Ekirajüshi saaʼu uuchi

PIIRAKAA nümüin Jesús, nikirajüin na wayuukana saaʼu wanee uuchi chaaʼaya Galilea. Na pejekana nünain naya na aluwataaushiikana, 12 naya napüshuaʼa. ¿Pütüjaa aaʼu kasaichi nanülia?

Anuu nanülia: Simón Pedro, Andrés chi nimüliakai. Jacobo otta Juan pawalaawashii. Santiago, Simón, Judas Iscariote, Judas (chi Tadeo münakai). Felipe, Natanael (chi Bartolomé münakai), Mateo otta Tomás.

Süchikijee nüleʼejüin Samariajee oʼttushi Jesús sünain aküjaa pütchi, nümaka: ‹Alüʼütsü nükalia Maleiwa süpüla aluwatawaa›. Chi sülaülakai nuluwataaya Maleiwa nia Jesús. Aluwataainjachi nia sirumatuʼujee, nnojoluinjatü atkawaa saaʼu tü Mmakat otta paraiisüinjatü shia.

Nikirajüin Jesús na wayuukana süchiki nuluwataaya Maleiwa suluʼu tü ayaakuaakat. Müshi nia: ‹Meena jia juchuntapa nümüin Maleiwa: Taata Maleiwa chi chakai sirumatuʼu, kojutushaatashi pia watuma. Pünta maalü sünain aluwatawaa süpüla saainjünüin tü keeʼireekat paaʼin saaʼu tü Mmakat maʼaka saainjünüin chaaʼaya sirumatuʼu›. Sünülia tia pütchikat natuma na wayuukana ‹Nünüiki Jesús› ¿Eesü süpüla püküjüin tia nünüikikat Jesús?

Nikirajüin Jesús na wayuukana süchiki tü nakuwaʼipainjatkat namaa waneeinua. Müshi nia: ‹Jaaʼinra tü anasükat sümüin wayuu, maa aka jücheküin saainjünüin tü anasükat jümüin›. ¿Anasü pümüin kojutule pia atumawaa? Anamiainjana waya namüin na wayuukana. ¡Aneerü maʼin kepiaa suluʼu tü paraiisükat naainjüle napüshuaʼa na wayuukana tü nümakat Jesús!