EKIRAJAAYA 01
¿Aneetche pukuwaʼipa sutuma tü sümakat tü Bibliakat?
Wainma na wayuu atüjaweekana saaʼu süchiki tü nakuwaʼipakat. Natüjawee aaʼu jamüin müliaka wayuu, jamüin outaka wayuu jee kaseerüin alatüin mapeena. Shapaasia naaʼin saaʼu tü choʼujaakat namüin, maʼaka saaʼin tü naapüinjatkat sümüin napüshi jee natüjawee aaʼu tü naaʼinrajatkat süpüla anajiraain naya sümaa napüshi. Wainma na wayuu ousütakana suluʼu tü Bibliakat süchiki tü natüjaweekalü aaʼu jee süküjainya namüin tü anakat süpüla naaʼinrüin. ¿Eesüche süpüla anain nukuwaʼipa wanee wayuu sutuma tü sümakat tü Bibliakat?
1. ¿Jarat tü waneirua kasa pütüjaajeetka aaʼu sünainjee tü sümakat tü Bibliakat?
Anuu waneirua kasa pütüjaajeetka aaʼu sünainjee tü sümakat tü Bibliakat: Jamakuwaʼipaliin waya, kasapülajanain eeka waya, kasain müliaka anainjee wayuu otta nnojoluin sujuʼitüin naaʼin wanee wayuu outapa nia. Mayaainjeʼe shiain süchajaain achiki wayuu anajirawaa, ¿jamüsü joutka atkawaa? ¿Ajaʼttinneetche tü Mmakat? Puusüteerü anain suluʼu tü Bibliakat tü pütüjaweekalü aaʼu. Wainma na wayuu atüjaainnapakana saaʼu tia.
2. ¿Kasa süküjaka wamüin tü Bibliakat süpüla anainjatüin wakuwaʼipa?
Wainma pütchi anasü süküjaka wamüin tü Bibliakat. Süküjain wamüin tü waaʼinrajatkat süpüla anainjatüin wakuwaʼipa sümaa wapüshi. Tü waaʼinrajatkat süpüla nnojoluin shapaain maʼin waaʼin jee anainjatüin waaʼin sümaa waʼyataain. Sümaʼinruʼu wekirajaain sünain karaloʼutakat tüü, pütüjaajeerü aaʼu tü sümakat tü Bibliakat süpüla anainjatüin pukuwaʼipa otta süchiki waneirua kasa. Piyaawateetka saaʼu «jaloulin» wamüin süpüshuaʼa tü sümakat tü Bibliakat (2 Timoteo 3:16, TNM).
Karaloʼutakat tüü, nnojotsü shiain tü Bibliakat, ashajuushi sünainjee süpüla piyaawatüinjatüin saaʼu tü sümakat tü Bibliakat. Paashajeʼera süpüshuaʼa tü wetsiikulo ashajünakat sünain tü ekirajaayakat. Jülüja paaʼin pansaale shia sümaa tü pikirajaakalü anain.
WEKIRAJAA SOOʼOMÜIN
Wekirajaa süchiki tü naaʼinrakat waneinnua wayuu süpüla anain nakuwaʼipa sutuma tü sümakat tü Bibliakat. Wekirajaa sünain tü waaʼinrajatkat süpüla kamalainjatüin wamüin waashajeʼerüin tü Bibliakat otta jamüin anaka wekirajünüle süpüla wayaawatüin saaʼu tü sümakat.
3. Suʼunirüin wakuwaʼipa tü sümakat tü Bibliakat
Tü Bibliakat müsü aka saaʼin wanee luusa katchinka maʼin awarala, müsü sünakakai saaʼin tü wopukot wapüleerua. Eesü süpüla waashajeʼerüin tü sümakat süpüla watüjaain saaʼu tü anakat süpüla waaʼinrüin jee süpüla watüjaain saaʼu tü alatajateetkat mapeena.
Jaashajeʼera Salmo 119:105 otta yooto jia süchiki tüü:
¿Jamüsü nünüiki chi ashajakai Salmo süchiki tü Bibliakat?
¿Jamüsü pünüiki süchiki tü Bibliakat?
4. Süküjain wamüin tü Bibliakat tü watüjaweekalü aaʼu
Shiyaawata aaʼu wanee wayuu tü sütüjaweekalü aaʼu sükajee tü sümakat tü Bibliakat, kakaliairü shia sümaa sütüjaweein saaʼu tia. Jünaja tü VIDEOKOT otta yooto jia süchiki tüü:
¿Kasa sütüjaweeka aaʼu tü wayuu weʼrakat suluʼu tü videokot?
¿Kasa anasü shiʼraka sünainjee shikirajaain sünain tü Bibliakat?
Süküjain wamüin tü Bibliakat wasakirüinjanain süchiirua wanee kasa watüjaweekalü aaʼu. Jaashajeʼera Mateo 7:7, 8 otta yooto jia süchiki tüü:
¿Süküjeetche pümüin tü Bibliakat süchiki tü kasa pütüjaweekalü aaʼu? Püküja süchiki waneirua kasa pütüjaweekalü aaʼu.
5. Kamalainjeerü pümüin paashajeʼerüin tü Bibliakat
Wainma na wayuu kamalainkana amüin naashajeʼerüin tü Bibliakat jee anasü nakuwaʼipa sünainjee naaʼinrüin tü sümakat. Jünaja tü VIDEOKOT otta yooto jia süchiki tüü:
¿Jamüsü nanüiki süchiki aashajeʼeraa tü Bibliakat na tepichi weʼrakana suluʼu tü videokot?
¿Kasa naaʼinraka süpüla kamalainjatüin namüin naashajeʼerüin tü Bibliakat?
Katsüinsü waaʼin sutuma tü sümakat tü Bibliakat otta süküjain wamüin tü kasa anasü eeinjatkat mapeena. Jaashajeʼera Roma 15:4 otta yooto jia süchiki tüü:
¿Pücheküin pütüjeein sooʼomüin tü sümakat tü Bibliakat süchiki tü kasa akatchinrakat waaʼin otta süchiki tü kasa anasü eeinjatkat mapeena?
6. Wayaawateerü saaʼu tü sümakat tü Bibliakat wekirajünüle sünain
Eesü süpüla waashajeʼerüin tü Bibliakat wamüiwaʼa, anapejeʼe maʼin wekirajünüle sünain. Jaashajeʼera Aluwataaushikana [Hechos] 8:26-31 otta yooto jia süchiki tüü:
¿Kasa choʼujaaka wamüin süpüla wayaawatüin saaʼu tü sümakat tü Bibliakat? (Jaashajeʼera süchikuaʼa wetsiikulokot 30 otta 31).
Ekirajünüinjachi sünain tü Ashajuushikat chi wayuu chejeʼewaikai Etiopía. Müinjatia wakuwaʼipa, ekirajünüinjana waya sünain tü Bibliakat.
EESHII WAYUU EEKAI NAMÜIN: «Amüla neʼe ekirajawaa sünain tü Bibliakat».
¿Jamüsüjaʼa pünüiki süchiki tia?
WATÜJAAITPAKA AAʼU
Süküjain wamüin tü Bibliakat pütchi anainjatka atuma wakuwaʼipa, tü watüjaweekalü aaʼu, tü kasa anasü eeinjatkat mapeena otta sükatchinrüin waaʼin.
Pusouta shiʼipajee
¿Kasa pütchi anasü süküjaka wamüin tü Bibliakat süpüla anainjatüin wakuwaʼipa?
Süküjain tü Bibliakat süchiki waneirua kasa sütüjaweekalü aaʼu wayuu, püküja süchiki süpüshi tia.
¿Kasa pütüjaweekalü aaʼu sünainjee tü sümakat tü Bibliakat?
PÜNAʼLA SOOʼOMÜIN
Jalouisü wamüin maaʼulu tü sümakat tü Bibliakat.
«Jalouijeerü waneepia tü sümakat tü Bibliakat» (Aapiria Wayuu, nuum. 1, 2018)
Eeʼiratüsü nukuwaʼipa wanee wayuu manüleʼupuʼukai jee mmoleʼepuʼukai jintüliiwaʼaya nia.
Süküjain wamüin tü Bibliakat tü waaʼinrüinjatkat süpüla anain wakuwaʼipa sümaa wapüshi.
«12 kasa talateetka atuma paaʼin sümaa püpüshi» (¡Eeja Waaʼin!, nuum. 2, 2018)
Süpansaajüin tü Bibliakat jaralin chi aluwataakai maaʼutpünaa.
¿Jamüshii wekirajaainjanaka sünain tü Bibliakat? (video miyoʼu) (3:14)