Weʼraaja jaralin kakumalain tü kasakalüirua

Talatüsü naaʼin Juan sutuma nütüjaain saaʼu tü nüntireetkat Jeʼwaa, shiajaʼa nnojoluin müin nunoujakai saaʼin sünain nüntireerüin shia. Nüküjaka Ramón wanee kasa süpüla niyaawatüin saaʼu jamüin nüntireetka Jeʼwaa tia. «Pütüjaa aaʼu nnojoluin eejaʼalaa sümüin wanee kasa süpaʼa mma», nümaka Ramón.

Nüküjüin Ramón saashajaain tü Wiwüliakat süchiki tia, naashajeʼeraka nümüin wetsiikulokot tüü:

• «Süpüla eeinjatüin wanee piichi, eeshi chi kakumalakai shia» (Hebreokana 3:4, TNM).

«Shiimainsaʼaya. Nnojotsü akumajaʼalaa müin wanee piichi sümüiwaʼa», nümaka Juan.

«Aanee, jamüsüjaʼa tü eküütkat, aʼlakajaanüsü shia, nnojotsü jaʼyuuin sümüiwaʼa», nümaka Ramón.

Nümaka Ramón nümüin Juan: «Süpüshuaʼa tü kasa weʼrakat anashantaleesia sukumajia suulia wanee piichi. Piirakaa sümüin tü süsiikat mojuui, anasü maʼin sünoʼu, müloʼu maʼin uuchikalüirua, müloʼu maʼin tü palaakat otta wainma maʼin tü kasa chakat iipünaa. Süpüla sukumajünüin wanee piichi, choʼujaashi eeinjachin chi akumajakai shia. Süpüla jaʼyuuinjatüin wanee eküülü, eeinjachi wanee aʼlakajaakai shia. Müsia neʼe tü kasakalüirua chakat iipünaa, eeshi chi Akumajakai shia».

Lotusü nümüin Juan tia pütchikat.

Nümaka Ramón: «Saashin tü Wiwüliakat, eeshi chi Kakumajalakai tü kasakalüirua. Otta pülashantashi nia. Maleiwa münüshi nia. Pülashi maluʼulu tü pütchikat Maleiwa. Maaʼutpünaa wainma sümaleiwase tü wayuukalüirua. Waneeshipajaʼa neʼe chi kakumalakai tü kasakalüirua, nia Jeʼwaa chi Maleiwa Pülashikai maʼin».

Kamalainsü maʼin nümüin Juan saashajaain tü Wiwüliakat süchiki süpüshuaʼa tü kasa nukumajakat Jeʼwaa. Anuu waneeirua wetsiikulo, naashajeʼeraka Ramón nümüin Juan:

• «Paala sümaiwa, nuʼttaiwaʼaya Maleiwakai sünain akumajaa kasa süpüshua chaa iipünaa ooʼulaka yaa mmoluʼu» (Génesis 1:1).

• «Anakajaʼa jütüjaale saaʼu niain Maleiwain Jeʼwaa. Nia kakumajalaka waya otta nia laülaaka waaʼu» (Salmo 100:3).

• «Tü sirumatuʼukat, süküja achikit tü paʼanasiainkat. Otta tü kasa chakalü iipünaa, süküja achiki tü kasa pukumajakat» (Salmo 19:1).

• «Chi akumajakai nüʼliikajia chaa sirumatuʼu, chi eʼitaakai shia saaʼu tü mma nukumalakat; chi ounejakai tü wüinkat shirokujee tü palaakat süpüla niʼitirüinjatüin shia saaʼumüin tü mmakat... Jeʼwaa nünülia» (Amós 9:6).

«Ichaalein, nia Jeʼwaa kakumalaka süpüshuaʼa tü kasakalüirua. ‹Nünain Maleiwakai, katoʼuchii waya, waraittüshii waya otta wayuushii waya›, müsü tü Wiwüliakat nüchiki Jeʼwaa (Aluwataaushikana 17:28). Nia aapaka kataa oʼuu sümüin kasa süpüshuaʼa. Niaʼaya Washikaʼaya. Müsü tü Wiwüliakat: «Waneeshia neʼe chi Washikai. Waneeshia neʼe chi Maleiwa akumajakai waya», nümaka Ramón (Malaquías 2:10).

«Müsüjaʼa. Müleka jülüjale waaʼin sukuwaʼipa tü kasakalüirua, shiimain nnojoluin eejaʼalaa sümüin. Eeshijaʼa chi Kakumalakai shia», nümaka Juan.

«Nüinküle nukumajüin süpüshuaʼa tü kasakalüirua, nikeraajeerü süpüshuaʼa tü pütchi nüküjakat suluʼu tü Wiwüliakat», sümaka María sümaa talatüin saaʼin.

Pansaasü nümüin Juan sümaa María tü pütchi aküjünakat namüin. Makalaka nekirajaweein sooʼomüin nüchiki chi Kakumalakai tü kasakalüirua.