Naakajirüin waya Maleiwa nükajee Jesuu

1, 2. (1) ¿Kasa kojutüka maʼin atuma wanee asülajuushi? (2) ¿Jamüsü kojutüshaataka wamüin ouktüin Jesuu waaʼu?

¿KASA tü asülajünakat pümüin kojutüka maʼin pümüin? Nnojotsü choʼujaain wainma nneerü süpüla kojutüinjatüin maʼin wanee asülajuushi. Tü kojutükat maʼin atuma wanee asülajuushi shia talatüle pia sutuma otta choʼujaale maʼin shia pümüin.

² Saʼakajee tü kasa asülajünakat pümüin eesü wanee kojutüshaataka maʼin. Shia tü nüsülajalakat Maleiwa namüin na wayuukana. Wainma kasa naapaka Jeʼwaa wamüin, tü kojutüleekat maʼin shia naapajiraain nikii Jesukürisüto süpüla ouktüin nia waaʼu (paashajeʼera Mateo 20:28). Suluʼu ekirajaayakat tüü, wekirajaajeerü anain kojutüin maʼin tia nüsülajakat wamüin Maleiwa süka eein süpüla talatüin waya sutuma otta wamaʼanain tü choʼujaakat wamüin. Tia shiiʼiyatüin alin maʼin waya nüpüla Jeʼwaa.

¿KASA WAYUU TÜ AAKAJIRAAKAT?

3. ¿Kasa wayuu tü aakajiraakat? ¿Kasa tü watüjaainjatkalü aaʼu süpüla kojutüin wamüin naakajirüin waya Maleiwa nükajee Jesukürisüto?

³ Tü aakajiraakat shia tü naapakat Jeʼwaa süpüla taashin na wayuukana suulia naainjala jee ouktaa (Éfeso 1:7). Süpüla watüjaain saaʼu tia shikirajakalü anain tü Wiwüliakat, wekirajaainjatü anain tü alatakat chaaʼaya Edén. Watüjaale saaʼu tü amülouikat nutuma Adán wanaa sümaa kaainjalain nia, kojuteerü maʼin wamüin naakajirüin waya Maleiwa nükajee Jesukürisüto.

4. ¿Kasa nnojoluinjatka alatüin nümüin Adán sükajee anain maʼin nia wanaa sümaa nukumajünüin?

⁴ Wanaa sümaa nukumajünüin Adán nutuma Maleiwa naapüin nümüin wanee kasa anashaatasü maʼin: katüin noʼu sümaa anain maʼin nia. Anasü maʼin nüta otta tü jülüjakat naaʼin. Sutuma tia, nnojoluinjachi ayuulin, laülaain, ouktüin otta aleewashi maʼin nümaa Jeʼwaa. Saashin tü Wiwüliakat «nüchon Maleiwa» Adán (Lucas 3:38, TNM). Sünainjee tia, aleewapuʼushi maʼin Maleiwa nümaa Adán maʼaka naaʼin wanee wayuu aipürai aleewaka nümaa nüchon. Aashajaapuʼushi Jeʼwaa nümaa Adán, talatapuʼushi Adán sümaa tü niʼyataainkat otta nüküjüin Maleiwa nümüin Adán tü naainjainjatkat (Génesis 1:28-30; 2:16, 17).

5. Nukumajüin Maleiwa Adán «sünain müin aka nukuwaʼipa» saashin tü Wiwüliakat, ¿jamaluʼulu tia?

⁵ Nukumajüin Maleiwa Adán ‹sünain müin aka nukuwaʼipa› (Génesis 1:27). Nnojoishi nia wanaawain nümaa Maleiwa. Maʼaka wekirajaain suluʼu ekirajaaya 1, Jeʼwaa meʼrujusai nia (Juan 4:24). Nnojoishi wayuuin nia maʼaka waaʼin. Nukuwaʼipa Adán müsü aka saaʼin nukuwaʼipa Maleiwa sükajee nukumajünüin sümaa aipüralin, kekiin maʼin, lotuin nukuwaʼipa, katchin nia otta waneeirua. Jee müshia Adán akumajünüshi süpüla nüneeküin tü keeʼireekat naaʼin. Makalaka nnojolin nia müin aka saaʼin wanee maakina aainjaka tü akumajünakat apüla shia. Nüneeküinjatü tü kasa eekalü anain jee tü eekat mojuin. Noonoole sümaa nünüiki Maleiwa, katüsüjeʼe noʼu waneepia suluʼu tü Paʼaraiisükat.

6. ¿Kasa alataka nümüin Adán sünainjee nnojoluin noonooin sümaa nünüiki Maleiwa? ¿Kasa alataka namüin na nuuʼuliwoʼukana?

⁶ Ouktajachi Adán sünainjee nnojoluin noonooin sümaa nünüiki Maleiwa. Sutuma tia nnojoluichipa anain maʼin nia (Génesis 3:17-19). Nnojoishi niain neʼe Adán amojujaaka akuwaʼipa, amojujaasü nakuwaʼipa na nuuʼuliwoʼukana. Müsü tü Wiwüliakat: «Kaainjalashi Adán nuulia Maleiwa sükajee niyouktajaain sümaa nünüiki nümüin. Ouktakalaka nia saaliijee. Jee sükajee kaainjalain Adán, oʼttüsü wayuu ütamüinreʼeya sünain kaainjalaa. Ouktakalaka naya saaliijee» (Roma 5:12). Kaainjalashii waya nünainjee Adán. Makalaka süchepchiain waya kaainjalaa jee ouktaa nutuma Adán saashin tü Wiwüliakat (Roma 7:14). Nnojotsü katüinjatüin noʼu Adán sümaa Eva nachikuaʼa süka naainjain tü kasa mojusükat sümaa natüjaain saaʼu mojuin shia. ¿Kasakaʼa alatajatüin namüin na nuuʼuliwoʼukana?

7, 8. ¿Jarat tü piamasükat sukuwaʼipa aakajiraa?

⁷ Nuʼtteʼerüinjana Jeʼwaa na wayuukana sükajee naakajirüin naya suulia naainjala. ¿Kasa wayuu tü aakajiraakat? Piamasü sukuwaʼipa. Tü palajatkat shia tü awalaajünakat saaʼu wanee kasa otta süpüla nüjütünüin wanee wayuu eeka püreesain. Tü wanee shia tü awalaajünakat saaʼu wanee kasa eeka seewaain atumawaa. Keewainre wanee wayuu nuwalaajüinjatü wanaapünaa sümaa sülia tü neewainkat.

⁸ Watüjaaitpa aaʼu mojuin maʼin wakuwaʼipa nutuma Adán. ¿Jamüinjatü sukuwaʼipa süpüla waakajinnüin suulia süchepchiain waya kaainjalaa jee ouktaa? Wekirajaa sünain tü sukuwaʼipakat nutuma Jeʼwaa otta tü paainjainjatkat süpüla anain pukuwaʼipa sutuma.

¿JAMÜSÜ SUKUWAʼIPA SÜPÜLA NAAKAJIRÜIN WAYA JEʼWAA?

9. ¿Kasa awalaajünajatka aka tü amülouikat nutuma Adán?

⁹ Anashi maʼin Adán paala, akatsaʼa tia amülouisü nutuma. Süpüla eeinjatüin shia süchikuaʼa, nnojoishi ouktajachin wanee wayuu eeka nnojoluin anain maʼin (Salmo 49:7, 8). Süpüla tia ouktajachi wanee wayuu eeka müin aka Adán. Müsü sünüiki tü Wiwüliakat süchiki tia: «Chi wayuu eekai niyuʼlüin soʼu wane wayuu, anasü shiyuʼnnüle noʼu» (Mateo 5:38). Saashin pütchikat tia wanaawainjatü tü aapünakat saaʼu tü amülouikat. ¿Kasa awalaajünajatka aka tü amülouikat nutuma Adán? Ouktajachi wanee wayuu eeka anain maʼin, eeka müin aka Adán (1 Timoteo 2:6).

10. ¿Jamüsü sukuwaʼipa süpüla naakajirüin waya Jeʼwaa?

¹⁰ ¿Jamüsü sukuwaʼipa süpüla naakajirüin waya Jeʼwaa? Nuluwataain Mmapaʼamüin wanee nüchon anashi maʼin, nia chi waneeshikai Nüchon aika maʼin nüpüla (paashajeʼera 1 Juan 4:9, 10). Ashakatüshi nia süka naaʼin nümüiwaʼa Mmapaʼamüin (Filipos 2:7). Maʼaka wekirajaain suluʼu ekirajaaya 4, aainjashi Jeʼwaa wanee kasa pülasü, nülateʼerüin chi Nüchonkai suluʼumüin süchonla María. Sükajee tü nütchinkat Maleiwa, maainjalasai otta anashi maʼin Jesuu jemeipa nia (Lucas 1:35).

11. ¿Jamüshi waneeshika chi aakajirüinjachikai wainmashaata wayuu?

¹¹ ¿Jamüshi waneeshika chi aakajirüinjachikai wainmashaata wayuu? ¿Jamüsü kaainjaratka wayuu süpüshuaʼa? Soto paaʼin kaainjalain Adán, sünainjee tia nnojoluichipa anain maʼin nia otta nnojotsü nülatirüin shia nanainmüin na nuuʼuliwoʼukana. Shia mülee nülatiraka namüin tü kaainjalaakat jee tü ouktaakat. Anashi maʼin Jesuu, maainjalasai nia. Niiʼirakashi Adán süpüla katüin woʼu. Jaa müshi nia waneepia nümüin chi Nüshikai jee ouktüshi nia waaʼu. Sükajee ouktüin nia nuwalaajüin tü naainjalakat Adán otta kateerü woʼu waneepia nutuma (Roma 5:19; 1 Corinto 15:21, 22, 45).

12. ¿Kasa niiʼiyataka Jesuu sükajee müliain maʼin nia?

¹² Süküjüin tü Wiwüliakat müliain maʼin Jesuu süpülapünaa ouktüin nia. Aʼyaajünüshi otta achitünüshi nia sünain wanee wunuʼu süpüla ouktaa (Juan 19:1, 16-18, 30; paashajeʼera tü pütchikat «¿Eeinjatche kuruusa wamaʼana?»). ¿Jamüshi müliaka maʼin nia? Wekirajaajeerü anain suluʼu wanee ekirajaaya tü nümakat Satanaa, nnojoluin süpüla noonooin waneepia sümaa nünüiki Maleiwa wanee wayuu müliale nia atumawaa. Wanaa sümaa müliain maʼin Jesuu jaa müshi nia waneepia nümüin Jeʼwaa. Sükajee tia, niiʼiyatüin aküjülin alawaa Satanaa. Niiʼiyatüin Jesuu eein süpüla jaa nümüin waneepia nümüin Maleiwa wanee wayuu eeka anain maʼin, jaʼitaichi müliain maʼin nutuma Satanaa. ¡Talatakajasaʼa maʼin Maleiwa sükajee noonooin waneepia chi Nüchonkai sümaa nünüiki! (Proverbios 27:11.)

13. ¿Kasa naainjaka Maleiwa süpüla naakajirüin waya?

¹³ ¿Kasa naainjaka Maleiwa süpüla naakajirüin waya? Soʼu 14 tü kashikat nisán, wanee kashi natuma na judíokana, soʼu tü juyakat 33 soʼu wakalia, nuuʼulaain Maleiwa nuʼutünüin aaʼin chi Nüchon anakai maʼin sümaa maainjalain nia. Sükajee tia, aapajiraashi nikii «watua neʼe» süpüla ouktaa waaʼu (Hebreokana 10:10). Apünüin kaʼi süchikijee, asoʼireʼennüsü naaʼin nutuma Jeʼwaa maʼaka naaʼin wanee meʼrujusai. Chaaʼaya sirumatuʼu, nüküjüin Jesuu nümüin chi Nüshikai ouktüin nia süpüla naakajirüin na nuuʼuliwoʼukana Adán (Hebreokana 9:24). Anasü nümüin Jeʼwaa tü naainjakat Jesuu, sükajee tia taashishii na wayuukana suulia süchepchiain naya kaainjalaa jee ouktaa (paashajeʼera Roma 3:23, 24).

¿JAMEERÜ PUKUWAʼIPA SUTUMA NAAKAJIRÜIN PIA JEʼWAA?

14, 15. ¿Kasa waainjüinjatka süpüla «sülatinnüin waainjala woulia»?

¹⁴ Mayaapejeʼe kaainjaraliin waya, aapüneerü wamüin wainma kasa anasü sükajee taashin waya nutuma Jesukürisüto. Wekirajaa sünain süpüshi tü naapakat wamüin Maleiwa maaʼulu otta tü naapüinjatkat mapeena.

¹⁵ Alatinnüsü waainjala woulia. Kapüleesü wamüin aainjaa tü kasa anasükat süka kaainjaraliin waya. Eesü mojule wanüiki jee waainjüle kasa mojusü. Sükajee ouktüin Jesuu waaʼu, eesü süpüla «sülatinnüin waainjala woulia» (Colosas 1:13, 14). Süpüla tia, wooʼulaainjatü tü waainjalakat. Sükajee ouktüin chi Nüchonkai waaʼu, wachunta nümüin Jeʼwaa sümaa nnojoluin yaletüin waaʼin süpüla nülatirüin waainjala woulia (paashajeʼera 1 Juan 1:8, 9).

16. ¿Jamüshi waʼwaajaka Maleiwa sümaa wulein waaʼin? ¿Jamüsü wakuwaʼipa wulere waaʼin?

¹⁶ Wulesü waaʼin nümüin Maleiwa. Yarüttüle waaʼin nnojotsü kasain waʼatapajüin otta nnojoishii kasain anain apüla waya waashin. Sükajee naakajirüin waya Jesuu nülatirüin Jeʼwaa tü waainjalakat woulia otta eeshi süpüla waʼwaajüin nia sümaa wulein waaʼin (Hebreokana 9:13, 14). Sükajee tia, eeshii süpüla waashajaain nümaa sümaa nnojoluin mmoluin waya (Hebreokana 4:14-16). Wulere waaʼin jutatüsü waaʼin, anasü waaʼin wamaajiraa otta talatüshii maʼin waya.

17. ¿Kasa eeinjatka sükajee ouktüin Jesuu waaʼu?

¹⁷ Kateerü woʼu waneepia suluʼu wanee paʼaraiisü. Roma 6:23 müsü sünüiki: «Chi wayuu ayatakai süchepchiain kaainjalaa, ouktajachi nia saaliijee». Süpüshi tia wetsiikulokat müsü shia: «Chi eekai saʼaniraain nukuaippa nümaa Cristo Jesuu chi Wasenyotsekai, eeʼiranajaweerü naaʼin süpüla chainjachin nia nümaa Maleiwa waneepia [kateerü noʼu waneepia, TNM]». Suluʼu ekirajaaya 3, wekirajaa anainrü tü kasa anasü eeinjatkat suluʼu tü Paʼaraiisükat (Alateetkat Mapeena 21:3, 4). Sükajee ouktüin Jesuu waaʼu eejeerü tia otta kateerü woʼu waneepia sümaa nnojoluin ayuulin waya. Süpüla wamaʼanain tia kojutüinjatü wamüin naakajirüin waya Jesuu.

¿KASA PAAINJAINJATKA KOJUTÜLE PÜMÜIN TÜ NAAINJAKAT JEʼWAA?

18. ¿Jamüsü kojutüinjatka wamüin naakajirüin waya Jeʼwaa nükajee Jesuu?

¹⁸ ¿Jamüsü kojutüinjatka wamüin naakajirüin waya Jeʼwaa nükajee Jesuu? Kojutüsü maʼin wanee asülajuushi müleka niʼyataale maʼin wanee wayuu süpüla niyaʼlajüin shia. Otta müsia nüsülajüin shia wamüin süka alin maʼin waya nüpüla. Sükajee wainmain kasa naainjaka Maleiwa süpüla naakajirüin waya nükajee Jesuu, kojutüsü maʼin tü nüsülajakat wamüin. Juan 3:16 müsü sünüiki: «Anuu sukuaippa saalii wayuu sainküin mmakat süpüshua nüpüla chi Maleiwakai: Naapüin chi Nüchonkai waaʼu, chi waneeshikai Nüchoin». Naakajirüin waya Maleiwa sükajee alin maʼin waya nüpüla. Otta müshia Jesuu aishii maʼin waya nüpüla makalaka ouktüin nia saaʼu waainjala (paashajeʼera Juan 15:13). Sükajee tia watüjaaitpa aaʼu alin maʼin waya nüpüla Jeʼwaa otta nüpüla Jesuu (Galacia 2:20).

19, 20. ¿Kasa paainjainjatka kojutüle pümüin tü naainjakat Jeʼwaa?

¹⁹ ¿Kasa paainjainjatka kojutüle pümüin tü naainjakat Jeʼwaa? Piʼraajüinjachi maʼin Jeʼwaa (Juan 17:3). Piʼraajeechi nia pikirajaale sünain tü Wiwüliakat süka karalouktakat tüü. Piʼraajüle maʼin Jeʼwaa aijeechi maʼin püpüla otta paainjeerü tü keeʼireekat naaʼin (1 Juan 5:3).

²⁰ Piʼitaa paaʼin nünain Jesuu süka ouktüin nia paaʼu. Müsü pütchi nüchiki Jesuu: «Chi wayuu eekai niʼitaain naaʼin sünain anoujaa nünain chi Nüchonkai Maleiwa, eeʼiranajaweerü naaʼin süpüla eeinjachin nia nümaa süpüla kaʼikat süpüshua» (Juan 3:36). ¿Kasa waainjainjatka süpüla weʼitaain waaʼin nünain Jesuu? Nnojotsü sükainjatüin neʼe wanüiki. Santiago 2:26 müsü sünüiki: ‹Manoujainsai chi eekai nnojoluin naaʼinrüin tü nüchekakat Maleiwa›. Shiimainre wanoujain weeʼiyatüin süka tü kasa waainjakat. Wanee sukuwaʼipa süpüla weeʼiyatüin weʼitaain waaʼin nünain Jesuu shia washatüle nukuwaʼipa süka tü wanüikikat jee tü waainjakat (1 Juan 2:6).

21, 22. (1) ¿Jamüshii woʼunüinjanaka sünain tü outkajawaa asoʼirakat waaʼin nünain chi Senyotkai? (2) ¿Kasa wekirajaainjatka anain suluʼu ekirajaaya 6 otta 7?

²¹ Puʼuna sünain tü outkajawaa asoʼirakat waaʼin nünain chi Senyotkai. Saʼwai, soʼu 14 nisán tü juyakat 33, niʼitaain Jesuu sukuwaʼipa tia outkajawaakat. Sünülia sutuma tü Wiwüliakat ‹outkajawaa asoʼirakat waaʼin nünain chi Senyotkai› (1 Corinto 11:20; Mateo 26:26-28). Jee müsia wanee sünülia shia tü kaʼi sotokat anainjee waaʼin ouktüin Jesuu waaʼu. Niʼitaala Jesuu tia napüleerua na nikirajüinkana otta wapüleerua süpüla sotuin waaʼin ouktüin nia saaʼu waainjala. Müsü nünüiki: «Süpülajatü jaaʼinrüin waneepia süpüla sotüinjachin jaaʼin taya» (Lucas 22:19). Sutuma tia, sotusü waaʼin alin maʼin waya nüpüla Jeʼwaa otta Jesuu sükajee naakajirüin waya. Woʼunüle sünain tia outkajawaakat weeʼiyatüin kojutüin wamüin naakajirüin waya Jeʼwaa nükajee Jesuu.a

²² Kojutüsü maʼin tü naainjakat Jeʼwaa naakajirüin waya nükajee Jesuu (2 Corinto 9:14, 15). Sutuma tia, eesü süpüla süsoʼiraain naaʼin na ouktüshiikana. Suluʼu ekirajaaya 6 otta 7 wekirajaajeerü anain tia.