Soto paaʼin tü alatakat sümüin nuʼwayuuse Lot

Kepiapuʼushi Lot nümaa Abrahán suluʼu tü mmakat Canaán. Watta saalii tü namüʼlüinkat makalaka nnojoluin mma shiküleinjatü. «Anakajaʼa müleka jooluʼu wapaajiraale, püneeka tü mma püchekakat püpüleerua, oʼuneechi taya suluʼu wanee naata», nümaka Abrahán nümüin Lot. Kamaneeshi maʼin Abrahán nümüin Lot ¿aashimüin?

Niʼrüin Lot shiʼipa wanee mma anashaatasü maʼin, miyoʼu wüin suluʼu otta wüittuuisü maʼin. Nukolojooko suluʼumüin tia mmakat sümaa nüpüshi, süʼütpaʼa tü mmakat Sodoma.

Mojulaajüsü maʼin tü wayuu chajatkat kepiain Sodoma otta tü chajatkat kepiain Gomorra. Eʼrünnüü maʼin wayumüin, makalaka najaʼttirüinjatüin Jehová tia pueulokalüirua. Nükaalinjeein Maleiwa Lot sümaa tü nuʼwayuusekat otta nüchonnii, nuluwataaka piamashii aapiee nümaʼanajeejana, namaka na aapieekana nümüin Lot: «Jujuʼita yaajee yaa, süka sajaʼttinnüinjatüin tü pueulokot süpüshuaʼa».

Nnojoishi ountaain Lot sümaa nuʼwayuuse otta nüchonnii, najattünakalaka suluʼujee tü pueulokot natuma na aapieekana. Namakalaka na aapieekana namüin: «Juwataa jümaala suulia outaa sünain nnojoluin jiirakaain jüchiiruajee sümüin Sodoma».

Wanaa sümaa nantüin eemüin wanee pueulo Zoar münüsü, ojutuusü nutuma Jehová siki otta azufre saaʼu tü mmakat Sodoma otta Gomorra. Ajaʼttaleesia tia piamasükat mma. Shiasaʼa tü nuʼwayuusekat Lot, nnojotsü oonooin sümaa nünüiki Jehová, eirakaasü süchiiruajee. Ichiijaaka shia. Akaisaʼa Lot sümaa tü piamasükat nüchonnii, oonooshii naya. Mojuka maʼin naaʼin sutuma moonooin nuʼwayuuse sümaa nünüiki Jehová. Anapejeʼe naaʼin süka noonooin sümaa nünüiki Jehová.