Nnojoishii nasapainkain

¿SOTUSHII paaʼin na apünüinshiikana jimaʼalii? Nia Sadrac, Mesac otta Abednego, na naʼaleewainkana Daniel. Nnojoishii naya eküin tü nikakat chi aluwataaikai. Piirakaa namüin suluʼu tü ayaakuaakat, ¿jamüshii nnojoliika nasapainkain naya maʼaka naaʼin na waneeinua? Wekirajaa sünain tia.

¿Sotusü paaʼin tü poloosükat pütchi nüshajalaka Jeʼwaa? Tü palajatkat shia: ‹Nnojoluinjana jia aʼwaajüin tü maleiwayaasükat›. Oonooshii na jimaʼaliikana sümüin pütchikat tia sümaa kapüleein namüin shia.

Neenajirüin Nabucodonosor wainma wayuu süpüla naʼwaajüin tü ayaakuaa nukumajakat. Nümaka namüin: ‹Jaapapa shiiʼira tü suʼwakat paaʼa, tü arpakat otta waneeirua, jüsapainka jia sünain juʼwaajüin tü ayaakuaa aainjuushikat süka ooro. Na nnojoliikana nasapainkain ojutuneena saʼaka siki›.

Jashichishi maʼin Nabucodonosor naapapa nnojoluin nüsapainkain Sadrac, Mesac otta Abednego, nüsaajitka naya. Naluwataaka naya nachikuaʼa süpüla nasapainkain. Neʼitaain naaʼin na jimaʼaliikana nünain Jeʼwaa, namaka: ‹Nükaaliinjeena waya chi Maleiwa waʼyataakai amüin. Nnojorüle naainjüin shia, ayatüinjatü nnojoluin waʼwaajüin tü ayaakuaakat›.

Jashichireeshia maʼin Nabucodonosor sutuma tü nanüikikat. Nümaka: ‹¡Jaʼi maʼin jutuma tü sikikat!› Nuluwataaka na wayuu katchinkana maʼin süpüla nejittaain Sadrac, Mesac otta Abednego. Nojutaka naya saʼaka tü sikikat. Süka jaʼin maʼin shia ouktushii na wayuu katchinkana maʼin sutuma tü suchuwalakat. ¿Kasa alataka namüin na jimaʼaliikana?

Niirakaaka chi aluwataaikai sümüin tü sikikat, nüinkuuka aaʼin, nümaka: ‹Müshii wejittaakai otta wojutakai apünüinshii wayuu saʼaka tü sikikat›.

Namaka na nüchepchiakana: ‹Aa, shia waainjaka tia›.

Nümaka: ‹Teʼrüin pienchishii wayuu waraittüshii saʼaka tü sikikat, nnojoishii kapüin otta jamajüin sutuma. Eeshi wanee müshi aka naaʼin wanee maleiwa›. Nürütkaaka chi aluwataaikai sümaa nuʼwaatüin: ‹¡Sadrac! ¡Mesac! ¡Abednego! ¡Jujuʼita aʼyataashiikana nümüin chi Maleiwa Miyoʼushaatakai›.

Nojuʼitapa nnojoishii jamajüin sutuma tü sikikat. Nümaka Nabucodonosor: ‹¡Anashi nuʼwaajünüle chi Nümaleiwasekai Sadrac, Mesac otta Abednego! Nuluwataain wanee aapiee süpüla nükaaliinjüin naya süka nnojoluin nasapainkain otta naʼwaajüin wanee maleiwa naata›.

Tia shikirajüin waya, woonooinjanain waneepia nümüin Jeʼwaa.