjüin waaʼin iseerüin wachiki aküjaa pütchi (2 Cor. 3:5, NM). Weʼitaale waaʼin nünain Jeowa otta woʼunüle süchiirua tü nükaaliinjakat aka waya, ‹wounteerü kasa süpüshuaʼa otta yapeena waya süpüla aʼyatawaa eekai eein› (2 Tim. 3:17, NM).