¿Jamüsü nuuʼulaaka Maleiwa eein kasa mojusü otta müliaa?

1. ¿Jamakuwaʼipat tü kasa mojusükat?

Akumajaasü tü kasa mojusükat sutuma naʼalain Satanaa. Niapuʼushi wanee aapiee anamia jee lotopuʼusü nukuwaʼipa. Akaisaʼa nia, «niyouktüin tü shiimüinkat» (Juan 8:44). Aʼwaajüneeshi nia nuulia Maleiwa. Aküjüshi naʼalain sümüin Eva süpüla soonooin sümaa nünüiki nuulia Maleiwa. Wanaawashi Adán sümaa Eva. Sutuma tia, eesü müliaa jee ouktaa. Püleeja Génesis 3:1-6, 19.

Eʼrüijaashi wayumüin Satanaa nümüin Maleiwa süka nüküjüin naʼalain sümüin Eva. Niyouktüin Jeʼwaa süpüla aluwatawaa. Niaichipa ‹aluwataaka naaʼu› na wayuukana süka wanaawain naya nümaa otta süka nayouktüin nuluwataaya Maleiwa. Püleeja Juan 14:30 otta 1 Juan 5:19.

2. ¿Kamojulasü tü kasa nukumajakat Maleiwa?

Mamojulasat tü kasa nukumajakat Jeʼwaa. Nukumajüin na wayuukana jee na aapieekana süpüla noonooinjanain sümaa nünüiki (Deuteronomio 32:4, 5). Nukumajala waya süpüla waneeküin tü kasa wachekakat anale jee mojule shia. Sutuma tia, jaa müinjana waya nümüin süka alin nia wapüla. Püleeja Santiago 1:13-15 otta 1 Juan 5:3.

3. ¿Jamüsü nuuʼulaaka Maleiwa eein müliaa?

Najaʼttireerü Jeʼwaa tü müliaakat soʼu palitchon kaʼi. ¿Jamüsü nuuʼulaaka eein shia? Shia süpüla niiʼiyatüin isain nachiki na wayuukana naluwataain waaʼu (Eclesiastés 7:29; 8:9). Alatüirü 6.000 juya otta isasü nachiki na wayuukana najaʼttirüin tü kasa mojusükat, tü kaainjalaakat, tü atkawaakat otta tü ayuuliikat. Püleeja Jeremías 10:23 otta Roma 9:17, TNM.

Aneerü wakuwaʼipa wacheküle nuluwataaya Maleiwa (Isaías 48:17, 18). Najaʼttireerü naluwataaya na wayuukana soʼu palitchon kaʼi. Nayeena kepiaka suluʼu tü Mmakat na wayuu achekakana nuluwataaya Maleiwa (Isaías 11:9). Püleeja Daniel 2:44.

Pünaja tü videokot ¿Jamüsü nuuʼulaaka Maleiwa eein kasa mojusü otta müliaa?

4. ¿Kasa waaʼinrajatka süka kaʼatapalain Maleiwa?

Naashin Satanaa, aʼyataashii waya nümüin Maleiwa süka naapüin kasa anasü wamüin. Sutuma kaʼatapalain nia, eesü süpüla weeʼiyatüin süka tü wakuwaʼipakat alaain Satanaa otta wacheküin tü nuluwataayakat Maleiwa suulia naluwataaya na wayuukana. Püleeja Job 1:8-12 otta Proverbios 27:11.

5. ¿Kasa waaʼinrajatka süpüla nümaain waya Maleiwa?

Watüjaainjatü aaʼu tü kasa nüchekakat süpüla waʼwaajüin nia, suluʼuinjana waya tü iküleesia shiimainkat, tü ekirajakat tü sümakat tü Wiwüliakat (Juan 4:23). Wayoukteerü tü nuluwataayakat Satanaa nnojoliire sünainpünaain waya poliitika otta atkawaa maʼaka nnojolin sünainpünaain Jesuu. Püleeja Juan 17:14.

Naainjirüin Satanaa na wayuukana kasa yarüttüsü süka pülain nia. Nemeeʼerainpaleena jee eʼreena wayumüin wamüin na waʼaleewainkana otta na wapüshikana wayouktüle tia (1 Pedro 4:3, 4). Sülatüle tia wamüin, waaʼinra tü nümakat Jeʼwaa otta aleewa waya namaa na aikana apüla nia. Mayaa, weeʼiyateerü alawaain tü nümakat Satanaa, nnojoleenain jaa wamüin nümüin Maleiwa sülatüle kasa mojusü wamüin. Püleeja 1 Corinto 6:9, 10 otta 15:33, TNM.

Najaʼttireerü Maleiwa tü müliaakat otta tü kasa mojusükat süka alin waya nüpüla. Na anoujakana nünain Maleiwa, kepieena waneepia yaa saaʼu tü Mmakat. Püleeja Juan 3:16, TNM.