Jaʼraisü kasa pikirajeetka akajee wayuu
1. ¿Kasa waaʼinrüinjatka müleka nnojoiyüire wousütüin nünain wanee wayuu ekirajaweekai sünain tü Wiwüliakat? ¿Jamüsü waainjüinjatka shia?
1 ¿Eesü kapüleere pümüin puusütüin nünain wanee wayuu ekirajaweekai sünain tü Wiwüliakat? Ayata piʼyataain süchiirua tia. Nükaaliinjüin Jeowa chi aainjakai tü keeʼireekat naaʼin (Gal. 6:9). Waküjüin paala pümüin jaʼraisü kasa akaaliinjeechika pia.
2. ¿Kasa waaʼinrüinjatka süpüla wekirajüin uatuwoʼushi na wayuukana sünain tü Wiwüliakat?
2 Pikiraja uatuwoʼushi. Wainma na wayuu atüjaakana saaʼu sünain waküjüin pütchi süka tü rewiisütakat Aapiria Wayuu otta ¡Despertad!, akanasaʼa eeshii na nnojoliikana atüjaain saaʼu wekirajüin wayuu sünain tü Wiwüliakat. Püküjapeena pütchi sainküin piichi, pikiraja uatuwoʼushi tü wayuukalüirua sünain tü Wiwüliakat. Maaʼaya shia putuma naka na wayuu puwaraijaakana aaʼu. Nnojorülejeʼe nekirajaweein, ayata piʼikajüin waneeirua karaloukta namüin, kamaʼa nekirajaweenale mapeena. Eeshi wanee wawala kakaliaichikai eʼikajüin rewiisüta namüin wanee wayuuinnua. Soʼu wanee kaʼi oʼunüshi nia sünain niʼikajaain tü rewiisüta jeketkat namüin, nüsakiraka naya sümaa nümüin: «¿Ekirajaweeshii jia sünain tü Wiwüliakat?». «Aa» namakalaka nümüin, woutiisainnapa na wayuukana maaʼulu.
3. ¿Jamüsü jülüjüinjatka waaʼin eein süpüla nnojotyülüinya nekirajaain sünain tü Wiwüliakat na wayuu oʼunakana sünain tü outkajawaakat?
3 Paashajaa namaa na antakana sünain tü outkajawaakat. Jülüjüinjatü paaʼin eein süpüla nnojotyülüinya nekirajaain sünain tü Wiwüliakat na wayuu oʼunakana sünain tü outkajawaakat. Müshi wanee wawala: «Na wayuu tekirajakana sünain tü Wiwüliakat, tekirajüin naya sünainjee tü outkajawaakat. Eesü wanee wayuu japüleʼe, oʼunaka sünain tü outkajawaakat soʼu poloo jaʼralimüin juya sümaa piamashii süchonnii woutiisashii. Antawaisü shia suʼttapa tü outkajawaakat jee oʼunamaatüsü shia süchikijee sujutaain. Shiasejeʼe wanee kaʼi, «tekirajeerü pia sünain tü Wiwüliakat» sümaka wanee wawala sümüin. Shikirajaaka tia wayuukot jee woutiisaka shia mapa. Müsü tü wawalakat: «¡Kasataalejeseʼe taashajaatüjürüle sümaa süpüla tekirajüin shia sünain tü Wiwülikat!».
4. ¿Jamüsü süpüla wakaaliinjiraain namaa na wawalayuukana süpüla wekirajüin wayuu sünain tü Wiwüliakat?
4 Wakaaliinjiraa namaa na wawalayuukana. Oʼunawaisü wanee wawala namaa na waneeinnua sünain ekirajaa. Keraapa tü ekirajawaakat jee anale nümüin chi ekirajüshikai, süsakirawalin tü wawalakat chi wayuu ekirajünakai niʼraajüle wanee wayuu ekirajaweekai sünain tü Wiwüliakat. Na wanee eekana süpüla wasakirüin nanain na wayuu ekirajaweekana, naya na wayuu wouyantakana aaʼu sümaa waapüirüin tü karalouktakat Kasa shikirajaka namüin. Eeshii aküjülii pütchi jee pürekutsoot kapülejeenaka amüin ekirajaa wanee wayuu ekirajaweekai sünain tü Wiwüliakat. Pükaaliinjiraa namaa na wawalayuukana.
5. ¿Kasa waaʼinrüinjatka eere wawalayuu suluʼu tü woutkajaaleekat manoujüinka aʼwayuuse?
5 Waashajaa namaa na manoujüinsaliikana. ¿Eeshii wawalayuu suluʼu tü woutkajaaleekat manoujüinkana aʼwayuuse? Eeshii manoujüinsalii mamalainka amüin süküjünüin pütchi namüin natuma naʼwayuuse, aluʼujasaʼa nekirajünüle sutuma wayuu naata suulia nüpüshi. Wasakira palajana na manoujüinkana aʼwayuuse sünain joujain anain aashajawaa namaa naʼwayuuse.
6. ¿Jamüsü choʼujaaka maʼin wachuntüin nümüin Maleiwa süpüla wekirajüin wayuu sünain tü Wiwüliakat?
6 Püchunta kaaliinwaa nümüin Jeowa. Naapeerü waneepia Jeowa wanüiki wachuntüle nümüin (Sant. 5:16). Naapajeerü wanüiki Jeowa müleka wanaapünaale shia sümaa tü keeʼireekat naaʼin (1 Juan 5:14). Achuntüshi wanee wawala kaaliinwaa nümüin Jeowa süpüla nikirajüinjachin wanee wayuu sünain tü Wiwüliakat mayaapejeʼe kupaain maʼin nia. Shapaasü maʼin saaʼin nuʼwayuuse chi wawalakai süka eein süpüla nnojoluin nikirajüin wanee wayuu sutuma kupaain maʼin nia, yaaʼaleekajaʼa choʼujaale maʼin nükaaliinjünüin chi nikirajüinkai. Saashajaakalaka nümaa Jeowa süchiki tü shapaakalü atuma saaʼin. Piama semaana süchikijee, asouktüshi Jeowa namüin sükajee wanee wawala pürekutsoot aküjaka pütchi nümüin wanee wayuu ekirajaweekai sünain tü Wiwüliakat jee saashajaaka nümaa chi wawalakai süpüla niain ekirajüin chia wayuukai. Müsü tü nuʼwayuusekat: «Na kapüleekana amüin naashin ekirajaa wayuu sünain tü Wiwüliakat, shia anaka aluʼu nachuntüle nümüin Jeowa jee naküjüinjatü uatuwoʼushi tü keeʼireekat naaʼin. «Eeyaa watüjaain saaʼu talatüinjatüin maʼin waaʼin sutuma tia». Piʼyataale maʼin süchiirua tia, eejeerü wayuu pikirajaka sünain tü Wiwüliakat otta pükaaliinjeena naya sünain oʼunaa suluʼumüin tü wopu sünainmüinkat kataa oʼu waneepia (Mat. 7:13, 14, NM).