Meimmoluinjana waya seema aküjaa pütchi sainküin oikkaalee
1. ¿Jamüsü nnojoluinjatka ponuin waaʼin kapüleere wamüin aküjaa pütchi sainküin oikkaalee?
1 ¿Kapüleesü maʼin pümüin aküjaa pütchi sainküin oikkaalee? Müle shia, nnojo mojuin paaʼin, alatüsü tia sümüin wayuu maʼleekalia. Mayaainjeʼe yalayalain maʼin Pablo sünain aküjaa pütchi, kapüleesü nümüin ekeraajaa tü niʼyataainkat (1 Tes. 2:2). Wekirajaajeerü anain apünüinsü kasa süchiki tü aküjaakat pütchi sainküin oikkaalee otta wekirajaajeerü anain tü waainjüinjatkat.
2. ¿Jamüshii nnojoleenaka jashichin pümüin na oikkaaliikana müleka paashajaale namaa?
2 ¿Tekeʼejüinche naaʼin na oikkaaliikana? Nooʼulaainjatü na aʼyataashiikana tü naainjakat napüleerua na antakana suluʼumüin tü oikkaaleekat. Otta müsia kamaneejeena naya pümüin süka piyaʼlajüinjachin naküjainruʼu. Anale paʼanaaya otta kamaneere pia, kojuteechi pia namüin.
3. ¿Kasa paaʼinrajatka süpüla nnojoluin pikeʼejüin naaʼin na ayaʼlajaashiikana?
3 ¿Yootuinjachi taya suʼupala wainma wayuu? Anasü püneeküle wanee kaʼi yüütüükat oʼu tü oikkaaleekat maʼaka sujutannaiwaʼaya. Paʼatapaja nümüiwaʼain chi oikkaaikai jee niale chi aluwataaikai otta motsoʼo pümaa.
4. ¿Jamüinjatü pünüiki sünain aküjaa pütchi?
4 ¿Jamüinjatü tanüiki? Wainmale na oikkaaliikana, paashajaa nümaa chi aluwataaikai. Maa pünüiki: «Eeshii nnojoliire jimatüin nepialuʼu na wayuu aʼyataakana suluʼu oikkaalee, müshiijeseʼe wantüin naʼyataaleruʼumüin». Süpüla nnojolinjachin pülirajünüin sünain puikkaalin, nnojo püchuntüin namüin na wayuukana tü nasülajüinjatkat, aluʼusaa nasakirüle jamakuwaʼipalüin tü nneerü aküjünakat aka pütchi sainküin Mma. Püsakira chi aluwataaikai sünain eere süpüla paashajaain motsoʼo namaa na aʼyataaliikana, wanaapünaainjatü tia sümaa sukuwaʼipa tü oikkaaleekat. Nnojo piiʼiratüin tü pünüikikat. Kupaale wanee aʼyataai, motsoʼo pümaa otta paapa nümüin wanee karalouktachon. Isale püchiki paashajaain namaa napüshuaʼa na oikkaaliikana, püsakira sünain eere süpüla püpütüin karaloukta eekai tü eemeraayakat.
5. ¿Jamüshii meimmoluinjanaka waya sünain aküjaa pütchi sainküin oikkaalee?
5 Yalayalashi maʼin Jesuu nümaa Pablo sünain aküjaa pütchi sainküin shiʼyataale wayuu (Mat. 4:18-21, 9:9; Aluw. 17:17). Püchunta nümüin Jeowa jimatüin paaʼin otta meimmoluin pia (Aluw. 4:29). Anasü maʼin aküjaa pütchi sainküin oikkaalee süka jouluin wayuu. ¡Puuʼulakapa!