Weitaja tü rewiisüta kakaliaitkat ojuʼitüin
Nnojoleerü kasain saamüin tü rewiisütakalüirua müleka wojunaale shia otta yalakuʼu müle wamaʼanain. Müsüjeseʼe weitajüinjatüin tü rewiisütakalüirua. ¿Jamüsü weitajüinjatka shia? Süka eein süpüla saapaain amaa wayuu tü pütchi suluʼukat wanee rewiisüta otta noʼttüin sünain aʼwaajaa Jeʼwaa (Roma 10:13, 14, NM). Anuu tü waaʼinrajatkat süpüla weitajüin tü rewiisütakalüirua kakaliaitka ojuʼitüin.
Nnojorüle wayuu wapüla suluʼu wanee miichi, eesü süpüla wapütüin wanee rewiisüta. Waaʼinrüinjatü tia eere nnojoluin süküjünüin maʼin pütchi.
Waküjapa pütchi eere süshaʼwajüle kemion jee türein, wasakira na wayuu yalakana yala müleka keeʼireere naaʼin naashajeʼerüin wanee karaloukta otta weeʼiyata namüin tü rewiisüta eekat wamaʼana süpüla naneeküin tü kamalainkat namüin.
Wanaa sümaa waküjüin pütchi suluʼu pitaat, eere nakaaliinjünüin na laülaacheinkana otta eere jouluin wayuu, wapüta napüla tü rewiisütakalüirua. Waashajaa nümaa chi wayuu laülaakai saaʼu tia süpülapünaa wapütüin tü rewiisütakalüirua. Eeitpale kojuyasü rewiisüta namaʼana, nnojo wapütüin sooʼomüin namüin. Waainjüinjatü tia suluʼu tü mma waküjakalü aluʼu pütchi.
Wouyantüinjanale wachikuaʼa shipialuʼumüin wanee wayuu, jülüja waaʼin jaralüin tü pütchi jalouijeetkat sümüin. Jülüja paaʼin kachonle shia, kamalainre sümüin suʼunajaain wattapünaa jee kamalainre sümüin waneeirua kasa. Wachajaainjatü achiki suluʼu tü rewiisüta kakaliaitkat ojuʼitüin jaralüin tü pütchi kamalainjeetkat namüin na wayuukana jee waapa tia namüin.
Kakaliaichire nnojolin wawaraijaain naaʼu wanee wayuu kamalainka amüin tü pütchikat, wapüta nüpüla tü rewiisütakat waashajaapa nümaa.