Nukumajüin Noé wanee anuwa

Aʼwainmalaasü wayuu mapa yaa saaʼu tü Mmakat. Watta saalii tü eekai mojulaain. Müshiʼiya napüshi na aapieekana, mojulaashii. Ashakatüshii naya iipünaajee yaa saaʼumüin tü Mmakat. ¿Pütüjaa aaʼu jamüin naainjakaʼa tia? Süpüla wayuuinjanain naya jee naʼwayuuseinjatüin tü jieyuukalüirua.

Kachonshii naya mapa sümüin tü jieyuukalüirua. Katchinshii maʼin na nachonniikana, mojulaashii maʼin naya otta müliasü maʼin wayuu natuma. Nnojoishii nuuʼulaain Jehová naya sünain aaʼinraa tia. Najaʼttirüin naya süka wanee juya miyoʼushaata.

Eejachipajaʼa wanee wayuu anamia soʼu tia. Aishi Jehová nüpüla. Noé nünülia. Kaʼwayuuseshi nia otta apünüinshii nüchonnii: Sem, Cam otta Jafet nanülia. Kaʼwayuuseshii naya apünüinruʼuleʼeya. Nüküjain Jehová nümüin Noé nukumajüinjatüin wanee anuwa miyoʼushaata, müinjatü shia maʼaka saaʼin wanee kaaja miyoʼu süpüla samatüinjatüin shia shiroku tü wüinkat. Ekerotuinjachi Noé suluʼu sümaa nüpüshi süpüla nnojoliinjanain outuin naya. Nikerotirüinjatü watta saalii mürüt süpüla katüinjatüin soʼu.

Nukumajamaataka Noé tü anuwakat. Eetaashijaʼa maʼaka 50 juya nia sümaa nüpüshi sünain akumajaa tü anuwakat. Nakumajüin shia wanaapünaa sümaa tü nümakat Jehová. Naapirüin Noé tü wayuukalüirua suulia tü juya miyoʼushaatakat. Akanasaʼa macheʼein naya suulia tü pütchikat.

Ekeroluinjana joo naya suluʼumüin tü anuwakat. ¿Pütüjawee aaʼu kasain alatüin süchikijee tia?