Wekirajaainjatka anain sünain tü outkajawaakat Wakuwaʼipa otta Waʼyataain nümüin Maleiwa
AKOOSÜTOʼU 3-9
KOROLO KOJUTUSÜ SULUʼUKA TÜ WIWÜLIAKAT | ÉXODO 13, 14
«Jüchechera jaaʼin nuʼtteʼereena jia Jeʼwaa»
(Éxodo 14:13, 14) Nümaka joo Moisés namüin na israeliitakana: «Nnojo mmoluin jia. Jüchechera jaaʼin, nuʼtteʼereena jia Jeʼwaa soʼu kaʼikat tüü. Müinnia nnojoluin jiʼrüin na egipcio sekana jüchiirua. 14 Atkaajeechi Jeʼwaa jüpüleerua jee yüüteena neʼe jia».
(Éxodo 14:21, 22) Niyaleraka joo Moisés najapü sünainmüin tü palaakat, eejaasü wanee joutai jee sujutajaaka tü palaakat süpüla jososhiinjatüin napüleerua na israeliitakana, siraasü aika saaʼu tü joutaikat. 22 Nalatakalaka na israeliitakana eere jososhiin, sümaʼinruʼu jutatüin tü palaakat, jimatüsü shia.
(Éxodo 14:26-28) Nümaka joo Jeʼwaa nümüin Moisés: Piyurula pütüna wanaapünaa sümaa tü palaakat süpüla sujuttuin tü palaakat naaʼu na egipciokana, saaʼu neʼejena otta naaʼu na surulaat amaajunakana. 27 Niyalera nümüsia Moisés tü wunuʼu najapuluʼukat wanaapünaa sümaa tü palaakat. Sülüʼütpa maʼin süpüla jaʼyuuinjatüin, nujuttirüin Jeʼwaa tü palaakat naaʼu na egipciokana. 28 Wüinsitkalaka neʼejena na egipciokana, na amaajunakana otta napüshuaʼa na nusurulaatsekana Faraón. Nnojoishi apütaain waneeshiaakaijeʼe, outushii napüshuaʼa.
Püchajaa süchiki kaaʼürüi suluʼu tü Wiwüliakat
(Éxodo 13:17) Wanaa sümaa nuuʼulaain faraón noʼunuinjanain na israeliitakana Egiptojee, nnojoishii nuʼunirüin naya Maleiwa suluʼupünaa tü wopu chaʼwatkat eemüin na filisteokana. Mayaapejeʼe nantamaateenain eeʼewaliire naya noʼunule suluʼupünaa tia wopukot. Naainjain Maleiwa tia süka nümüin suluʼu naaʼin: «Jamüshiijaʼa noʼunule suluʼupünaa tia wopu pejekat, eeshiijaʼa süpüla nantiraajeenain namaa na naʼünüükana». Shiasaʼa suluʼujee tia, meena naya: «Joʼu maata waleʼejai wachikuaʼa Egiptomüin».
(Éxodo 14:2) «Püma namüin na israeliitakana nouyanajaaiwa chayaa suluʼumüin tü mmakat Pihahirot. Yalainjana naya shiʼipoʼujee tia mmakat. Pasanainjana naya sünain Migdol otta tü palaakat, neʼrüinjatü yalejee tü mmakat Baal-Zefón. Yalainjana naya shiʼipoʼujee tü mmakat Baal-Zefón, pejeinjana naya sünain tü palaakat.
Wetsiikulo aashajeʼennajatka
(Éxodo 13:1-13) Anuukalaka nünüiki Jeʼwaa nümüin Moisés: 2 «Pükatalüinjana tamüin napüshuaʼa neʼiruma na israeliitakana. Toolole neʼiruma na israeliitakana taya kamüinjachika otta toolole shiʼiruma mürüt taya kamüinjachika tiaʼaya». 3 Anuuka nünüiki Moisés sümüin tü pueulokot: «Soto jaaʼin kaʼikat tüü, shia tü kaʼi jujuʼitakalü oʼu yaajee Egiptojee eepuʼule achepchieein jia atumawaa. Nia ayutka jia Jeʼwaa yaajee süka pülashaatain maʼin nia, nnojoluinjana jia eküin wanee kasa eekai kaʼakain soolojia pan. 4 Ojuʼiteena jia yaajee noʼu kaʼikai chii, soʼu kashikat abib. 5 Nüküjain Jeʼwaa namüin na kooʼuliwoʼukana jia sünain naapajatüin namüin tü noumainkat na cananeokana, na hititakana, na amoreokana, na heveokana otta na jebuseokana, jooutsü maʼin leechi suluʼu tia mmakat otta müsia mapa. Chapa jia suluʼu tia mmakat, ayatüinjatia sotuin jaaʼin kaʼikat tüü otta müsia kashikat tüü. 6 Soʼu akaratshi kaʼi eküinjachi pia pan maʼakakat soolojia otta soʼu tü akaratshikat kaʼi, paainjainjatü wanee miʼiraa shiyaawaseka kojutuin pümüin Jeʼwaa. 7 Shia jiküinjatka tü pan maʼakakat soolojia. Jaaʼinrüinjatü shia soʼu tia akaratshikat kaʼi, nnojotsü eeinjatüin pümaʼana wanee kasa eekai kaʼakain soolojia pan otta nnojotsü eeinjatüin jümaʼana tü ariina eekai saashüʼüjaain. 8 Müinjatü jooluʼu pünüiki namüin na püchonniikana: ‹Taainjain tüü süpüla sotuinjatüin taaʼin tü kaʼi niyutkalü oʼu taya Jeʼwaa chejee Egiptojee›. 9 Miʼiraakat tüü, meerü aka saaʼin wanee jeerü sünain pajapü otta sünain piʼipoʼu süpüla sotuinjatüin paaʼin shia otta müsia tü pütchi nümaʼanajeejatkat Jeʼwaa paashajaainjatü achiki waneepia, süka jamüin, niyuluin pia Jeʼwaa Egiptojee süka pülashaatain nia. 10 Paaʼinrawalinjatü tia uwatua süpüla juyakat. Nuʼunnaa chi kaʼi aneekünakai süpüla saainjünüin tia. 11 »Wanaa sümaa nüntirüin pia Jeʼwaa suluʼumüin noumain na cananeokana, tü mma nüpansaajakat pümüin ooʼulaka namüin na kooʼuliwoʼukana pia, 12 püneeküinjana nümüin Jeʼwaa na tooloyuu eʼirumaakana otta müsia shiʼiruma tü mürütkalüirua. Tooloinjana napüshuaʼa, nümüinjana Jeʼwaa napüshuaʼaleʼeya. 13 Chi shiʼirumakai wanee püliikü, paapüinjatü wanee anneerü naaʼu suulia outajüin nia. Nnojorüle paapüin tia, püshataainjatü nunut, awalaajüinjana jia naaʼu napüshuaʼa na juuʼuliwoʼukana.
AKOOSÜTOʼU 10-16
KOROLO KOJUTUSÜ SULUʼUKA TÜ WIWÜLIAKAT | ÉXODO 15, 16
«Waʼwaaja Jeʼwaa süka jayeechi»
(Éxodo 15:1, 2) Soʼu kaʼikat tia anuu niiʼirain Moisés otta na israeliitakana nümüin Jeʼwaa: «Teeʼirajeechi amüin Jeʼwaa süka nükanajüin otta shiʼraajüin nia wayuu süpüshuaʼa. Chi amakai otta chi naajuchikai nujutuin naya shirokumüin tü palaakat. 2 Nia katchinka atuma taya Jeʼwaa otta tountuin taaʼinrüin wainma kasa nutuma, nia oʼtteʼeraka taya. Niaʼaya Tamaleiwasekai niakai ooʼulaka taʼwaajeechi nia. Nia Nümaleiwasekai chi tashikai otta kojutushaateechi tamüin.
(Éxodo 15:11) Nnojoishi eein wanee Maleiwa makai aka paaʼin piakai Jeʼwaa. ¿Jaraijaʼa makai aka paaʼin piakai suluʼu wuleshaatain pukuwaʼipa? Pia neʼe pümüiwaʼa kojutuinjachika atumawaa aʼwaajünüinjachi pia süka jayeechi otta pia neʼe pümüiwaʼa ountakai aaʼinrüin kasa pülasü.
(Éxodo 15:18) Aluwataajeechi Jeʼwaa süpüla kaʼika süpüshuaʼa.
(Éxodo 15:20, 21) Shiasaʼa Míriam tü nünüikimaajatkat Maleiwa, nuwala shia Aarón, saapainjeseʼe wanee pandereta, nojuʼitakalaka na jieyuukana süchiirua jee natalejakalaka tü panderetakat ooʼulaka nayonnojoka. 21 Asoutusü Míriam neʼipajee na tooloyuukana sümaa müin shiiʼirain: «Jiiʼiraja nümüin Jeʼwaa süka niʼraajirüipain nünülia sümüin wayuu süpüshuaʼale. Chi amakai otta chi naajuchikai nujutuin naya shirokumüin tü palaakat».
Püchajaa süchiki kaaʼürüi suluʼu tü Wiwüliakat
(Éxodo 16:13) Shiasaʼa mapa aliika antapaatüsü watta saalii codorniz eemüin na israeliitakana, wattaʼamüin süchikijee tia, maʼaka wattaʼa maalü ememajüsü tü juyakat eejanale na israeliitakana.
(Éxodo 16:32-34) Anuukalaka nünüiki Moisés: «Anuu tü nuluwataakalü anain Jeʼwaa: ‹Jünaajaa suluʼu wanee jaarü wanee omer maná jee jünaajaa shia neʼraiwa shia na juuʼuliwoʼukana jee natüjaaiwa saaʼu kasain jaainjapuʼuin aka tü pan jikakat chaa isashiipaʼa wanaa sümaa tojuʼitirüin jia Egiptojee›». 33 Anuukalaka nünüiki Moisés nümüin Aarón: «Paapaa wanee jaarü jee pipiraja shia süka wanee omer maná jee piʼitaa shia nümülatuʼu Jeʼwaa süpüla natüjaainjatüin saaʼu na juuʼuliwoʼukana». 34 Niʼitaainjeseʼe shia Aarón suluʼu tü jurasükeetkat süpüla yalainjatüin shia suluʼu, naainjainjaʼa shia maʼakaajüle nuluwataain Jeʼwaa nümüin Moisés.
Wetsiikulo aashajeʼennajatka
(Éxodo 16:1-14) Mapa oʼunushii naya chejee suluʼujee tü mmakat Elim, süntapaataka tü pueulokot Israel chaa isashiipaʼa suluʼu tü mmakat Sin pasanain shia sünain tü mmakat Elim otta Sinaí, antüshii naya soʼu tü kaʼikat 15 soʼu tü piamakat kashi, süchikijee nojuʼitüin chejee Egiptojee. 2 Nayounalaakalaka napüshuaʼa na israeliitakana nooʼomüin Moisés otta Aarón chaa isashiipaʼa. 3 Anuu nanüiki na israeliitakana namüin: «Anashiije outule waya nutuma Jeʼwaa chayaa suluʼu tü mmakat Egipto, chayaa ojoyolooshii waya süʼütpaʼa tü wushukat otta emirashii waya asalaa, eküshii waya pan emiraleepaʼaya waya. Jüntiraka neʼe waya yaamüin isashiipaʼamüin süpüla outuinjanain waya sutuma jamü». 4 Anuukalaka nünüiki Jeʼwaa nümüin Moisés: «Taʼitireerü wanee juya jümüin chejee sirumatuʼujee, shiasaʼa tia juyakat panjaajeerü süpüshuaʼa, nakotchojeerü na wayuukana tü neküinjatkat nükaaluʼuwai wanee kaʼi. Tooʼulakeerü naaʼin süpüla tatüjaain saaʼu müleka noonoole sümaa tü taluwataakalü anain naya. 5 Soʼu tü aipiruakat kaʼi jükotchojüinjatü tia süpüla piama kaʼi jee jüʼlakajaajeetkalaka shia». 6 Anuukalaka nünüiki Moisés nümaa Aarón namüin na israeliitakana: «Aliika jütüjaajeerü aaʼu niain Jeʼwaa ayuʼlüin jia chejee suluʼujee tü mmakat Egipto. 7 Wattaʼa wattaʼa maalü jiʼreerü sünain niain Jeʼwaa chi pülashikai maʼin, süka jamüin naapüin Jeʼwaa wanaa sümaa jiyounnalaain. ¿Jaraliisaʼa maʼin waya süpüla jiyounnalaainjanain wamüin?». 8 Ayatüshia aashajaain Moisés sünain maa: «Naapeerü Jeʼwaa jümüin aliikajee tü asalaa jiküinjatkat otta naapeerü pan jümüin wattaʼa maalü emiraleepaʼa jia. Süka jamüin, naapüin Jeʼwaa jünüiki sünain jiyounnalaain. ¿Jaraliisaʼa maʼin waya süpüla jiyounnalaainjanain wamüin? Nnojoliipejeʼe wayain jiyounnalaain amüin, nia Jeʼwaa jiyounnalaakai amüin». 9 Anuukalaka nünüiki Moisés nümüin Aarón: «Püma sümüin tü pueulokot Israel mayaa: ‹Jalainna yaamüin naashin Jeʼwaa, aashajaweeshi nia jümaa, süka jamüin, naapüin jünüiki wanaa sümaa jiyounnalaain›». 10 Keraapa Aarón sünain aashajawaa namaa na israeliitakana, napalaʼitaakalaka na israeliitakana sümaa neirakaain chaa isashiipaʼamüin, neʼrakalaka tü nüpülainkat Jeʼwaa sünain wanee siruma. 11 Anuu sooʼomüin nünüiki Jeʼwaa nümüin Moisés: 12 «Taapüin nanüiki na israeliitakana wanaa sümaa nayounnalaain, püma namüin tüü: ‹Aipaʼa ekeena jia asalaa otta müsia wattaʼa wattaʼa maalü ekeena jia pan emiraleepaʼaya jia. Jütüjaajetkalaka saaʼu tayain Jeʼwaa chi Jümaleiwasekai›». 13 Shiasaʼa mapa aliika antapaatüsü watta saalii codorniz eemüin na israeliitakana, wattaʼamüin süchikijee tia maʼaka wattaʼa maalü, ememajüsü tü juyakat eejanale na israeliitakana. 14 Shiasaʼa soosojoopa tü mmapaʼakat, apütaasü wanee kasa müsü aka saaʼin ariina, mataasü aka saaʼin escarcha süpaʼapünaa tü mmapaʼakat.
AKOOSÜTOʼU 17-23
KOROLO KOJUTUSÜ SULUʼUKA TÜ WIWÜLIAKAT | ÉXODO 17, 18
«Na wawalayuu nnojoliikana yaletüin aaʼin ekirajüshii otta neʼitaain aʼyatawaa najapuluʼu na waneinnua»
(Éxodo 18:17, 18) Anuu nünüiki chi nüshimiakai Moisés nümüin: «Nnojotsü anain tü paainjakat. 18 Ayatüle müin pia mapüseechi maʼin pia otta mapüseena na wayuu pümaakana, kaawainsü maʼin tü aʼyatawaa paainjakat, nnojotsü süpüla paaʼinrüinjatüin shia pümüiwaʼa.
(Éxodo 18:21, 22) Saʼakajee tü wayuukalüirua, püneeküinjana wayuu eekai yalayalain aaʼin, kojutukana amüin Maleiwa, wayuu eekai lotuin akuwaʼipa otta nnojoliikana anain amüin naapaain nneerü saaʼu wanee kasa nnojotkalü anain. Nayainjana akaalinjakana tü pueulokot, püneeküinjana naya süpüla shikiipüʼüinjanain miit wayuu, shikiipüʼüinjana poloo shikii wayuu, shikiipüʼüinjana jaʼrai shikii wayuu otta shikiipüʼüinjana poloo wayuu. 22 Nayakana, nayainjana anouteʼeraka sukuwaʼipa wanee kasa shiʼikajaanapa namüin natuma na wayuukana, sülatüle wanee kasa kapüleekai maʼin piainjachi akumajaka sukuwaʼipa, eekajasaʼa tü eekai mapüleein nayeena akumajaka sukuwaʼipa nayakana. Nnojoleetkalaka kaawain maʼin pümüin tü aʼyatawaakat otta mapüleejeerü shia pümüin.
(Éxodo 18:24, 25) Naapaamaata amaalü Moisés süpüshuaʼa tü nümakat chi nüshimiakai nümüin. 25 Nüneeküin naʼakajee na israeliitakana wayuu eekai yalayalain aaʼin otta nüneeküin naya süpüla shikiipüʼüinjanain naya tü pueulokot, shikiipüʼüshii miit wayuu, shikiipüʼüshii poloo shikii wayuu, shikiipüʼüshii jaʼrai shikii wayuu otta shikiipüʼüshii poloo wayuu.
Püchajaa süchiki kaaʼürüi suluʼu tü Wiwüliakat
(Éxodo 17:11-13) Iipünaale nütüna Moisés nutuma, akanajüshii na israeliitakana, shiasaʼa nüshakatirapa nütüna ayamüluushii na israeliitakana natuma na amalequitakana. 12 Aijapa nütüna Moisés neʼitaakalaka joo wanee ipa miyoʼu süpüla nüikalaain Moisés saaʼu, nia Aarón nümaa Hur aaʼalijaka nütüna, wanee yaajeeruʼu jee wane chejeeruʼu. Siraasü kaʼikat naaʼu sünain iipünaain nütüna. 13 Niyamünnaka Amaleq sümaʼaleʼeya nupueulose nutuma Josué.
(Éxodo 17:14) Müsü joo nünüiki Jeʼwaa nümüin Moisés: «Püshaja tüü süpüla nnojoluinjatüin motuin aaʼinyüü otta püküja shia nümüin Josué: ‹Tajaʼttireena napüshuaʼa na amalequitakana, müiria nnojoluin sotuin saaʼin wayuu tü pueulokot Amaleq›».
Wetsiikulo aashajeʼennajatka
(Éxodo 17:1-13) Oʼunushii napüshuaʼa na israeliitakana suluʼujee tü mmakat Sin. Eemeraʼawaishii naya wopuluʼu maʼaka nümüin Jeʼwaa namüin, nantakalaka suluʼumüin tü mmakat Refidim makatakalaka naya yala, nnojotpejeʼe wüin suluʼu tia mmakat. 2 Aʼülüjiraashii na wayuukana nümaa Moisés sümaa namüin nümüin: «¡Wüinyaasüshii waya!». Anuukalaka nünüiki Moisés namüin: «¿Jamüshii jüʼülüjiraaka tamaa? ¿Jamüshii ayataka jia juuʼulaküin naaʼin Jeʼwaa?». 3 Wüinyaasüshii maʼin na wayuukana suluʼu tia mmakat, ayatapejeʼe naya aʼyounnalaain nümüin Moisés sümaa namüin nümüin: «¿Jamüshii pümaaka waya Egiptojee? ¿Pümaashii waya süpüla outuinjanain waya sutuma wüinyaasü, outuinjanain wüinyaasü na wachonniikana otta tü wamünüinkalüirua?». 4 Nuchuntakalaka kaalinwaa Moisés nümüin Jeʼwaa sünain maa: «¿Jamüinjatkai sukuwaʼipa tü pueulokot tatuma? ¡Neʼinaʼaleechi taya mapa süka ipa!». 5 Anuukalaka nünüiki Jeʼwaa nümüin Moisés: «Puʼuna napüleerua na israeliitakana, pümaa kojuyashii laülaashii otta pülüʼüja tü wunuʼu piʼyaatakalü aka tü süchikat Nilo, ayataʼaya pajapüʼitpain tia wunuʼukat. 6 Yaleechi taya pümaa eere tü ipakat soʼu kaʼikat tia chayaa Horeb. Piʼyaatüinjatü tü ipakat sujuʼiteetkalaka wüin suluʼujee süpüla nasüinjatüin shia na israeliitakana». Shiajaʼa naainjaka tia Moisés noʼupala na laülaashiikana. 7 Masá otta Meribá nümakalaka Moisés sümüin tia mmakat süka younnatüin na israeliitakana nooʼomüin Moisés jee nooʼulaküin naaʼin Jeʼwaa sünain mma: «¿Aniiyaakaijeʼe Jeʼwaa wamaa, nnojoitaapa eein nia?». 8 Nayasaʼa na amalequitakana oʼunushii naya suluʼumüin tü mmakat Refidim otta nashutaka naaʼu na israeliitakana. 9 Nütüjaapa saaʼu Moisés tia, nümakalaka nümüin Josué mayaa: «Püneeka kojuyashii tooloyuu otta puʼuna pütkaai namaa na amalequitakana, cheechi taya aliikajaain saaʼu tü utaikat, talüʼüjeetkalaka tü wunuʼu naapakat tamüin chi Maleiwakai». 10 Ayatüsüjaʼa naainjain Josué tü nümakat Moisés, nuʼunakalaka sünain atkawaa namaa na amalequitakana. Aluʼuinjaʼa Moisés nümaa Aarón otta Hur oʼunushii naya saaʼumüin tü utaikat. 11 Iipünaale nütüna Moisés nutuma, akanajüshii na israeliitakana, shiasaʼa nüshakatirapa nütüna ayamüluushii na israeliitakana natuma na amalequitakana. 12 Aijapa nütüna Moisés neʼitaakalaka joo wanee ipa miyoʼu süpüla nüikalaain Moisés saaʼu, nia Aarón nümaa Hur aaʼalijaka nütüna, wanee yaajeeruʼu jee wane chejeeruʼu. Siraasü kaʼikat naaʼu sünain iipünaain nütüna. 13 Niyamünnaka Amaleq sümaʼaleʼeya nupueulose nutuma Josué.
AKOOSÜTOʼU 24-30
KOROLO KOJUTUSÜ SULUʼUKA TÜ WIWÜLIAKAT | ÉXODO 19, 20
«¿Nnojotsüche kasain saamüin wamüin tü Poloosükat Pütchi nuluwataakalü anain Jeʼwaa?»
(Éxodo 20:3-7) Nnojoishii kamaleiwaseyaainjanain jia, tayainjachi chi Jümaleiwasekai. 4 »Nnojo pukumajüin wanee maleiwayaasü makalü aka saaʼin tü kasa chakalü iipünaa, tü yaakat yaa mmapaʼa otta tü shirokukat palaa. 5 Nnojo püsapainkain pia sümülatuʼu tia jee nnojo puuʼulaain pimeʼejünüin aaʼin süpüla puʼwaajüin shia, süka jamüin, tayakai Jeʼwaa, taya wanee Maleiwa achuntakai tayainjachin aʼwaajünüin tamüiwaʼa. Kaainjarale wanee wayuu tamüin, süsalashii tatuma na nüchonniikana, na nüikeyuukana jee nachonnii na nüikeyuukana na üttakana aaʼin tanain. 6 Na aikana apüla taya otta na jaa makana sümüin tü taluwataakalü anain naya, aijeena tapüla na nooʼuliwoʼukana süpüla kaʼikat süpüshuaʼa. 7 »Nnojotsü puchuntajatüin sümaa mojutuyaain pümüin nünülia Jeʼwaa chi Pümaleiwasekai. Na eekana naainjain tia süsaleena nutuma Jeʼwaa.
w89 11/15 6 püt. 1
¿Kasa shikirajaka anain waya tü Poloosükat Pütchi nuluwataakalü anain Jeʼwaa?
Tü palajatkalüirua pütchi nuluwataakat Jeʼwaa süküjain wamüin tü waaʼinrajatkat süpüla anainjatüin wakuwaʼipa noʼuluʼu Jeʼwaa. (Palajatkat) Nuchuntuin wamüin Maleiwa waʼwaajüinjachin nia nümüiwaʼa (Mateo 4:10). (Piama) Na wayuu aʼyataakana nümüin Maleiwa, nnojoishii kamaleiwaseyaainjanain (1 Juan 5:21). (Apünüin) Kojutuinjatü wamüin tü nünüliakat Maleiwa waneepia (Juan 17:26, TNM; Roma 10:13, TNM). (Pienchi) Shia waaʼinmaainjatka maʼin aʼyatawaa nümüin Jeʼwaa. Waaʼinrüle tia, eemeraweena waya suulia tü wanee aʼyatawaakalüirua (Hebreokana 4:9, 10).
(Éxodo 20:8-11) »Soto paaʼin nnojoluinjatüin paainjain kasa saawanoʼuwai süka nüneeküin Jeʼwaa tia kaʼikat nüpüla niakai. 9 Eesü aipiruasü kaʼi süpüla piʼyataainjachin otta süpüla paaʼinrüinjatüin tü waneirua kasa choʼujaakat pümüin, 10 eekajasaʼa tü akaratshikat kaʼi saawanoʼuwai nümüinjatü Jeʼwaa chi Pümaleiwasekai. Nnojoishi pia aʼyataainjachin soʼu kaʼikat tia. Nnojotsü kasainjatüin niʼyataain anain chi püchonkai, tü püchonkat, nnojotsü kasainjatüin saainjain tü püchepchiakat jee chi püchepchiakai, tü pümünüinkalüirua otta müsia waneirua wayuu antaka suluʼumüin puumain. 11 Süka jamüin, naainjain Jeʼwaa soʼu aipirua kaʼi tü sirumatuʼukat, tü mmakat, tü palaakat otta süpüshuaʼa tü kasa eekat saaʼu. Aluʼuinjaʼa noʼu chi akaratshikai kaʼi, eemeraashi nia. Müsüjeseʼe pülashoʼuin tü akaratshikat kaʼi nutuma Maleiwa.
(Éxodo 20:12-17) »Kojutu pümüin chi püshikai otta tü piikat süpüla piʼrüinjachin watta saalii juya yaa saaʼu tü mma naapüinjatkat pümüin Jeʼwaa chi Pümaleiwasekai. 13 »Nnojo puʼutuin saaʼin wayuu. 14 »Nnojo pümaʼüjiraain pukuwaʼipa. 15 »Nnojo puʼluwajüin. 16 »Nnojo püküjain alawaa süchiki wayuu püsakinnüle anain süchiki wanee kasa. 17 »Nnojotsü keeʼireeinjatüin paaʼin nipia wanee wayuu. Nnojotsü keeʼireeinjatüin paaʼin nuʼwayuuse wanee wayuu. Nnojo keeʼireein paaʼin tü nüchepchiakat jee chi nüchepchiakai, chi nüpaaʼasekai, chi nüpüliikusekai otta müsia kasayaakaijeʼe eein nümaʼanain chia wayuukai.
w89 11/15 6 püt. 2, 3
¿Kasa shikirajaka anain waya tü Poloosükat Pütchi nuluwataakalü anain Jeʼwaa?
(Jaʼrai) Jaa müle na tepichikana namüin na kachooinkana naya, alanaʼaleesia tia suulialeʼeya wanee kasa otta eesü kottirawaa sutuma. Müle sukuwaʼipa natuma, eʼreena naya kasa anasü nutuma Jeʼwaa. Aneerü maʼin wakuwaʼipa jaa müle waya sümüin tia pütchikat, chi wayuu aaʼinrakai tia, eʼreechi nia kasa anasü otta eʼreechi nia miyoʼuwaa yaa saaʼu tü mmakat (Éfeso 6:1-3). Maaʼutpünaa yaa, jaa müle na jimaʼaliikana jee na majayünnüükana sümaa pütchikat tia, nnojoleena naya outuin sajaʼttüinjatpa oʼu kasakalüirua süpüshuaʼa (2 Timoteo 3:1; Juan 11:26).
Aire wapüla wayuu nnojoleerü waaʼinrüin kasa mojusü namüin maʼaka saaʼin (Aipirua) woʼutuin naaʼin, (Akaratshi) wamaʼüjiraain wakuwaʼipa namaa, (Mekiisat) waʼluwajüin tü kasa namaʼanakat otta (Mekietsat) waküjale alawaa namüin (1 Juan 3:10-12; Hebreokana 13:4; Éfeso 4:28; Mateo 5:37; Proverbios 6:16-19). Eejüinjatü waaʼin suulia tü suchuntaakat waaʼin. Saashin tü pütchi (Poloo) nuluwataakalü anain Jeʼwaa, wuleinjatü tü kasa suluʼukat waaʼin noʼuluʼu Maleiwa (Proverbios 21:2).
Püchajaa süchiki kaaʼürüi suluʼu tü Wiwüliakat
(Éxodo 19:5, 6) Joonoole sümaa tü tanüikikat jee kojutule jümüin tü pütchi tapansaajakat jümaa, jieena tapueuloseka saʼakajee wayuu süpüshuaʼa süka tayain kakoroloin tü mmakat. 6 Otta aluwataainjana jia, sacerdooteinjana otta wuleinjatü jukuwaʼipa tatuma›. Müinjatü pünüiki namüin na israeliitakana».
(Éxodo 20:4, 5) »Nnojo pukumajüin wanee maleiwayaasü makalü aka saaʼin tü kasa chakalü iipünaa, tü yaakat yaa mmapaʼa otta tü shirokukat palaa. 5 Nnojo püsapainkain pia sümülatuʼu tia jee nnojo puuʼulaain pimeʼejünüin aaʼin süpüla puʼwaajüin shia, süka jamüin, tayakai Jeʼwaa, taya wanee Maleiwa achuntakai tayainjachin aʼwaajünüin tamüiwaʼa. Kaainjarale wanee wayuu tamüin, süsalashii tatuma na nüchonniikana, na nüikeyuukana jee nachonnii na nüikeyuukana na üttakana aaʼin tanain.
Wetsiikulo aashajeʼennajatka
(Éxodo 19:1-13) Soʼu tü apünüinkat kashi nojuʼitaka oʼu na israeliitakana chejee Egiptojee. Soʼu kaʼikat tia, antüshii naya süpaʼa tü isashiikat Sinaí. 2 Ojuʼitüshii naya suluʼujee tü mmakat Refidim, nantakalaka chaa eere tü isashiikat Sinaí. Yalainnajaʼa naya shiʼipoʼujee tü uuchikat. 3 Nüliikajaakalaka Moisés süpüla naashajaainjachin nümaa chi Maleiwa shiimainshikai. Neenajüin nia Jeʼwaa chejee saaʼu tü uuchikat, nümakalaka nümüin: «Müinjatü pünüiki namüin na nuuʼuliwoʼukana Jacob otta namüin na israeliitakana: 4 ‹Aashin jiʼrüin tü kasa taainjakat namüin na egipciokana. Taainjain shia süpüla müinjanain talüʼüjakai jaaʼin saaʼu sütüna wanee warulapai süpüla tantirüinjanain jia tanainmüin. 5 Joonoole sümaa tü tanüikikat jee kojutule jümüin tü pütchi tapansaajakat jümaa, jieena tapueuloseka saʼakajee wayuu süpüshuaʼa süka tayain kakoroloin tü mmakat. 6 Otta aluwataainjana jia, sacerdooteinjana otta wuleinjatü jukuwaʼipa tatuma›. Müinjatü pünüiki namüin na israeliitakana». 7 Nüshakatakalaka Moisés jee nuutkajeʼeraka na laülaashii chajanakana Israel otta nüküjakalaka namüin süpüshuaʼa tü nümakat Jeʼwaa nümüin. 8 Süchikijee tia, anuukalaka nanüiki napüshuaʼa na israeliitakana: «Süpüshuaʼa tü nümakat wamüin Jeʼwaa, waaʼinreerü shia». Nuʼunuichikalaka Moisés eemüin Jeʼwaa süpüla nüküjainjatüin tü namakat na israeliitakana. 9 Anuujeseʼe nünüiki Jeʼwaa nümüin Moisés: «Anteechi taya pünainmüin saʼaka wanee siruma kojosü maʼin süpüla naapüinjanain na israeliitakana tü tamakat pümüin otta süpüla jaa müinjanain naya sümüin tü pümakat namüin». Nüküjakalaka Moisés tü sümakat tü pueulokot nümüin Jeʼwaa. 10 Anuujeseʼe nünüiki Jeʼwaa mapa nümüin: «Puʼuna eemüin na israeliitakana jee wule putuma naya soʼukai otta wattaʼa. Nashijaainjatü tü nasheʼinkat. 11 Soʼu tü apünüinkat kaʼi yapainjana naya, süka jamüin, ashakatüinjachi Maleiwa chejee iipünaajee süpüla nüntüin eemüin tü uuchikat Sinaí noʼupala napüshuaʼa na israeliitakana. 12 Piʼitaainjatü wanee sülüjüle tü uuchikat jee müinjatü pünüiki namüin mayaa: ‹Nnojo jüʼliikajaain saaʼumüin tü uuchikat otta nnojo jiʼitaain juuʼui sotpünaa tü uuchikat. Chi wayuu eekai nipettüin tü uuchikat, outajachin nia. 13 Nnojoishi jipettüinjachin chi wayuu aaʼinrakai tia, jüʼinaʼalüinjachi nia süka ipa outaleepa nia jee shiale jütküin nia süka jatü, jaʼitasü mürüʼlüin jee wayuule nia, shiimain outajachin nia, nnojotsü katüinjatüin noʼu›. Shiʼyalajinnapa tü suʼuwakat anneerü, arütkaainjana na israeliitakana sünainmüin tü uuchikat».
AKOOSÜTOʼU 31–SETTIENPÜROʼU 6
KOROLO KOJUTUSÜ SULUʼUKA TÜ WIWÜLIAKAT | ÉXODO 21, 22
«Kojuta wamüin tü kataakalü oʼuu maʼaka kojutuin shia nümüin Maleiwa»
(Éxodo 21:20) »Niʼyaajüle wanee wayuu süka wunuʼu chi nüchepchiakai jee shiale tü nüchepchiakat jee outule naya suluʼujee tia, pasalaainjana naya atumawaa.
it-1 1028
Aʼyaatünaa
Wanee wayuu hebreo eekai kachepchieein eeshi süpüla niʼyaatüin chi nüchepchiakai jee shiale tü nüchepchiakat süka wanee wunuʼu. Naaʼinrüinjatü shia nnojoliire jaa namüin jee neʼrüliire wayumüin. Müleka outule chi achepchieekai süchikijee niʼyaajünüin pasalaawainjachi atumawaa. Akaajasaʼa müleka outule chi achepchieekai wanee kaʼi süchikijee jee piama shiale, eeshijaʼa nnojoire nuʼuteein aaʼin nia chi nülaamainkai. Wanaa sümaa niʼyaatünüin chi achepchieekai nutuma chi nülaamainkai shia süka niyaʼlajüin nia. Chi wayuu eekai kachepchiain nnojoishi nuʼuteein aaʼin wanee nüchepchia süka jamüin, naaʼinrüle shia müsüjaʼa aka saaʼin sümülouire tü nünneetsekat. Outule chi achepchieekai wanee kaʼi süchikijee jee shiale waneirua kaʼi, nnojotsü atüjaanüin aaʼu müleka shiale saaʼujee niʼyaajünüin nutuma chi nülaamainkai. Eekajasaʼa katüle noʼu chi achepchieekai wanee kaʼi süchikijee jee shiale piama kaʼi, nnojoishi jamajüinjachin atumawaa chi nülaamainkai (Éx 21:20, 21).
(Éxodo 21:22, 23) »Müleka natkaajiraale piamashii wayuu otta kaliale natuma wanee jierü eeka ipuoluin, sujutirüle chi süchonkai sümaa nnojolin outuin nia jee nnojoluin outuin shiaka, achekajüneerü nutuma chi suʼwayuusekai nümüin chi kaainjalashikai otta naapüinjatü tü namakat na laülaashiikana. 23 Akaajasaʼa outule chi süchonkai jee shiale shiaka, outajachi chi kaainjalashikai.
(Éxodo 21:28, 29) »Nusotunule wanee wayuu jee shiale wanee jierü nutuma wanee paaʼa jee outule naya, acheküshi nüʼinaʼanüinjachin chi paaʼakai süka ipa outaleepaʼaya nia otta müsia tü niʼirukukat nnojotsü ekünüinjatüin. Nnojoishi outajachin chi kapaaʼasekai nia. 29 Kiʼraichire chi paaʼakai sünain osotoo otta nnojoire nia jamüin nutuma chi kapaaʼasekai mayaapejeʼe naapinnatüjülin paala jee nusotule chi paaʼakai wanee wayuu jee shiale wanee jierü sümaa outuin naya nutuma, acheküshi nüʼinaʼanüinjachin chi paaʼakai süka ipa outaleepaʼaya nia. Müinjatia neʼe nukuwaʼipa atumawaa chi kapaaʼasekai nia.
w10 4/15 29 püt. 4
Nücheküin Jeʼwaa anainjatüin wakuwaʼipa
Tü Pütchi Aapünakat nümüin Moisés süküjain kasainjatüin aainjünüin nüka wanee mürüt müleka jamajüle wanee wayuu nutuma. Nüsotünüle wanee wayuu nutuma wanee paaʼa, chi kapaaʼasekai nia, nuʼutajachi aaʼin suulia sülanüin süchikuaʼa tia. Nnojotsü niküinjatüin tü niʼirukukat chi paaʼakai otta nnojotsü nüiküinjatüin shia. Sükajee tia, amülouisü nünneetse chi wayuukai. Eeshi nüsotüle chi paaʼakai wanee wayuu nnojoipejeʼe outuin chi wayuukai nutuma. ¿Kaseerü alataka nnojoire naaʼinmajüin chi kapaaʼasekai nia otta nuʼutataale naaʼin wanee wayuu? Acheküshi nuʼutunajachin aaʼin chi paaʼakai otta müshia chi kapaaʼasekai nia. Sükajee pütchikat tüü, ekirajünüshii na israeliitakana süpüla naaʼinmajüinjatüin tü namünüinkat (Éx. 21:28, 29).
Püchajaa süchiki kaaʼürüi suluʼu tü Wiwüliakat
(Éxodo 21:5, 6) ‹Ayateeshia taya aʼyataain nümüin chi talaamainkai süka alin nia tapüla, süka alin tapüla taʼwayuuse jee tachonnii›, nümüle wanee achepchiee kojuyatua, 6 nürütkeʼerüinjachi nia chi nülaamainkai nünainmüin chi Maleiwa shiimainshikai. Nücheʼinreechikalaka nia sünain tü miichoʼukat jee shiale sünain sot tü miichoʼukat otta nusoteetkalaka tü nücheʼekat süka wanee wutia. Sükajee tia, ayaawatüneerü aaʼu sünain nüchepchiainjachin nia süpüla kaʼikat süpüshuaʼa.
(Éxodo 21:14) Jashichijaale wanee wayuu jee nuʼutule naaʼin wanee wayuu yalejee süka naaʼin nümüiwaʼa, acheküshi nuʼutunajachin aaʼin chia wayuukaiyaa, jaʼitashi niʼyataain tamüin chayaa eere tü aʼajüleekat.
it-1 608 püt. 7
Suʼuwa anneerü
Tü pütchi sümakat Éxodo 21:14, aashajaasü süchiki nuʼutunajachin aaʼin wanee sacerdoote müleka nuʼutule naaʼin wanee wayuu jee eesü shiale saashajaain achiki outajachinya neʼe wanee wayuu jaʼitashi naapaain suʼuwa tü anneetkat chaa eere nuʼwaajünüin chi Maleiwakai, ayatajachia outuin nia (anasü paashajeʼerüle 1Re 2:28-34).
Wetsiikulo aashajeʼennajatka
(Éxodo 21:1-17) »Anuu sooʼomüin tü taluwataakalü anain naya süpüla püküjain namüin: 2 »Müleka piyaʼlajüle wanee achepchiee hebreo, aʼyataainjachi pümüin soʼu aipirua juya, acheküshi nuʼunajachin nipialuʼumüin soʼu tü akaratshikat juya otta nnojoishi nia awalaajüinjachin saaʼu tia. 3 Müleka nüntüshire nümüiwaʼa, ayatüinjachia oʼunuin nümüiwaʼa. Akaajasaʼa nüntüshire sümaa kaʼwayuusein nia, oʼunajatü tü nuʼwayuusekat nümaa süchikuaʼa. 4 Müleka saapünüle wanee jierü nümüin chi achepchieekai nutuma chi nülaamainkai otta kachontaale shia nutuma, nnojotsü oʼunajatüin shia nümaa otta na süchonniikana süka niain laülaain naaʼu chi nalaamainkai. Acheküshi nuʼunuin nümüiwaʼa chi achepchieekai. 5 ‹Ayateeshia taya aʼyataain nümüin chi talaamainkai süka alin nia tapüla, süka alin tapüla taʼwayuuse jee tachonnii›, nümüle wanee achepchiee kojuyatua, 6 nürütkeʼerüinjachi nia chi nülaamainkai nünainmüin chi Maleiwa shiimainshikai. Nücheʼinreechikalaka nia sünain tü miichoʼukat jee shiale sünain sot tü miichoʼukat otta nüsoteetkalaka tü nücheʼekat süka wanee wutia. Sükajee tia, ayaawatüneerü aaʼu sünain nüchepchiainjachin nia süpüla kaʼikat süpüshuaʼa. 7 »Nuiküle wanee wayuu tü nüchonkat süpüla achepchieein shia, nnojoleerü taashin shia maʼaka naaʼin wanee achepchiee toolo. 8 Müleka nnojorüle nuʼwayuusein shia chi sülaamainkai süka nnojoluin nücheküin shia jee niyaʼlajeere shia wanee wayuu naatakai oumain, nnojotsü nuikajatüin shia nümüin süka jamüin, nnojoluin nikeraajüin nünüiki. 9 Naapüle tü nüchepchiakat süpüla nuʼwayuuseinjatüin shia wanee nüchon, wanaawainjatü sujutu nümüin maʼaka sujutu wanee nüchon. 10 Müleka kawalaʼatale shia nutuma, ayatüinjatia naapüin sümüin tü palajatkat nuʼwayuuse tü shiküinjatkat, tü süsheʼinjatkat otta ainkaainjachi nia sümaa. 11 Nnojorüle naapeein tia apünüinsükat kasa sümüin, taasheerü shia sümaa nnojoluin suwalaajüin nneerü. 12 »Chi wayuu oʼutakai naaʼin wanee yalejee, acheküshi nuʼutunajachin aaʼin. 13 Akaajasaʼa nuʼutule naaʼin sümaa nnojoluin naaʼinjeein shia otta nuuʼulaale chi Maleiwa shiimainshikai sülatüin tia, eeshi süpüla nuʼunuin eemüinre taküjainjatüin pümüin. 14 Jashichijaale wanee wayuu jee nuʼutule naaʼin wanee wayuu yalejee süka naaʼin nümüiwaʼa, acheküshi nuʼutunajachin aaʼin chia wayuukaiyaa, jaʼitashi niʼyataain tamüin chayaa eere tü aʼajüleekat. 15 Chi wayuu aʼyaatakai nüshi jee shiale nii, acheküshi nuʼutunajachin aaʼin. 16 »Chi wayuu eekai ataʼülüin wanee wayuu sümaa nuiküin nia jee nüntünüle aaʼu sünain aaʼinraa tia, acheküshi nuʼutunuinjachin aaʼin. 17 Chi wayuu oʼulejakai nüshi jee nii, acheküshi outajachin nia.