Püsaʼwateerü tü piʼyataweekat anain nümüin Maleiwa

1. ¿Kasa nasaʼwateeka amüin na jimaʼalii otta majayünnüü anoujakana?

¹ Piale wanee jimaʼai otta wanee majayülü anoujaka, eesü püsaʼwateere wanee kasa sutuma alin püpüla Jeowa otta müsia sutuma tü nümakat Jesuu namüin napüshuaʼa na anoujüshiikana ‹nachajaain palajana nuluwataaya Maleiwa› (Mat. 6:​33, NM). Eesü kooʼomüinweere piʼyataain maʼaka saaʼin pürekutsoolüin pia jee pükaaliinjüin eere choʼujaain aküjülii pütchi. Jee eeshii na jülüjakana aaʼin oʼunaa sainküin mma sünain akumajaa piichi aʼwaajülee, aʼyatawaa suluʼu Weteet jee ajütünaa suluʼumüin wanee mma naata sünain aküjaa pütchi. ¡Anataʼaleesüjaʼa maʼin süpüla püsaʼwatüin tia!

2. ¿Kasa akaaliinjeechika pia süpüla püinküin tü püsaʼwateekat amüin?

² Wanee kasa püsaʼwateetka atuma tia shia püshajüle shia. Müsü La Atalaya ojuʼitaka juulioʼu 15 soʼu 2004: «Waainjeere wanee kasa nnojotka maʼin wayaawatüin aaʼu, wayaawateerü aaʼu sukuwaʼipa washajüle shia. [...] Müsüjeseʼe anain washajüle kasain wasaʼwateein otta jamüinjatüin süsaʼwatia watuma». Piʼitaale püpüleerua wanee kasa püsaʼwateeka soʼu palit kaʼi, piyaawateerü aaʼu kooʼomüinre punoula otta eesü süpüla püinküin tü püsaʼwateekat amüin soʼu watta kaʼi.

3. Püküja tü püsaʼwateekat amüin soʼu palit kaʼi keraajeechika atuma pia süpüla woutiisaa.

³ Tü püsaʼwateekat soʼu palit kaʼi. Nnojoiyüire woutiisain pia, jülüja paaʼin kasain choʼujaain pümüin süpüla puuntüin shia. Eesü choʼujaale piyaawatüin saaʼu tü kasa mapüleesat shikirajakat tü Wiwüliakat. Müle shia, piʼitaa püpüleerua pikirajaain maʼin sünain tü karalouktakat Kasa shikirajaka sümaʼaleʼeya paashajeʼerüin süpüshuaʼa tü pütchi suluʼujeejatkat tü Wiwüliakat (1 Tim. 4:15). Paashajeʼera süpüshuaʼa tü Wiwüliakat, sünainjee Génesis sünainmüin Alateetkat Mapeena maʼaka naainjüin shia na weteliitakana otta na ekirajaakana Galaad. Kettaapa shia putuma, puʼtta püchikuaʼa sünain aashajeʼeraa shia weinshi (Sal. 1:​2, 3). Kooʼomüinjeerü maʼin tü punoulakat. Puʼuraaja puʼttaiwaʼaya jee keraapa putuma aashajeʼeraa otta ekirajawaa sünain tü Wiwüliakat, otta piʼitaa suluʼu pukuwaʼipa tü pikirajaakat anain (Sant. 1:25).

4. Niʼyataweere wanee wawala suluʼu Weteet otta nüküjeere pütchi suluʼu wanee mma naata, ¿kasa nüsaʼwatüinjatkat soʼu palit kaʼi?

⁴ ¿Jama woutiisale pia? ¿Kasa eeka süpüla püsaʼwatüin? ¿Choʼujaasü pünoukteʼerüin püküjia pütchi? ¿Choʼujaasü pütüjüin maʼin aküjaa pütchi süka tü Wiwüliakat? (2 Tim. 2:​15, NM.) ¿Kasa eeka süpüla paainjüin süpüla kooʼomüin piʼyataain? Piʼitaa püpüleerua kasa eeka süpüla püsaʼwatüin wanaapünaa sümaa puuyase otta pukuwaʼipa. Otta keraweetka putuma tü püsaʼwateekat soʼu watta kaʼi.

5. ¿Jamüsü nuuntaka niʼyataain wanee wawala suluʼu Weteet sutuma eein tü nüsaʼwateekat soʼu palit kaʼi?

⁵ Nüinküin shia. Wanaa sümaa 19 nuuyase Tony, awaraijaashi nia suluʼumüin Weteet otta niʼyataweemaataka suluʼu. Akaisaʼa nia eʼrüipuʼushi wayumüin otta nnojoishi aapüin naaʼin nümüin Maleiwa. Nünoukteʼeraka nukuwaʼipa Tony wanaapünaa sümaa tü nüchuntakat Jeowa otta nikeraajaka tü achuntünakat nümüin süpüla woutiisain nia. Keraapa tia nutuma nüsaʼwateein pürekutsoolüin aaʼusiliaat otta mapa pürekutsooleeshi rekulaat, süpüla nüinküin tia nüshajaka suluʼu tü ayaawatiakat semaana, kashi otta kaʼi joujainjachin nuʼttüin. Talatakajasaʼa maʼin nia nuunejaanapa sünain aʼyatawaa suluʼu Weteet sülatapa kojuya kashi süchikijee pürekutsoolüin nia.

6. ¿Kasa akaaliinjeechika pia süpüla püsaʼwatüin tü piʼyataweekat anain nümüin Maleiwa?

⁶ Müshia piakai, eesü süpüla püsaʼwatüin tü piʼyataweekat anain nümüin Maleiwa shiale palajanain putuma tü Nuluwataayakat. Püküja nümüin Jeowa «tü paainjeekat» otta piʼyataa maʼin süchiirua (Pro. 16:​3, NM; 21:5).