Wekiraja wachonnii joʼuuiwaʼaya naya

1, 2. ¿Kasa naaʼinrajatka na kachonshiikana süpüla anain nepijia nachonnii?

MÜSHI wanee wayuu kachonshi: «Nüpatse wamüin Jeʼwaa na wachonniikana». Alatüirü maʼaka 3.000 juya süchikijee nüküjüin tia (Salmo 127:3, NM). Nüsülajala Maleiwa nachonnii na wayuukana. Akatsaʼa nayaawatüin saaʼu wainmain aʼyatawaa nanain.

² Kapüleesü maʼin epijaa maaʼulu na tepichikana. Akatsaʼa wainmain na wayuu ountakana anain nepijia nachonnii. Anuu tü naaʼinrajatkat: «Nnojorüle nukumajüin Jeʼwaa tü piichikat, amülasü neʼe naʼyataain maʼin na wayuukana sünain» (Salmo 127:1, NM). Waainjüle maʼin tü nümakat Jeʼwaa, aneerü nepijia wachonnii. Müsü tü Wiwüliakat: «Piʼitaa süpüshuaʼa paaʼin nünain Jeʼwaa, nnojo piʼitaain paaʼin sünain tü pütüjaakalü aaʼu» (Proverbios 3:5, NM). ¿Waainjeerü tü nümakat Jeʼwaa süpüla anain nepijia wachonnii?

TÜ SÜMAKAT TÜ WIWÜLIAKAT

3. ¿Kasa naaʼinrajatka chi toolokoi süpüleerua nüchonnii?

³ Naashin waneeinnua tooloyuu shiainjatü tü jietkat epijaka süchonnii. Saashin tü Wiwüliakat niainjachi chi toolokoi epijaka nuʼwayuuse otta nüchonnii jee aʼyataainjachi nia sünain tü kasa aainjünakat miichipaʼa. Müsü tü Wiwüliakat: «Kettaa putuma tü piʼyataainkalü anuuipaʼa otta yapa putuma shia suluʼu piyüüjase. Süchikijee pukumaja pipia» (Proverbios 24:27, NM). Naashin Maleiwa, niainjachi chi toolokoi sümaa tü jietkat epijaka otta ekirajaka nachonnii (Proverbios 1:8, 9).

4. ¿Jamüsü wanaawainjatka nojutü na tepichi tooloyuukana namaa na jieyuukana?

⁴ ¿Kojutshii pümüin püchonnii? Na wayuu chakana Asia «nnojotsü nacheküin jieyuule nachonnii». Müshiʼiya na wayuu kepiakana América, jaʼitainna nayain na «atüjakana maʼin karaloukta». Wanaawasü nojutü na tepichi jieyuukana namaa na tooloyuukana. Müshi Jacob nachiki na nüchonnii tooloyuukana otta na jieyuukana: «Naya na tachonniikana aapünakana tamüin nütüma chi Maleiwakai» (Génesis 33:1-5; 37:35). Müshia Jesuu, anasü nünüiki namüin ‹na tepichi› antinnakana nümüin (tooloyuu otta jieyuu) (Mateo 19:13-15). Sutuma tia, nüshatüin Jesuu tü nukuwaʼipakat Jeʼwaa (Deuteronomio 16:14).

5. ¿Kasa jülüjüinjatka naaʼin na wayuukana süpüla natüjaain saaʼu jeʼrainjatüin nachonnii?

⁵ ¿Anasü wainmale süchonnii wayuu suluʼu tü mma kepiakalü aluʼu pia? Naneeküinjatü na kaʼwayuuseshiikana jeʼrainjatüin nachonnii. Wanaa sümaa naainjüin tia, jülüjüinjatü naaʼin nounteerüle naapüin neküin, nasheʼin otta tü süpülainjatkat nakoleejiase. Eeshii naapüle süpüshi nachonnii sümüin napüshi süka isain nachiki nepijüin naya napüshuaʼa. Mojusü tia. Na aainjakana tia, nnojoishii ooʼulaʼaleeinjanain suulia epijaa nachonnii. Müsü tü Wiwüliakat: ‹Wane anoujashi, nnojorule naaʼinmajüin nüpüshi, niyouktüinjaʼa tü nünüikikat Maleiwa› (1 Timoteo 5:8). Na wayuu kekiikana maʼin jülüjüsü naaʼin palajana jeʼrainjatüin nachonnii süpüla ‹naaʼinmajüin napüshi›, tia shia naapüinjatüin tü choʼujaakat namüin. Naneeküinjatü naaʼinmajiraainjatüle nakuwaʼipa suulia wainmain nachonnii otta tü kasa naaʼinmajiraainjatkalü aka nakuwaʼipa. Watüjaa aaʼu ‹wasouktinneenain waneʼewai wakua nuʼupala Maleiwa saaʼu süpüshua tü waaʼinrakat› (Galacia 6:5). Saashin tü Wiwüliakat, mojusü tü ojutiraakat joʼuu otta naaʼinmajiraale nakuwaʼipa süka wanee kasa nojutiraka atuma. Nia Jeʼwaa «aapakaʼaya wamüin kataa oʼu» (Aluwataaushikana 17:25). Na wayuu ojutirakana, neeʼiyatüin mojutüin Jeʼwaa namüin jee oʼutüshii naya saaʼin wayuu (Éxodo 21:22, 23; Salmo 139:16; Jeremías 1:5).

WAAPA TÜ CHOʼUJAAKAT NAMÜIN WACHONNII

6. ¿Jeʼrainjatü nouyase na tepichikana süpüla nekirajünüin?

⁶ Müsü Proverbios 22:6, NM: «Pikiraja püchon wanaajiraa sümaa tü wopu kaluʼuinjachika nia». Nekirajüinjana nachonnii na wayuukana. ¿Jeʼrainjatü nouyase nachonnii süpüla nekirajüin naya? Nekirajüinjana joʼuuiwaʼaya naya. Naashin Pablo, ekirajünüshi Timoteo ‹joʼuuiwaʼaya nia› (2 Timoteo 3:15, NM). Tü pütchi griego alatinnakalü aka wersiikulokot tüü, maluʼulu joʼuu eiwaʼalii jemein otta süleʼeruʼuyülii nei (Lucas 1:41, 44; Aluwataaushikana 7:18-20). Müshijeseʼe nikirajünüin Timoteo joʼuuiwaʼaya nia. Anasü maʼin nekirajünüle na tepichikana joʼuuiwaʼaya naya süka jüüjüüin nekii süpüla wanee kasa.

7. (1) ¿Jamüsü choʼujaaka alinjachin maʼin chi jintüikai nüpüla nüshi otta süpüla nii? (2) ¿Jamüsü nukuwaʼipa Jeʼwaa nümaa chi waneeshikai Nüchon?

⁷ Müsü wanee wayuu: «Teʼraiwaʼaya chi tachonchonkai, aishi maʼin nia tapüla». Wainma jieyuu aika maʼin apüla süchon süka waneepiain nia sümaa süchikijee jemein nia. Otta sutujeʼerüle nia aishi maʼin süpüla otta anasü naaʼin sümaa (puʼwanaajireʼera sümaa 1 Tesalónica 2:7). Süpüla anainjatüin naaʼin chi jintüikai süsepajüinjachi nia otta saashajaainjachi amaa (puʼwanaajireʼera sümaa Isaías 66:12). Jama chi toolokoi, ¿kasa naaʼinrajatka? Alinjachi maʼin nüpüla chi nüchonkai. Anasü maʼin süpüla nüshatüin nukuwaʼipa Jeʼwaa. Müshi Mateo süchiki tü nukuwaʼipakat Jeʼwaa nümaa chi waneeshikai nüchon: «Saapünakalaka joo wane pütchi chaa iipünaajee sünain maa: ‹Anii chi Tachonkai aishikai tapüla. Talatüshi maʼi taya nümaa›» (Mateo 3:17; Juan 1:14). Müinjatia shia nutuma chi wayuukai, alinjana maʼin nüpüla na nüchonniikana nakumajaaiwaʼaya. Müshi wanee wayuu kachonshi: «Piiʼiyata alin maʼin püpüla püchon. Nnojoishi ouktüichin wanee jintüi sutuma nüsepajünüin».

8. ¿Kasa naaʼinrajatka na kachonshiikana süpüla natüjüinjanain na nachonniikana joʼuuiwaʼaya naya?

⁸ Choʼujaasü nekirajünüin na tepichikana joʼuuiwaʼaya naya süka jüüjüüin maʼin nekii. Nekirajüinjana nashi jee nei. Naashin na achajaakana sukuwaʼipa wanee kasa, atüjüshii aashajawaa otta aleejaa karaloukta na tepichikana «sutuma naashajaanüin amaa joʼuuiwaʼaya naya». Joʼuuiwaʼaya na püchonniikana, paashajaa namaa otta püleeja karaloukta namüin. Nashateerü mapa tü paainjakat otta pikirajamaateena naya sünain aleejaa karaloukta. Natüjeenaka süpülapünaa neʼitaanüin sünain koleejia. Choʼujaweerü tia namüin kepiale naya suluʼu wanee maa eere piratüin koleejia noulia otta eere alin neeʼiree na ekirajüliikana.

9. ¿Jamüshii nekirajüinjanaka nachonnii na anoujüshiikana?

⁹ Tü keeʼireekat maʼin naaʼin na anoujüshiikana shia nekirajüin nachonnii nüchiki Maleiwa (paashajeʼera Mateo 4:4). ¿Jamüshii nekirajüinjanaka naya? Shia süpüla «shiiʼiranajaainjatüin nakuwaʼipa» (Éfeso 4:24). Süpüla tia, choʼujaasü tü ekirajünajatkalü anain naya otta jamüinjatüin nekirajia, maʼaka choʼujaain tü kasa akumajünakalü aka wanee miichi otta jamüinjatüin sukumajia.

WEKIRAJA WACHONNII NÜCHIKI MALEIWA

10. ¿Jarat tü akuwaʼipa eeinjatkat nanain na tepichikana?

¹⁰ Anasü maʼin wanee miichi anale maʼin tü kasa akumajünakalü aka shia. Naashin Pablo, tü choʼujaakat süpüla anainjatüin nukuwaʼipa wanee anoujüshi shia: «ooro, pülaata otta ipa kojutsü» (1 Corinto 3:10-12, NM). Tia, shiyaakuasü tü akuwaʼipaakat maʼaka saaʼin anoujaa, kekiiwaa, ayaawataa saaʼu wanee kasa, waneepiaa nümaa Maleiwa, kojutaa amüin Jeʼwaa otta müsia aire apülaa nia jee kojutaa amüin tü nuluwataakalü anain (Salmo 19:7-11; Proverbios 2:1-6; 3:13, 14). ¿Kasa naaʼinrajatka na wayuukana süpüla eein sünain nachonnii akuwaʼipaakat tia? Oonooinjana sümaa wanee pütchi kakaliairü ashajünüin.

11. ¿Kasa naainjapuʼuka na israeliita kachonshiikana süpüla eeinjatüin sünain nachonnii tü akuwaʼipaa anakat nümüin Maleiwa?

¹¹ Nnojoliiwaʼaya nantüin na israeliitakana suluʼumüin tü Mma Aapünajatkat namüin, müshi Jeʼwaa namüin na kachonshiikana: «Pütchikat tüü, tü taluwataakalü anain pia jooluʼu, suluʼuinjatü shia paaʼin; pikirajüinjana na püchonniikana sünain, paashajaa süchiki wanaa sümaa püikkalaain pipialuʼu, wanaa sümaa waraittüin pia, piisalaain otta pütamaain» (Deuteronomio 6:6, 7, NM). Sutuma tia, anainjatü nakuwaʼipa na kachonshiikana, aleewainjana namaa nachonnii, aashajaainjana namaa otta nekirajüinjana naya.

12. ¿Jamüsü choʼujaaka anainjatüin nakuwaʼipa na kachonshiikana?

¹² Ana pukuwaʼipa. Müshi Jeʼwaa palajana: «Pütchikat tüü, [...] suluʼuinjatü shia paaʼin». Süchikijee nümaka: «Pikiraja na püchonniikana sünain». Chi wayuu eekai kachoin, niʼitaainjatü palajana suluʼu naaʼin tü akuwaʼipaa anasükat. Kojutüinjatü nümüin tü nümakat Maleiwa otta naainjüinjatü shia. Müle shia nutuma, yapeechi nia süpüla nüntüin suluʼumüin naaʼin chi nüchonkai (Proverbios 20:7). ¿Jamüsü? Shia süka naainjüin maʼin na tepichikana tü neʼrakat suulialeʼeya tü aküjünakat namüin (Lucas 6:40; 1 Corinto 11:1).

13. ¿Kasa naaʼinrajatka na kachonshiikana süpüla nashatüin nukuwaʼipa Jesuu?

¹³ Aleewa pia namaa. Müshi Jeʼwaa namüin na israeliitakana: ‹Paashajaa namaa wanaa sümaa püikkalaain pipialuʼu, wanaa sümaa waraittüin pia›. Tia pütchikat maluʼulu, nakatalüinjanain kaʼi na wayuukana napüla nachonnii, jaʼitairü wainmain naʼyataain. Akatatshi Jesuu kaʼi napüla na tepichikana. Sajaʼlajaayamüin niʼyataain saaʼu tü mmakat ‹antinnüsü wane tepichiirua nünainmüin süpüla niʼitaainjatüin najapü naaʼuirua›. ¿Kasa naainjaka Jesuu naka? ‹Naapaakalaka na tepichikana nütünaluʼumüin sünain nüchuntüin nümüin Maleiwa naaʼu› (Marcos 10:13, 16). Mayaapejeʼe sülüʼülüin maʼin nükalia Jesuu süpüla nuʼutünüin aaʼin, akatatshi nia kaʼi napüla na tepichikana. ¡Anakatche maʼin tia süpüla nashatüin na kachonshiikana!

14. ¿Jamüsü anaka pükatarüle kaʼi napüla püchonnii?

¹⁴ Paashajaa namaa. Pükatarüle kaʼi napüla püchonnii, paashajaweena amaa naya otta piyaawateerü saaʼu nakuwaʼipa. Soto paaʼin jülüjüinjatüin paaʼin nanüiki püchonnii, nnojotsü shiain paashajaainjatüin neʼe namaa. Müsü wanee wayuu kachonsü chejeʼewat Brasil: «Tekiraleʼerüin taaʼin sünain aapajaa nünüiki chi tachonkai, jülüjüsü maʼin taaʼin nünüiki». Sünainjee tia, nüküjüin chi süchonkai sümüin tü suluʼukat naaʼin.

15. ¿Kasa jülüjüinjatka naaʼin na kachonshiikana süchiki tü ashaittaakat?

¹⁵ Choʼujaasü namüin na tepichikana «kaʼi süpüla asirajaa [...] otta kaʼi süpüla wonnataa», tia shia kaʼi süpüla ashaittaa (Eclesiastés 3:1, 4, NM; Zacarías 8:5). Anasü maʼin nashaittüle na tepichikana nümaa nashi jee nei. Wainma tepichi nnojoliika ashaittüin, anajüshii neʼe telewisoot. Mayaapejeʼe eein kasa anasü ojuʼitaka suluʼu, eesü waneeirua amojujaka nakuwaʼipa otta nnojoishii aashajaajiraain naya sümaa napüshi sutuma. Makalaka jükatalüinjanain kaʼi süpüla jüshaittüin namaa jüchonnii. Eeshii süpüla jiiʼirajüin namaa, jümaain naya juwaraijaapa namaa jaʼaleewainyuu jee jiʼraajirüin naya wanee mma naatajatü. Jaainjüle tia, aashajaajiraajeena jia namaa jüchonnii.

16. ¿Kasa nekirajüinjanaka anain nachonnii na wayuukana? ¿Jamüinjatü sukuwaʼipa natuma?

¹⁶ Pikiraja naya. Müshi Jeʼwaa: «Pikiraja na püchonniikana sünain [pütchikat tüü]». Süpülapünaa pütchikat tüü, aküjünüsü kasain nekirajüinjatüin otta jamüinjatüin sukuwaʼipa natuma. Palajana, «alinjachi püpüla Jeʼwaa süka süpüshuaʼa paaʼin, süka süpüshuaʼa pukuwaʼipa otta süka süpüshuaʼa pütchin» (Deuteronomio 6:5, NM). Süchikijee, «pütchikat tüü, [...] pikirajüinjana na püchonniikana sünain». Nekirajüinjana nachonnii na wayuukana süpüla alinjachin Jeʼwaa napüla süka süpüshuaʼa naaʼin otta kojutüinjatüin namüin tü nuluwataakalü anain (puʼwanaajireʼera sümaa Hebreokana 8:10). Piiteʼerüinjatü kojuyatua tü pikirajakalü anain püchonnii. Süpüla eeinjatüin nanain tü akuwaʼipaa anakat nümüin Jeʼwaa, paashajaainjana amaa waneepia nüchiki. Süpüla tia, pükatala kaʼi süpüla pikirajüin naya waneepia sünain tü Wiwüliakat.

17. ¿Kasa neʼitaainjatka na wayuukana suluʼu naaʼin nachonnii? ¿Jamüsü naaʼinrajatka shia?

¹⁷ Wainma wayuu kapüleeka amüin neʼitaain suluʼu naaʼin na nachonniikana tü shiimainkat nüchiki Maleiwa. Müshi Pedro: ‹Shia anaka keeʼireere jaaʼin tü pütchi shiimüinkat, maa aka naaʼin wane joʼuu sünain keeʼireein naaʼin süchira nii› (1 Pedro 2:2). Tü pütchikat ‹keeʼireeinjatü jaaʼin›, shiiʼiyatüin wainmain wayuu nnojotka suluʼutüjülüin saaʼin shikirajaweein nüchiki Maleiwa. Nachajaainjatü na wayuukana sukuwaʼipa süpüla neʼitaain suluʼu naaʼin nachonnii nekirajaweeinjanain nüchiki Maleiwa.

18. ¿Jarat tü nikirajia Jesuu nashatajatkat na wayuukana nekirajapa nachonnii?

¹⁸ Antüshi Jesuu suluʼumüin naaʼin na wayuukana sutuma naashajaain namaa süka tü kasa eʼnnaajünakat (Marcos 13:34; Lucas 10:29-37). Tia, anasü maʼin süpüla nashatüin na wayuukana wanaa sümaa nekirajüin nachonnii. Pikiraja naya sünain tü pütchi nümakat Jeʼwaa süka tü aküjalaa kamalainkat namüin maʼaka saaʼin tü suluʼukat tü karalouktakat Aküjalaa suluʼujeejatü tü Wiwüliakat.a Maa chakai putuma püchonnii suluʼu tü aküjalaa püküjakat namüin otta püma namüin naainjai shiyaakua. Wanee kasa naainjaka Jesuu shia nüsakirüin na nikirajüinkana (Mateo 17:24-27). Püshata tia nikirajiakat Jesuu soʼu tü Ai puʼwaajakalü oʼu Maleiwa sümaa püpüshi. Nnojo püküjüin neʼe namüin tü nuluwataakalü anain Maleiwa, püsakira naya: ¿Jamüshii nuluwataaka waya Jeʼwaa sünain tia? ¿Kaseerü alataka wamüin woonoole sümaa? ¿Kaseerü alataka wamüin nnojorüle woonooin sümaa? Püsakirüle naya sünain tia, nayaawateerü aaʼu anain tü nuluwataakalü anain Maleiwa otta aneerü nakuwaʼipa sutuma (Deuteronomio 10:13).

19. Naainjüle na wayuukana tü sümakat tü Wiwüliakat, ¿jameerü nakuwaʼipa na nachonniikana?

¹⁹ Anale wakuwaʼipa, aleewale waya namaa wachonnii, waashajaale namaa otta wekirajüle naya, aneerü nakuwaʼipa nümaa Jeʼwaa joʼuuiwaʼaya naya otta talateerü naaʼin sünain anoujaa. Naainjeerü maʼin tü nanoujakalü anain, jaʼitairü apüleeruaanüin otta ooʼulakünüin naaʼin. Wakaaliinja naya waneepia süpüla kojutüin namüin nakuwaʼipa nümaa Maleiwa (Proverbios 27:11).

WACHIAJAA NA WACHONNIIKANA

20. ¿Kasa wayuu tü achiajawaakat? ¿Kasa naaʼinrajatka na wayuukana nachiajaale nachonnii?

²⁰ Tü achiajawaakat, shia nekirajünüle na tepichikana süpüla sunouktaain tü suluʼukat nekii otta naaʼin. Naainjüinjatü tia waneepia na kachonshiikana. Naashin Pablo, ‹anashii nekirajüle naya sünain tü nuluwataakat anain Maleiwa jee nachiajaainjana naya› (Éfeso 6:4). Nachiajaainjana sümaa neeʼiyatüin alin naya napüla maʼaka naainjüin shia Jeʼwaa (Hebreokana 12:4-11). Müle shia natuma, naküjeerü namüin jamüin mojuka tü naainjakat. Sutuma tia, müsü pütchi wamüin: «Paainja tü münakat pümüin püchiajaanüle» (Proverbios 8:33, NM). ¿Jamüinjatü nachiajaaya na tepichikana?

21. ¿Jarat tü pütchi jülüjüinjatka naaʼin na kachonshiikana wanaa sümaa nachiajaain nachonnii?

²¹ Naashin waneeinnua wayuu, aʼülüjüinjana namüin nachonnii, airuʼuluinjatü nanüiki otta neimmolojuinjana wanaa sümaa nachiajaain naya. Müshi Pablo süchiki tia: «Jia kachoinshiikana, anakaja müleka juluwataale na jüchooinkana süka anakat akuaippa suulia jashichijüin naya jümüin» (Éfeso 6:4). Müsü pütchi namüin na anoujüshiikana: ‹Anakaja kamaneere jia sümüin wayuu jee jimeʼejüle naaʼin eekai nayouktüin tü jümakat sümaa anamiain jia namüin› (2 Timoteo 2:24-26). Icheinjana na kachonshiikana süchiirua tü nanüikikat, akatsaʼa jülüjüinjatüin naaʼin tü nümakat Pablo nachiajaale nachonnii. Eesü choʼujaale naʼyaatünüin na tepichikana süka nnojoluin jaa namüin naashajaanüle neʼe amaa (Proverbios 22:15).

22. ¿Kasa natüjaainjatka aaʼu na tepichikana nachiajaanüle?

²² Naatawaisü nakuwaʼipa na tepichikana, makalaka naatawalinjatüin nachiajaaya. Eeshii na manouktaainkana akuwaʼipa «süka pütchi neʼe». Naʼyaatünüle jee süpülajünüle kasa noulia, eesü süpüla katüin noʼu sünainjee (Proverbios 17:10; 23:13, 14; 29:19, NM). Akanasaʼa na tepichikana natüjaainjatü aaʼu jamüin naʼyaatünaka jee süpülajünaka kasa noulia. «Kekiishi maʼin wanee wayuu nüchiajaanüle» (Proverbios 29:15, NM; Job 6:24). Achiajaanüinjana naya wanaapünaa sümaa tü naaʼinrakat. Müshi Jeʼwaa sümüin tü nupueulosekat: ‹Tachiajaajeena jia wanaapünaa sümaa tü jaaʼinrakat› (Jeremías 46:282, NM). Mojusü saashin tü Wiwüliakat ouktapünaale watuma na tepichikana süka eein süpüla iruwanaijüin otta eʼikaajüin nata (Proverbios 16:32).

23. ¿Kasa nayaawatüinjatka aaʼu na tepichikana nachiajaanüle?

²³ Wanaa sümaa nüchiajaain Jeʼwaa tü nupueulosekat, müshi nia: ‹Nnojo mmoluin jia [...] süka eein taya jümaa› (Jeremías 46:281, NM). Wanaa sümaa nachiajaanüin na tepichikana, nnojotsü antajatüin suluʼumüin naaʼin maalin naya apülaa (Colosas 3:21). Tü nayaawatüinjatkalü aaʼu shia ‹eein chi nashikai namaa›.

WAAʼINMAJA WACHONNII

24, 25. ¿Kasa aaʼinmajünüinjanaka oulia maaʼulu na tepichikana?

²⁴ Wainma wayuu miyoʼuyuu sotoka aaʼin talatüin maʼin naaʼin tepichiiwaʼaya naya. Anasü naaʼin sutuma naaʼinmajünüin nutuma chi nashikai jee tü neikat, jaʼitairü alatüin kasa eeka eein. Meesü sukuwaʼipa nachonnii na wayuukana, akatsaʼa kapüleein aaʼinmajaa na tepichikana maaʼulu sutuma wainmain tü kasa mojusü aainjünakat.

²⁵ Wanee kasa mojusü aainjünaka maʼin maaʼulu shia nataüjaanüin na tepichikana. Aainjünüsü maʼin tia chaa Malaysia soʼutpünaa tü 10 juya alatüitpakat. Eeshii maʼaka 300.000 tepichi ataüjaanaka juyawai Alemania otta 9.000.000 América. Mojusü maʼin tü aainjünakat namüin na tepichikana. Ataüjaanüshii maʼin naya nepialuʼu natuma na neʼraajüinkana otta na ekakana neitainruʼu. Naaʼinmajüinjana nachonnii na wayuukana. ¿Kasa naaʼinrajatka süpüla naaʼinmajüin naya?

26. ¿Kasa naaʼinrajatka na wayuukana süpüla naaʼinmajüin nachonnii? ¿Jamüshii saaʼinmajaka naya tü natüjaakalü aaʼu?

²⁶ Jooshii maʼin na tepichi nnojoliikana atüjaain saaʼu kasain wayuu tü aainjirawaakalü akuwaʼipaa. Makalaka choʼujaain süküjünüin namüin joʼuuiwaʼaya naya kasain wayuu tia. Müle shia, saaʼinmajeena naya ‹suulia mojuin nakuwaʼipa otta nuulia chi wayuu aashajaakai süchiki kasa mojusü› (Proverbios 2:10-12, NM). ¿Kasa tü natüjaainjatkalü aaʼu? Shia tü pütchi suluʼukat tü Wiwüliakat süchiki tü kasa anasükat jee tü mojusükat. Aküjünajatü namüin eein wayuu mojulaashii nnojoliinjanaka noonooin amaa müleka naainjireere naya kasa mojusü (puʼwanaajireʼera sümaa Daniel 1:4, 8; 3:16-18). Aküjünajatü namüin kojuyatua süka eein tepichi choʼujaaka amüin tia süpüla sotuinjatüin naaʼin. Miyoʼuyuupa na jieyuukana, niyaawatüinjatü chi nashikai choʼujaain namüin namüiwaʼainjanain naya. Otta müsia tü neikat, saainjüinjatü tia miyoʼuyuupa na süchonnii tooloyuukana. Müle shia natuma, nakaaliinjeena na nachonniikana süpüla nayaawatüin saaʼu tü kasa mojusükat otta tü kasa anasükat. Süpüla nnojoluinjanain nataüjaanüin na tepichikana, jülüjüinjana maʼin naya naaʼin nashi jee nei.

WACHUNTA KAALIINWAA NÜMÜIN MALEIWA

27, 28. ¿Jarai chi anakai süpüla akaaliinjaa na wayuukana sünain epijaa nachonnii?

²⁷ Kapüleesü maʼin ekirajaa na tepichikana joʼuuiwaʼaya naya, akanasaʼa na anoujüshiikana, nnojotsü naainjüin shia namüiwaʼa. Sümaiwa paala, ipuotsü nuʼwayuuse Manóah, nuchuntaka kaaliinwaa nümüin Jeʼwaa süpüla anainjatüin nutuma nipijia chi nüchonkai. Nükaaliinjünaka nutuma Jeʼwaa (Jueces 13:8, 12, 24).

²⁸ Müsia maaʼulu, eeshii süpüla nachuntüin nümüin Jeʼwaa na anoujüshiikana süpüla anainjatüin natuma shipijia nachonnii. Kapüleesü epijaa tepichi otta anale nepijia, wainma tü kasa anasü eekat sünainjee. Müshii wanee anoujüshii chejeʼewalii Hawai namüin na kachonshiikana: «Eesü 12 juya süpüla anain jutuma nepijia jüchonnii süpülapünaa süntüin tü kaʼi kapüleekat maʼin. Tia, shia jimaʼaliipa otta majayünnüüpa naya. Joonoole waneepia sümaa tü pütchi suluʼukat tü Wiwüliakat, talateerü otta jimateerü jaaʼin naneekapa süka naaʼin namüiwaʼa naʼyataain nümüin Jeʼwaa» (Proverbios 23:15, 16). Naneekapa tia na jüchonniikana, meerü jünüiki sümaa talatüin jaaʼin maʼaka naaʼin chi eeʼirajüikai nümüin Maleiwa: «Nüpatse wamüin Jeʼwaa na wachonniikana».