EKIRAJAAYA 4

Süpülapünaa paashajeʼerüin wanee wetsiikulo

Mateo 22:41-45

PÜTÜJAINJATKA APÜLEERUA: Süpülapünaa paashajeʼerüin wanee wetsiikulo, püküja namüin na wayuukana tü sünainpünaakat tü pütchikat.

Püküja jamüin paashajeʼerüinjatka wanee wetsiikulo. Kamalain putuma tü wetsiikulo paashajeʼerakat süpüla jülüjain naaʼin na wayuukana tü pütchi kojutukat maʼin sünainjee.

Jülüja paaʼin kasain aashajaanüin achiki süpülapünaa wanee pütchi otta süchikijee. Püküja jaralin kanüikin wanee pütchi otta jaralin kashajalain wanee karaloʼuta suluʼu tü Bibliakat.
Püküja shiain anaʼleein anüiki tü Bibliakat. Paashajaale sümaa wayuu anoujaka nünain Maleiwa, püküja «Nünüikin Maleiwa» tü Bibliakat. Sükajee tia, piiʼiyatüin shiain pikirajüin tü jülüjakat naaʼin Maleiwa.
Kamalainjatü sümüin wayuu tü Bibliakat watuma. Püsakira sünain wanee kasa yalaka asoutia suluʼu tü Bibliakat, püküja süchiki wanee kasa sunoutaka akuwaʼipa tü Bibliakat jee shiale wanee pütchi kayaawaseka sutuma süpüla shiyaawatünüin aaʼu.

Jülüja paaʼin kasain natüjaain aaʼu na aapajakana pünüiki süchiki tü Bibliakat otta süchiki tü pütchi pikirajakalü anain. Pikiraja naya sünain wanee pütchi natüjaakalü aaʼu sümaa kemeʼeriain shia putuma namüin, nekirajaweetka sünain nachikuaʼa.