Nnojo mmoluin pia
1. ¿Jamüshii eeka na nnojoliikana ekirajüin wayuu sünain tü Wiwüliakat?
1 ¿Eeshi nnojoire pikirajüin wayuu sünain tü Wiwüliakat sutuma nnojoleerüin puuntüin shia paashin? Mapuʼusia nukuwaʼipa Moisés otta Jeremías naʼyataapa nümüin Maleiwa (Éx. 3:10, 11; 4:10; Jer. 1:4-6). Sülatüle wamüin tia, aleinjatia neʼe. ¿Kasache waaʼinrüinjatka?
2. ¿Jamüshii nnojoliinjanaka neʼe waküjüin pütchi sainküin piichi?
2 Jülüjüinjatü waaʼin palajana nnojoluin nuchuntüin wamüin Jeowa wanee kasa iseetka wachiki (Sal. 103:14). Süka nütüjaain saaʼu Maleiwa wounteerüin shia, nuluwataain waya sünain wekirajüinjanain na wayuukana süpüla nanoujüinjanain (Mat. 28:19, 20). Nnojoishii neʼe nayain nüneeküin Jeowa na wayuu atüjakana maʼin jee na ounteenakana tia aʼyatawaakat (1 Cor. 1:26, 27). Nnojoliinjana neʼe waya aküjüin pütchi sainküin piichi, wekirajüinjana na wayuukana sünain tü Wiwüliakat.
3. Süpüla wekirajüinjanain wayuu sünain tü Wiwüliakat, ¿kasa naaʼinraka Jeowa süpüla nükaaliinjüin waya sünain?
3 Nikirajüin waya Jeowa. Nikirajüin waya Jeowa süpüla wekirajüinjanain wayuu (2 Cor. 3:5). Müsüjeseʼe nüküjüin wamüin sükajee tü nupueulosekat süchiki kasa nnojorüleeka nayaawatüin aaʼu na wayuu atüjakana maʼin (1 Cor. 2:7, 8). Ashajünüsü suluʼu tü Wiwüliakat tü sukuwaʼipapuʼukat shikirajia wayuu nutuma Jesuu, chi Atüjakai maʼin Ekirajaa. Jee ekirajünüshii waya suluʼu tü outkajaaleekat weinshi. Otta taasia, wainma tü karalouktakalüirua jalouijeetka wamüin, maʼaka saaʼin Kasa shikirajaka, sutuma tia karalouktakat, ayaawatüna aaʼulu tü kasa mapüleekat suluʼujee tü Wiwüliakat. ¡Mapüleesat ekirajaa wayuu sünain tü Wiwüliakat!
4. ¿Jamüsü watüjaaka saaʼu nükaaliinjeenain waya Jeowa?
4 Nuuntüin Moisés otta Jeremías tü naʼyataainkat sutuma nükaaliinjüin naya Jeowa (Éx. 4:11, 12; Jer. 1:7, 8). Wachunta nümüin Jeowa nükaaliinjaiwa waya. Watüjaa aaʼu nükaaliinjeenain waya Jeowa sünain tia, süka wekirajüin na wayuukana nüchiki niakai, talatsü naaʼin sutuma (1 Juan 3:22). Müsüjeseʼe weʼitaainjatüin wapüleerua wekirajüinjanain wayuu sünain tü Wiwüliakat. Talateerü maʼin waaʼin otta wainmeerü kasa anasü weʼreetka sutuma.