EKIRAJAAYA 15

Jaʼyainjatü paaʼu shiimain pünüiki

1 Tesalónica 1:5

PÜTÜJAINJATKA APÜLEERUA: Jaʼyainjatü paaʼu punoujain sünain tü shiimainkat otta kojutuin maʼin tü pümakat.

Ekirajaainjachi maʼin pia. Pikirajaa sünain tü pütchikat otta piyaawata saaʼu jamüin shiimainka shia saashin tü Bibliakat. Puuʼulaka süka pütchi eekai mapüleein tü pütchi anakat maʼin sünainjee tü pikirajakat. Shia jülüja paaʼin jamüin aneetka nakuwaʼipa na aapajüshiikana sutuma. Puchunta nümüin Maleiwa naapai tü nüpülainkat pümüin.

Pikirajaainjachipa sünain tü pünüikinjatkat, emetuluinjatü putuma süpüla pütüjaain saaʼu kasain paashajaainjatüin achiki otta punoutuin wanee kasa sünain.
Pikiraja süka pütchi eeʼiyataka shiimain pünüiki. Pikiraja sükajee pünüiki suulialeʼeya shiain paashajeʼerüin tü pütchi yalakat ashajünüin. Püküja pütchi jaʼyaka atuma paaʼu shiimain tü pümakat.
Nnojoishi pia emeeʼerajaainjachin otta lotuinjatü pünüiki. Emetuluinjatü pünüiki, nnojotpejeʼe airuʼuluinjatüin shia otta piirakaa namüin na aapajüshiikana.

Nnojoishi pia jashichinjachin, nnojotsü müinjatüin nnojoluyaakai saaʼin jamajatüin pümüin nakuwaʼipa na waneinnua. Jaʼitakajeʼe püküjainjatüle wanee kasa naaʼinrajatka na wayuukana, kamaneeinjachi pia sünain püküjain tia.