Suluʼushi nipia Jeʼwaa

PIIRAKAA nümüin Jesús, aashajaashi nia namaa na ekirajüliikana suluʼu tü aʼwaajüleekat chaaʼaya Jerusalén. 12 nuuyase Jesús.

Ponushi maʼin nia naaʼin na ekirajüliikana süka niʼraajüin maʼin Maleiwa otta tü ashajuushikat suluʼu tü Wiwüliakat. ¿Jamüshi nnojoika José otta María nümaa Jesús? ¿Jalashii naya? Wekirajaa sünain tia.

Antawaishi juyawai José sümaa nüpüshi Jerusalénmüin sünain tü miʼiraa kanüliakat Pascua. Kaʼyatüsü Jerusalén. Nnojotsü kemion otta türein. Nooʼuikashii napüshuaʼa na wayuukana, waraittüshii naya 3 kaʼi süpüla nantüin Jerusalénmüin.

Kojuya nüchonnii José otta kanainshii naaʼin na motsoyunnuukana. Soʼu wanee kaʼi aleʼejüshi José sümaa nüpüshi Nazaretmüin. Chayaashi Jesús naashin namaa na wanee wayuukana. Neemeraapa, nnojoishi nuusütüin anain, nachajaain nia naʼaka napüshi otta naʼaleewainyuu. Naleʼejaaka Jerusalénmüin süpüla nachajaain nüchiki.

Mapa nousütaka nünain. Naapajüin nanüiki na ekirajüliikana otta nüsakiijüin naya. Ponushi saaʼin tü wayuukalüirua süka kekiin maʼin nia. Sümaka María: ‹Tachonchee, ¿jamüsü paainjaka tia? Wachajaain püchiki sünain shapaain maʼin waaʼin›.

Nümaka Jesús: ‹¿Jamüshii jüchajaaka tachiki? ¿Nnojotsü jütüjaain saaʼu yaainjachin taya suluʼu nipia chi Tashikai?›

Nücheküin Jesús suluʼuin nia tü aʼwaajüleekat süpüla nikirajaain nünain Maleiwa. Oʼunushi nia semaanawai sünain tü outkajawaakat. Atüjüshi maʼin nia sünain tü Wiwüliakat süka kanain naaʼin tü aküjünakat. Müinjana waya maʼaka naaʼin Jesús.