Nüküjain Maleiwa sunoutaajeerüin tü Mmakat

Shia tü naküjakalü achiki waneinnua científico natüjaapa saaʼu tü saaʼinrakat tü Mmakat sutuma meʼitüin juya. Punoujalejeʼeya nünain Maleiwa, piyaawateerü aaʼu sükajee tü namakat nukumalain Maleiwa tü Mmakat süpüla sunoutaainjatüin sümüiwaʼa.

Mayaainjeʼe müin sukumajia tü Mmakat, wainma maʼin tü kasa naaʼinrakat na wayuukana süpüla namojujain shia. Müsüjeseʼe kapüleein sümüin tü Mmakat sunoutaain sümüiwaʼa. ¿Jamüsü watüjaaka saaʼu nunouteʼereerüin shia Maleiwa?

Paashajeʼera tü wetsiikulo ashajünakat suluʼu tü pütchi süttakat süpüla pütüjaain saaʼu sunoutaajeerüin tü Mmakat jee aneerüin maʼin shia mapeena.

• Nukumala Maleiwa tü Mmakat. «Paala sümaiwa, nuʼttaiwaʼaya Maleiwakai sünain akumajaa kasa süpüshua chaa iipünaa ooʼulaka yaa mmoluʼu» (Génesis 1:1).

• Nia kakoroloko Maleiwa tü Mmakat. «Nia Jehováa kakumalaka tü mmakat [otta] tü eekat suluʼu» (Salmo 24:1).

• Nukumala Maleiwa tü Mmakat süpüla sunoutaain sümüiwaʼa. «Nia kakumalaka tü mmakat [...,] eeinjatü shia süpüla kaʼikat süpüshuaʼa» (Salmo 104:5).

• Nüküjain Maleiwa kateerüin soʼu kasa süpüshuaʼa saaʼu tü Mmakat waneepia. «Chi Maleiwa shiimainshikai, chi kakumalakai tü mmakat [...], nnojotsü nukumajaʼalüin neʼe shia, nukumajüin süpüla kepiainjatüin wayuu suluʼu» (Isaías 45:18).

• Nüküjain Maleiwa kateerüin soʼu wayuu süpüla kaʼikat süpüshuaʼa suluʼu tü Mmakat. «Nayeena kepiaka suluʼu tü mmakat süpüla kaʼikat süpüshuaʼa na lotokana akuwaʼipa» (Salmo 37:29).

Nukumajüin Maleiwa tü Mmakat süpüla talatüinjatüin naaʼin na wayuukana suluʼu sümaa nnojoluinjatüin jamajüin shia natuma. Süküjain tü Bibliakat najaʼttireerüin Jehová, chi Maleiwakai, na wayuu amojujakana tü Mmakat (Apocalipsis 11:18).

Süküjain tü Bibliakat paʼaraiiseerüin tü Mmakat nutuma Maleiwa sümaa aneerüin maʼin shia nutuma. Otta müsia, naapeerü süpüshuaʼa tü kasa suchuntaakat saaʼin wayuu (Salmo 145:16).