¿Püküjawalin nüjünalain pia chi pikirajüinkai?

Pikirajüle wanee wayuu sünain tü Wiwüliakat, püsakira kamaʼa nikirajaweere sünain tü Wiwüliakat wanee naʼaleewain, nüpüshi jee niale wanee niʼraajüin. Eesü nüküjerüle nanülia na ekirajaweekana. Eesüjaʼa süpüla puwaraijaain naaʼu süpüla pikirajüin naya sünain tü Wiwüliakat jee püma namüin nüjünalain pia chi pikirajüinkai müleka anashiire shia nümüin. «Ekirajaashi [püküja nünülia chi pikirajüinkai] sünain tü Wiwüliakat jee anasü saaʼin nümüin pikirajaale wamaʼaya». Piiʼiyata motsomüin jamüin shikirajia wayuu süka tü karalouktakat Kasa shikirajaka.

Kooʼomüinre nunoula wanee pikirajüin, püma nümüin niiʼiyataiwa jamüin sukuwaʼipa ekirajawaa sünain tü Wiwüliakat namüin na naʼaleewainkana otta na nüpüshi ekirajaweekana. Eeshiijaʼa süpüla nuunejaain naya soʼu tü kaʼi nikirajünakat oʼu. Nnojorülejeʼe müin sukuwaʼipa tia, eeshi süpüla pükatalüin kaʼi süpüla puuʼulaküin sukuwaʼipa namüin. Paainjüle tia, pükaaliinjüin chi pikirajüinkai süpüla nuʼttüin sünain aküjaa süchiki tü sümakat tü Wiwüliakat sümüin wayuu.

Mayaapejeʼe nnojoluin nekirajaain sünain tü Wiwüliakat na wayuu puwaraijaʼawaikana aaʼu, eeshii süpüla naküjüin nanülia na ekirajaweekana sünain tü Wiwüliakat. Paapüinjatpa tü karalouktakat Kasa shikirajaka, püsakira naya: «¿Piʼraajüin wanee wayuu kamaʼaneeka karalouktakat tüü?».

Süka sülüʼülüin süpüla sajaʼttüin tü kasakalüirua, wachajaa sukuwaʼipa süpüla wakaaliinjüin na wayuukana sünain aapawaa sümaa tü pütchi anasükat. ¿Jama piakai? ¿Püküjawalin nüjünalain pia chi pikirajüinkai?