TÜ WAAʼINRAJATKAT KOJUTUJAALE TÜ KASAKALÜIRUA

Talata waaʼin sümaa tü kasa eekat wamaʼana

Talatüle naaʼin wanee wayuu sümaa tü kasa eekat nümaʼana niisatteerü nünneetse, jama nnojoluin kachiiruain naaʼin wainmeein kasa nümaʼana.

¿JAMÜSÜ CHOʼUJAAKAʼA WAAʼINRÜIN TIA?

Saashin wanee wayuu psicóloga, Jessica Koehler sünülia talatüle naaʼin wanee wayuu sümaa tü kasa eekat nümaʼana jülüjasü naaʼin kasa anasü waneepia otta nnojotsü achunjain naaʼin saaʼu tü kasa eekat namaʼana na waneinnua. Müsüjeseʼe nnojoluin shapaain maʼin naaʼin jee talatüsü naaʼin waneepia. Naya talatakana maʼin aaʼin na wayuu nnojoliikana wainmain kasa namaʼana süka shiain naaʼinmaain maʼin nalatirüin kaʼi sümaa napüshi jee namaa naʼaleewainyuu suulialeʼeya kachiiruain naaʼin tü nneetkat.

«Anakajaʼa talatüle waaʼin saaʼu eein wamaʼana tü weküinjatkat jee tü washeʼinjatkat» (1 Timoteo 6:8).

TÜ EEKAT SÜPÜLA PAAʼINRÜIN

Nnojo piyoujireʼerüin pukuwaʼipa namaa na waneinnua. Jülüjale paaʼin wainmain kasa namaʼana na waneinnua puulia, eesü süpüla mojuin paaʼin jee suchunjain paaʼin. Nnojotpejeʼe watüjaain saaʼu analejeʼe maʼin nakuwaʼipa eesüjaʼa wainmale nojuyaala. Anuu sünüiki wanee wayuu Nicole sünülia, chejeʼewat shia Senegal: «Nnojotsü choʼujaain wainmainjatüin kasa tamaʼana süpüla talatüinjatüin taaʼin. Müsüjeseʼe nnojoluin tayoujijeʼerüin takuwaʼipa namaa na waneinnua süka talatüin taaʼin sümaa tü kasa eekat tamaʼana».

Puuʼulaka paaʼinrüin tüü: Nnojo pünajüin suluʼu internet video jee shiyaakua tü kasa namaʼanaka na wayuu washinnuukana süka suchuntaajeerüin paaʼin pümaʼanain tia.

«Jalia jia suulia suchuntaain jaaʼin wainma kasa, süka nnojoluin shiain katüin atuma noʼu wanee wayuu tü kasa eekat nümaʼana, jaʼitasü wainmain shia» (Lucas 12:15).

Kojuta wamüin tü kasa eekat wamaʼana. Kojutule wamüin tü kasa eekat wamaʼana talateerü waaʼin sümaa jee nnojoleerü jülüjain waaʼin saapünüinjatüin wamüin kasa jee choʼujaain wamaʼanainjatüin wainmain kasa. Anuu nünüiki wanee wayuu, Roberton nünülia, chejeʼewai nia Haití: «Jülüjawaisü taaʼin tü kasa naaʼinrakat na waneinnua tapüleerua jee napüleerua tapüshi. Taapa tamüsia analuʼutka namüin saaʼujee tü naaʼinrakat. ‹Paapüinjatü analuʼutka saapünüle pümüin wanee kasa›, tamüshi chi tachon mekiisatkai ouyase».

Puuʼulaka paaʼinrüin tüü: Anasü püshajawaire suluʼu karaloʼuta tü paapüinjatkalü aaʼujee analuʼut maʼaka saaʼin nnojoluin ayuulin pia, paaʼinwain pia namaa na püpüshikana, na paʼaleewainyuukana jaʼitakajeʼe saaʼujee piʼrüin wüittuulin maʼin tü mmapaʼakat.

«Chi talatakai aaʼin, eesü ekawaa nümaʼana waneepia» (Proverbios 15:15).

Eesüjaʼa nnojorüle talatüin waaʼin sümaa tü kasa eekat wamaʼana. Wayaawatüle saaʼu nnojoluin choʼujaain wainmain kasa wamaʼana talateerü waaʼin. Anaʼleesia tia suulia kanneetsein waya.