KEEMASÜ MAʼIN MMAPAʼAKAT

4 | Paaʼinmaa tü kasa anasü paʼatapajakat

¿JAMÜSÜ CHOʼUJAAKA TIA?

Sutuma shapaain maʼin waaʼin saaʼujee mojuin maʼin tü mmapaʼakat, eesü süpüla mojuin waaʼin jee ayuulin waya. Eesü jülüjale naaʼin na alatakana amüin kasa mojusü nnojoleerüin sunoutaain nakuwaʼipa watta kaʼi. ¿Kasa eeka sünainjee tia?

Eeshii na nnojoliikana jülüjeein aaʼin tü alateetkat mapeena.
Eeshii na asakana yootshi jee akamüjakana yüi suulia jülüjain naaʼin tia.
Eeshii na aküjakana süchiki nnojoluin kasain saamüin namüin katüin noʼu.

¿Pütüjaa aaʼu?

Eesüjaʼa süpüla sülatapünaain neʼe tü kasa mojusü piʼrakat, eesüjaʼa sunoutamaatüle tü kasa mojusü alatakat pümüin.
Nnojorüle sunoutaain tü kasa alatakat pümüin, eesü süpüla paaʼinrüin wanee kasa süpüla nnojoluin shapaain maʼin paaʼin.
Süküjain tü Bibliakat sajaʼttinneerüin tü kasa mojusükat mapeena.

¿Kasa paaʼinrajatka?

Tü sümakat tü Bibliakat: «Nnojo shapaain jaaʼin saaʼu tü kasa choʼujaajeetkat jümüin wattaʼa, eejeerü tü kasa shapaakalü atuma jaaʼin wattaʼaya. Wainmawai tü kasa alatakat wamüin soʼukaiwai» (Mateo 6:34).

Nnojo paaʼinmaain maʼin tü alateetkat pümüin mapeena suulia nnojoluin paaʼinrüin tü eekat süpüla paaʼinrüin maaʼulu.

Shapaale paaʼin saaʼu tü eekat süpüla sülatüin, shapaʼaleejeeria maʼin paaʼin jee nnojoleerü jülüjain paaʼin sunoutaajeerüin tü kasa mojusü alatakat.

¿Kasa eeka süpüla paaʼinrüin? Anuu waneirua kasa

PAAʼINMAA KASA EEKAI ANAIN

Tü sümakat tü Bibliakat: «Mojusü waneepia nukuwaʼipa chi mojukai aaʼin, akaisaʼa chi talatakai aaʼin, eesü ekawaa nümaʼana waneepia» (Proverbios 15:15). Paaʼinmaale maʼin tü kasa mojusü alatakat pümüin, eesüjaʼa süpüla nnojoluin piyaawatüin saaʼu eein süpüla punoutuin shia. Eekajasaʼa jülüjale paaʼin tü kasa anasü eejeetkat sünainjee, mapüleejeerü pümüin punouteʼerüin tü alatakat pümüin.

Nnojo paapajüin jee pünajüin maʼin noticia.
Jülüja paaʼin piamasü jee apünüinsü kasa paapüinjatka aaʼujee analuʼut nümüin Maleiwa soʼukaiwai.
Püshaja süchiki tü paaʼinrüinjatkat soʼukaiwai. Paaʼinra tü aʼyatawaa eekai kapüleein shiʼipaʼaya, nnojo paaʼinrüin shia uatuoʼuishi. Paaʼinrüle tia, piʼreerü tü kasa anasü puuntakat sünainjee.

PUCHUNTA KAALINWAA

Tü sümakat tü Bibliakat: «Chi akatalaakai nümüiwaʼa [...], niyoutuin tü kekiwaakat» (Proverbios 18:1). Nnojoishi süpüla niyuʼlaain nümüiwaʼa wanee wayuu suluʼujee ishi, choʼujaashi nükaalinjünüin süpüla niyuʼlaainjachin.

Puchunta kaalinwaa namüin püpüshi jee paʼaleewainyuu.
Nnojo motuin paaʼin eein süpüla pükaalinjain na waneinnua. Paaʼinrüle tia, nnojoleerü shapaain maʼin paaʼin sutuma tü kasa alatakat pümüin.
Jülüjale paaʼin nnojoleerüin sunoutaain tü kasa alatakat pümüin jee oʼuteere paaʼin, anashii piʼrajeʼerüle nümaʼanamüin wanee tottoot. Eesüjaʼa müle paaʼin sutuma ayuulin pia. Wainma wayuu anakana sutuma neʼrajeʼerüin.a

a Nnojotsü süküjain tü rewiisütakat ¡Eeja Waaʼin! süchiki wanee tratamiento anaka püpüla.

Aʼatapajüshii waya kasa anasü sünainjee tü sümakat tü Bibliakat

Anuu nünüiki wanee wayuu ashajakai Salmo nümüin Maleiwa: «Tü pünüikikat müsü aka saaʼin wanee anakia süpüleerua tooʼui otta müsü aka saaʼin wanee luusa suluʼu tü tapünakat» (Salmo 119:105). ¿Kasa nüküjeeka achiki sükajee tia?

Sükajee wanee ranpara weʼrüin eepünaainjanale waya saʼakapünaa piʼyuushi. Müsia neʼe tü Bibliakat, süküjain wamüin tü waaʼinrajatkat süpüla waneeküin wanee kasa.

Wanaküle tü wopu woʼunakalü aluʼupünaa, weʼreerü tü kasa eekat wapüleerua. Müsia neʼe tü Bibliakat, süküjain tü kasa anasü alateetkat mapeena.

Nnojotsü neʼe süküjain tü Bibliakat süchiki jamakuwaʼipaliin waya, süküjainña süchiki tü kasa anasü eejeetkat mapeena. Anuu waneirua kasa süküjaka:

¿Jamüsü müliaka wayuu?

Anuu tü sümakat tü Bibliakat: «Kaainjalashii napüshuaʼa na wayuukana nünainjee waneeshia neʼe wayuu, outuinnaka naya suluʼujee tia. Aʼwalakajaasü tü outaakat naʼakapünaa napüshuaʼa na wayuukana, jama kaainjalain naya» (Roma 5:12).

¿Jamüsüche nnojotka sunouteʼennüin?

¿Jamüsü nnojotka sunouteʼerüin wayuu tü müliaakat? Müsü tü Bibliakat: «Nnojoireejaʼa niainjachin oʼunirüin [chi wayuukai] nukuwaʼipa nümüiwaʼa» (Jeremías 10:23). Watüjaa aaʼu tia sünainjee tü weʼrakalü alatüin maaʼulu.

¿Kaseerü alataka mapeena?

¿Kaseerü naaʼinraka Maleiwa süpüla nunouteʼerüin tü kasa mojusükat? Anuu tü sümakat tü Bibliakat: «Meerü nülaʼajaakai saaʼin Maleiwa naʼwüira naya wayuukana, nnojoleerü outaa, nnojoleerü mojuu aaʼin, nnojoleerü aʼyalajaa jee nnojoleerü saalin wanee kasa» (Apocalipsis 21:4).