Tü anasü eekat natuma na wawalayuu wojuʼitakana amaa sünain aküjaa pütchi
1. ¿Kasa anasü weʼreetka sutuma wojuʼitüle namaa na wawalayuukana sünain aküjaa pütchi?
1 ¿Eesü sotule paaʼin wanee kasa aainjünapuʼuka sünain tü Ekirajawaakat sünain wanee Karaloukta? Anapuʼusü waaʼin namaa na wawalayuukana mayaapejeʼe paliʼirüin naya, anasü süpüla aleewajirawaa (Prov. 18:24). Chi shikiipüʼükai tü ekirajawaakat sünain wanee karaloukta, jülüjapuʼusü naaʼin tü wakuwaʼipakat jee nükaaliinjapuʼuin waya sünain tü choʼujaakat wamüin (Prov. 27:23; 1 Ped. 5:2, 3). Eeyülia süpüla müin wakuwaʼipa wojuʼitapa sünain aküjaa pütchi namaa na wawalayuukana.
2. ¿Kasa eeka süpüla paaʼinrüin süpüla paʼaleewajaain maʼin namaa na pujuʼitakana amaa sünain aküjaa pütchi?
2 Waaʼinra tü aküjünakat wamüin. Süka palitchoin na wawalayuu outkajaapuʼukana sünain ekirajawaa sünain wanee karaloukta, müshia na wawalayuu wojuʼitakana amaa sünain aküjaa pütchi. Sutuma paaʼinwajiraain waya namaa na wawalayuukana sünain aküjaa pütchi, aleeweena maʼin waya namaa (Filip. 1:27). ¿Jeʼrainna na wawalayuu wojuʼitakana amaa sünain aküjaa pütchi? ¿Jama kooʼomüinre putuma na pujuʼitakana amaa sünain aküjaa pütchi? (2 Cor. 6:13.) Eeshii süpüla puunejaain waneeinnua wawalayuu sünain wanee ekawaa jee shiale sünain tü ai puʼwaajakalü oʼu Maleiwa sümaa püpüshi. Suluʼu waneeirua outkajaalee na ojuʼitakana sünain aküjaa pütchi, nounejaʼawalin sünain ekawaa chi wawala aküjakai tü pütchi süpülajatkat wayuu süpüshuaʼa, pachikuatüshii naya sünain tia. Nayainjanapa ounejaain chi wawalakai na wawalayuu nnojoyüliikana ounejaain nia, ayatshii outkalaain naya mayaainjeʼe nnojoleechin chi wawalakai.
3. ¿Jamüsü süpüla sükaaliinjüin waya sünainpünaa wanoula namaale waya na wojuʼitakana amaa sünain aküjaa pütchi?
3 Ayatüinjanaʼaya naaʼinmajüin na laülaashiikana na wawalayuukana mayaainjeʼe noutkajaain piantua süpüla semaanaka. Tü naaʼinrajatkat chi nekiipüʼükai na wawalayuukana shia natütüleʼerüin naaʼin, nakaaliinjüin naya waneʼewai nakua jee nakaaliinjüinjanain naya süpüla naküjüin pütchi. Nnojoiyüire pujuʼitüin nümaa chi pikiipüʼükai sünain aküjaa pütchi, püma nümüin pujuʼiteein nümaa. Chi wawala jülüjakai aaʼin tü aküjaakat pütchi, alapalaawaishi naaʼu na wawalayuu wojuʼitakana amaa sünain aküjaa pütchi saawanoʼu jee rimiinkoʼu uatua süpüla kashika. Suluʼu outkajaalee eere paliʼirüin wawalayuu, eeshijaʼa süpüla nülapalaain piantua süpüla juyakat. Püchajaa sukuwaʼipa süpüla püküjüin pütchi namaa na pujuʼitakana amaa sünain aküjaa pütchi nülapalaapa jaaʼu chi wawala jülüjakai aaʼin tü aküjaakat pütchi.
4. 1) ¿Jaralüinjatü sukuwaʼipaka tü outkajawaa süpülajatkalü aküjaa pütchi? 2) ¿Jamüsü waʼanapajirüinjatka wepia süpüla saainjünüinjatüin outkajawaakat tia?
4 Eesü tü anakat sutuma katataawain na wawalayuukana süpüla aküjaa pütchi saawanoʼu jee rimiinkoʼu. Süka wanaawain tü oora aainjünakalü oʼu tü outkajawaakat süpüla aküjaa pütchi jee katataawain shia, antamaateena maalü na wawalayuukana sünain. Mapüleejeerü akumajaa nakuwaʼipa na wawalayuukana süpüla nojuʼitamaatüin sünain aküjaa pütchi. Müle shia nutuma chi nekiipüʼükai na wawalayuukana, mapüleejeerü nümüin jülüjüin naaʼin nakuwaʼipa na wawalayuukana. Eesü choʼujaale kottiraain na wawalayuu wojuʼitakana amaa sünain aküjaa pütchi namaa waneeinnua. Müleka nojuʼitüle napüshuaʼa na wawalayuukana sünain aküjaa pütchi soʼu tü palajatkat saawanoʼu soʼu tü kashikat jee shiale süchikijee Ekirajawaa sünain Aapiria Wayuu, anashii nojoyoloole na wawalayuukana namaa na nojuʼitüinjanakana amaa sünain aküjaa pütchi süpüla nukumajüinjatüin nakuwaʼipa chi nekiipüʼükai süpülapünaa tü oʼuraajaakat. (Paashajeʼera tü pütchikat «Paʼanapajira pipia».)
5. Mayaapejeʼe nnojoluitpain tü Ekirajawaakat sünain wanee Karaloukta, ¿kasa tü eekat süpüla waaʼinrüin?
5 Mayaapejeʼe nnojoluitpain tü Ekirajawaakat sünain wanee Karaloukta, ayatüshiʼiya nükaaliinjüin waya Jeowa süpüla waaʼinrüin tü keeʼireekat naaʼin (Heb. 13:20, 21). Nükaaliinjeena waya süpüla nnojoluinjatüin kasain choʼujaain wamüin (Sal. 23:1). Wainma kasa anasü eeka natuma na wojuʼitakana amaa sünain aküjaa pütchi. Waaʼinra tü aküjünakat wamüin otta soto waaʼin, ‹wane apünajüi, müleka nüpünajüle wainma waüyee, wainmeerü nüʼttia› (2 Cor. 9:6).
[Epiikürape suluʼu süpanaka 6]
«Paʼanapajira pipia»
Eesü outkajaalee eere kottiraainjanain na wawalayuu wojuʼitakana amaa sünain aküjaa pütchi süka nnojoluin eein jalainjanain noutkalaain saawanoʼu jee rimiinkoʼu. Tü outkajawaa süpülajatkalü aküjaa pütchi, shia suwalaʼata sukuwaʼipa süpüla nekirajünüinjanain na wawalayuukana, müsüjeseʼe anain maʼin saainjünüle wepialuʼu. Paʼanapajira pipia, jaʼitairü nnojotkai anain maʼin saaʼin. Tü jülüjeetkat naaʼin na laülaashiikana, shieerü jalain shia jee müsia waneeirua kasa maʼaka saaʼin süneekünapüʼüin wanee piichi süpüla tü Ekirajawaakat sünain wanee Karaloukta. Paashajaa nümaa chi pikiipüʼükai müleka paʼanapajireere pipia.