Aʼyataashii na laülaashiikana süpüla talatüinjatüin waaʼin

1. ¿Kasa talataka atuma naaʼin Pablo?

SOʼU JUYAKA 55 soʼu wakalia, chashi chi aluwataaushikai Pablo suluʼu tü mmakat Troas sümaa shapaain naaʼin naaʼu na nuwalayuu chakana Corinto. Naapa achikit naʼülüjiraain. Süka alin naya nüpüla maʼaka naaʼin wanee wayuu aikai apüla nüchonnii, nüshajüin wanee karaloukta namüin süpüla nüchiajaain naya (1 Cor. 1:11; 4:15). Nüjütaka Tito, chi naʼaleewainkai sünain alapalawaa naaʼu, nüntiraainjachika nümaa chayaa Troas süpüla nüküjüin tü alatakat chayaa Corinto. Eetaayaai nüntiraain nümaa Tito. ¿Kasakaʼa naainjüin Pablo? Oʼunüshi nia Macedoniamüin. Nüntiraaka chayaa nümaa Tito otta nüküjaka nümüin Pablo tü alatakat. Anashiisü namüin na anoujüshiikana tü nüshajakat Pablo otta neʼreein nia nüchikuaʼa. Talatshi maʼin Pablo süka naapüin tia pütchikat (2 Cor. 2:12, 13; 7:5-9).

2. (1) ¿Jamüsü nünüiki Pablo namüin na corintojeʼwaliikana süchiki tü nanoulakat jee tü talataakalü aaʼin? (2) ¿Kaseerü wekirajaaka anain?

² Süchikijee tia, nüshajüin Pablo tü chiiruaajatkat karaloukta, müshi nia: «Nnojoishii waya aluwataain saaʼu tü junoulakat, aʼyataashii waya süpüla talatüinjatüin jaaʼin süka jüchecherüin jaaʼin sutuma kanoulain jia» (2 Cor. 1:24, NM). ¿Jamaluʼulu nünüiki Pablo? ¿Kasa shikirajaka anain tia na laülaashiikana suluʼu tü outkajaaleekat?

KANOULASHII WAYA JEE TALATSÜ WAAʼIN

3. (1) ¿Jamüshi nümaka Pablo: «Nnojoishii waya aluwataain saaʼu tü junoulakat»? (2) ¿Kasa naainjaka na laülaashiikana süpüla nashatüin nukuwaʼipa Pablo?

³ Aashajaashi Pablo süchiki piamasü kasa sünainpünaaka maʼin waʼyataain nümüin Maleiwa: shia kanoulain waya jee talatüin waaʼin. Müshi nia süchiki tü wanoulakat: «Nnojoishii waya aluwataain saaʼu tü junoulakat [...] süka jüchecherüin jaaʼin sutuma kanoulain jia». Nütüjaa aaʼu Pablo noonooin nümaa Maleiwa na anoujüshii chakana Corinto sutuma kanoulain naya; nnojotsü shiain nutuma niakai otta waneeirua wayuu. Nnojotsü choʼujaain nuluwataain saaʼu nanoula na nuwalayuukana otta niyoukta achikit tia süka nütüjaain saaʼu naainjeein kasa anasü (2 Cor. 2:3). Müshiʼiya na laülaashiikana suluʼu tü outkajaaleekat: natüjaa aaʼu kanoulain na nawalayuukana otta jamüin naʼyataweeka nümüin Maleiwa (2 Tes. 3:4). Nnojoishii naluwataain sünain wanee kasa nnojotka suluʼujeejatüin tü Wiwüliakat, shia naainjaka tü sümakat tü nupueulosekat Jeʼwaa. Nnojoishii naya aluwataain saaʼu nanoula na nawalayuukana (1 Ped. 5:2, 3).

4. (1) ¿Jamüshi nümaka Pablo: «Aʼyataashii waya süpüla talatüinjatüin jaaʼin»? (2) ¿Kasa keeʼireeka naaʼin na laülaashiikana?

⁴ Müshi Pablo nüchikuaʼa: «Aʼyataashii waya süpüla talatüinjatüin jaaʼin». Aashajaashi Pablo nüchiki niakai otta nachiki na wayuu aʼyataajiraakana nümaa. ¿Jamüsü watüjaaka saaʼu tia? Müsü nünüiki suluʼu tia karalouktakat nachiki piamashii wayuu aʼyataajiraakana nümaa: «Tayakai Pablo nümaa Silas je Timoteo, shiimüin sünain lotüin wanüiki [nüchiki] Jesucristo chi Nüchonkai Maleiwa wekirajakai achiki jümüin» (2 Cor. 1:18, 19). Wanaa sümaa «aʼyataashii waya» nümüin Pablo, eejana nümaa waneeinnua wayuu maʼaka naaʼin Apolos, Timoteo, Tito otta Áquila sümaa Priscila (Roma 16:3, 21; 1 Cor. 3:6-9; 2 Cor. 8:23). Wanaa sümaa nümüin Pablo: «Aʼyataashii waya süpüla talatüinjatüin jaaʼin», shia nüküjeeka achiki keeʼireein naaʼin niakai otta na nümaajanakana nükaaliinjeein na nuwalayuukana süpüla talatüinjatüin naaʼin. Müshiʼiya na laülaashiikana, shia keeʼireeka maʼin naaʼin nakaaliinjüin na nawalayuukana süpüla ‹talatüinjatüin naaʼin sünain aʼyatawaa nümüin Jeʼwaa› (Sal. 100:2, NM; Filip. 1:25).

5. ¿Kasa wekirajaainjatka anain? ¿Kasa tü jülüjüinjatkat waaʼin?

⁵ Asakinnüshii jekenainka waneeinnua wawalayuu aküjakana maʼin pütchi. Münüshii naya: «¿Kasa naainjaka jee nüküjaka pümüin wanee laülaashi süpüla nütalateʼerüin paaʼin?». Sümaʼinruʼu wekirajaain sünain tü namakat, ¿jamüsüjeʼe pünüiki piale asakinnüin? Jülüjeesü waaʼin tü waaʼinrajatkat süpüla watalateʼerüin naaʼin na wawalayuukana.a

TASAKÜIN PÉRSIDA KOJUTKAT MAʼIN TATÜMA

6, 7. (1) ¿Kasa naainjüinjatka na laülaashiikana süpüla nashatüin nukuwaʼipa David, Elihú otta Jesuu? (2) ¿Jamüshii talataka na wawalayuukana suchuntünüle nanülia?

⁶ Naashin noʼutku na wawalayuukana, talatsü maʼin naaʼin müleka kamaneere maʼin na laülaashiikana namüin. Naainjüin tia na laülaashiikana wanaa sümaa nashatüin nukuwaʼipa David, Elihú otta Jesuu (paashajeʼera 2 Samuel 9:6; Job 33:1 otta Lucas 19:5). Nounejüin na wayuukana süka nanülia. Anasü maʼin nümüin Pablo sotuin naaʼin sümaa nuchuntüin nanülia na nuwalayuukana. Sajaʼttiamüin tü karaloukta nuluwataakat namüin na romajeʼewaliikana, nuchuntüin süka nanülia maʼaka piama shikii jaʼralimüin wawalayuu. Müshi nia: «Tasaküin [...] Pérsida kojutkat maʼi tatüma» (Roma 16:3-15).

⁷ Eeshii na laülaashii motowaikana aaʼin nanülia na nawalayuu noutkajaakana amaa. Natüjaale saaʼu kasaichin nanülia na wawalayuukana waneʼewai nakua, müshii namakai namüin: «Kojutshi pia tamüin» (Éx. 33:17). Talateerü maʼin naaʼin na wawalayuukana suchuntünüle nanülia natuma na laülaashiikana nayalerapa najapü sünain ekirajawaa sünain tü rewiisütakat Aapiria Wayuu jee shiale sünain wanee outkajawaa (puʼwanaajireʼera sümaa Juan 10:3).

TÜTÜSÜ MAʼIN SÜNAIN AʼYATAWAA NÜMÜIN CHI SENYOTKAI

8. ¿Kasa nüshataka anain Pablo nukuwaʼipa Jeʼwaa nümaa Jesuu?

⁸ Wanee sukuwaʼipa süpüla watalateʼerüin naaʼin na wawalayuukana shia anale wanüiki namüin saaʼu tü kasa naainjakat, maʼaka naainjüin Pablo. Naainjüin tia wanaa sümaa nümüin suluʼu tü chiiruaajatkat karaloukta nüshajaka namüin na corintojeʼewaliikana: «Aʼwaataashi taya suluʼu jukuaippa» (2 Cor. 7:4). Atütülaasü naaʼin na corintojeʼewaliikana sutuma tia pütchikat. Nnojoliipejeʼe nayain neʼe namüiwaʼa nümaka amüin Pablo (Roma 1:8; Filip. 1:3-5; 1 Tes. 1:8). Süchikijee nüsaküin Pérsida, müshi nia: ‹Tütüsü maʼi sünain aʼyatawaa nümüin chi Senyotkai› (Roma 16:12). ¡Talatakajasaʼa maʼin shia sutuma tia pütchikat! Shia nüshataka Pablo nukuwaʼipa Jeʼwaa nümaa Jesuu (paashajeʼera Marcos 1:9-11 otta Juan 1:47; Alat. Map. 2:2, 13, 19).

9. ¿Jamüsü sütalatalaaka waaʼin sutuma waküjüin jee süküjünüin wamüin wanee pütchi analuʼut?

⁹ Natüjaa aaʼu na laülaashiikana naküjüinjatüin namüin na nawalayuukana kojutüin naya namüin (Prov. 3:27; 15:23). Müshii namakai aaʼin namüin: «Kojutsü tamüin tü paainjakat süka kojutüin pia tamüin». Choʼujaasü maʼin natütüleʼennüin aaʼin na wawalayuukana natuma na laülaashiikana. Shiajaʼa namaka na wawalayuukana tü sümakat wanee wawala ataralüirü: «Nnojotsü jaralüin atalateʼerüin paaʼin eere piʼyataain. Shia neʼe jülüjaka naaʼin na wayuukana tü nakuwaʼipakat. Müsüjeseʼe talatüin maʼin taaʼin nüküjüle tamüin wanee laülaashi anain maʼin tü taainjakat suluʼu tü outkajaaleekat. Sükajee tia, tatüjaa aaʼu alin maʼin taya nüpüla Jeʼwaa». Eeshi wanee wawala epijüshi nümüiwaʼa piamashii nüchonnii, atütüleʼenüsüinka naaʼin nutuma wanee laülaashi. Anasü maʼin tia nümüin chi wawalakai, nümaka: «Sütalateʼerüin taaʼin tü nümakat tamüin». Naküjüle na laülaashiikana wanee pütchi analuʼut namüin na nawalayuukana, natütüleʼereerü naaʼin. Müle shia, nnojoleerü aʼleejaain naaʼin na wawalayuukana sümaa tü anoujaakat (Is. 40:31).

NIʼITAAIN JIA SÜPÜLA JAAʼINMAJÜIN NANOULA

10, 11. (1) ¿Kasa nashatüinjatka na laülaashiikana sünainjee nukuwaʼipa Nehemías? (2) ¿Kasa akaaliinjeenaka na laülaashiikana süpüla naküjüinjatüin wanee pütchi anasü nalapalaapa naaʼu wanee wawala?

¹⁰ ¿Kasa amaa naainjüinjatka na laülaashiikana süpüla nakaaliinjüin na wawalayuukana otta natalateʼereein naaʼin? Shia nachajaale sukuwaʼipa süpüla natalateʼerüin naaʼin na mojukana aaʼin (paashajeʼera Aluwataaushikana 20:28). Naainjüle tia, nashatüin nakuwaʼipa na laülaashii namaiwajanakana maʼaka naaʼin Nehemías. Saashin tü Wiwüliakat, nüchajaain sukuwaʼipa süpüla nütütüleʼerüin naaʼin na judíokana wanaa sümaa niʼrüin sümalajaain nanoula (Neh. 4:14). Müshiʼiya neʼe na laülaashiikana, nachajaain sukuwaʼipa süpüla natütüleʼerüin naaʼin na anoujüshii amalajaakana anoula. Makalaka nalapalaain naaʼu nepialuʼumüin, müleka anashiire shia, süpüla naküjüinjatüin namüin wanee pütchi anasü (Roma 1:11). ¿Kasa naainjüinjatka na laülaashiikana süpüla anain sukuwaʼipa tia?

¹¹ Süpülapünaa nalapalaain na laülaashiikana naaʼu wanee wawala, jülüjüinjatü naaʼin nukuwaʼipa chi wawalakai. Jülüjüinjatü naaʼin tüü: «¿Kasa alataka nümüin chi wawalakai? ¿Jamüinjatü tanüiki nümüin süpüla tatalateʼerüin naaʼin? ¿Jarat tü wersiikulo pansaakat sümaa nukuwaʼipa? ¿Aashajaasü tü Wiwüliakat nüchiki wanee wayuu alatakai amüin tia?». Jülüjüle tia naaʼin na laülaashiikana, aneerü maʼin nakuwaʼipa yootopa naya nümaa. Suʼunnaa tia, nooʼulaain yootuin na wawalayuukana otta jülüjüsü naaʼin tü namakat (Sant. 1:19). Müsü wanee wawala: «Atalatalaasü saaʼin wanee wayuu sutuma jülüjüin naaʼin wanee laülaashi tü sümakat» (Luc. 8:18).

12. ¿Jaralii na choʼujaakana amüin kaaliinwaa? ¿Jamüsü choʼujaaka shia namüin?

¹² ¿Jaralii na anakana süpüla alapalaanaa aaʼu? Müshi Pablo: ‹Ee mata jaaʼin saaʼu süpüshuaʼa tü anoujasükalüirua›. Atütüleʼennüinjatü naaʼin napüshuaʼa na wawalayuukana, jaʼitainna kakaliainnain naküjüin pütchi otta pürekutsoolüin naya. ¿Jamüsü choʼujaaka tia namüin na wawalayuukana? Süka eein süpüla süntüin nekiiruʼumüin iseerüin nachiki eejirawaa sümaa tü kasa mojusü joutkat maaʼulu. Alatsü tia nümüin David, chi aluwataaikai otta shikirajüin waya choʼujaain nakaaliinjünüin na wawalayuukana, jaʼitairü ichein nanoula.

ANTAMAATÜSHI ABISAI SÜPÜLA NÜKAALIINJÜIN DAVID

13. (1) ¿Jamüshi najachijünaka David nutuma Isbí-benob? (2) ¿Jamüshi nükaaliinjünaka David nutuma Abisai?

¹³ Süchikijee nüneekünüin David süpüla niainjachin aluwataain saaʼu Israel, ojuʼitaashi nia niʼipomüin Goliat chi suuʼuliwoʼukai wayuu miyoʼusenuu. Yalayala aaʼinchi David makalaka nuʼutüin naaʼin Goliat (1 Sam. 17:4, 48-51; 1 Crón. 20:5, 8). Shiasaʼa kojuya juya süchikijee tia, atkaashi David namaa na filisteokana, niʼipoloka nüchikuaʼa wanee wayuu miyoʼusenuu, Isbí-benob nünülia (2 Sam. 21:16; noota). Mayaapejeʼe yalayalain naaʼin David, ajachijünüshi nia nutuma Isbí-benob süka niʼrüin mapüsain maʼin nia. «Shiasaʼa nüntamaataka Abisai chi süchonkai Zeruyá süpüla nükaaliinjüin nia otta nuʼutaka naaʼin chi filisteokai.» (2 Sam. 21:15-17, NM.) Ouktataaichijeʼe David. ¡Talatakajasaʼa maʼin nia nümaa Abisai süka jülüjüin nia naaʼin otta süka nükaaliinjünüin nutuma! ¿Kasa shikirajaka anain waya tia?

14. (1) ¿Jara akaaliinjeenaka waya suʼunnaa tü kasa mojusü alatakat wamüin? (2) ¿Kasa naainjüinjatka na laülaashiikana süpüla natütüleʼerüin waaʼin? Püküja wanee shiyaawatia.

¹⁴ Ayatshiʼiya waya aküjüin pütchi sainküin mmaka süpüshuaʼa mayaapejeʼe numojujeʼereein wakuwaʼipa Satanaa otta na nümaajanakana. Eesü sülatüle wamüin kasa eekai kapüleein maʼin maʼaka saaʼin tü alatakat nümüin David. Nnojoishii waya akanajuuin sutuma tia süka eein wamaa Jeʼwaa. Akatsaʼa eein süpüla mapüsain waya sümaa mojuin waaʼin sutuma tü alatakat wamüin weinshi. Müle shia, eeshii süpüla wakanajuuin sutuma mayaapejeʼe nnojoluin maajapuʼuin waya sutuma. Sülatüle wamüin tia, nia eeka süpüla atütüleʼerüin waaʼin wanee laülaashi. Müsü sünüiki wanee pürekutsoot 65 suuyase: «Mojuwaisü taaʼin sümaa mapüsain taya sutuma taküjüin pütchi. Niʼraka wanee laülaashi müin takuwaʼipa, nükaaliinjaka taya. Nütütüleʼerüin taaʼin sükajee tü sümakat tü Wiwüliakat. Taainjüin tü nümakat müsüjeseʼe anain takuwaʼipa. Talatsü maʼin taaʼin süka eejüin naaʼin sünain tü alatakat tamüin sümaa nükaaliinjüin taya.» Anasü maʼin eere wamaa laülaashii eekai aipüraliin, kamaneein otta akaaliinjamaataka waya maʼaka naainjüin shia Abisai nüka David.

SÜPÜLAJATÜ JÜTÜJAAINJATÜIN SAAʼU SÜNAIN ALIN MAʼIN JIA TAPÜLA

15, 16. (1) ¿Jamüshi aika maʼin Pablo napüla na nuwalayuukana? (2) ¿Jamüshii aika maʼin wapüla na laülaashiikana?

¹⁵ Nnojotsü müin aka saaʼin ekaa roo aaʼinmajaa na wawalayuukana, wainma aʼyatawaa sünainpünaaka. Eesü siraale aika naaʼu na laülaashiikana sünain oʼuraajaa saaʼu tü alatakat namüin na wawalayuukana jee shiale sünain akaaliinjaa naya (2 Cor. 11:27, 28). Anapajaʼa maʼin natuma tü naʼyataainkat otta naainjüin shia süka süpüshuaʼa naaʼin. Shia nashataka nukuwaʼipa Pablo, müshi nia: «Yapashi taya süpüla takaalinjainjanain jia waneepia süka süpüshua taaʼin» (2 Cor. 12:15). Süka alin nüpüla na nuwalayuukana shia naaʼinmaaka nütütüleʼerüin naaʼin (paashajeʼera 2 Corinto 2:4; Filip. 2:17; 1 Tes. 2:8). ¡Shiajaʼa mata aikaʼa maʼin nia napüla! (Aluw. 20:31-38.)

¹⁶ Müshiʼiya wayakana, aishii wapüla na laülaashiikana otta waapüin tü analuʼutkat nümüin Maleiwa saaʼu eein naya wamaa. Atalatalaasü waaʼin sutuma kamaneein naya otta atütülaasü waaʼin sutuma nalapalaain waaʼu. Kojutsü maʼin wamüin nakaaliinjamaatüin waya wanaa sümaa mojuin waaʼin sutuma tü alatakat wamüin. Shiimain pütchikat tüü: ‹Aʼyataashii naya süpüla talatüinjatüin waaʼin›.