SUSOUKTAKA EʼIPAJEE TÜ WIWÜLIAKAT
¿Eeshiiche süpüla sükaaliinjüin waya tü aapieekalüirua?
Akaaliinjünüshi Daniel nümaiwa nutuma wanee aapiee. Müsia maaʼulu, akaaliinjünüshii na wayuukana sutuma tü aapieekalüirua süpüla nekirajünüin sünain Wiwüliakat
Süpülapünaa nukumajüin Maleiwa tü wayuukalüirua, watta maʼin saalin aapiee nukumajaka (Job 38:4, 7). Aʼyataasüirua nümüin Maleiwa. Eeshii nakaaliinjüle jee naaʼinmajüle na wayuu kacheʼekana nümüin Maleiwa (Salmo 91:10, 11). Maaʼulu yaa, nakaaliinjüin na wayuukana süpüla süküjünüin pütchi namüin natuma na nikirajüinkana Jesuu. (Paashajeʼera Alateetkat Mapeena [Apocalipsis] 14:6, 7.)
¿Woʼuraajüinjanaka sümüin tü aapieekalüirua? Nnojo. Niainjachi neʼe Maleiwa waʼwaajaka nümüiwaʼa (Alateetkat Mapeena 19:10). Niʼitaain neʼe naya süpüla aʼyatawaa nümüin jee süpüla oonowaa nümaa. Niainjachi neʼe Maleiwa woʼuraajaka amüin sükajee nünülia Jesuu. (Paashajeʼera Salmo 103:20, 21 jee Mateo 26:53.)
¿Eesüche aapiee eekai mojulaain?
Nukumajüin Maleiwa tü aapieekalüirua süpüla naneeküin süka naaʼin namüiwaʼa tü anasükat jee tü mojusükat. Wainma tü eʼrakat wayumüin nümüin Maleiwa (2 Pedro 2:4). Eʼrüshi wayumüin palajana Satanaa; süchikijee, tü yolujaakalüirua. Ojutünüshi naya chejee iipünaajee yaa saaʼumüin tü Mmakat. (Paashajeʼera Alateetkat Mapeena 12:7-9.)
Soʼujee juyaka 1914, awainmalaasü maʼin mojulawaa jee atkawaa. Shiiʼiyatüin wamüin tia sünain sülüʼülüin maʼin süpüla najaʼttinnüin Satanaa sümaa tü yolujaakalüirua. Süchikijee, paʼaraiiseerü tü Mmakat nutuma Maleiwa. (Paashajeʼera Alateetkat Mapeena 12:12 jee 21:3, 4.)