Wemeʼera naaʼin na wekirajüinkana
1. ¿Kasa choʼujaaka süpüla anain süküjia pütchi sükajee tü Wiwüliakat?
1 Na atüjakana aküjaa pütchi maʼaka naaʼin Pablo, nayaawata aaʼu nnojoluin shiain neʼe aashajeʼeraa wanee pütchi suluʼujee tü Wiwüliakat tü ‹atüjaakat ekirajaa tü shiimainkat› (2 Tim. 2:15, NM). ¿Jamüsü süpüla wemeʼerüin naaʼin na wekirajakana? (Aluw. 28:23.)
2. ¿Kasa waainjüinjatka süpüla kojutüin tü Wiwüliakat nümüin chi wekirajakai?
2 Waashajeʼera tü Wiwüliakat. Palajana, anainjatü suʼttia wanüiki süpüla waashajeʼerüin tü Wiwüliakat süpüla kojutüin namüin na wayuukana tü pütchi suluʼukat. Wanoujüle sünain tü sümakat tü Wiwüliakat, eesü süpüla naapajüin chi wekirajakai tü pütchi waashajeʼerakat suluʼujee (Heb. 4:12). Eeshii süpüla wamüin: «Sükaaliinjüin taya tü nümakat Maleiwa süchiki kasakat tüü. Jülüja paaʼin tü sümakat tü Wiwüliakat.» Shia analeeka waashajeʼerüle tü sümakat tü Wiwüliakat namüin.
3. Waashajeʼerapa wanee pütchi suluʼujee tü Wiwüliakat, ¿kasa waainjüinjatka süpüla niyaawatüin shia chi wekirajakai?
3 Tü wanee kasa waainjüinjatkat, shia waküjüinjatüin jamaluʼuluin tü sümakat tü Wiwüliakat. Wainma na wayuu kapüleekana amüin ayaawataa saaʼu tü wersiikulo eiwaʼatkat aashajeʼennüin namüin. Choʼujaasü waküjüin namüin jamüin sünainpünaaka shia tü pütchi waashajaakat achiki (Luc. 24:25-27). Waküjüinjatü tü pütchi jaʼyakat maʼin sünain otta wasakirüinjana nayaawatüle saaʼu tü waashajaakat achiki (Pro. 20:5; Aluw. 8:30).
4. ¿Jarat tü chiiruajatü kasa choʼujaakat süpüla kemeʼeriain wekirajia?
4 Wanoukteʼera nunoula süka tü Wiwüliakat. Tü chiiruajatü kasa waainjüinjatkat, shia wantüin suluʼumüin naaʼin otta nikii chi wekirajakai. Wakaaliinja nia süpüla niyaawatüin saaʼu jamüin nünainpünaaka tü pütchi waashajeʼerakat suluʼujee tü Wiwüliakat. Wekirajüle süka tü Wiwüliakat, eesü süpüla wemeʼerüin naaʼin otta nünoukteʼerüin tü jülüjakat naaʼin (Aluw. 17:2-4; 19:8). Waashajeʼerapa Salmo 83:18, eesü süpüla waküjüin nümüin choʼujaain weʼraajüin sünülia wanee wayuu süpüla waʼaleewain shia. Süchikijee wasakira nia: «¿Anouktaajeetche sukuwaʼipa woʼuraajia wachuntüle nünülia Maleiwa?». Weeʼiyatüle sünainpünaain nukuwaʼipa chi wekirajüinkai tü sümakat tü Wiwüliakat, jaʼyeerü anain maʼin tü shikirajakat anain. Kemeʼeriale tü wekirajiakat, keeʼireejeerü naaʼin na wayuukana naʼwaajüin Jeowa, chi Maleiwa shiimainkai otta matüjüinkai ouktaa (1 Tes. 1:9).