¿Ekirajüi taya?
1. ¿Kasa aʼyatawaa anasü eeka wapüleerua wayakana aküjüliikana pütchi?
1 Wanee kasa anasü sünainka tü aʼyatawaakat nümüin Maleiwa, shia tü ekirajaakat wayuu süchiki tü shiimainkat. Talatüshii maʼin waya wanaa sümaa wantüin sünain wayuu eeka shikirajaweein süchiki tü shiimainkat otta weʼrüin noonooin sümüin tü pütchi waküjakat namüin süchiki tü Nuluwataayakat Maleiwa. Wakaaliinjüin naya süpüla naʼwanajaain nakuwaʼipa, tü suluʼukat naaʼin otta nacheküinjachin Jeowa süpüla aluwatawaa naaʼu (Sant. 4:8). Tia, shia tü naaʼinrajatkat wanee aküjüi pütchi süchiki Nuluwataaya Maleiwa (Mat. 28:19, 20).
2. ¿Jamüshii eeka na isakana achiki naashin ekirajaa süchiki tü Wiwüliakat? ¿Kasa akaaliinjeenaka naya süpüla nainküin shia?
2 Nükaaliinjüin waya Jeowa. Sümaiwa paala, noʼutku na aʼyataapuʼukana nümüin Maleiwa isainjatü nachiki naashin tü aluwataanakat anain naya süka nnojoluin karalouktamaajanain naya. Eeshii wayuu maʼaka naaʼin Moisés, Jeremías, Amós otta waneeinnua nnojoliika mmoluin sünain aaʼinraa tü aluwataanakat anain naya süka nakaaliinjünüin nutuma Jeowa (Éxo. 4:10-12; Jer. 1:6, 7; Amós 7:14, 15). Müsü nünüiki chi aluwataaushikai Pablo nüchiki otta na nümaajanakana: «Achechennüsü waaʼin». ¿Jamüsü nainkaka shia? Müsü nünüiki Pablo: «[Shia] nütüma chi Wamaleiwasekai» (1 Tes. 2:2). Weʼitaainjatü waaʼin sünain nükaaliinjeenain, kekiijeenain otta katchinjeenain waya nutuma Jeowa süpüla nanoujuin na wayuu wekirajakana (Rom. 8:31; 1 Cor. 1:26, 27; 1 Ped. 4:11).
3, 4. ¿Kasa nikirajaka aka waya Jeowa süpüla anainjatüin nekirajia na wayuukana watuma sükajee tü Wiwüliakat?
3 Puuʼulaa pikirajünüin. Jeowa chi Atüjakai maʼin Ekirajaa, nikirajüin waya waneepia sükajee tü Wiwüliakat süpüla watüjüinjanain maʼin ekirajaa (Juan 6:45; 2 Tim. 3:16, 17). Puuʼulaa pikirajünüin süpüla pütüjaain saaʼu tü shikirajakat anain tü Wiwüliakat otta anainjatüin shikirajia putuma tü shiimain suluʼukat. Mayaapejee saainjuushin tü Ekirajawaakat Süpüla Aʼyatawaa Nümüin Maleiwa otta tü outkajawaakat Süpüla Waʼyataain Nümüin Maleiwa tü wanee outkajawaakalüirua sükaaliinjüin waya süpüla wekirajüin süchiki tü Wiwüliakat.
4 Püchajaa maʼin sukuwaʼipa süpüla mapüleein shikirajia putuma tü shikirajakat tü Wiwüliakat jaʼitairü kapüleein. Tü karalouktakat Benefíciese suluʼu süpana 227 müsü: «Keeʼireere paaʼin sütüjaanüin aaʼu tü pikirajakat anain pütüjaainjatü aaʼu palajana». Otta müsia wanaa sümaa wayalerüin wajapü süpüla wasouktüin sünain tü outkajawaakat sükaaliinjeena waya süpüla makatüin suluʼu wekii wanee pütchi akaaliinjeenaka waya mapeena. Yapale waya nnojoleena mmoluin sünain ekirajaa.
5. ¿Jaralii akaaliinjeenaka waya suluʼu tü outkajaaleekat süpüla anainjatüin wekirajia?
5 Na palajanakana oʼunuin nüchiirua Cristo atüjüshii nünainjee chi najuʼitakai amaa sünain ekirajaa wayuu (Luc. 10:1). Eeshii süpüla wojuʼitüin sünain ekirajaa namaa na kakaliainnaka sünain aküjaa pütchi, na pürekutsootkana, na laülaayuukana otta chi wawala waraittakai waaʼu. Jülüja paaʼin jamüin nekirajia sükajee tü ayaakuaa mapüleekat otta wanee sukuwaʼipa ekirajia eeka suluʼu tü karalouktairua wamaʼanakat. Püsakira naya sünain tü paaʼinrajatkat süpüla pütüjüin ekirajaa (Pro. 1:5; Heb. 10:24). Süpüshuaʼa ekirajawaakat tia naapajala shia Maleiwa pümüin (2 Cor. 3:5).
6. ¿Kasa choʼujaaka süpüla pikirajüin wayuu sünain tü Wiwüliakat?
6 Piʼitaa paaʼin nünain Jeowa otta pikirajaa maʼin sükajee tü nikirajakat anain. Puchunta nümüin pütüjeein ekirajaa (Sal. 25:4, 5). Eesü süpüla talatüin paaʼin wanaa sümaa pükaaliinjüin wanee wayuu süpüla müinjatüin aka pukuwaʼipa: ¡Wanee ekirajüi sünain tü Wiwüliakat!