Wekirajaainjatka anain sünain tü outkajawaakat Wakuwaʼipa otta Waʼyataain nümüin Maleiwa
Peʼureeroʼu 6-12
KOROLO KOJUTÜSÜ SULUʼUKA TÜ WIWÜLIAKAT ISAÍAS 47-51
«Wainma kasa anasü naapaka Jeʼwaa nümüin chi oonookai sümaa nünüiki»
(Isaías 48:17) Anuu nünüiki Jeʼwaa, chi ayaʼlajakai pia püchikuaʼa, chi Wuleshikai sünainjee Israel: «Tayakai Jeʼwaa, taya chi Pümaleiwasekai, Chi ekirajakai pia süpüla anainjatüin pukuwaʼipa, Chi oʼunirakai pia suluʼupünaa tü wopu anasükat.
ip-2-S süp. 131 püt. 18
Nikirajüin waya Jeʼwaa süpüla anain wakuwaʼipa
Joonoo sümaa tü taluwataakalü anain
18 Müsü nünüiki Isaías sutuma tü nütsüinkat Maleiwa: «Nuluwataain taya chi Senyotkai Jeʼwaa sükajee tü nütsüinkat. Anuu nünüiki Jeʼwaa, chi ayaʼlajakai pia püchikuaʼa, chi Wuleshikai sünainjee Israel: ‹Tayakai Jeʼwaa, taya chi Pümaleiwasekai, Chi ekirajakai pia süpüla anainjatüin pukuwaʼipa, Chi oʼunirakai pia suluʼupünaa tü wopu anasükat›» (Isaías 48:162, 17, TNM). Sutuma müin nünüiki Jeʼwaa namüin na israeliitakana, shiimainjatü namüin taashinjanain naya nutuma Jeʼwaa, süka Niyaʼlajüin naya nachikuaʼa (Isaías 54:5), otta keeʼireesü naaʼin anajiraain naya nachikuaʼa nümaa jee noonooin sümaa tü nuluwataakalü anain. Shiimainre waʼwaajüin Jeʼwaa oonoweena waya sümaa tü nuluwataakalü anain. Nnojoleerü nayaawatüin aaʼu na israeliitakana tü nakuwaʼipainjatkat, nnojoliire noʼuninnüin «suluʼupünaa tü wopu anasükat».
(Isaías 48:18) Poonoole sümaa tü taluwataakalü anain, jimateerü paaʼin maʼaka saaʼin wanee süchi otta loteerü pukuwaʼipa maʼaka saaʼin sümüna tü palaakat.
ip-2-S süp. 131 püt. 19
Nikirajüin waya Jeʼwaa süpüla anain wakuwaʼipa
19 Nüküjüin Jeʼwaa shiain nücheküin anain nakuwaʼipa na israeliitakana otta nnojoluin nachajaain mojuin nakuwaʼipa, müshi nia: «Poonoole sümaa tü taluwataakalü anain, jimateerü paaʼin maʼaka saaʼin wanee süchi otta loteerü pukuwaʼipa maʼaka saaʼin sümüna tü palaakat» (Isaías 48:18, TNM). ¡Shiimainshaata maʼin tü nuluwataakalü anain chi Kakumalakai waya! (Deuteronomio 5:29; Salmo 81:13). Suulialeʼeya püreesain na israeliitakana atumawaa, eesüjaʼa süpüla jimatüin naaʼin maʼaka saaʼin wanee süchi (Salmo 119:165). Otta eesü süpüla lotuin sukuwaʼipa tü kasa naaʼinrakat maʼaka saaʼin sümüna tü palaakat (Amós 5:24). Süka jülüjain naya naaʼin Jeʼwaa, nüküjüin namüin tü nakuwaʼipainjatkat, otta oonooinjana sümaa tü nuluwataakalü anain. ¡Anasüjeʼe nümüin Jeʼwaa noonooin sümaa nünüiki!
(Isaías 48:19) Watteena naalii püchonnii maʼaka saaʼin tü jasaikat, otta meena aka saaʼin soʼu jasai na puuʼuliwoʼukana. Eʼraajüneena maʼin otta nnojoleerü tooʼulaain noʼutünüin aaʼin».
ip-2-S süp. 132 püt. 20, 21
Nikirajüin waya Jeʼwaa süpüla anain wakuwaʼipa
20 ¿Kasajeʼe naapaka Jeʼwaa namüin na israeliitakana nayaawajaale suulia naainjala? Anuu nünüiki Jeʼwaa: «Watteena naalii püchonnii maʼaka saaʼin tü jasaikat, otta meena aka saaʼin soʼu jasai na puuʼuliwoʼukana. Nnojoleerü asünneʼennüin nanülia otta nnojoleerü tooʼulaain noʼutünüin aaʼin» (Isaías 48:19, TNM). Nüsoʼirüin naaʼin Maleiwa na israeliitakana sünain tü Nüküjakat paala nümüin Abraham, wattainjatüin saalii nuuʼuliwoʼu maʼaka «tü shüliwalakalüirua chakat iipünaa je tü jasai sotpünaakat palaa» (Génesis 22:17,16; 32:12). Nnojoliipejeʼe jaa müin na nuuʼuliwoʼukana Abraham, nnojotkalaka neʼrüin shikeraajia tia pütchikat. Mojusü maʼin tü kasa naaʼinrakat, müshiijeseʼe süsünneʼennüin nanülia noulia maʼaka nüküjüin shia Jeʼwaa (Deuteronomio 28:45). Nnojotpejeʼe nücheküin najaʼttinnüin otta nnojoishii nüpütüin naya namüiwaʼa.
21 Napülajatü na anoujashiikana nünain Jeʼwaa maaʼulu yaa tü pütchi wekirajaaitpakalü anain. Nütüjaa aaʼu Jeʼwaa tü waaʼinrajatkat süka niain Katüin atuma woʼu (Salmo 36:9). Tü kasa nuluwataakalü anain waya, süpülajatü anain wakuwaʼipa, nnojotsü süpülajatüin mojuin wakuwaʼipa. Sutuma tia, na anoujashii shiimainshiikana, nooʼulaain niain Jeʼwaa oʼunirüin nakuwaʼipa (Miqueas 4:2). Naaʼinmajüin wanoula sükajee tü nuluwataakalü anain otta anajiraashii waya nümaa jee naaʼinmajüin waya nuulia Satanaa. Wayaawatüle saaʼu tü nuluwataakalü anain Jeʼwaa, watüjaajeerü aaʼu nikirajüin waya süpüla anain wakuwaʼipa otta nnojoishii «nuluwataain waya sünain kasa kapüleesü» (1 Juan 2:17; 1 Juan 5:3, TNM).
Püchajaa süchiki kaaʼürüi suluʼu tü Wiwüliakat
(Isaías 49:6) Nümakalaka tamüin: «Alanaʼaleesia piʼyataain, nnojotsü shiain neʼe taneeküin apüla pia pütameʼerüin na nuuʼuliwoʼukana Jacob otta püntirüin nachikuaʼa na oʼtteʼennakana saʼakajee Israel; taneeküin pia süpüla müinjachin aka saaʼin luusa sümüin wayuu süpüshuaʼa, suʼttaajeetka wayuu maʼleekalia».
w07-S 15/1 süp. 9 püt. 8
Pütchi anaka maʼin sünainjee tü karalouktakat Isaías (shiʼipa 2)
Susouktaka eʼipajee tü Wiwüliakat:
49:6. Müshi «aka saaʼin luusa sümüin wayuu süpüshuaʼa». ¿Jamüshi nümünaka chi Mesiiakai sümaa nüküjüin neʼe pütchi namüin na israeliitakana? Aküjünüsü tia sükajee tü naaʼinrakat na nikirajüinkana süchikijee ouktüin nia. Ekeraajüsü tü sümakat Isaías 49:6 nanain na nikirajüinkana Jesuu (Aluwataaushikana 13:46, 47). Maaʼulu yaa, müshii «aka saaʼin luusa» na wawalayuu chainjanakana iipünaa namaa na kepiainjanakana saaʼu tü maakat süka naküjüin pütchi süpüla suʼttaainjatüin «wayuu maʼleekalia» (Mateo 24:14; 28:19, 20).
(Isaías 50:1) Anuu nünüiki Jeʼwaa: «¿Jalasü sükaraloukse jii sümaajatka ooʼulaajirawaa, tü tajünajaakat yaajee? ¿Jarai chi toikkakai amüin jia naʼakajee na ayaʼlajüliikana? ¡Kaatei! Oikkünüshii sükajee mojulaain jia, otta ajünajaanüsü tü jiikat saaʼujee jaainjala.
it-1-S süp. 715 püt. 5, 6
Ooʼulaajirawaa
Shiyaawase ooʼulaajirawaa. Eesü shiyaawasere wanee kasa tü kaʼwayuuseekat saashin tü Wiwüliakat (Isa 54:1, 5, 6; 62:1-6). Akaʼaya neʼe tü ooʼulaajirawaakat otta nüjünajaale nuʼwayuuse wanee wayuu, eesü shiyaawasere shia wanee kasa suluʼu tü Wiwüliakat (Jer 3:8).
Ajaʼttinnüsü Judá sümaa Jerusalén soʼu 607 Sü.W., otta püreesashii na israeliitakana chaa Babilonia. Nüküjatüjülia Jeʼwaa paala püreesainjanain na judíokana, müshi nia: «¿Jalasü sükaraloukse jii sümaajatka ooʼulaajirawaa, tü tajünajaakat yaajee?» (Isa 50:1, TNM). Israel tü makalü aka saaʼin nei na israeliitakana, ajünajaanüsü nutuma Jeʼwaa süka nnojoluin noonooin na israeliitakana sümaa tü pütchi naapakat Jeʼwaa nümüin Moisés, nnojotsü sutumasirüin nuuʼulaweein Jeʼwaa Israel otta motuin naaʼin tü nünüikikat paala. Eepejeʼe waneeirua israeliita ayaawajaaka suulia naainjala, oʼuraajüshii nümüin Jeʼwaa süpüla nücheküin naya nachikuaʼa otta niiteʼerüin naya noumainpaʼamüin. Niiteʼerüin naya Jeʼwaa noumainpaʼamüin soʼu juyakat 537 Sü.W., sülatapa 70 juya süchikijee sajaʼttinnüin Jerusalén. Naainjain tia Jeʼwaa süpüla kojutüin nünülia (Sl 137:1-9; paashajeʼera KAʼWAYUUSEE).
Wetsiikulo aashajeʼennajatka
(Isaías 51:12-23) «Tayakai... taya Chi atütüleʼerakai jaaʼin. »¿Jamüshi mmoluinjachika pia seema wayuu sümaa ouktajatüin shia maʼaka [juluin] tü mojuuikat? 13 ¿Jamüshi motuinjachika paaʼin Jeʼwaa chi Kakumalakai pia, Chi eʼitaakai tü sirumakat sümaa tü mmakat? ¿Jamüshi mmoluinjachika pia waneepia sutuma jashichin chi outkajakai pia shiiʼiree nuʼuteein paaʼin? ¿Jalashi joo chi outkajakai pia sümaa jashiee? 14 »Ajütüneechi achiki chi jepütakai sutuma kaleenaluʼuin nia, suulia ouktüin nia otta eejeerü niküin waneepia. 15 »Aluʼusaʼa tayakai Jeʼwaa, taya Pümaleiwasekai, chi jashichikai atuma tü palaakat süpüla koʼlotüin tü sümünakat. Chi kanüliakai Jeʼwaa chi wainmakai asurulaatse. 16 Shieerü paashajaaka tü tanüikikat, tounjuleechi pia süka seemiouse tajapü, süpüla teʼitaain tü sirumatuʼukat otta taikkaleʼerüin tü mmakat jee meechi taya sümüin Sión: ‹Pia tapueuloseka›. 17 »Püchijiraa, püchijiraa, pütamaa Jerusalén, alatüsü kasa mojusü pümüin süka jashichin Jeʼwaa putuma. Müsü aka püsakai saaʼin süpüshuaʼa tü sulujutkat tü iita asajiakat. 18 Nnojoishi eein wanee süchon eekai oʼunirüin shia, otta nnojotsü najattüin shia wanee süchon eekai shipijalain. 19 Alatüsü pümüin tia piamasükat kasa. ¿Jaraleechi amülialaaka paaliin? ¡Ashutüna aaʼulu neʼe pia, müliasü pia atumaa, müliasü pia sutuma jamü otta atkaana amaalü pia! ¿Jaraleechi amüliajaka paaʼin? 20 Oukchichajaashii na püchonniikana. Palasütüshii kaayeruʼu maʼaka saaʼin anneerü wünaʼapajatü ataʼünnaka, alatüsü tia namüin sutuma jashichin Jeʼwaa namüin, naʼayajaain naaʼin Maleiwa.» 21 Paapajataa tüü, pia jierü mojukalü aaʼin, pia epetkat, mayaapejeʼe nnojoluin püsüin wiino. 22 Anuu nünüiki chi Senyotkai Jeʼwaa, chi Maleiwa atkaakai saaʼujee nupueulose: «¡Kaatei! Tasünneʼereerü puulia tü jashieekat tü makalü aka saaʼin iita asajia. Nnojoleerü müin püsakai aaʼin tü suluʼukat. 23 Otta talatireerü tü jashieekat nooʼomüin na mojulaakana pümüin, sümaa namüin pümüin: ‹Püʼwachiraa mmoluʼu süpüla walatüin›, nalatawaika sooʼopünaa püsapü maʼaka saaʼin sooʼopünaa mma, müsü saaʼin kaaye pia natuma».
Peʼureeroʼu 13-19
KOROLO KOJUTÜSÜ SULUʼUKA TÜ WIWÜLIAKAT ISAÍAS 52-57
«Müliashi Kürisüto paala waaʼujee»
(Isaías 53:3-5) Ayouktünüshi nia otta nnojoishi jamajachin namüin na wayuukana, wayuu eʼitaanüshi süpüla niʼrüin müliaa otta nütüjaa aaʼu sukuwaʼipa ayuulii. Müsü nuunjulakai saaʼin nuʼupünaa woulia. Ayouktünüshi nia otta mojutsai nia wamüin. 4 Nülüʼüjüin tü ayuuliikat woulia otta nnojotsü alin wanee kasa wanain nutuma. Müshi aka niyüülajakai naaʼin Maleiwa, müshi niʼyaajakai naaʼin otta müliashi nia. 5 Asotünüshi nia saaʼujee tü waainjalakat; müliashi nia atumaa saaʼujee tü mojukat watuma. Müliashi nia süpüla jimatüin waaʼin, otta anashii waya saaʼujee eʼikaajüin nia.
w09-S 15/1 süp. 26 püt. 3-5
Asotünüshi saaʼu waainjala chi Aʼyataaikai nümüin Jeʼwaa
«Ayouktünüshi» otta «mojutsai nia» atumaa
3 (Paashajeʼera Isaías 53:3). Kapüleekajasaʼa nümüin Jesuu nüpütüin chi Nüshikai chaa iipünaa otta nüntüin yaamüin saaʼu tü Mmakat süpüla taashin waya nutuma suulia waainjala jee ouktaa (Filip. 2:5-8). Sutuma naapajiraain nikii Jesuu waaʼu, eesü süpüla motoleein naaʼin Jeʼwaa tü waainjalakat, tia nnojotpuʼusü alatüin sutuma suʼutüin aaʼin mürüt nümüin Jeʼwaa (Heb. 10:1-4). Müsüjeseʼe anainjatüin namüin na wayuukana nüntüin Jesuu mmapaʼamüin. Shia naaʼinrüinjatka tia na judíokana süka naʼatapüin nüntüin chi Mesíaskai (Juan 6:14). «Ayouktünüshi» nia natuma na judíokana, naashin Isaías «mojutsai nia» namüin. Anuu tü nüshajakat Juan: «Antüshi nia noumainpaʼamüin na nüpüshikana [...]. Otta mamaneesalii naya nuulia» (Juan 1:11). Müsü tü nüshajakat Pedro namüin na judíokana: «Chi Maleiwakai, [...] niʼitaain chi kanüliakai Jesús sünain nüchepchiain, süpüla kojutüinjachin sütüma wayuu [...], chi anii saapüinkain ekii juʼuluku nümüin Pilato. Wanaa sümaa nüjüteeyaainjeʼe achikü nia, [...] jüjütaa amaachi chi Maainjalasaikai, chi aaʼinrakai waneepia tü nüchekakat Maleiwa» (Aluw. 3:13, 14).
4 Nüküjatüjülia Isaías, nütüjaainjatüin aaʼu Jesuu «sukuwaʼipa ayuulii». Eeshi mapüsawaire Jesuu saashin tü Wiwüliakat, nnojotpejeʼe oʼotüin ayuulii nünain (Juan 4:6). ¿Jamaluʼulu nütüjaain saaʼu sukuwaʼipa ayuulii? Tia maluʼulu, niʼraajüin wayuu ayuuisü wanaa sümaa nüküjüin pütchi, wainma na aawalaakana nutuma süka nümülialaain naalii (Mar. 1:32-34). Ekeraajüsü nünain Jesuu pütchikat tüü: «Nülüʼüjüin tü ayuuliikat woulia otta nnojotsü alin wanee kasa wanain nutuma» (Isa. 53:41, TNM; Mat. 8:16, 17).
«Müshi niʼyaajakai naaʼin» Maleiwa
5 (Paashajeʼera Isaías 53:42). Wainma wayuu soʼu nükalia Jesuu nnojotka ayaawatüin saaʼu jamüin müliaka jee ouktaka nia. Eeshii na makana süsalain nia naainjala nutuma Maleiwa, müsü aka nüjütakai saaʼin Maleiwa wanee kasa nooʼomüin eekai keemain maʼin (Mat. 27:38-44). Naashin na judíokana aküjüshi naʼalain Jesuu nüchiki Maleiwa (Mar. 14:61-64; Juan 10:33). Nnojotpejeʼe kasain naainjalain Jesuu. Müliakajasaʼa maʼin naaʼin sutuma ouktajachin nia saaʼujee nüküjüin naʼalain nüchiki Maleiwa saashin wayuu, mayaapejeʼe alin maʼin chi Nüshikai nüpüla. Anashiipejeʼe nümüin naainjüin waneepia tü nümakat Jeʼwaa (Mat. 26:39).
(Isaías 53:7, 8). Alatitshi jaʼijawaa, otta nuuʼulaain müliain nia atumawaa; nnojotpejeʼe mojuin nünüiki. Amaanüshi nia maʼaka saaʼin wanee anneerü eekai süüjaanajatüin; otta yüütüshi nia maʼaka saaʼin wanee anneerü eekai süüjünüinjatüin. 8 Asünneʼennüshi nia süka süpülajünüin kasa nuulia otta süka süsalain nia wanee kasa; ¿jaraleechi kachipünaaka aaʼin na nuuʼuliwoʼukana? Oʼutüna aaʼinchi nia. Eʼikaajüshi nia saaʼujee saainjala tapueulose.
w09-S 15/1 süp. 27 püt. 10
Asotünüshi saaʼu waainjala chi Aʼyataaikai nümüin Jeʼwaa
«Amaanüshi nia maʼaka naaʼin wanee anneetchon eekai nüüjaanajachin»
10 (Paashajeʼera Isaías 53:7, 8). Müsü nünüiki Juan chi awoutisaajüikai nüchiki Jesuu: «jiirakaa, iseeichi chi wayuu aneekünakai nütüma Maleiwa süpüla nuʼutünajachin aaʼin süpüla nülaʼajaainjatüin saainjala wayuu süpüshua sainküin mmakat, maa akaapüʼü tü anneerü oʼutünapüʼükat aaʼin» (Juan 1:29). Sükajee «anneerü» nümüin Juan, eesüjaʼa shialejeʼe sotuin naaʼin tü nüküjakat Isaías, tü makat mayaa: «Amaanüshi nia maʼaka naaʼin wanee anneetchon eekai nüüjaanajachin» (Isa. 53:7, TNM; noota). Otta müsü sooʼomüin tü nüshajakat Isaías: «Aapajiraashi nia nikii süpüla ouktaa» (Isa. 53:12, TNM). Wanaa sümaa nikeraajüin Jesuu namaa na nikirajüinkana tü aainjünajatkat süpüla sotuinjachin nia naaʼin, soʼu aikat tia nülatirüin wanee iita kaluʼuka wiino namüin na nikirajüinkana sümaa nümüin namüin: «Asüüshikat tüü, müsü aka sukuaippa tü tasha amülainjatkat süpüla nikeraajüinjatüin chi Maleiwakai tü pütchi jeket pansaatüjütkalia nütüma je süpüla sülatinnajatüin saainjala wayuu süpüshua» (Mat. 26:28).
(Isaías 53:11, 12) Sükajee shapaain maʼin naaʼin, wainmeerü kasa niʼraka jee aneerü nukuwaʼipa. Sükajee atüjain maʼin chi aʼyataaikai tamüin, aneerü maʼin nakuwaʼipa na wayuu nümaajanakana; nieechika niakai nümüiwaʼa asouktaka saaʼu tü saainjalakat tü wayuukalüirua. 12 Sünainjee tia taapeerü nümüin wainma kasa naʼakajee na wayuukana, yaleechi nia naʼaka na aluwataaliikana atüjakai süpüla akataala wanee kasa, sünainjee kaainjalain na wayuukana niashi aapaka nikii süpüla oukta naaʼujee.
w09-S 15/1 süp. 28 püt. 13
Asotünüshi saaʼu waainjala chi Aʼyataaikai nümüin Jeʼwaa
«Anasü maʼin nakuwaʼipa na wayuukana nünainjee chi Aʼyataaikai nümüin Jeʼwaa»
13 (Paashajeʼera Isaías 53:11, 12). Nümakalaka Jeʼwaa nümüin chi Aʼyataaikai nüneekakai: «Aneerü maʼin nakuwaʼipa na wayuu nümaajanakana». ¿Jamaluʼulu tia pütchikat? Sajaʼttiamüin tü wetsiikulokot 12 aküjünüsü süchiki tia: «Sünainjee kaainjalain na wayuukana niashi aapaka nikii süpüla oukta naaʼujee». Kaainjalashii waya wapüshuaʼa sükajee nuuʼuliwoʼuin waya Adán, sükajee kaainjalain Adán, oʼttüsü wayuu ütamüinreʼeya sünain kaainjalaa. «Ouktakalaka naya saaliijee» aluʼusaʼa tü naapakat wamüin Jesuu shia katüinjatüin woʼu (Roma 5:12; 6:23). Müsüjeseʼe choʼujaain maʼin anajiraainjanain waya nümaa Jeʼwaa. Suluʼu Isaías kapiitulokat 53 aküjünüsü kasain naainjüin Jesuu wapüleerua. Müsü mayaa: «Asotünüshi nia saaʼujee tü waainjalakat; müliashi nia atumaa saaʼujee tü mojukat watuma. Müliashi nia süpüla jimatüin waaʼin, otta anashii waya saaʼujee eʼikaajüin nia» (Isa. 53:5, TNM).
Püchajaa süchiki kaaʼürüi suluʼu tü Wiwüliakat
(Isaías 54:1) «!Piakat jiet maralü nnojotkat kachoin puchunta sümaa talatüin paaʼin! Anasü maʼin talatüle paaʼin jee puʼwaataa sümaa talatüin pia, süka nnojoluin piʼrüin saalin kachonwaa, wainmaleesia süchon tü jiet apütünakat sümüiwaʼa suulia tü jiet kaʼwayuusekat, müsü nünüiki Jeʼwaa.
w06-S 15/3 süp. 11 püt. 2
Wanee «Drama» kojutükat wamüin
¿Kasa kayaawaseka Sara, «tü jiet anakalü akuwaʼipa» nümaa chi süchonkai Isaac? Naashin Pablo Sara shiyaawasesü tü «jiet maralü» makalü aka saaʼin nuʼwayuuse Maleiwa, tia sünainpünaasü tü Nuluwataaya Maleiwa chakat iipünaa. Jiet maralü münüsü süka nnojoluin «kachoin» shia saaʼu tü mmakat süpülapünaa nüntüin Jesuu (Galacia 4:27; Isaías 54:1-6). Akatsaʼa soʼu Pentecostés, juyaka 33 So.W., antüshi chi naaʼinkai Maleiwa naaʼu tooloyuu jee jieyuu, soʼu kaʼikat tia müshii jemeikai naaʼin nachikuaʼa süpüla süchoinjanain naya tü jiet chejeʼewatkat iipünaa. Na jekenakana süchonnii tü Nuluwataayakat Maleiwa, nayainnapa nüchonniikana Maleiwa jee na aluwataainjanakana nümaa Jesuu sükajee süpansaajünüin tü pütchi jeketkat (Roma 8:15-17). Sünainjee tia, anuu nünüiki Pablo: «Tü Jerusalén chejeʼewatkat iipünaa anaitpa sukuwaʼipa, shiaitpa tü weikat» (Galacia 4:26, TNM).
(Isaías 57:15) Anuu nünüiki chi miyoʼushikai chi anakai maʼin akuwaʼipa, chi eeinjachikai süpüla kaʼikat süpüshuaʼa, chi wulekai maʼin anülia: «Kepiashi taya iipünaa jee wulesü eere taya, jee kepiashi taya nümaa chi yüülakai aaʼin süpüla tatütüleʼerüin naaʼin otta nümaa chi nnojoikai yaletüin naaʼin süpüla anainjatüin nukuwaʼipa.
w05-S 15/10 süp. 26 püt. 3
Waʼyataa süchiirua nnojoluin yaletüin waaʼin
Chi anakai maʼin süpüla washatüin akuwaʼipa
3 Nnojotsü wayaawatüin saaʼu kasainjatüin weeʼiyatüin aka nujutü Jeʼwaa nümüin; mayaapejeʼe müin shia, «nünanajüin Jeʼwaa süpüshuaʼa tü mmakat süpüla nükaaliinjain süka nütchin na oonookana sümaa nünüiki süka süpüshuaʼa naaʼin» (2 Crónicas 16:9, TNM). ¿Kasa naainjaka Jeʼwaa süpüla nükaaliinjain na oonookana nümaa wanaa sümaa neʼrüin namüliala? Müshi ‹kepiakai› naaʼin Jeʼwaa namaa süpüla nütütüleʼerüin naaʼin chi yüülakai aaʼin jee anainjatüin nukuwaʼipa chi nnojoikai yaletüin naaʼin (Isaías 57:15, TNM). Sünainjee tia, na aʼyataaliikana nümüin Jeʼwaa katchinsü maʼin naaʼin jee talatüshi naya sünain aʼyatawaa nümüin. ¡Anamiakaiche maʼin Maleiwa!
Wetsiikulo aashajeʼennajatka
(Isaías 57:1-11) Nnojoliichipa eein chi lotokai akuwaʼipa, jee nnojotsü jaralin jülüjain aaʼin nukuwaʼipa. Otta na anamiakana ajaʼlajaashii naya sutuma tü ouktaakat, sümaa nnojoluin jaralüin ayaawatüin saaʼu niain ouktüin chi lotokai akuwaʼipa. 2 Jimatüitpa naaʼin, eemeraashii saaʼu tü natunkülekat, na lotokana akuwaʼipa. 3 «Jüntapa yaamüin, jiakana süchonniikana tü ashantanajütkat saaʼu wanee kasa, jiakana suuʼuliwoʼukana tü jiet amaʼüjiraakat sukuwaʼipa nümaa wanee nnojoikai suʼwayuusein jee suuʼuliwoʼukana jierü maaʼinsat: 4 ¿Jaraikai maʼin chi talatakai atuma jaaʼin? ¿Jaraikai maʼin chi jaashajaakai achiki sümaa wakatüin maʼin jaanükü sümaa nnojoluin jimatüin jutuma tü jieekat? ¿Nnojoishiikai süchonniin jia tü kaainjalaakat, suuʼuliwoʼuin jia tü alawaakat, 5 jiakana achuntakana amaʼüjirawaa akuwaʼipaa saʼakapünaa tü wunuʼulia miyoʼukat, suupünaa wanee wunuʼu küʼisü, sümaa juʼutüin naaʼin na jüchonniikana suluʼupünaa luwopu, suupünaa soʼu tü ipa miyoʼuyuukat? 6 »Shia pümüinjatka tü ipa siratüsü suluʼukat luwopu. Tiairua... shia tü anainjatka atuma pukuwaʼipa paaʼinruʼu. Piʼyotuin wanee kasa jemeta eejuut saaʼu. ¿Amülialaajeechiche taya paalii sutuma tia? 7 Saaʼu wanee uuchi piʼitaain tü putunkülekat. Jee oʼotoosü pia süpüla paapüinjatüin tü püsülajüinjatkat chayaa. 8 Süpüchoʼu soʼu tü miichikat, piʼitaain shiyaawase süpüla nnojoluinjatüin motuin shia paaʼin. Akayalaasü pia toulia, paakataka püsheʼin otta puʼunaka nanainmüin, punouktaka putunkia. Püpansaajaka wanee pütchi namaa. Amaʼüjiraasü pia namaa. Otta piʼrüin tü nanuʼusekat. 9 Puʼunaka eemüin Mélec sümaa seita, jee ayatüsia wainmain pümaʼana tü peejuuinjatkat. Püjütüin wattamüin na pünüikeʼejanakana, püntiraleʼeinya naya eemüin tü Seolkat. 10 Shapaasü paaʼin sutuma waraikuʼu pümüin. Nnojotsü müin pünüiki: ‹¡Amüla neʼe taʼatapajüin!›. Akatchinraasü paaʼin püchikuaʼa. Müsüjeseʼe nnojoluin ayuulin pia. 11 »¿Jaraikai chi keemakai pümüin jee jarai chi mmotkai eema pia, püküjaka atuma paʼalain? Nnojoipejeʼe tayain sotuin paaʼin. Nnojotsü kasain jülüjain paaʼin. ¿Nnojoishichejeʼe tayain ounjulajüin tü kasakalüirua puulia, sümaa koʼutüin taya? Nnojotpejeʼe mmoluyaain pia teema.
Peʼureeroʼu 20-26
KOROLO KOJUTÜSÜ SULUʼUKA TÜ WIWÜLIAKAT ISAÍAS 58-62
«Waküja süchiki tü juya eeinjatkalü oʼu anaa nutuma Jeʼwaa»
(Isaías 61:1, 2) Antüshi chi Naaʼinkai Maleiwa taaʼu, süka taneekünüin nutuma süpüla taküjüinjatüin süchiki anaa sümüin wayuu eekai müliain. Nuluwataain taya sünain amüliajaa na müliakana aaʼin, süpüla taapirüinjanain na püreesashiikana sünain taashinjanain naya, na moʼusaliikana sünain koʼuinjanain naya; 2 süpüla taküjüin süchiki tü juya eeinjatkalü oʼu anaa nutuma Maleiwa, jee sümaa tü kaʼi eere süsalainjanain naya naainjala nutuma; süpüla amüliajaa naaʼin na ouktakana apüshi.
ip-2-S süp. 322 püt. 4
Eesü lotoo akuwaʼipaa chaa Sión
«Tü juya eeinjatkalü oʼu anaa»
4 Müsü nünüiki Isaías: «Antüshi chi Naaʼinkai Maleiwa taaʼu, süka taneekünüin nutuma süpüla taküjüinjatüin süchiki anaa sümüin wayuu eekai müliain. Nuluwataain taya sünain amüliajaa na müliakana aaʼin, süpüla taapirüinjanain na püreesashiikana sünain taashinjanain naya, na moʼusaliikana sünain koʼuinjanain naya» (Isaías 61:1, TNM). ¿Jarai chi anakai süpüla nüküjüinjachin tü pütchi anasükat? Soʼu tia nia Isaías, sükajee nüshajüin tü pütchi anasükat namüin na püreesakana chayaa Babilonia. Ekeraajüsü maʼin tia pütchikat nünain Jesuu (Lucas 4:16-21). Nuluwataain Jeʼwaa Jesucristo süpüla nüküjüinjachin süchiki tü pütchi anasükat namüin na wayuu anamiakana, süpüla naainjüin tia naapüin nümüin chi naaʼinkai alatüsü tia wanaa sümaa nuwoutisaajünüin (Mateo 3:16, 17).
(Isaías 61:3, 4) Süpüla nüküjüin tü naaʼinrajatkat na mojukana aaʼin saalii Sión, süpüla napüna namüin wanee kuluulu nekiaalaja suulialeʼeya paliʼi, tü seita talatakalü atuma wayuu suulialeʼeya mojuu aaʼin, tü kuluulu anakat süpüla aʼwaajaa suulialeʼeya matchinwaa aaʼin; eʼraajüneena naya sutuma müin aka saaʼin wunuʼulia miyoʼuyuu lotoko akuwaʼipa, tü nüpünajüinkat Jeʼwaa, süpüla nuʼwaajünüin. 4 Nakumajüinjatü süchikuaʼa tü pueulo kakaliairükalü ajaʼttinnüin; nakumajeerü süchikuaʼa tü mma sümüiwaʼakat, jeketeerü natuma tü pueulokot nnojotkat kasain apütaain sünainjee, otta tü mma kakaliaitkat sümüiwaʼain.
ip-2-S süp. 326, 327 püt. 13-15
Eesü lotoo akuwaʼipaa chaa Sión
13 Soʼujee tü Pentecostés eejatkat soʼu juyakat 33 Sü.W., nüpünajüin Maleiwa «wunuʼulia miyoʼuyuu lotoko akuwaʼipa», nayaawase na anoujüshii chainjanaka iipünaa, süka naʼatapüin «tü Israel nüneekakat Maleiwa» (Galacia 6:16, TNM). Awainmalaashii naya shiʼipaʼaya, eeinna 144.000, anasü maʼin tü eekat sünainjee naʼyataain, aʼwaajünüshi Jeʼwaa sünainjee (Alateetkat Mapeena 14:3). Na apütaakana naʼakajee na wawalayuu chainjanakana iipünaa anasü maʼin naʼyataain soʼujee 1919, wanaa sümaa niʼitaain naya Jeʼwaa nachikuaʼa sünain aʼyatawaa nümüin. Naapüin tü choʼujaakat sümüin nanoula, müsü naapakai saaʼin wüin süpüla müin naya maʼaka saaʼin wunuʼulia miyoʼuyuu lotoko akuwaʼipa (Isaías 27:6).
14 Nüküjüin Isaías tü naʼyataakalü anain naya wawalayuukana, müshi nia: «Nakumajüinjatü süchikuaʼa tü pueulo kakaliairükalü ajaʼttinnüin; nakumajeerü süchikuaʼa tü mma sümüiwaʼakat, jeketeerü natuma tü pueulokot nnojotkat kasain apütaain sünainjee, otta tü mma kakaliaitkat sümüiwaʼain» (Isaías 61:4, TNM). Na judío waneepiakana nümaa Jeʼwaa, aleʼejüshii naya Babiloniajee wanaapünaa sümaa tü nümakat Ciro chi aluwataakai saaʼu Persia, süpüla nakumajüin Jerusalén otta tü aʼwaajüleekat süchikuaʼa. Sutuma nakumajüin shia süchikuaʼa, shiyaawasesü tü alatajatkat süchikijee tü juyakat 33 Sü.W. otta süchikijee tü juyakat 1919.
15 Mojusü maʼin naaʼin na nikirajüinkana Jesuu sutuma nütaʼünüin otta nuʼutünüin aaʼin soʼu juyakat 33 So.W (Mateo 26:31). Anapejeʼe naaʼin niiʼiyataapa Jesuu namüin sümaa nüsoʼiraain aaʼin otta wanaa sümaa saapünüin namüin chi naaʼinkai Maleiwa, aʼyataashii naya sünain aküjaa pütchi «suluʼupünaa Jerusalén, suluʼupünaa tü mmakat Judea, suluʼupünaa Samaria otta suluʼupünaa süpüshuaʼa mma wattapünaa maʼi» (Aluwataaushikana 1:8). Eeka tü anoujaa shiimainsükat süchikuaʼa natuma. Akaʼaya neʼe soʼujee 1919, nuluwataain Jesucristo na anoujashii chainjanakana iipünaa süpüla neʼitaain «süchikuaʼa tü pueulo kakaliairükalü ajaʼttinnüin». Kakaliairü maʼin nnojoluin shikirajüin tü iküleesia nnojotkat shiimain tü nüchikikat Jeʼwaa, shikirajüin neʼe sukuwaʼipa wayuu otta alawaa. Nasünneʼerüin na anoujashii chainjanakana iipünaa tü alawaa ekirajünakat anain süpüla sukumajaain süchikuaʼa tü anoujaa shiimainsükat. Otta müsia, aküjüshii maʼin naya pütchi sainküin mmakat, nnojotsü jaralüin aainjain tia (Marcos 13:10).
(Isaías 61:5, 6) «Eejeena wayuu naatajannuu jaʼaka otta narüleejeerü jaʼanneetse otta nayeena apünajaka na naatakana oumain jee apünajeena uuwa. 6 Otta müshiʼiya jiakana, nüsacerdootese Jeʼwaa müneena jia; na aʼyataashiikana nümüin Wamaleiwase müneena jia. Shieerü jikaka tü sümaʼanajeejatkat tü pueulokalüirua otta yaleteerü jaaʼin sünainjee tia.
w12-S 15/12 süp. 25 püt. 5, 6
Paaʼinwajiraashii sünain aʼyatawaa nümüin Maleiwa
5 Jülüjataa jaaʼin tü alatajatkat saashin Isaías kapiitulo 61, tia pütchikat ekeraajüsü nanain na anoujashii shiimainshiikana. ¿Jamüsü sümaka wetsiikulo 5 otta 6 eeinjanain wayuu naataka oumain sünain aʼyatawaa namaa na nüsacerdootesekana Jeʼwaa?
6 Na sacerdootekana naya na anoujashii chainjanakana iipünaa, naya «na asoʼiraainjanakana aaʼin palajana». «Sacerdooteena naya nutuma Maleiwa jee Kürisüto, aluwataainjana naya wanaa nümaa Kürisüto soʼu miit juya» (Alat. Map. 20:6, TNM). Eepajaʼa waneeinnua anoujashii kepiainjanakana waneepia saaʼu tü mmakat. Naya «na naatakana oumain» aʼyataajiraaka namaa na chainjanakana iipünaa. Aʼyataajiraashii namaa na nüsacerdootesekana Jeʼwaa müshii aka naaʼin apünajülii uuwa. Ekirajüshii naya tü shiimainkat süpüla nuʼwaajünüin Maleiwa jee eeshii jekennuu anoujashii natuma. Müshiijeseʼe naʼyataajiraain na anoujashii chainjanakana iipünaa namaa na kepiainjanakana saaʼu tü maakat süpüla naaʼinmajüin na wayuu aʼyataweekana waneepia nümüin Maleiwa (Juan 10:16).
Püchajaa süchiki kaaʼürüi suluʼu tü Wiwüliakat
(Isaías 60:17) Suulialeʼeya cobre shieerü tantiraka ooro otta suulialeʼeya kachueera tantireerü pülaata otta suulialeʼeya wunuʼu tantireerü cobre otta suulialeʼeya ipa tantireerü kachueera; otta shieerü laülaaka paaʼu tü jimataakat aaʼin otta tü lotookat akuwaʼipaa shieerü aküjaka tü paaʼinrajatkat.
(Isaías 61:8, 9) Tayakai Jeʼwaa, kojutüsü tamüin tü lotookat akuwaʼipaa, üttüsü taaʼin sünain aʼluwajaakat otta nnojorüle lotuin sukuwaʼipa wanee kasa. Tawalaajeerü namüin sünainpünaale naya tü shiimainkat otta tapansaajeerü wanee pütchi namaa süpüla kaʼi süpüshuaʼa. 9 Jee eʼraajüneerü maʼin nachonnii sainküin mma otta nooʼuliwoʼu saʼaka tü pueulokalüirua. Ayaawatüneena natuma na eʼrakana naya, süka nayain na anakana akuwaʼipa nutuma Jeʼwaa.»
w07-S 15/1 süp. 11 püt. 4
Pütchi anaka maʼin sünainjee tü karalouktakat Isaías (shiʼipa 2)
Susouktaka eʼipajee tü Wiwüliakat:
61:8, 9 ¿Jarat tü pütchi pansaatüjütkalia süpülajatka kaʼika süpüshuaʼa? ¿Jaralii na eekana sünainjee? Shia tü pütchi nüpansaajakat Jeʼwaa namaa na anoujashii chainjanakana iipünaa. Na eekana sünainjee naya na wayuu wattakana naalii jaa makana sümüin tü pütchi naküjakat na chainjanakana iipünaa (Juan 10:16).
Wetsiikulo aashajeʼennajatka
(Isaías 62:1-12) Nnojoishi taya yüütüin saaʼujee Sión, otta nnojoleechi taya jimatüin saaʼujee Jerusalén waneʼereʼeya lotopa sukuwaʼipa maʼaka saaʼin wanee kasa eekai chuwatüin otta suʼtteʼennapa maʼaka saaʼin sikoʼu. 2 «Shiʼreerü tü pueulokalüirua lotuin pukuwaʼipa, [pia jietkat,] otta neʼreerü paʼanasia napüshuaʼa na aluwataashiikana. Jeketeerü pünülia, niʼitaajeerü Jeʼwaa tia. 3 Otta müinjatka pia saaʼin wanee kotse anachonsü maʼin najapuluʼu Jeʼwaa otta maʼaka saaʼin wanee ekiaalaja najapuluʼu chi Pümaleiwasekai. 4 Nnojoleerü aküjünüin püchiki müin aka pia wanee jierü apütünaka sümüiwaʼa jee nnojoleerü aashajaanüin süchiki mapaʼajanain puumain; meerü pütchi püchiki: Shia Talataka amaa Taaʼin, otta pütchi süchiki puumain: Aneekünüsü süpüla aʼwayuuseein. Süka talateerüin naaʼin Jeʼwaa pümaa, otta meerü nuʼwayuusekai saaʼin puumain. 5 Maʼaka naaʼin wanee jimaʼai aneekakai wanee majayüt süpüla nuʼwayuusein, akaweeria pia naʼwayuuseerü pia na püchonniikana. Otta maʼaka talatüin wanee wayuu sünainjee nümüraajüin akaweechia chi Pümaleiwasekai, talateechi pünainjee. 6 Niʼitaain wayuu aapirülii saaʼu püsepü Jerusalén. Aapirüinjana naya waneepia, soʼukai jee saʼwai. »Jiakana aküjakana pütchi nüchiki Jeʼwaa, nnojo yüütüin jia, 7 otta nnojo juunjulajüin nüchiki waneʼereʼeya niʼitaapa Jeʼwaa Jerusalén süpüla nuʼwaajünüin saaʼu tü mmakat.» 8 Nüküjüin tia Jeʼwaa süka tü najapü nikiakat sümaa tü nütüna katchinsükat: «Nnojoleerü taapüin süchikuaʼa tü jiküinkat namüin na jüʼünüükana, jee nnojoleerü nasüin tü wiino jeketkat na naatakana oumain, tü piʼyataakat maʼin achiirua. 9 Nayeena ekaka shia na atpajüshiikana otta shiimain naʼwaajeechin Jeʼwaa; otta naseerü tü wiinokot na akotchojokana shia suluʼu süpaatiase tepia». 10 Jülata, jülata anooipaʼapünaa sünain tü puettakat. Sümüiwaʼa jutuma tü wopu pueulopaʼamüinkat. Patajatshii jutuma tü wopukat. Jüsünneʼera ipa suulia. Jiʼitaa wanee shiyaawase sümüin tü pueulokalüirua. 11 ¡Kaatei! Saapüin wayuu maʼleekalia nutuma Jeʼwaa sainküin mma pütchikat tüü: «Jüma sümüin süchon Sión: ‹¡Kaatei! Oʼttaweerü pia. ¡Kaatei! Eesü nümaʼana tü nüsülajüinjatkat, otta eesü tü nüwalaajüinjatkalü aka›». 12 Tü pueulo wulesükat meena na wayuukana sümüin, na niyaʼlajakana Jeʼwaa nachikuaʼa; otta meerü pütchi püchiki: Asaajuushi, wanee Pueulo Nnojotka Apütünüin Sümüiwaʼa.
Peʼureeroʼu 27–Maatsoʼu 5
KOROLO KOJUTÜSÜ SULUʼUKA TÜ WIWÜLIAKAT ISAÍAS 63-66
«Talatüsü waaʼin sutuma jeketeerüin tü sirumatuʼukat sümaa tü mmakat»
(Isaías 65:17) »¡Kaatei!, eeinjatü tatuma wanee sirumatuʼu jeketü jee müsia wanee mma jeketü otta nnojoleerü jülüjain jaaʼin tü kasa alatüitpakat.
ip-2-S süp. 383 püt. 23
«Talata jia waneepia sümaa tü kasa takumajüinjatkat»
23 Süküjüin tü karalouktakat Alateetkat Mapeena tü niʼrakat Juan süchiki nükalia Jeʼwaa eere najaʼttirüinjatüin tü kasa mojusükat. Otta süchikijee tia, ojutuneechi Satanaa suluʼumüin tü ishikat (Alateetkat Mapeena 19:11–20:3). Süchikijee nüküjüin tia Juan, müsü tü nüshajakat wanaapünaa sümaa tü nüshajakat Isaías: «Eeinjatü tatuma wanee sirumatuʼu jeketü jee müsia wanee mma jeketü». Tü wetsiikulo ashajünakat süchikijee tia, aashajaasü süchiki nunouktajatüin Maleiwa tü kasa mojusü eekat saaʼu tü Mmakat (Alateetkat Mapeena 21:1, 3-5). Pansaasü maʼin tü nümakat Isaías eeinjatüin «wanee sirumatuʼu jeketü jee müsia wanee mma jeketü», ekeraajeerü tia suluʼu tü paʼaraiisükat nutuma Maleiwa. Eejeerü wanee aluwataaya jeketü, meerü aka saaʼin siruma, aneerü nakuwaʼipa na wayuukana sutuma otta aneerü nanoula suluʼu tü paʼaraiisükat. Amülialaasü waaʼin sutuma nnojoleerüin tü müliakat atuma saaʼin wayuu maʼaka saaʼin ayuulii jee müliaa, «otta nnojoleerü jülüjain [waaʼin] tü kasa alatüitpakat». Jaʼitairü jetsüin tü kasa alatakat wamüin paala, nnojoleena müliain waya jee mojuin waaʼin sutuma.
(Isaías 65:18, 19) Talata jaaʼin waneepia sümaa tü kasa takumajüinjatkat. ¡Kaatei! Takumajüinjatü sümüin Jerusalén wanee kasa talatüinjatka atuma saaʼin otta talatüinjana na wayuukana suluʼu. 19 Talateechi taya sümaa Jerusalén jee talateechi taya sümaa tapueulose; otta nnojoleerü aapünüin suluʼu shiiʼira wayuu jee shiiʼira eekai müliain maʼin saaʼin».
ip-2-S süp. 384 püt. 25
«Talata jia waneepia sümaa tü kasa takumajüinjatkat»
25 Müsia nutuma Jeʼwaa maaʼulu, nukumajüin «sümüin Jerusalén wanee kasa talatüinjatka atuma saaʼin». ¿Jamaluʼulu tia? Watüjaaitpa aaʼu shiʼitaanüin tü jeketkat siruma soʼu 1914 otta aneekünüshii 144.000 süpüla naluwataain nümaa Jesuu chaa iipünaa. «Jerusalén jeket» münüshii naya (Alateetkat Mapeena 21:2). Müsü nünüiki Maleiwa nachiki: «Takumajüinjatü sümüin Jerusalén wanee kasa talatüinjatka atuma saaʼin otta talatüinjana na wayuukana suluʼu». Naapeerü Jeʼwaa kasa anasü namüin na wayuu jaa makana nümüin sükajee tü Jerusalén Jeketkat. Nnojoleetka shiiʼira wayuu jee shiiʼira eekai müliain, süka naapeerüin Jeʼwaa «tü suchuntakat waaʼin» (Salmo 37:3, 4, TNM).
(Isaías 65:21-23) Shiimain nakumajeenain piichi süpüla kepiainjanain naya suluʼu; shiimain napünajeenain süpüla neküinjatüin süchon naʼttia. 22 Nnojoleena akumajüin piichi süpüla kepiainjatüin wayuu naatajannuu suluʼu; nnojoleena apünajüin süpüla shiküinjatüin wayuu naatajannuu süchon naʼttia. Maʼaka kakaliain katüin soʼu suuʼulia wanee wunuʼu meeria nakuwaʼipa na aʼyataakana tamüin. Talateerü naaʼin sünain aʼyatawaa na wayuu taneekajalakana. 23 Nnojoleerü kasain nashapajaain achiirua, nnojoleena mojulaain na nachonniikana. Süka jamüin, nayain na wayuu anakana akuwaʼipa nutuma Jeʼwaa namaʼaleʼeya na nachonniikana.
w12-S 15/9 süp. 9 püt. 4, 5
Jimataa aaʼin soʼu miit juya... ¡otta süpüla kaʼi süpüshuaʼa!
AKUMAJEENA PIICHI OTTA APÜNAJEENA
4 Kepieeshii napüshuaʼa na wayuukana, sümaa jimatüin naaʼin napüshi suluʼu. Wainmapejeʼe wayuu mepiaka maaʼulu yaa. Watta maʼin saalii wayuu suluʼu tü pueulokalüirua jee oʼttaashii na wayuukana süchikumüin namüliala suluʼu barrio eere jouluin müliaa. Nnojotsü namaʼana tü süliainjatkat wanee piichi.
5 Kepieerü wayuu sutuma Nuluwataaya Maleiwa, müsü nünüiki Isaías: «Shiimain nakumajeenain piichi süpüla kepiainjanain naya suluʼu; shiimain napünajeenain süpüla neküinjatüin süchon naʼttia» (Isa. 65:21, TNM). Shiimainya eein wayuu kepiaka maaʼulu yaa, jee eesü miyoʼuyuule maʼin nepia. Mmotpejeʼe naya süka eein süpüla süsütünüin noulia sutuma maʼletsein naya, naʼluwajünüle jee jamüle naya atumaa. Nnojoleerü shapaain naaʼin na wayuukana sutuma Nuluwataaya Maleiwa, müsü tü nüshajakat Miqueas: «Shiimain maʼin nojoyoloweenain suupünaa wanee suuʼulia uuwa otta higuera, nnojoleena eimolojunuin» (Miq. 4:4, TNM).
Püchajaa süchiki kaaʼürüi suluʼu tü Wiwüliakat
(Isaías 63:5) Ayatüshi taya eirakaain, nnojoika jaralin akaaliinjain taya; müshi moʼokai taaʼin, nnojoika jaralin kachipünaain aaʼin taya. Toʼttaaka süka takuwaʼipa tamüiwaʼa, otta tachecherüin taaʼin suulia jashiee.
w07-S 15/1 süp. 11 püt. 5
Pütchi anaka maʼin sünainjee tü karalouktakat Isaías (shiʼipa 2)
Süsouktaka eʼipajee tü Wiwüliakat:
63:5. ¿Jamaluʼulu nüchecherüin naaʼin Jeʼwaa suulia naashichijaain? Atüjashi achecheraa naaʼin Jeʼwaa suulia jashiee: pansaasü tü jashiee nünainkat. Nüchecherüin naaʼin Jeʼwaa suulia naashichijaain süpüla lotuin sukuwaʼipa nutuma tü naaʼinrajatkat süpüla süsalain saainjala wayuu nutuma.
(Isaías 64:8) Pia chi Washikai Jeʼwaa, pootshi waya otta pia chi Atükakai waya; pukumala wayuu süpüshuaʼa.
Wetsiikulo aashajeʼennajatka
(Isaías 63:1-10) ¿Jarai chi sekai chejee Edom jerottakai anoʼu asheʼin chejee Bozrá, kojutükai nia sutuma nüsheʼin, waraittakai süka pülashin nia? «Taya chi aashajaakai süka lotoo akuwaʼipaa, Chi pülashikai maʼin süpüla oʼtteʼeraa wayuu.» 2 ¿Jamüsü ishaaittaka püsheʼin? ¿Otta jamüsü maka püsheʼin maʼaka saaʼin nüsheʼin wayuu aʼliikajaka saaʼu uuwa? 3 «Shia taʼliikaka aaʼu tamüiwaʼa tü süpülajanakat wiino, sümaa nnojoluin eejachin wanee wayuu tamaa suluʼujee wanee pueulo. Taʼliikaja aaʼulu shia sümaa jashichin taya. Otta yarüttüsü tasheʼin sutuma tü süsha chüittakat jee yarüttaka tasheʼin süpüshuaʼa sutuma. 4 Suluʼusü taaʼin pasalaaweein taya otta alüʼütsü tü juya tayaʼlajünüinjachika oʼu tachikuaʼa. 5 Ayatüshi taya eirakaain, nnojoika jaralin akaaliinjain taya; müshi moʼokai taaʼin, nnojoika jaralin kachipünaain aaʼin taya. Toʼttaaka süka takuwaʼipa tamüiwaʼa, otta tachecherüin taaʼin suulia jashiee. 6 Otta ayatüsü taʼliikajüin aaʼu tü pueulokalüirua süka jashichin taya jee müliashii maʼin naya natuma otta shottoʼosü nasha mmapaʼamüin.» 7 Shieerü taashajaaka achiki tü nümaneekat maʼin Jeʼwaa, eeʼirajeechi taya nümüin Jeʼwaa, wanaapünaa sümaa tü naainjakat Jeʼwaa wapüleerua, shieerü taküjaka tü naainjakat süpüla nümüliajüin Israel süka kamaneein maʼin nia. 8 Otta müshi nia: «Naya tapueuloseka, na tachonnii waneepiakana tamaa». Niaichipaka oʼtteʼerüin naya. 9 Suʼunnaa mojuin maʼin naaʼin nayakana, mojusia naaʼin Maleiwa saaliijee niʼrüin namüliala. Oʼttaashii naya nutuma chi nünüikeʼejachikai. Niyaʼlajüin naya nachikuaʼa süka alin naya nüpüla jee nüpataain naya sümaa kakaliainnain nülüʼüjüin naya. 10 Neʼrüliijaaka wayumüin jee mojukalaka naaʼin chi naaʼinkai natuma. Naʼünüükalaka nia; nütkaakalaka namaa.