Müshii aka saaʼin wanee aʼttiee yapaka süpüla asüʼüjünaa
1. ¿Jarat tü aʼyatawaa aainjünakat maʼin maaʼulu?
1 Süchikijee nüküjüin pütchi Jesuu sümüin wanee wayuu samariajeʼewat, müshi nia namüin na nikirajüinkana: ‹Jiirakaa namüin na wayuu antakana. Müshii aka saaʼin wanee aʼttiee yapaka süpüla asüʼüjünaa› (Juan 4:35, 36). Shiimain tia, süka süküjünüin pütchi namüin na wayuukana müshii natpajünakai aaʼin maʼaka saaʼin wanee aʼttiee otta nütüjaa aaʼu Jesuu saainjünajatüin sainküin tü mmakat. Maaʼulu yaa, ayatüshi nia sünainpünaain tü aküjaakat pütchi chejee sirumatuʼujee (Mat. 28:19, 20). ¿Kasa eeʼiyataka wamüin ayatüin kooʼomüin tia aʼyatawaakat sümaʼinruʼu sülüʼülüin süpüla sajaʼttüin?
2. ¿Kasa eeʼiyataka kooʼomüin tü aküjaakat pütchi sainküin tü mmakat?
2 Aküjaa pütchi sainküin mma. Soʼu tü juyakat 2009, eeshii 3,2% nooʼomüin na aküjüliikana pütchi sainküin tü mmakat. Suluʼu tü mma eere süpülajünüin aküjaa pütchi, kooʼomüinshii 14%. Eʼewaisü kashiwai 7.619.000 wayuu ekirajünakat sünain tü Wiwüliakat, tia alanaʼaleesia noulia na aküjüliikana pütchi otta alanaʼaleesia shia maʼaka shiatapünaa miyon noulia na wayuu ekirajünakana soʼu tü juya alatakat. Sutuma kooʼomüin tü aʼyatawaakat suluʼu waneeirua mma, ayatüsü achuntünüin nooʼomüin wawalayuu ajütünaka sünain aküjaa pütchi suluʼu wanee mma naata, ekirajünaka palaa suluʼu Galaad. Sainküin tü mmakat, ayatüshii kooʼomüin sünain anoujaa na naatakana anüiki süka süküjünüin pütchi namüin suluʼu nanüiki. Kajaalapüsü nutuma Jeowa tü aküjaakat pütchi sülüʼütpa süpüla sajaʼttüin (Isa. 60:22). ¿Anasü pünüiki nachiki na wayuu püküjakana amüin pütchi?
3. ¿Kasa eeka süpüla naküjüin waneeinnua süchiki tü mma naküjakat aluʼu pütchi?
3 Eere waküjüin pütchi. Eeshii eeka namüin: «Shiimain tia, akatsaʼa nnojoluin alatüin tia eere taküjüin pütchi». Shiimain eein mma eere nnojoluin kooʼomüin na wayuu anoujakana maʼaka sümaiwa otta eesü wanee eere kooʼomüin naya. Sutuma tia, eeshii wawalayuu eeka namüin nnojoluinnapain wainmain na wayuu waküjakana amüin pütchi otta nakotchojünüinjanain neʼe na apütaakana. Akatsaʼa ¿müsüchejeʼe shia mayaa?
4. ¿Jamüinjatü saaʼin wamüin tü waʼyataainkat nümüin Maleiwa? ¿Jamüsü waaʼinrajatka tia?
4 Wainma aʼyatawaa sünain tü aküjaakat pütchi, waneʼereʼeya suuʼulaanüin sajaʼttapa. Jülüjataa paaʼin choʼujaain maʼin saainjünüin tü nümakat Jesuu: ‹Wainma wayuu eekai saapeein tachiki. Otta palitchon na yapakana süpüla oʼunaa sünainmüin. Jee sükajee tia, jüchunta nümüin chi Maleiwakai süpüla nuluwataain na wayuu aküjüinjanakana tachiki namüin› (Mat. 9:37, 38). Nia aneekaka Jeowa joujainjanain otta jalainjanain kooʼomüin na anoujüshiikana (Juan 6:44; 1 Cor. 3:6-9). ¿Kasa waaʼinrajatka wayakana? Müsü sünüiki tü Wiwüliakat: «Püpünaja tü püwaüyainkat wattaʼa maalü, waneʼereʼeya peemeraain suulia aliika» (Ecl. 11:4-6, NM). Alüʼütsü süpüla sajaʼlajaain tü aküjaakat pütchi, makalaka nnojoliinjanain weemeraain suulia.
5. ¿Jamüshii ayatüinjanaka waküjüin pütchi mayaapejeʼe nnojoluin saapünüin wanüiki?
5 Nnojoyülia ajaʼttüin tü aküjaakat pütchi. Jaʼitairü wainmatuairüin waküjüin pütchi namüin na wayuukana sümaa nnojoluin noonooin sümüin tü pütchikat, eesü tü kasa talatüinjatkat atuma waaʼin otta ayatüinjatka atuma waaʼinrüin shia (2 Tim. 4:2). Süka neʼrüin na wayuukana sülatüin maʼin wainma kasa mojusü, aʼwanajaasü sukuwaʼipa tü jülüjakat naaʼin otta nasakireʼerüin naaʼin sünain tü alatajatkat namüin mapeena. Nayaawata aaʼu na jimaʼaliikana otta na majayünnüükana choʼujaain jimatüin naaʼin otta anain nakuwaʼipa sümaʼinruʼu miyoʼuin naya. Otta eesü ponule naaʼin na wayuukana ayatüin waküjüin pütchi jee eeshii eeka naapajeein wanüiki mayaapejeʼe nnojoluin jamajatüin shia namüin paala. Jaʼitainna eein na ayouktakana tü pütchi waküjakat, waapirüinjana naya (Eze. 2:4, 5; 3:19).
6. ¿Kaseerü akaaliinjaka waya süpüla talatüin waaʼin sünain aküjaa pütchi?
6 Kapüleere aküjaa pütchi eere kepiain waya, ¿kaseerü akaaliinjaka waya süpüla ayatüin talatüin waaʼin? Sümaʼaleʼeya waküjüin pütchi sainküin piichi, eeshii süpüla waküjüin pütchi sainküin oikkaalee jee süka teleepono. Naatawalinjatü süküjia tü pütchikat watuma otta waashajaainjatü achiki wanee kasa jeketü. Eesü süpüla waʼwanajaain tü kaʼi wojuʼitakat oʼu sünain aküjaa pütchi maʼaka saaʼin waküjüin pütchi aliika jee shiale soʼu wanee kaʼi eeka oʼu na wayuukana nepialuʼu. Jee shiale wekirajaain sünain wanee anüikii naata süpüla kooʼomüin na wayuu waküjakana amüin pütchi. Pürekutsoorüle rekulaat waya, eesü süpüla kooʼomüin tü waʼyataainkat nümüin Maleiwa. Wanee kasa eeka süpüla waainjüin shia wakolojooin suluʼumüin wanee mma eere palitchoin na aküjüliikana pütchi. Anale saaʼin wamüin tü aküjaakat pütchi, wachajaajeerü sukuwaʼipa süpüla waainjüin maʼin shia.
7. ¿Joujeena wooʼulaaka suulia aküjaa pütchi?
7 Palitchon tü kaʼi nakotchojüinjatkat oʼu tü pünajütkat na apünajüliikana, makalaka neemeraʼaleʼeinya sajaʼttapa natuma. Müsia tü aküjaakat pütchi. ¿Joujeena wooʼulaaka suulia aküjaa pütchi? «Süntapa tü kaʼi sajaʼlajaweetkat oʼu kasa süpüshua» otta «sajaʼttapa kasa süpüshuaʼa» (Mat. 24:14, NM; 28:20). Maʼaka naaʼin Jesuu, keeʼireesü waaʼin keraain watuma tü aʼyatawaa aluwataanakat anain waya (Juan 4:34; 17:4). Makalaka ayatüinjanain waya sünain waküjüin maʼin pütchi sümaa talatüin waaʼin otta weʼitaain waaʼin sünain aneerüin wakuwaʼipa sünain. Waneʼereʼeya wooʼulaain sajaʼttapa kasa süpüshuaʼa (Mat. 24:13, NM). ¡Nnojoyülia ajaʼttüin tü aküjaakat pütchi!
[Epiikürape suluʼu süpanaka 2]
Wainma aʼyatawaa sünain tü aküjaakat pütchi, waneʼereʼeya suuʼulaanüin sajaʼttapa