Nikirajüin waya Jeowa sünain tü nuluwataakat anain waya
1. ¿Kasa naainjaka Jeowa nuluwataale sünain wanee kasa na aʼyataaliikana nümüin?
1 Nuluwataale Jeowa sünain wanee kasa na aʼyataakana nümüin, nükaaliinjaleʼeinya naya süpüla naainjüin shia. Soʼu nuluwataain Noé sünain akumajaa tü anua miyoʼushaatakat, wanee kasa eiwaʼalüinjatka nukumajüin, nüküjüin jamüinjatüin sukumajia nutuma (Gén. 6:14-16). Arüleejüishi Moisés soʼu nuluwataain nia Jeowa nanainmüin na laülaashiikana suluʼu Israel otta nünainmüin Faraón, nümaka nümüin: «Eejeechi taya pümaa paashajaapa otta shiimainshaata tekirajeechin pia sünain tü pünüikinjatkat» (Éxo. 4:12, NM). Maaʼulu yaa, ayatüshiʼiya nükaaliinjüin waya Jeowa sünain aküjaa tü pütchi anasükat sükajee tü outkajawaakat Ekirajawaa süpüla Aküjaa Pütchi otta tü Outkajawaakat süpüla Aʼyatawaa nümüin Maleiwa. ¿Kasa waainjüinjatka süpüla anain wakuwaʼipa sutuma?
2. ¿Jamüsü süpüla anain wakuwaʼipa sutuma tü Ekirajawaakat süpüla Aküjaa Pütchi?
2 Ekirajawaa süpüla Aküjaa Pütchi. Pikirajaʼawai sünain tü ekirajaanajatkat anain. Müle shia, atüjeechi maʼin pia ekirajaa piʼrapa jamüin shikirajia wanee pütchi natuma na ekirajaashiikana (Pro. 27:17). Pülüʼüja tü karalouktakat Benefíciese sünain tü outkajawaakat maʼaka saaʼin wanee karaloukta piʼyataainmaajatü. Nüküjapa chi shikiipüʼükai tü ekirajawaakat wanee pütchi süchikijeʼewai nekirajüin na ekirajaashiikana, pejeetta tü pütchi püshateekat amüin otta püshaja sotpünaa tü karalouktakat. Tü aneetkat maʼin atuma pukuwaʼipa shia sünainpünaale pia tü ekirajawaakat. ¿Püshajirüitpa pünülia sünain? Pikirajaa sünain tü pütchi pikirajüinjatkat otta poonoo sümaa tü münakat pümüin. Püshata sünain aküjaa pütchi tü pütüjüitpakat apüleerua.
3. ¿Kasa waaʼinrajatka süpüla anain wakuwaʼipa sutuma tü Outkajawaakat süpüla Aʼyatawaa nümüin Maleiwa?
3 Outkajawaa süpüla Aʼyatawaa nümüin Maleiwa. Süpüla sotuin waaʼin tü ekirajünakat sünain outkajawaakat tüü, waashajeʼerüinjatü palajana tü ekirajaanajatkat anain otta yapainjana waya süpüla wayalerüin wajapü. Motsoʼole sümaa wanüiki, nayalereerü najapü na waneeinnua. Jülüja maʼin paaʼin shiyaawase tü ekirajaanakat anain otta jüüjüü pia sümüin tü pütchi aneetkat atuma piʼyataain nümüin Maleiwa. Eere wanee pütchi anaka maʼin suluʼu Waʼyataain Nümüin Maleiwa, nnojo pujutüin shia.
4. ¿Jamüsü anainjatka watuma sukuwaʼipa tü nikirajakat anain waya Jeowa?
4 Kapüleesü tü aluwataanakat anain Noé nümaa Moisés, müsia aküjaa tü pütchi anasükat sainküin Mmaka süpüshuaʼa (Mat. 24:14). Wainkeetpajaʼa shia wanoujüle nünain Jeowa chi Atüjakai maʼin ekirajaa waya otta anale watuma sukuwaʼipa tü nikirajakat anain waya (Isa. 30:20).