Tü püliiku kanüikat

¿PAAPÜIRÜ süchiki wanee püliiku eeka kanülin? ‹Nnojo, manüisalii na mürütkana›. Kanüisü wanee püliiku saashin tü Wiwüliakat, wekirajaa sünain tia.

Alüʼütshii na israeliitakana süpüla antaa Canaánmüin. Mmotka Balac chi aluwataaikai saaʼu Moab neema na israeliitakana. Nüsaajitka wanee wayuu kanüliashi Balaam süpüla nuʼulejüin naya. Wainma nneerü naapüinjatka nümüin, nuʼunaka Balaam saaʼu nüpüliise eemüin Balac.

Mojusü tia nümüin Jeʼwaa. Nuluwataaka wanee aapiee sümaa wanee chajaruuta miyoʼushaata suluʼumüin nüpüna Balaam. Nnojoishi niʼrüin Balaam chi aapieekai, shia eʼraka tü nüpüliisekat. Nnojotka sürütkaweein nünainmüin, mapa süikalaaka suluʼu tü wopukot. Jashichika maʼin Balaam, niʼyaataka shia süka nunuʼuse.

Kanüika tü püliikukat nutuma Jeʼwaa. Sümaka: ‹¿Kasa taainjaka pümüin piʼyaataka taya?›

Nümaka Balaam: ‹Müshi malakai taya putuma. ¡Eere wanee chajaruuta tamaʼana, toʼutayülüjee paaʼin!›

Sümaka tü püliikukat: ‹¿Mapuʼushi pia tatuma?›

Nümaka Balaam: ‹Nnojo›.

Niʼraka Balaam chi aapieekai nutuma Jeʼwaa. Nümaka chi aapieekai: ‹¿Jamüsü piʼyaataka püpüliise? Yaashi taya süpüla nnojoluinjanain puʼulejüin na israeliitakana. Nnojoire süsünneʼerüin pia tü püpüliisekat ouktushijee pia tatuma, shiajeʼe kataka oʼu püpüliise›.

Nümaka Balaam: ‹Kaainjalashi taya. Nnojotsü tatüjaain aaʼu suluʼuin pia tü wopukot›. Nuuʼulaaka chi aapieekai nuʼunuin Balaam eemüin Balac, ayatüshi nia nuʼulejeein na israeliitakana. Akaisaʼa Jeʼwaa naashajeʼerüin Balaam apünüintua süpüla anainjatüin nakuwaʼipa na israeliitakana.